ಅಲ್ಲಿಂದ ಸುಹಾಸ್ ಶೆಟ್ಟಿ ಮತ್ತು ಅವರ ಸ್ನೇಹಿತರು ಬಜಪೆ ಕಡೆಗೆ ತೆರಳಿದ್ದಾರೆ. ಇದರ ಬೆನ್ನಲ್ಲೇ, ಬಜಪೆ ಪೇಟೆಯ ಕಡೆಯಿಂದ ಅತಿ ವೇಗವಾಗಿ ಬಂದ ಪಿಕಪ್ ಟೆಂಪೋ ಕಾಲೇಜಿನ ಗೇಟ್ ಬಳಿ ತಿರುಗಿ, ಅದೇ ವೇಗದಲ್ಲಿ ಬಜಪೆ ಪೇಟೆಯ ಕಡೆಗೆ ಚಲಿಸಿದೆ.

ಸುಹಾಸ್ ಶೆಟ್ಟಿಯವರ ಕಾರನ್ನು ಹಿಂಬಾಲಿಸಿಕೊಂಡು ಹೋದ ಪಿಕಪ್ ಟೆಂಪೋ, ಅವರ ಕಾರನ್ನು ಓವರ್‌ಟೇಕ್ ಮಾಡಿ ಮುಂದೆ ಹೋಯಿತು. ನಂತರ, ಕಿನ್ನಿಪದವು ಪೆಟ್ರೋಲ್ ಬಂಕ್ ಪಕ್ಕದಲ್ಲಿರುವ ಮಣ್ಣಿನ ರಸ್ತೆಯ ಮೂಲಕ ಹಳೆ ವಿಮಾನ ನಿಲ್ದಾಣ ರಸ್ತೆಯಿಂದ ಬಜಪೆಗೆ ಬರುವ ರಾಜ್ಯ ಹೆದ್ದಾರಿ 67ಕ್ಕೆ ತಿರುವು ಪಡೆದು ಬಂದು, ಬಸ್ ನಿಲ್ದಾಣದ ಬಳಿ ಸುಹಾಸ್ ಶೆಟ್ಟಿಯವರ ಇನ್ನೋವಾ ಕಾರಿನ ಬಲಭಾಗಕ್ಕೆ ಡಿಕ್ಕಿ ಹೊಡೆದಿದೆ. ಈ ಡಿಕ್ಕಿಯ ರಭಸಕ್ಕೆ ಸುಹಾಸ್ ಅವರ ಕಾರು ಸಮೀಪದ ಸಲೂನ್ ಅಂಗಡಿಗೆ ನುಗ್ಗಿತು. ಪಿಕಪ್ ಟೆಂಪೋ ಹತ್ತಿರದ ಸೀಯಾಳದ ಅಂಗಡಿಗೆ ನುಗ್ಗಿ ನಿಂತಿತು.

ಈ ಸಂದರ್ಭದಲ್ಲಿ, ಇನ್ನೋವಾ ಕಾರಿನ ಹಿಂಬದಿಯಲ್ಲಿದ್ದ ಸ್ವಿಫ್ಟ್ ಕಾರಿನಲ್ಲಿದ್ದವರು ಮತ್ತು ಪಿಕಪ್ ವಾಹನದ ಚಾಲಕ ಸೇರಿ ಸುಹಾಸ್ ಅವರನ್ನು ಬೆನ್ನಟ್ಟಿ ತಲವಾರುಗಳಿಂದ ಮಾರಣಾಂತಿಕವಾಗಿ ಹಲ್ಲೆ ನಡೆಸಿದ್ದಾರೆ. ಮೊದಲು ಕಾರಿನಲ್ಲಿದ್ದ ಮತ್ತೊಬ್ಬ ವ್ಯಕ್ತಿಯ ಮೇಲೆ ಹಲ್ಲೆ ನಡೆಸಿದರೂ, ನಂತರ ಸುಹಾಸ್ ಅವರನ್ನೇ ಗುರಿಯಾಗಿಸಿ ಹಲ್ಲೆ ಮಾಡಲಾಗಿದೆ ಎಂದು ಹೇಳಲಾಗಿದೆ.

ಘಟನೆ ನಡೆದಾಗ ಸುಹಾಸ್ ಅವರು ಕಾವಿ ಬಣ್ಣದ ಲುಂಗಿ ಧರಿಸಿದ್ದರು. ಪಿಕಪ್ ಟೆಂಪೋ ಡಿಕ್ಕಿ ಹೊಡೆದಾಗ ಅಪಾಯವನ್ನು ಅರಿತು ಕಾರಿನಿಂದ ಇಳಿದು ಓಡಿ ಹೋಗುವಾಗ ಅವರು ಎರಡು ಬಾರಿ ಬಿದ್ದ ಕಾರಣ ದುಷ್ಕರ್ಮಿಗಳಿಗೆ ಸುಲಭವಾಗಿ ಸಿಕ್ಕಿಬಿದ್ದರು. ಹತ್ಯೆಯ ನಂತರ, ದುಷ್ಕರ್ಮಿಗಳು ಸ್ವಿಫ್ಟ್ ಕಾರಿನಲ್ಲಿ ಸುಮಾರು 50 ಮೀಟರ್ ದೂರ ಹೋಗಿ, ಅದನ್ನು ಅಲ್ಲಿಯೇ ಬಿಟ್ಟು ಬೇರೆ ಕಾರಿನಲ್ಲಿ ಪರಾರಿಯಾಗಿದ್ದಾರೆ ಎಂದು ತಿಳಿದುಬಂದಿದೆ.

ಜಾಮೀನು ಪಡೆದು ಬಂದ ನಂತರ ಸುಹಾಸ್ ಅವರು ತಮ್ಮನ್ನು ಸಂಘಟನೆಯ ಕೆಲಸದಲ್ಲಿ ಸಂಪೂರ್ಣವಾಗಿ ತೊಡಗಿಸಿಕೊಂಡಿದ್ದರು. ಅವರು ಗೋ ಸಂರಕ್ಷಣಾ ಕಾರ್ಯದಲ್ಲಿ ಹೆಚ್ಚು ಸಕ್ರಿಯರಾಗಿದ್ದರು ಮತ್ತು ಅವರನ್ನು ಕಳವಾರು ಘಟಕದ ಗೋರಕ್ಷಾ ಪ್ರಮುಖ್ ಆಗಿ ನೇಮಿಸಲಾಗಿತ್ತು. ಜೀವ ಬೆದರಿಕೆ ಇದ್ದ ಕಾರಣ ಅವರು ಬೇರೆ ಯಾವುದೇ ಕೆಲಸಕ್ಕೆ ಹೋಗುತ್ತಿರಲಿಲ್ಲ