ಸಿನಿಮಾ ಉದ್ಯಮದ ಬಾಕ್ಸ್ ಆಫೀಸ್ ಅಂಕಿಅಂಶಗಳನ್ನು ಪ್ರಕಟಿಸುವ ಸ್ಯಾಕ್‌ನಿಲ್ಕ್ (Sacnilk) ವೆಬ್‌ಸೈಟ್ ಪ್ರಕಾರ, ‘ರಾಮಾಯಣ’ ಸಿನಿಮಾ ಬಿಡುಗಡೆಯಾದ ನಾಲ್ಕನೇ ದಿನದ ಅಂತ್ಯಕ್ಕೆ ಭಾರತದಲ್ಲಿ 238.85 ಕೋಟಿ ರೂ. ನಿವ್ವಳ ಗಳಿಕೆ ಮಾಡಿದೆ.

ಈ ಮೂಲಕ ಪ್ರಭಾಸ್ ಅಭಿನಯದ ‘ಆದಿಪುರುಷ್’ ಚಿತ್ರದ ಮೊದಲ ನಾಲ್ಕು ದಿನಗಳ 237 ಕೋಟಿ ರೂ. ನಿವ್ವಳ ಗಳಿಕೆಯ ದಾಖಲೆಯನ್ನು ಹಿಂದಿಕ್ಕಿದೆ.

ಚಿತ್ರದ ದೇಶೀಯ ಒಟ್ಟು ಗಳಿಕೆ 285.20 ಕೋಟಿ ರೂ. ತಲುಪಿದ್ದರೆ, ವಿದೇಶಿ ಮಾರುಕಟ್ಟೆಯಿಂದ 214 ಕೋಟಿ ರೂ. ಸಂಗ್ರಹವಾಗಿದೆ. ಇದರಿಂದ ಚಿತ್ರದ ಜಾಗತಿಕ ಒಟ್ಟು ಗಳಿಕೆ 499.20 ಕೋಟಿ ರೂ. ತಲುಪಿದೆ ಎಂದು ವರದಿಯಾಗಿದೆ.

ದೀಪಾವಳಿ ದಿನದ ಗಳಿಕೆಯಲ್ಲಿ ಹೊಸ ದಾಖಲೆ

ಭಾನುವಾರ ರಾತ್ರಿ 9 ಗಂಟೆಯ ವೇಳೆಗೆ ‘ರಾಮಾಯಣ’ ಚಿತ್ರವು ದೀಪಾವಳಿ ದಿನದ ಹಿಂದಿನ ಬಾಕ್ಸ್ ಆಫೀಸ್ ದಾಖಲೆಗಳನ್ನು ಹಿಂದಿಕ್ಕಿದೆ. ಈ ಹಿಂದೆ ಸಲ್ಮಾನ್ ಖಾನ್ ಅಭಿನಯದ ‘ಟೈಗರ್ 3’ ಸಿನಿಮಾ 2023ರ ದೀಪಾವಳಿಯಂದು 44.50 ಕೋಟಿ ರೂ. ನಿವ್ವಳ ಗಳಿಕೆ ಮಾಡಿ ದಾಖಲೆ ನಿರ್ಮಿಸಿತ್ತು. 2024ರಲ್ಲಿ ಬಿಡುಗಡೆಯಾದ ರೋಹಿತ್ ಶೆಟ್ಟಿ ನಿರ್ದೇಶನದ ‘ಸಿಂಗಂ ಎಗೇನ್’ 43.50 ಕೋಟಿ ರೂ. ಗಳಿಕೆಯೊಂದಿಗೆ ನಂತರದ ಸ್ಥಾನದಲ್ಲಿತ್ತು. ಕಳೆದ ವರ್ಷದ ದೀಪಾವಳಿಗೆ ಬಿಡುಗಡೆಯಾದ ಆಯುಷ್ಮಾನ್ ಖುರಾನಾ ಅಭಿನಯದ ‘ಥಾಮಾ’ 24 ಕೋಟಿ ರೂ. ಗಳಿಸಿತ್ತು.

ಕನ್ನಡ ಆವೃತ್ತಿಯಿಂದಲೂ ಭರ್ಜರಿ ಕೊಡುಗೆ!

ಭಾನುವಾರ ದೇಶಾದ್ಯಂತ 21,770 ಪ್ರದರ್ಶನಗಳ ಮೂಲಕ ಚಿತ್ರ 56.15 ಕೋಟಿ ರೂ. ಗಳಿಕೆ ಮಾಡಿದೆ. ಈ ಅವಧಿಯಲ್ಲಿ ಸುಮಾರು 23.53 ಲಕ್ಷ ಟಿಕೆಟ್‌ಗಳು ಮಾರಾಟವಾಗಿವೆ.

ಭಾಷಾವಾರು ಗಳಿಕೆಯ ವಿವರ ಹೀಗಿದೆ:

• ಹಿಂದಿ: 36.75 ಕೋಟಿ ರೂ.
• ಕನ್ನಡ: 7.25 ಕೋಟಿ ರೂ.
• ತೆಲುಗು: 6.25 ಕೋಟಿ ರೂ.
• ತಮಿಳು: 3.15 ಕೋಟಿ ರೂ.
• ಮಲಯಾಳಂ: 2.75 ಕೋಟಿ ರೂ.
• ಹಿಂದಿ ಆವೃತ್ತಿ ಚಿತ್ರದ ಗಳಿಕೆಯಲ್ಲಿ ಪ್ರಮುಖ ಪಾಲು ಹೊಂದಿದ್ದರೆ, ಕನ್ನಡ ಆವೃತ್ತಿಯೂ 7.25 ಕೋಟಿ ರೂ. ಗಳಿಸುವ ಮೂಲಕ ಗಮನ ಸೆಳೆದಿದೆ. ಕನ್ನಡಿಗರ ನೆಚ್ಚಿನ ನಟ ಯಶ್ ಅವರ ಉಪಸ್ಥಿತಿಯೂ ಚಿತ್ರದ ಮೇಲಿನ ಕುತೂಹಲಕ್ಕೆ ಪ್ರಮುಖ ಕಾರಣವಾಗಿದೆ.