ಶೆಟ್ಟಿ ವೈಯಕ್ತಿಕ ಖಾತೆಗಳಿಗೆ ಹರಿದು ಬಂದಿತ್ತು 2.6 ಬಿಲಿಯನ್ ದಿರ್ಹಮ್..!
NMC ಕಂಪೆನಿಯ ಖಾತೆಗಳಿಂದ ಬಿ.ಆರ್. ಶೆಟ್ಟಿ ಅವರ ವೈಯಕ್ತಿಕ ಬ್ಯಾಂಕ್ ಖಾತೆಗಳಿಗೆ ಒಟ್ಟು 4.183 ಬಿಲಿಯನ್ ದಿರ್ಹಮ್ ವರ್ಗಾವಣೆಯಾಗಿರುವುದಕ್ಕೆ ಲೆಕ್ಕಪತ್ರ ದಾಖಲೆಗಳು ಸಾಕ್ಷಿಯಾಗಿವೆ ಎಂದು ನ್ಯಾಯಾಲಯ ತಿಳಿಸಿದೆ.

ಈ ಸಂಬಂಧ 500ಕ್ಕೂ ಹೆಚ್ಚು ಹಣ ವರ್ಗಾವಣೆಗಳ ವಿವರಗಳನ್ನು ಹಕ್ಕುದಾರರು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು. ಇವುಗಳಲ್ಲಿ ಬಹುತೇಕ ವರ್ಗಾವಣೆಗಳು ಬ್ಯಾಂಕ್ ಆಫ್ ಬರೋಡಾದಲ್ಲಿದ್ದ NMC ಗ್ರೂಪ್ ಖಾತೆಗಳಿಂದ ಶೆಟ್ಟಿ ಅವರ ಮೂರು ವೈಯಕ್ತಿಕ ಖಾತೆಗಳಿಗೆ ನಡೆದಿದ್ದವು.

ವರ್ಗಾವಣೆಯಾದ ಹಣದ ಒಂದು ಭಾಗವನ್ನು ಮತ್ತೆ NMCಗೆ ಹಿಂದಿರುಗಿಸಲಾಗಿತ್ತು. ಇದನ್ನು ಕಡಿತಗೊಳಿಸಿದ ಬಳಿಕ ಶೆಟ್ಟಿ ಅವರ ಖಾತೆಗಳಿಗೆ ವರ್ಗಾವಣೆಯಾಗಿದ್ದ ನಿವ್ವಳ ಮೊತ್ತ 2.6 ಬಿಲಿಯನ್ ದಿರ್ಹಮ್ ಎಂದು ನ್ಯಾಯಾಲಯ ಗುರುತಿಸಿದೆ.

ಕಂಪೆನಿಯ ಹಣವನ್ನು ಬಳಸಿಕೊಂಡು ಶೆಟ್ಟಿ ವೈಯಕ್ತಿಕ ಆಸ್ತಿಗಳು ಮತ್ತು ಹೂಡಿಕೆಗಳನ್ನು ಮಾಡಿದ್ದರು ಎಂಬುದನ್ನೂ ನ್ಯಾಯಾಲಯ ಉಲ್ಲೇಖಿಸಿದೆ. ಟ್ರಾವೆಲೆಕ್ಸ್‌ನಲ್ಲಿನ ಹೂಡಿಕೆ, ಖಾಸಗಿ ವಿಮಾನದಲ್ಲಿನ ಪಾಲು, ದುಬೈ ಹಿಲ್ಸ್‌ನಲ್ಲಿನ ಆಸ್ತಿಗಳು ಹಾಗೂ ಅಮೆರಿಕದ ವೋಮಿಂಗ್‌ನಲ್ಲಿನ ತೈಲ ಹೂಡಿಕೆಗಳು ಇದರಲ್ಲಿ ಸೇರಿವೆ.

2014ರ ಜುಲೈನಲ್ಲಿ ಶೆಟ್ಟಿ ಮತ್ತು ಪುತನ್ ಎನ್.ಸಿ. ಮೆನನ್ ಅವರು ಗಲ್ಫ್‌ಸ್ಟ್ರೀಮ್ G450 ಮಾದರಿಯ ಖಾಸಗಿ ವಿಮಾನವನ್ನು ಸಮಾನ ಪಾಲುದಾರಿಕೆಯ ಒಪ್ಪಂದದಡಿ ಖರೀದಿಸಿದ್ದರು. ಇತರ ಸ್ವಾಧೀನಗಳಿಗೂ NNMC ಸಂಸ್ಥೆಯನ್ನು ಬಳಸಲಾಗಿತ್ತು. ಈ ಸಂಸ್ಥೆಯಲ್ಲಿ ಶೆಟ್ಟಿ ಏಕೈಕ ಷೇರುದಾರರಾಗಿದ್ದರೆ, ಶೆಟ್ಟಿ ಮತ್ತು ಮಂಗಾಟ್ ನಿರ್ದೇಶಕರಾಗಿದ್ದರು.

3.888 ಬಿಲಿಯನ್ ಡಾಲರ್ ಸಾಲ ಮರೆಮಾಚಿದ್ದ NMC..!
NMCಯ ಹಣಕಾಸು ಅಕ್ರಮಗಳ ಮತ್ತೊಂದು ಪ್ರಮುಖ ಅಂಶವೆಂದರೆ ಕಂಪೆನಿಯ ನೈಜ ಸಾಲದ ವಿವರಗಳನ್ನು ಮರೆಮಾಚಿರುವುದು. 2018ರ ಡಿಸೆಂಬರ್ 31ರ ವೇಳೆಗೆ ಕಂಪೆನಿ ಬಹಿರಂಗಪಡಿಸದೆ ಉಳಿಸಿದ್ದ ಸಾಲದ ಮೊತ್ತ ಬರೋಬ್ಬರಿ 3.888 ಬಿಲಿಯನ್ ಡಾಲರ್ ಆಗಿತ್ತು. ಇದೇ ಅವಧಿಯಲ್ಲಿ ಅಧಿಕೃತವಾಗಿ ವರದಿ ಮಾಡಿದ್ದ ಸಾಲದ ಮೊತ್ತ ಕೇವಲ 1.993 ಬಿಲಿಯನ್ ಡಾಲರ್ ಆಗಿತ್ತು.

2012ರಿಂದ 2019ರ ಜೂನ್ 30ರವರೆಗಿನ ಅವಧಿಯಲ್ಲಿ ಕಂಪೆನಿಯ ಒಟ್ಟು ಸಾಲ ಹಾಗೂ ಬಹಿರಂಗಪಡಿಸದ ಸಾಲದ ಪ್ರಮಾಣ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗಿತ್ತು ಎಂದು ನ್ಯಾಯಾಲಯ ಕಂಡುಕೊಂಡಿದೆ.

ಆಂತರಿಕ ಲೆಕ್ಕಪತ್ರಗಳಲ್ಲಿ ನೈಜ ಸಾಲದ ವಿವರಗಳನ್ನು ದಾಖಲಿಸಲಾಗಿದ್ದರೂ, ದಾಖಲೆಗಳನ್ನು ತಿರುಚುವ ಮೂಲಕ ಲೆಕ್ಕಪರಿಶೋಧನಾ ಸಂಸ್ಥೆ ಅರ್ನ್ಸ್ಟ್ ಆ್ಯಂಡ್ ಯಂಗ್ (EY)ಗೂ ಈ ಮಾಹಿತಿ ತಿಳಿಯದಂತೆ ಮಾಡಲಾಗಿತ್ತು.

ನೈಜವಾಗಿ ಯಾವುದೇ ಸರಕು ಅಥವಾ ಸೇವೆಗಳನ್ನು ಪೂರೈಸದ ಸಂಸ್ಥೆಗಳ ಹೆಸರಿನಲ್ಲಿ ನಕಲಿ ವಹಿವಾಟುಗಳನ್ನು ಸೃಷ್ಟಿಸಿ ಹಣಕಾಸು ಪಡೆಯುವ ವ್ಯವಸ್ಥೆಯನ್ನೂ ಬಳಸಲಾಗಿತ್ತು. ಕಂಪೆನಿಯ ಲೆಕ್ಕಪತ್ರ ವ್ಯವಸ್ಥೆಗಳನ್ನು ನವೀಕರಿಸಿದ ಸಂದರ್ಭದಲ್ಲಿಯೂ ಎರಡು ಪ್ರತ್ಯೇಕ ಲೆಕ್ಕಪತ್ರಗಳನ್ನು ನಿರ್ವಹಿಸುವ ಮೂಲಕ ವಂಚನೆಯನ್ನು ಮುಂದುವರಿಸಲಾಗಿತ್ತು ಎಂದು ನ್ಯಾಯಾಲಯ ತಿಳಿಸಿದೆ.

ಶೆಟ್ಟಿ, ಮಂಗಾಟ್ ಪರಸ್ಪರ ಆರೋಪ; ಇಬ್ಬರ ವಾದ ತಿರಸ್ಕರಿಸಿದ ಕೋರ್ಟ್
ವಂಚನೆಯ ಬಗ್ಗೆ ತನಗೆ ಯಾವುದೇ ಮಾಹಿತಿ ಇರಲಿಲ್ಲ. ಮಂಗಾಟ್ ಸೇರಿದಂತೆ ಇತರ ಹಿರಿಯ ಅಧಿಕಾರಿಗಳ ದುಷ್ಕೃತ್ಯಕ್ಕೆ ತಾನೇ ಬಲಿಯಾಗಿದ್ದೆ ಎಂದು ಬಿ.ಆರ್. ಶೆಟ್ಟಿ ನ್ಯಾಯಾಲಯದಲ್ಲಿ ವಾದಿಸಿದ್ದರು.

ಇದಕ್ಕೆ ಪ್ರತಿಯಾಗಿ, ಶೆಟ್ಟಿ ತಮ್ಮ ವೈಯಕ್ತಿಕ ಲಾಭಕ್ಕಾಗಿ ವಂಚನೆ ನಡೆಸಿದ್ದರು ಎಂದು ಮಂಗಾಟ್ ಆರೋಪಿಸಿದ್ದರು. ಕಂಪೆನಿಯ ಹಣಕಾಸು ವ್ಯವಹಾರಗಳ ಮೇಲೆ ತನಗೆ ಯಾವುದೇ ನಿಯಂತ್ರಣವಿರಲಿಲ್ಲ ಮತ್ತು ಪ್ರಮುಖ ಷೇರುದಾರರ ಅಧೀನದಲ್ಲಿ ತಾನು ಕೆಲಸ ಮಾಡುತ್ತಿದ್ದೆ ಎಂದೂ ವಾದಿಸಿದ್ದರು.

ಆದರೆ, ಇಬ್ಬರ ವಾದಗಳನ್ನೂ ನ್ಯಾಯಾಲಯ ತಿರಸ್ಕರಿಸಿದೆ. ಇಬ್ಬರೂ ವಂಚನೆಯಲ್ಲಿ ಅಪ್ರಾಮಾಣಿಕವಾಗಿ ಭಾಗಿಯಾಗಿದ್ದರು ಎಂದು ತೀರ್ಮಾನಿಸಿದೆ.

ಕಂಪೆನಿಯ CEO ಆಗಿದ್ದ ಮಂಗಾಟ್ ಅವರು ಹಣಕಾಸು ವ್ಯವಹಾರಗಳ ಮೇಲೆ ತನಗೆ ನಿಯಂತ್ರಣವಿರಲಿಲ್ಲ ಎಂದು ಹೇಳಿರುವುದನ್ನು ನ್ಯಾಯಮೂರ್ತಿ ಸ್ಮಿತ್ ಪ್ರಶ್ನಿಸಿದ್ದಾರೆ. FTSE 100 ಕಂಪೆನಿಯ CEO ಆಗಿದ್ದ ವ್ಯಕ್ತಿಯೊಬ್ಬರು ಇಂತಹ ವಾದ ಮಂಡಿಸುವುದು ಅಸಂಭವನೀಯವಾಗಿದ್ದು, ಅದು ಲಭ್ಯವಿರುವ ಸಾಕ್ಷ್ಯಗಳಿಗೆ ವಿರುದ್ಧವಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

NMCಯ ಪ್ರಮುಖ ನಿರ್ಧಾರಗಳನ್ನು ಮಂಗಾಟ್ ಅವರೇ ತೆಗೆದುಕೊಳ್ಳುತ್ತಿದ್ದರು. ಕಂಪೆನಿಯ ಹಣಕಾಸು ಮತ್ತು ಖಜಾನೆ ವ್ಯವಹಾರಗಳ ನಿರ್ವಹಣೆಯೂ ಅವರ ಜವಾಬ್ದಾರಿಯಾಗಿತ್ತು ಎಂದು ನ್ಯಾಯಾಲಯ ಹೇಳಿದೆ.

ಕಂಪೆನಿಯ ಹಣವನ್ನು ಅಕ್ರಮವಾಗಿ ವರ್ಗಾಯಿಸಲು ಶೆಟ್ಟಿ ಮತ್ತು ಇತರರಿಗೆ ನೆರವಾಗಿದ್ದಲ್ಲದೆ, EYಯಿಂದ ಸಾಲದ ವಿವರಗಳನ್ನು ಮರೆಮಾಚುವ ಪ್ರಕ್ರಿಯೆಯಲ್ಲಿಯೂ ಮಂಗಾಟ್ ಪ್ರಮುಖ ಪಾತ್ರ ವಹಿಸಿದ್ದರು ಎಂದು ನ್ಯಾಯಾಧೀಶರು ತಿಳಿಸಿದ್ದಾರೆ.

ಮಂಗಾಟ್ ವಿರುದ್ಧ ADCBಗೆ 1.022 ಬಿಲಿಯನ್ ಡಾಲರ್ ವಸೂಲಿಗೆ ಅವಕಾಶ
ಮಂಗಾಟ್ ವಿರುದ್ಧ ಅಬುಧಾಬಿ ಕಮರ್ಷಿಯಲ್ ಬ್ಯಾಂಕ್ (ADCB) ದಾಖಲಿಸಿದ್ದ ಪ್ರತ್ಯೇಕ ಪ್ರಕರಣದಲ್ಲಿಯೂ ನ್ಯಾಯಾಲಯ ಬ್ಯಾಂಕ್ ಪರವಾಗಿ ತೀರ್ಪು ನೀಡಿದೆ.

ಮಂಗಾಟ್ ಅವರಿಂದ ಸುಮಾರು 1.022 ಬಿಲಿಯನ್ ಡಾಲರ್ ಬಾಕಿ ಹೊಣೆಗಾರಿಕೆ ಹಾಗೂ 168.989 ಮಿಲಿಯನ್ ಡಾಲರ್ ನಷ್ಟವಾದ ಲಾಭವನ್ನು ವಸೂಲಿ ಮಾಡಲು ಬ್ಯಾಂಕ್ ಅರ್ಹವಾಗಿದೆ ಎಂದು ನ್ಯಾಯಾಲಯ ತಿಳಿಸಿದೆ.

ಆದರೆ, ಮಂಗಾಟ್ ಸಮರ್ಥಿಸಿಕೊಳ್ಳಬಹುದಾದ ಹೊಂದಾಣಿಕೆಗಳಿಗೆ ಅವಕಾಶವಿದ್ದು, ಬ್ಯಾಂಕ್ ಈಗಾಗಲೇ ವಸೂಲಿ ಮಾಡಿರುವ ಮೊತ್ತವನ್ನು ಒಟ್ಟು ಬಾಕಿಯಿಂದ ಕಡಿತಗೊಳಿಸಬೇಕಾಗಿದೆ.

ಬ್ಯಾಂಕ್ ಆಫ್ ಬರೋಡಾ ಪ್ರಕರಣ ಇತ್ಯರ್ಥ
NMC ಆಡಳಿತಾಧಿಕಾರಿಗಳು ದಾಖಲಿಸಿದ್ದ ಪ್ರಕರಣದಲ್ಲಿ ಬ್ಯಾಂಕ್ ಆಫ್ ಬರೋಡಾ ಕೂಡ ಆರಂಭದಲ್ಲಿ ಪ್ರತಿವಾದಿಯಾಗಿತ್ತು. ಆದರೆ, ವಿಚಾರಣೆಯ ಅಂತಿಮ ಹಂತದಲ್ಲಿ ಬ್ಯಾಂಕ್ ಹಕ್ಕುದಾರರೊಂದಿಗೆ ಒಪ್ಪಂದ ಮಾಡಿಕೊಂಡು ಪ್ರಕರಣವನ್ನು ಇತ್ಯರ್ಥಪಡಿಸಿಕೊಂಡಿತ್ತು. ಹೀಗಾಗಿ ಬ್ಯಾಂಕ್ ವಿರುದ್ಧದ ದೂರುಗಳನ್ನು ಹಕ್ಕುದಾರರು ಹಿಂಪಡೆದಿದ್ದಾರೆ ಎಂದು ತೀರ್ಪಿನಲ್ಲಿ ಉಲ್ಲೇಖಿಸಲಾಗಿದೆ.

NMCಯ ನೈಜ ಹಣಕಾಸಿನ ಸ್ಥಿತಿಯನ್ನು ಮರೆಮಾಚುವ ಬದಲಾಗಿ ಕಂಪೆನಿಯ ಹೊಣೆಗಾರಿಕೆಗಳನ್ನು ಮರುಪಾವತಿಸಲು ಶೆಟ್ಟಿ ಮತ್ತು ಬ್ಯಾಂಕ್ ಆಫ್ ಬರೋಡಾದ ಆಗಿನ ವ್ಯವಸ್ಥಾಪಕ ನಿರ್ದೇಶಕ ಪಿ.ಎಸ್. ಜಯಕುಮಾರ್ ಒಪ್ಪಿಕೊಂಡಿದ್ದರೇ ಎಂಬುದರ ಕುರಿತು ತೀರ್ಮಾನಿಸಲು ನ್ಯಾಯಾಧೀಶರು ನಿರಾಕರಿಸಿದ್ದಾರೆ.

1975ರಲ್ಲಿ ಆರಂಭವಾಗಿತ್ತು NMC ಸಂಸ್ಥೆ
ಬಿ.ಆರ್. ಶೆಟ್ಟಿ ಅವರು 1975ರಲ್ಲಿ ಅಬುಧಾಬಿಯಲ್ಲಿ ಆರೋಗ್ಯ ಕೇಂದ್ರವೊಂದನ್ನು ಸ್ಥಾಪಿಸುವ ಮೂಲಕ NMC ಸಂಸ್ಥೆಗೆ ಚಾಲನೆ ನೀಡಿದ್ದರು. ನಂತರ ಅದು ದೊಡ್ಡ ಆರೋಗ್ಯ ಸೇವಾ ಸಂಸ್ಥೆಯಾಗಿ ಬೆಳೆದಿತ್ತು. 2012ರಲ್ಲಿ ಕಂಪೆನಿಯ ಮಾತೃಸಂಸ್ಥೆ ಲಂಡನ್ ಷೇರು ಮಾರುಕಟ್ಟೆಯಲ್ಲಿ ನೋಂದಣಿಯಾಗಿತ್ತು.

ಆದರೆ, ಹಣಕಾಸಿನ ಅಕ್ರಮಗಳು ಬಹಿರಂಗವಾದ ಹಿನ್ನೆಲೆಯಲ್ಲಿ 2020ರ ಏಪ್ರಿಲ್ 9ರಂದು ಇಂಗ್ಲೆಂಡ್‌ನ ಹೈಕೋರ್ಟ್ ಆದೇಶದ ಮೇರೆಗೆ ಕಂಪೆನಿ ಆಡಳಿತಾಧಿಕಾರಿಗಳ ನಿಯಂತ್ರಣಕ್ಕೆ ಒಳಪಟ್ಟಿತ್ತು. ಅದೇ ವರ್ಷದ ಸೆಪ್ಟೆಂಬರ್‌ನಲ್ಲಿ NMC ಹೆಲ್ತ್‌ಕೇರ್, NMC ಹೋಲ್ಡಿಂಗ್ ಮತ್ತು ಸಮೂಹದ 34 ಕಂಪೆನಿಗಳು ADGM ಆಡಳಿತ ಪ್ರಕ್ರಿಯೆಗೆ ಒಳಪಟ್ಟಿದ್ದವು.

ಅಂತಿಮ ಹೊಣೆಗಾರಿಕೆ ಮೊತ್ತಕ್ಕೆ ಇನ್ನೂ ಕಾಯಬೇಕು
2012ರ ಏಪ್ರಿಲ್ 30ರಿಂದ 2020ರ ಏಪ್ರಿಲ್ 9ರವರೆಗಿನ ಅವಧಿಯಲ್ಲಿ ಶೆಟ್ಟಿ ಮತ್ತು ಮಂಗಾಟ್ ಇಬ್ಬರೂ ವಂಚನೆಯ ವ್ಯವಹಾರಗಳಲ್ಲಿ ಉದ್ದೇಶಪೂರ್ವಕವಾಗಿ ಭಾಗಿಯಾಗಿದ್ದರು ಎಂದು ನ್ಯಾಯಾಲಯ ತೀರ್ಮಾನಿಸಿದೆ.

ಆದರೆ, 5.397 ಬಿಲಿಯನ್ ಡಾಲರ್ ಮೊತ್ತವು ಹಣಕಾಸಿನ ಹೊಣೆಗಾರಿಕೆ ನಿರ್ಧರಿಸುವ ಆರಂಭಿಕ ಆಧಾರ ಮಾತ್ರವಾಗಿದೆ. ಇಬ್ಬರೂ ಪ್ರತ್ಯೇಕವಾಗಿ ಪಾವತಿಸಬೇಕಾದ ಅಂತಿಮ ಮೊತ್ತವನ್ನು ಮುಂದಿನ ವಿಚಾರಣೆಯಲ್ಲಿ ನಿರ್ಧರಿಸಲಾಗುತ್ತದೆ.

ಇದರೊಂದಿಗೆ ಶಾಸನಬದ್ಧ ಬಡ್ಡಿ, ನ್ಯಾಯಾಲಯದ ವೆಚ್ಚಗಳು ಹಾಗೂ ಇತರ ಬಾಕಿ ವಿಷಯಗಳನ್ನೂ ಪರಿಶೀಲಿಸಲಾಗುತ್ತದೆ. ಒಂದೇ ನಷ್ಟಕ್ಕೆ ನಾಗರಿಕ ಮತ್ತು ದಿವಾಳಿತನಕ್ಕೆ ಸಂಬಂಧಿಸಿದ ಪ್ರತ್ಯೇಕ ಪ್ರಕರಣಗಳ ಮೂಲಕ ಎರಡು ಬಾರಿ ಹಣ ವಸೂಲಿ ಆಗದಂತೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳುವ ನಿಬಂಧನೆಯನ್ನೂ ತೀರ್ಪು ಒಳಗೊಂಡಿದೆ.