ತಮ್ಮ ಚುರುಕುತನ ಮತ್ತು ಆಟದ ಮೂಲಕ ಗಮನ ಸೆಳೆದಿದ್ದ ಕರಾವಳಿಯ ಪ್ರತಿಭೆ ರಕ್ಷಿತಾ ಶೆಟ್ಟಿ ಅವರು ರನ್ನರ್ ಅಪ್ ಸ್ಥಾನವನ್ನು ಅಲಂಕರಿಸಿದ್ದಾರೆ. ಮೊದಲ ಸೀಸನ್‌ನಲ್ಲೇ ಫಿನಾಲೆ ತಲುಪಿದ ಸಾಧನೆ ಮಾಡಿದ ರಕ್ಷಿತಾ ಅವರಿಗೆ 25 ಲಕ್ಷ ರೂಪಾಯಿ ನಗದು ಬಹುಮಾನ ಲಭಿಸಿದೆ.

ಕಿಚ್ಚನಿಂದ ಅಚ್ಚರಿಯ ಉಡುಗೊರೆ:
ಈ ಬಾರಿಯ ಫಿನಾಲೆಯಲ್ಲಿ ಅಚ್ಚರಿಯ ಘಟನೆಯೊಂದು ಜರುಗಿದೆ. ಬಿಗ್ ಬಾಸ್ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ನಿರೂಪಕ ಕಿಚ್ಚ ಸುದೀಪ್ ಅವರು ವೈಯಕ್ತಿಕವಾಗಿ ಸ್ಪರ್ಧಿಯೊಬ್ಬರಿಗೆ ಬಹುಮಾನ ಘೋಷಿಸಿದ್ದಾರೆ. ಗಿಲ್ಲಿ ನಟ ಅವರಿಗೆ ಸುದೀಪ್ ಅವರು ತಮ್ಮ ಕಡೆಯಿಂದ 10 ಲಕ್ಷ ರೂಪಾಯಿ ನಗದು ಬಹುಮಾನ ನೀಡುವ ಮೂಲಕ ಎಲ್ಲರ ಮೆಚ್ಚುಗೆಗೆ ಪಾತ್ರರಾದರು.

ಟಾಸ್ಕ್‌ನಲ್ಲಿ ಸೋಲು, ವ್ಯಕ್ತಿತ್ವದಲ್ಲಿ ಗೆದ್ದ ಗಿಲ್ಲಿ..
ಕಾವ್ಯ ಜತೆಗಿನ ಸ್ನೇಹ, ರಘು, ರಕ್ಷಿತಾ ಜತೆಗಿನ ಆತ್ಮೀಯತೆ, ಅಶ್ವಿನಿ ಜತೆಗಿನ ಸ್ನೇಹ-ಗಲಾಟೆ.. ಹೀಗೆ ಈ ಎಲ್ಲ ವಿಚಾರದಿಂದ ಗಿಲ್ಲಿ ಗಮನ ಸೆಳೆದಿರುವುದು ಹೆಚ್ಚು. ಗಿಲ್ಲಿ ಮನೆಯಲ್ಲಿ ಮೌನವಾಗಿದ್ದಕ್ಕಿಂತ, ಮಾತಿನಲ್ಲೇ ಲೀನವಾಗಿದ್ದೇ ಹೆಚ್ಚು. ಹಾಸ್ಯ ಗಿಲ್ಲಿಯ ವ್ಯಕ್ತಿತ್ವದ ಜತೆಯೇ ಬಂದಿದೆ. ಹಾಗಂತ ಗಿಲ್ಲಿ ಪ್ರತಿ ನಿತ್ಯ ಹಾಸ್ಯ ಮಾಡುತ್ತಲೇ ಇರಲಿಲ್ಲ. ನಾಮಿನೇಷನ್ ವಿಚಾರದಲ್ಲಿ ಪ್ರಬಲ ಕಾರಣಗಳನ್ನು ಕೊಟ್ಟು ಎದುರಾಳಿಯನ್ನು ಕಟ್ಟಿ ಹಾಕುವುದರಲ್ಲೂ ಗಿಲ್ಲಿ ಮುಂದಿದ್ದರು. ಆದರೆ ಎಲ್ಲದರಲ್ಲೂ ಗೆದ್ದ ಗಿಲ್ಲಿ, ಟಾಸ್ಕ್ ವಿಚಾರದಲ್ಲಿ ಮಾತ್ರ ಅಷ್ಟಕಷ್ಟೇ ಆಗಿಯೇ ಉಳಿದಿದ್ದಾರೆ. ಇಡೀ ಸೀಸನ್‌ನಲ್ಲಿ ಹತ್ತಾರು ಟಾಸ್ಕ್‌ಗಳನ್ನು ಆಡಿದ್ದಾರೆ. ಆದರೆ ಗೆದ್ದಿರುವುದು ಮಾತ್ರ ಕೆಲವು ಮಾತ್ರ. ಈ ಒಂದು ವಿಚಾರದಲ್ಲಿ ಗಿಲ್ಲಿ ಹಿಂದೆ ಉಳಿದಿದ್ದರು.

ಕಾವ್ಯ ಜತೆಗಿನ ಸ್ನೇಹ..
ಗಿಲ್ಲಿ ನಟ ಬಿಗ್ ಬಾಸ್ ಮನೆಯಲ್ಲಿ ಕಾವ್ಯ ಶೈವ ಅವರ ಜತೆ ಆತ್ಮೀಯವಾಗಿ ಕಾಣಿಸಿಕೊಂಡಿದ್ದರು. ಗಿಲ್ಲಿ ಎಡವಿದಾಗ ಕಾವ್ಯ ಜತೆಯಾಗಿದದ್ದು ಕಾವ್ಯ ಅವರು. ಜಂಟಿಯಾಗಿದ್ದ ಗಿಲ್ಲಿ – ಕಾವ್ಯ ಅವರ ಸ್ನೇಹ, ಮುನಿಸು ಕರುನಾಡಿನ ಮನಗೆದ್ದುಕೊಂಡಿತು. ಎಲ್ಲಿಯವರೆಗೆ ಅಂದರೆ ಸೋಶಿಯಲ್ ಮೀಡಿಯಾದಲ್ಲಿ ಕಾವ್ಯ – ಗಿಲ್ಲಿಗೆ ದೊಡ್ಡಮಟ್ಟದ ಬೆಂಬಲ ವ್ಯಕ್ತವಾಗಿತ್ತು. ಗಿಲ್ಲಿಯ ವ್ಯಕ್ತಿತ್ವ ತಿದ್ದುವಲ್ಲಿ ಕಾವ್ಯ ಅವರ ಕೊಡುಗೆಯೂ ದೊಡ್ಡಮಟ್ಟದಲ್ಲಿ ಇತ್ತು ಎಂದರೆ ತಪ್ಪಾಗದು. ಒಂದು ಹಂತದಲ್ಲಿ ಕಾವ್ಯ ಗಿಲ್ಲಿಯ ಜತೆ ಮಾತು ನಿಲ್ಲಿಸಿದ್ದರೂ ಅದು ಕೆಲವೇ ದಿನಕ್ಕೆ ಮಾತ್ರ ಸೀಮಿತವಾಗಿತ್ತು. ಒಟ್ಟಾರೆ ಗಿಲ್ಲಿ ಕಾವ್ಯ ಅವರ ಸ್ನೇಹ ಬಿಗ್ ಬಾಸ್ ಮನೆಯಲ್ಲಿ ಈ ವರ್ಷ ಗಮನ ಸೆಳೆದ ಅಂಶವಾಗಿತ್ತು.

ಈ ಹಿಂದೆ ಹಲವು ಶೋಗಳಲ್ಲಿ ರನ್ನರ್ ಅಪ್ ಸ್ಥಾನಕ್ಕೆ ತೃಪ್ತಿಪಡುತ್ತಿದ್ದ ಗಿಲ್ಲಿಗೆ, ಈ ಬಾರಿ ‘ವಿನ್ನರ್’ ಪಟ್ಟ ಒಲಿದಿರುವುದು ಅವರ ಅಭಿಮಾನಿಗಳಲ್ಲಿ ಸಂಭ್ರಮ ಮನೆ ಮಾಡಿದೆ. ಮನೆಯ ಹೊರಗೆ ಸಾವಿರಾರು ಸಂಖ್ಯೆಯಲ್ಲಿ ನೆರೆದಿದ್ದ ಅಭಿಮಾನಿಗಳು ಗಿಲ್ಲಿ ಗೆಲುವನ್ನು ಪಟಾಕಿ ಸಿಡಿಸಿ, ಕುಣಿದು ಕುಪ್ಪಳಿಸಿ ಹಬ್ಬದಂತೆ ಆಚರಿಸಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲೂ ‘ಗಿಲ್ಲಿ’ ಹೆಸರೇ ಟ್ರೆಂಡ್ ಆಗುತ್ತಿದೆ.