ಕಾಂಗ್ರೆಸ್ ಜಾತಿವಾದಿಯಾಗಿದ್ದು ಅದರ ನಾಯಕರು ಅವರವರ ಜಾತಿಯನ್ನು ಮುಂದಿಟ್ಟು ಮತಯಾಚಿಸುತ್ತಿದ್ದಾರೆ. ಆದರೇ ಬಿಜೆಪಿ ರಾಷ್ಟ್ರೀಯವಾದಿಯಾಗಿದೆ. ದೇಶವನ್ನು ರಕ್ಷಣೆ ಮಾಡುವುದು, ದೇಶದ ಸಂಸ್ಕೃತಿಯನ್ನು ಉಳಿಸುವುದು ಸಣ್ಣ ಕೆಲಸವಲ್ಲ. ದೇಶವನ್ನು, ಧರ್ಮವನ್ನು ಉಳಿಸುವವರನ್ನು ನೋಡಿ ಜನರು ಮತ ಹಾಕುತ್ತಾರೆಯೇ ಹೊರತು ಹೆಂಡ, ಜಾತಿ, ಹಣ ನೋಡಿ ಮತ ಹಾಕುವುದಿಲ್ಲ ಎಂದರು.

ಸೂ… ಮಗ- ಮಹಿಳಾ ನಾಯಕರ ಮುಂದೆಯೇ ವೇದಿಕೆಯಲ್ಲಿ ಅವಾಚ್ಯ ಪದ ಪ್ರಯೋಗ ಮಾಡಿದ ಈಶ್ವರಪ್ಪ

ಮುಖ್ಯಮಂತ್ರಿ ಎಂದು ಅಹಂಕಾರದಿಂದ ಚುನಾವಣೆಗೆ ಹೋದರೆ , ಜನರು ಎಲ್ಲಿ ಕೂರಿಸಬೇಕೆಂದು ತೀರ್ಮಾನಿಸುತ್ತಾರೆ ಎನ್ನುವುದಕ್ಕೆ ಸಿದ್ದರಾಮಯ್ಯ ಸೋತ ಚಾಮುಂಡೇಶ್ವರಿ ಚುನಾವಣೆ ಸಾಕ್ಷಿ. ಅವರು ಸೋತದ್ದಲ್ಲ. ಅವರನ್ನು ಇನ್ನೊರ್ವ ಕಾಂಗ್ರೆಸ್ಸಿನ ಹಿರಿಯ ಮುಖಂಡ ಪರಮೇಶ್ವರ್ ಸೋಲಿಸಿದ್ದು. ಅದಕ್ಕೂ ಹಿಂದಿನ ಚುನಾವಣೆಯಲ್ಲಿ ಸಿದ್ದರಾಮಯ್ಯನವರು, ಪರಮೇಶ್ವರನ್ನು ಸೋಲಿಸಿದರು. ಅದರ ಹಗೆಯನ್ನು ಚಾಮುಂಡೇಶ್ವರಿಯಲ್ಲಿ ಪರಮೇಶ್ವರ್ ತೀರಿಸಿದ್ದಾರೆ.

ಇದನ್ನು ಸ್ವತ: ಸಿದ್ದರಾಮಯ್ಯನವರು ವಿಧಾನಸಭೆ ಅಧಿವೇಶನದ ಸಂದರ್ಭ ನನ್ನಲ್ಲಿ ಖಾಸಗಿಯಾಗಿ ಹೇಳಿದ್ದು, ಆ ಸೂ… ಮಗ ನನ್ನನ್ನು ಸೋಲಿಸಿ ಬಿಟ್ಟ ಅಂದ್ರು ಎಂದು ಈಶ್ವರಪ್ಪ ನವರು ಮಹಿಳೆಯರು ಇದ್ದ ವೇದಿಕೆಯಲ್ಲಿ ಅವಾಚ್ಯ ಪದ ಬಳಕೆ ಮಾಡಿದ್ರು. ಇದನ್ನೆಲ್ಲ‌ ಪತ್ರಕರ್ತರು ಬರೆಯಬಾರದು ಎಂದ ಅವರು ಬರಕೊಳ್ಳುವುದಿದ್ದರೇ ಬರಕೊಳ್ಳಿ ನನಗೇನು ಹೆದರಿಕೆಯಿಲ್ಲ ಎಂದರು.

ದೇಶದ್ರೋಹಿ ಪಿಎಫೈಯನ್ನು ಬಗ್ಗು ಬಡಿದ ಸರಕಾರ

ಕನ್ನಡ ಮತ್ತು ಸಂಸ್ಕೃತಿ ಮತ್ತು ಕರ್ನಾಟಕ ಇಂಧನ ಇಲಾಖೆ ಸಚಿವ ವಿ. ಸುನೀಲ್ ಕುಮಾರ್ ಮಾತನಾಡಿ ” 18 ಹಿಂದೂ ಕಾರ್ಯಕರ್ತರ ಸಾವಿಗೆ ಕಾರಣರಾದ ಸಿದ್ದರಾಮಯ್ಯ ಸರಕಾರ ಬೇಕಾ? ಇಲ್ಲ ದೇಶದ್ರೋಹಿ ಪಿಎಫೈಯನ್ನು ಬಗ್ಗು ಬಡಿದ ಬಿಜೆಪಿ ಸರಕಾರ ಬೇಕಾ ? ಪಕ್ಷದ ಒಳಗಿನ ಸಣ್ಣಪುಟ್ಟ ಗೊಂದಲಗಳನ್ನು ದೂರ ಮಾಡಿ ಡಬ್ಬಲ್ ಇಂಜಿನ್ ಸರ್ಕಾರವನ್ನು ಬೆಂಬಲಿಸುವ ಕಾರ್ಯ ಮಾಡಬೇಕು ಎಂದರು.

ಪಕ್ಷದ ಹುಟ್ಟಿನ ಸಂದರ್ಭದಲ್ಲಿ ವ್ಯಕ್ತಪಡಿಸಿದ ಆಶಯದಂತೆ ಹಿಂದುತ್ವ ಹಾಗೂ ಅಭಿವೃದ್ಧಿಯನ್ನು ಕಣ್ಣ ಮುಂದೆ ಇಟ್ಟುಕೊಂಡು ಬಿಜೆಪಿ ಆಡಳಿತವನ್ನು ನಡೆಸಿದೆ. ಚುನಾವಣೆ ಬಂದಾಗ ಚಪ್ಪಾಳೆ ಗಿಟ್ಟಿಸಿಕೊಳ್ಳುವ ಭಾಷಣವನ್ನು ಯಾವತ್ತೂ ಬಿಜೆಪಿ ಮಾಡಿಲ್ಲ. ರಾಜ್ಯ ಮತ್ತು ಕೇಂದ್ರ ಸರಕಾರಗಳೆರಡು ರೈತರಿಗೆ, ಗ್ರಾಮೀಣ ಜನರಿಗೆ ವಿವಿಧ ಸವಲತ್ತುಗಳನ್ನು ಒದಗಿಸಿದೆ. ಡಬಲ್ ಇಂಜೀನ್ ಸರಕಾರ ಅಭಿವೃದ್ದಿ ಪರ್ವ ಮಾಡಿದೆ ಎಂದು ತಿಳಿಸಿದರು.

ರಸ್ತೆ, ದೀಪದಂತಹ ವಿಚಾರ ಬದಿಗಿಡಿ

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ ಬಿಜೆಪಿ ಜಿಲ್ಲಾಧ್ಯಕ್ಷ ಸುದರ್ಶನ್ ಮೂಡಬಿದರೆ ಮಾತನಾಡಿ ” ರಸ್ತೆ, ದೀಪದಂತಹ ವಿಚಾರಗಳನ್ನು ಬದಿಗಿಟ್ಟು, ನಮ್ಮ ಸಂಸ್ಕೃತಿ ಪರಂಪರೆಯನ್ನು ರಕ್ಷಿಸುವ ಬಿಜೆಪಿಯನ್ನು ಬೆಂಬಲಿಸುವ ಕಾರ್ಯ ಮಾಡಬೇಕು ಎಂದು ತಿಳಿಸಿದರು.

ಲವ್ ಜಿಹಾದ್ ನಿಂದ ರಕ್ಷಣೆಗೆ ಬಿಜೆಪಿಗೆ ಮತ : ಮಠಂದೂರು

ಪ್ರಾಸ್ತವಿಕವಾಗಿ ಮಾತನಾಡಿದ ಪುತ್ತೂರು ಶಾಸಕ ಸಂಜೀವ ಮಠಂದೂರು ಕ್ಷೇತ್ರದಲ್ಲಿ ತಾನು ಮಾಡಿದ ಅಭಿವೃದ್ದಿ ಕಾರ್ಯಗಳನ್ನು ವಿವರಿಸಿದರು. ಜತೆಗೆ ಕೇಂದ್ರ ಹಾಗೂ ರಾಜ್ಯ ಸರಕಾರಗಳ ವಿವಿಧ ಯೋಜನೆಗಳ ಮಾಹಿತಿಯನ್ನು ನೀಡಿದ ಅವರು ” ಲವ್ ಜಿಹಾದ್ ನಿಂದ ‌ಹಿಂದೂಗಳ ರಕ್ಷಣೆಯಾಗಬೇಕಾದರೆ ಬಿಜೆಪಿ ಸರಕಾರ ಬೇಕು ಎನ್ನುವುದನ್ನು ಮತ ಚಲಾಯಿಸುವ ವೇಳೆ ಗಮನದಲ್ಲಿಟ್ಟುಕೊಳ್ಳಿ ಎಂದರು.

ಮೆರವಣಿಗೆ

ಪುತ್ತೂರು ಗಾಂಧಿ ಕಟ್ಟೆಯ ಬಳಿಯಿಂದ ವಿಜಯ ಸಂಕಲ್ಪ ಯಾತ್ರೆಯ ಭವ್ಯ ಮೆರವಣಿಗೆ ಕಾರ್ಯಕ್ರಮ ನಡೆಯುವ ಮೈದಾನಕ್ಕೆ ಆಗಮಿಸಿತು. ಆಗಮಿಸಿದ ನಾಯಕರುಗಳನ್ನು ಪುಷ್ಪ ವರ್ಷ ಸುರಿಸುವ ಮೂಲಕ ಕಾರ್ಯಕರ್ತರು ಸ್ವಾಗತಿಸಿದರು.

ಸ್ವಾಗತ

ಸುಳ್ಯ ವಿಧಾನ ಸಭಾ ಕ್ಷೇತ್ರದಿಂದ ಆಗಮಿಸಿದ ಯಾತ್ರೆಯ ರಥವನ್ನು ಪುತ್ತೂರು ವಿಧಾನ ಸಭಾ ಕ್ಷೇತ್ರಕ್ಕೆ ಕಾವಿನ ಅಂಚಿನಡ್ಕದಲ್ಲಿ ಸ್ವಾಗತಿಸಲಾಯಿತು.

ವಿಧಾನ ಪರಿಷತ್ ಸದಸ್ಯ ಪ್ರತಾಪ್ ಸಿಂಹ ನಾಯಕ್, ವಿಭಾಗ ಪ್ರಭಾರಿ ಉದಯ ಕುಮಾರ್ ಶೆಟ್ಟಿ, ವಿಭಾಗ ಸಹ ಪ್ರಭಾರಿ ಗೋಪಾಲಕೃಷ್ಣ ಹೇರಳೆ, ವಿಜಯ ಸಂಕಲ್ಪ ಯಾತ್ರೆ ಕರ್ನಾಟಕ ಸಹ ಸಂಚಾಲಕರಾದ ಎಸ್. ದತ್ತಾತ್ರಿ, ಕಿಶೋರ್, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರ ಅಧ್ಯಕ್ಷ ಚಣಿಲ ತಿಮ್ಮಪ್ಪ ಶೆಟ್ಟಿ, ಜಿಲ್ಲಾ ಸಹ ಪ್ರಭಾರಿ ರಾಜೇಶ್ ಕಾವೇರಿ ಕುಂದಾಪುರ, ಮಂಡಲ ಪ್ರಭಾರಿ ರಾಮದಾಸ ಬಂಟ್ವಾಳ, ಪುಡಾ ಅಧ್ಯಕ್ಷ ಭಾಮಿ ಅಶೋಕ್ ಶೆಣೈ, ಮಾಜಿ ಶಾಸಕಿ ಮಲ್ಲಿಕಾ ಪ್ರಸಾದ್, ಜಿಲ್ಲಾ ಸಂಚಾಲಕ ದೇವದಾಸ್ ಶೆಟ್ಟಿ, ಕಸ್ತೂರಿ ಪಂಜ, ಬುಡಿಯಾರ್ ರಾಧಾಕೃಷ್ಣ ರೈ, ಜಯಂತಿ ನಾಯ್ಕ, ಆರ್.ಸಿ. ನಾರಾಯಣ, ವಿದ್ಯಾ ಗೌರಿ, ಸುನಿಲ್ ಕುಮಾರ್ ದಡ್ಡು ಉಪಸ್ಥಿತರಿದ್ದರು.

ಗೌರಿ ಬನ್ನೂರು, ಉಷಾ ಚಂದ್ರ ಮುಳಿಯ ಜೋತಿ ನಾಯಕ್ ಪ್ರಾರ್ಥಿಸಿದರು. ಗ್ರಾಮಾಂತರ ಮಂಡಲ ಅಧ್ಯಕ್ಷ ಸಾಜ ರಾಧಾಕೃಷ್ಣ ಆಳ್ವ ಸ್ವಾಗತಿಸಿದರು. ಪುತ್ತೂರು ಶಾಸಕ ಸಂಜೀವ ಮಠಂದೂರು ಪ್ರಸ್ತಾವನೆಗೈದರು. ನಗರ ಮಂಡಲ ಅಧ್ಯಕ್ಷ ಪಿ.ಜಿ. ಜಗನ್ನಿವಾಸ್ ರಾವ್ ವಂದಿಸಿದರು. ರಾಜೇಶ್ ಬನ್ನೂರು, ಚಂದ್ರಶೇಖರ್ ರಾವ್ ಬಪ್ಪಳಿಗೆ, ರಾಧಾಕೃಷ್ಣ ಬೋರ್ಕರ್ ಕಾರ್ಯಕ್ರಮ ನಿರೂಪಿಸಿದರು.

Photo courtesy : Bhoomi photo world puttur