ಪೆರೋಲ್ ಅವಧಿ ಮುಗಿದ ಬಳಿಕ 2018ರ ಆಗಸ್ಟ್ 29ರಂದು ಜೈಲಿಗೆ ಮರಳಬೇಕಿದ್ದ ಮೈನ್ ಪಾಲ್ ನಿಗದಿತ ದಿನದಂದು ವಾಪಸ್ ಆಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಹರ್ಯಾಣ ಉತ್ತಮ ನಡತೆಯ ಕೈದಿಗಳ ಕಾಯ್ದೆಯ ಸೆಕ್ಷನ್ 8 ಮತ್ತು 9ರ ಅಡಿ ಆತನ ವಿರುದ್ಧ ಪ್ರಕರಣ ದಾಖಲಿಸಲಾಯಿತು.

ತನಿಖೆ ತೀವ್ರಗೊಳಿಸಿದ ಪೊಲೀಸರು, ಮೈನ್ ಪಾಲ್‌ನ ಸುಳಿವು ನೀಡುವವರಿಗೆ 5 ಲಕ್ಷ ರೂ. ಬಹುಮಾನ ಘೋಷಿಸಿದ್ದರು. ಪೊಲೀಸರ ಹುಡುಕಾಟದ ನಡುವೆಯೂ ಆತ ದೇಶದಿಂದ ಪರಾರಿಯಾಗಿದ್ದ.

ನಕಲಿ ಪಾಸ್‌ಪೋರ್ಟ್ ಮೂಲಕ ಪರಾರಿ
ಪೊಲೀಸರು ಹಾಗೂ ಗುಪ್ತಚರ ಸಂಸ್ಥೆಗಳ ವರದಿ ಪ್ರಕಾರ, ಮೈನ್ ಪಾಲ್ ‘ಸೋನು ಕುಮಾರ್’ ಎಂಬ ಹೆಸರಿನಲ್ಲಿ ಪಾಸ್‌ಪೋರ್ಟ್ ಪಡೆದುಕೊಂಡಿದ್ದ. ಪಾಸ್‌ಪೋರ್ಟ್‌ನಲ್ಲಿ ತಾನು ಗುರುಗ್ರಾಮದ ನಿವಾಸಿ ಎಂದು ಆತ ನಮೂದಿಸಿದ್ದ. ಆದರೆ ತನಿಖೆಯ ವೇಳೆ ಆತ ನೀಡಿದ್ದ ಗುರುಗ್ರಾಮದ ವಿಳಾಸ ನಕಲಿ ಎಂಬುದು ಪತ್ತೆಯಾಗಿತ್ತು. ಈ ಹಿನ್ನೆಲೆಯಲ್ಲಿ ಪಾಸ್‌ಪೋರ್ಟ್ ಕಾಯ್ದೆಯಡಿ ಆತನ ವಿರುದ್ಧ ಹೆಚ್ಚುವರಿ ಆರೋಪಗಳನ್ನು ದಾಖಲಿಸಲಾಯಿತು.

2019ರ ಜುಲೈ 7ರಂದು ಕೋಲ್ಕತ್ತಾ ವಿಮಾನ ನಿಲ್ದಾಣದಿಂದ ಬ್ಯಾಂಕಾಕ್‌ಗೆ ತೆರಳುವ ಮೂಲಕ ಮೈನ್ ಪಾಲ್ ಭಾರತದಿಂದ ಪರಾರಿಯಾಗಿದ್ದ. ಥಾಯ್ಲೆಂಡ್‌ನಲ್ಲಿ ಸುಮಾರು 20ರಿಂದ 22 ದಿನಗಳ ಕಾಲ ತಂಗಿದ್ದ ಬಳಿಕ ಕಾಂಬೋಡಿಯಾಗೆ ತೆರಳಿ ಅಲ್ಲಿಯೇ ನೆಲೆಸಿದ್ದ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕಾಂಬೋಡಿಯಾದಲ್ಲಿ ಹೊಸ ಜೀವನ
ಕಾಂಬೋಡಿಯಾದಲ್ಲಿ ಮೈನ್ ಪಾಲ್ ಕೇವಲ ತಲೆಮರೆಸಿಕೊಂಡು ಬದುಕಿರಲಿಲ್ಲ. ಅಲ್ಲಿ ಮನೆ ಖರೀದಿಸಿದ್ದ ಆತ, ಮೂರು ಮಕ್ಕಳ ತಂದೆಯಾಗಿದ್ದ. ಅಲ್ಲದೆ ಡಿಸ್ಕೊ ಹಾಗೂ ರೆಸ್ಟೋರೆಂಟ್‌ವೊಂದರ ಮಾಲೀಕನಾಗಿ ವ್ಯವಹಾರ ನಡೆಸುತ್ತಿದ್ದ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ವಿಚಾರಣೆ ವೇಳೆ ಕಾಂಬೋಡಿಯಾದಲ್ಲಿನ ತನ್ನ ಜೀವನದ ಕುರಿತು ಮೈನ್ ಪಾಲ್ ಮಾಹಿತಿ ನೀಡಿದ್ದಾನೆ. ‘ನಾನು ಥಾಯ್ಲೆಂಡ್‌ನಲ್ಲಿ 20ರಿಂದ 22 ದಿನಗಳ ಕಾಲ ತಂಗಿದ್ದೆ. ಬಳಿಕ ಕಾಂಬೋಡಿಯಾಗೆ ತೆರಳಿ ಅಲ್ಲಿಯೇ ನೆಲೆಸಿದ್ದೆ. ಥಾಯ್ಲೆಂಡ್‌ನಿಂದ ಕಾಂಬೋಡಿಯಾಗೆ ಬಂದ ಬಳಿಕ ಚೆನ್ ಮಟಾಳನ್ನು ಭೇಟಿಯಾದೆ. ಬಳಿಕ ನಾವಿಬ್ಬರೂ ಒಟ್ಟಿಗೆ ವಾಸಿಸಲು ಆರಂಭಿಸಿದೆವು’ ಎಂದು ಆತ ಹೇಳಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

2018ರಲ್ಲಿ ಪೆರೋಲ್ ಪಡೆದು ಜೈಲಿಗೆ ಮರಳದೆ ಪರಾರಿಯಾಗಿದ್ದ ಮೈನ್ ಪಾಲ್, ನಕಲಿ ಗುರುತಿನ ಮೂಲಕ ಪಾಸ್‌ಪೋರ್ಟ್ ಪಡೆದು ಭಾರತದಿಂದ ಹೊರಹೋಗಿ ಕಾಂಬೋಡಿಯಾದಲ್ಲಿ ಸುಮಾರು ಎಂಟು ವರ್ಷಗಳ ಕಾಲ ಪೊಲೀಸರಿಗೆ ಸಿಗದೆ ವಾಸಿಸುತ್ತಿದ್ದ. ಕೊನೆಗೆ ರಾಜ್ಯ ಪೊಲೀಸರು, ಕೇಂದ್ರ ಗೃಹ ಸಚಿವಾಲಯ ಹಾಗೂ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಸಮನ್ವಯದೊಂದಿಗೆ ಸಿಬಿಐ ನಡೆಸಿದ ಕಾರ್ಯಾಚರಣೆಯಲ್ಲಿ ಆತನನ್ನು ಬಂಧಿಸಲಾಗಿದೆ.