ಹಂಸರೂಢ ರಥದಲ್ಲಿ ವಿರಾಜಮಾನರಾಗಿರುವ ಮಹಾಗಣಪತಿಗೆ ಉತ್ಸವ ಮೂರ್ತಿಯನ್ನು ಹೊತ್ತ 6 ಬ್ರಹ್ಮವಾಹಕರು ಪ್ರದಕ್ಷಿಣೆಯೊಂದಿಗೆ ಹೆಜ್ಜೆ ಹಾಕುತ್ತಾ ದರ್ಶನ ಬಲಿ ನೆರವೇರಿಸಿದರು. ಅನಂತ ಬಳ್ಳಕುರಾಯ ಅವರು ಬ್ರಹ್ಮವಾಹಕರಾಗಿದ್ದರು. ರಾತ್ರಿ 9.10ರ ಸುಮಾರಿಗೆ ರಕ್ತೇಶ್ವರಿ ಹಾಗೂ ಪಂಜುರ್ಲಿ ದೈವಗಳ ಕೋಲ ನಡೆಯಿತು. ಆ ಬಳಿಕ ಮಹಾಗಣಪತಿಯ ವೈಭವದ ಶೋಭಾಯಾತ್ರೆ ರಾತ್ರಿ ಗಂಟೆ 10.55ರ ಸುಮಾರಿಗೆ ಮೈದಾನದಿಂದ ಹೊರಟಿತು. ಶಶಾಂಕ್ ನೆಲ್ಲಿತ್ತಾಯ ಅವರು ದೈವಗಳ ಮಧ್ಯಸ್ಥರಾಗಿದ್ದರು. ಶೋಭಾಯಾತ್ರೆಗೆ ಮೊದಲು ಆಕರ್ಷಕ ಸುಡುಮದ್ದು ಪ್ರದರ್ಶನ ನಡೆಯಿತು.

ವೇದಿಕೆಯಲ್ಲಿ ಹಲವು ತಂಡಗಳ ಪ್ರದರ್ಶನ:
ಶೋಭಾಯಾತ್ರೆಯಲ್ಲಿ ಭಾಗವಹಿಸುವ ಚೆಂಡೆ, ಸರ್ವವಾದ್ಯ, ನೃತ್ಯಗಳು, ನೃತ್ಯ ಭಜನೆ, ಕಲ್ಲಡ್ಕದ ಶಿಲ್ಪಾ ಗೊಂಬೆ ಬಳಗದ ಕುಣಿತಗಳು ಶೋಭಾಯಾತ್ರೆ ಆರಂಭದ ಮೊದಲು ನೆಲ್ಲಿಕಟ್ಟೆ ದಿ.ಸುಧಾಕರ್ ಶೆಟ್ಟಿ ವೇದಿಕೆಯಲ್ಲಿ ಪ್ರದರ್ಶನ ನೀಡಲಾಯಿತು. ತಾಲೀಮು ಮತ್ತು ನಾಸಿಕ್ ಬ್ಯಾಂಡ್ ಪ್ರದರ್ಶನ ಮೈದಾನದಲ್ಲಿ ನಡೆಯಿತು.

ಮಹಾ ಅನ್ನಸಂತರ್ಪಣೆ:
ಕಳೆದ 7 ದಿನಗಳಿಂದ ಕಿಲ್ಲೆ ಮೈದಾನದಲ್ಲಿ ನಡೆದ ಗಣೇಶೋತ್ಸವದಲ್ಲಿ ಲಕ್ಷಾಂತರ ಮಂದಿಗೆ ಅನ್ನಸಂತರ್ಪಣೆ ನಡೆಯಿತು. ಶ್ರೀ ದೇವತಾ ಸಮಿತಿಯ ನೇತೃತ್ವದಲ್ಲಿ ತುಳಸಿ ಕೆಟರರ್‌ನ ಹರೀಶ್ ರಾವ್ ಅವರ ತಂಡ ನಳಪಾಕದ ಸವಿ ಉಣಬಡಿಸಿತು. ಅನ್ನಸಂತರ್ಪಣೆಯಲ್ಲಿ ಪ್ರತಿದಿನವೂ ವೈವಿಧ್ಯಮಯ ಪದಾರ್ಥ ಹಾಗೂ ಪಾಯಸವನ್ನು ಭಕ್ತರಿಗೆ ಉಣಬಡಿಸಲಾಯಿತು. ಅನ್ನಸಂತರ್ಪಣೆಗೆ ಪ್ರತ್ಯೇಕ ಸುಸಜ್ಜಿತ ವ್ಯವಸ್ಥೆಯನ್ನು ಮಾಡಿದ್ದು, ಒಟ್ಟು ವ್ಯವಸ್ಥೆ ಅಚ್ಚುಕಟ್ಟಾಗಿ ಮೂಡಿಬಂದಿತು. ಮಧ್ಯಾಹ್ನ ಆರಂಭಗೊಂಡರೆ ರಾತ್ರಿ ಎಷ್ಟು ಹೊತ್ತಾದರೂ ಬಂದ ಭಕ್ತರಿಗೆ ಅನ್ನಪ್ರಸಾದ ವಿತರಣೆ ನಡೆಯುತ್ತಿತ್ತು.

ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮ:
7 ದಿನದ ಗಣೇಶೋತ್ಸವದಲ್ಲಿ ಸಾಂಸ್ಕೃತಿಕ ಹಾಗೂ ಧಾರ್ಮಿಕ ಕಾರ್ಯಕ್ರಮ ವಿಶೇಷ ಗಮನ ಸೆಳೆಯಿತು. ಭಜನೆ, ಸ್ಯಾಕ್ರೋಫೋನ್ ವಾದನ, ಸಂಗೀತ ಕಛೇರಿ, ನೃತ್ಯ ವೈವಿಧ್ಯ. ಯಕ್ಷಗಾನ, ನಾಟಕ, ಗೊಂಬೆ ಕುಣಿತ ಮೊದಲಾದ ಕಾರ್ಯಕ್ರಮಗಳಿಗೆ ವೇದಿಕೆ ಸಾಕ್ಷಿಯಾಯಿತು.

ಬೃಹತ್‌ ಮಾಲೆ:
ನೆಲ್ಲಿಕಟ್ಟೆ ಮಿತ್ರ ವೃಂದದಿಂದ ಕಿಲ್ಲೆ ಗಣಪನಿಗೆ ಬೃಹತ್ ಮಾಲೆಯನ್ನು ಅರ್ಪಿಸಲಾಯಿತು. ಸೆ.2ರ ಸಂಜೆ ನೆಲ್ಲಿಕಟ್ಟೆಯಿಂದ ಮೆರವಣಿಗೆ ಮೂಲಕ ಕಿಲ್ಲೆ ಮೈದಾನಕ್ಕೆ ಬೃಹತ್ ಮಾಲೆಯನ್ನು ತಂದು ಮಹಾಗಣಪತಿಗೆ ಅರ್ಪಿಸಲಾಯಿತು.

ವೈಭವದ ಶೋಭಾಯಾತ್ರೆ:
ಕಿಲ್ಲೆ ಮಹಾಗಣಪತಿಯ ಶೋಭಾಯಾತ್ರೆಯಲ್ಲಿ ಶ್ರೀ ಮಹಾಲಿಂಗೇಶ್ವರ ದೇವರ ದೊಡ್ಡ ಭಾವಚಿತ್ರ ಹೊತ್ತ ವಾಹನ, ತಾಲೀಮು ಪ್ರದರ್ಶನ, ಗೊಂಬೆ ಕುಣಿತದ ಜೊತೆಗೆ ಚೆಂಡೆ ಸದ್ದು ಶೋಭಾಯಾತ್ರೆಯ ಮೆರುಗನ್ನು ಹೆಚ್ಚಿಸಿತು. ಗಣಪತಿ ಮೂರ್ತಿಯ ಜೊತೆಗೆ ದೈವಗಳು ಸಾಗುತ್ತಿದ್ದರೆ, ಸ್ಯಾಕ್ರೋಫೋನ್ ಹಾಗೂ ತಾಸೆ ಸದ್ದು ಧಾರ್ಮಿಕ ಟಚ್ ನೀಡಿತು.

7 ದಿನದಲ್ಲಿ ಲಕ್ಷಾಂತರ ಮಂದಿಗೆ ಅನ್ನಪ್ರಸಾದ ನೀಡಲು ಬಾಣಸಿಗರಿಗೆ ಶಕ್ತಿಯಾದ ಗಣಪ
ಧಾರ್ಮಿಕ ಆಚಾರ ವಿಚಾರಗಳಿಗೆ ಸಂಬಂಧಿಸಿದಂತೆ ಪುತ್ತೂರು ಸೀಮೆಯಲ್ಲಿ ವಿಶಿಷ್ಟ ಆಚರಣೆಯಲ್ಲಿ ಅನ್ನದಾನ ಶ್ರೇಷ್ಠ. ಅದರಲ್ಲೂ ಪುತ್ತೂರು ಕಿಲ್ಲೆಮೈದಾನದಲ್ಲಿ ಶ್ರೀ ದೇವತಾಸಮಿತಿಯ ಆಶ್ರಯದಲ್ಲಿ ಏಳು ದಿನಗಳ ಕಾಲ ನಡೆಯುವ ಸಾರ್ವಜನಿಕ ಶ್ರೀ ಮಹಾಗಣೇಶೋತ್ಸವದಲ್ಲಿ ನಿತ್ಯ ಅನ್ನದಾನ ಇಲ್ಲಿ ಮಹತ್ವ ಪಡೆದಿದ್ದು, ಲಕ್ಷಾಂತರ ಮಂದಿಗೆ ಅನ್ನಪ್ರಸಾದ ನೀಡುವ ಮೂಲಕ ಅನ್ನದಾನದ ಮಹಾಪ್ರಭುವಾಗಿ ಮಹಾಗಣಪತಿ ಕಾಣಿಸಿಕೊಳ್ಳುತ್ತಾರೆ. ಈ ಅನ್ನಪ್ರಸಾದ ತಯಾರಿಕೆಯಲ್ಲಿ ತುಳಸಿ ಕ್ಯಾಟರಿಂಗ್‌ನ ಮಾಲಕ ಹರೀಶ್ ರಾವ್ ಅವರ ನೇತೃತ್ವದಲ್ಲಿ 15 ಮಂದಿಯ ಬಾಣಸಿಗರಿಂದ ನಿತ್ಯ ಸಾವಿರಾರು ಮಂದಿಗೆ ಅನ್ನಪ್ರಸಾದ ತಯಾರಿಕೆಯಲ್ಲಿ ಗಣಪತಿಯೇ ಶಕ್ತಿಯಾಗಿದೆ.

ಸೆ. 2ರ ಕೊನೆಯ ದಿನದಂದು ಸುಮಾರು 20ಸಾವಿರಕ್ಕೂ ಮಿಕ್ಕಿ ಮಂದಿಗೆ ಅನ್ನಪ್ರಸಾದ ವಿತರಣೆ ನಡೆಯಿತು. ಇಲ್ಲಿನ ಚೌತಿ ಆಚರಣೆಯಲ್ಲಿ ಪ್ರತಿದಿನವೂ ಮಧ್ಯಾಹ್ನದ ಮಹಾಪೂಜೆಯ ಬಳಿಕ ಪ್ರಸಾದದ ರೂಪದಲ್ಲಿ ಅನ್ನದಾನವು ಆರಂಭಿಕ ಕಾಲದಿಂದಲೂ ನಡೆದುಬಂದಿದೆ. ಸಹಸ್ರಾರು ಭಕ್ತರು ಪ್ರಸಾದ ಸ್ವೀಕರಿಸುತ್ತಾರೆ. ಭಕ್ತರ ಬೇಡಿಕೆಗೆ ಕ್ಷಿಪ್ರ ಪ್ರಸಾದನಾಗಿ ಇಲ್ಲಿನ ಗಣಪ ಅಭಯ ಕರುಣಿಸುತ್ತಾನೆಯೆಂಬ ಅಚಲ ನಂಬಿಕೆಯಿಂದ ಒಳಿತನ್ನು ಕಂಡವರ ಸಂಖ್ಯೆಯೂ ವೃದ್ಧಿ ಯಾಗುತ್ತಿದೆ. ಹರೀಶ್ ರಾವ್ ಅವರ ನೇತೃತ್ವದಲ್ಲಿ ಕಳೆದ ಸುಮಾರು 20 ವರ್ಷಗಳಿಂದ ಅನ್ನಪ್ರಸಾದ ತಯಾರಿಕೆ ಕಾರ್ಯ ನಡೆಯುತ್ತಿದೆ. ಇವರಲ್ಲಿ ಮೂವರು ಅಪ್ಪಕಜ್ಜಾಯ, ಪಂಚಕಜ್ಜಾಯ ತಯಾರಿಕೆ ಮಾಡುತ್ತಾರೆ. ಪ್ರತಿನಿತ್ಯ ಪಲ್ಲಪೂಜೆಯ ಮೂಲಕ ದೇವರಿಗೆ ಸಮರ್ಪಣೆಯಾದ ಬಳಿಕ ಮಹಾಪೂಜೆಯ ಬಳಿಕ ಸಾರ್ವಜನಿಕ ಅನ್ನಸಂತರ್ಪಣೆ ನಡೆಯುತ್ತದೆ. ಮಧ್ಯಾಹ್ನ ಆರಂಭಗೊಂಡ ಅನ್ನಪ್ರಸಾದ ರಾತ್ರಿಯ ತನಕವೂ ಮುಂದುವರಿಯುತ್ತದೆ.

ದಿನಕ್ಕೆ 5 ಸಾವಿರಕ್ಕೂ ಮಿಕ್ಕಿ ಮಂದಿಗೆ ಅನ್ನಪ್ರಸಾದ ಸಿದ್ದಪಡಿಸಲಾಗುತ್ತಿತ್ತು. ಭಕ್ತರು ದೇವರ ನೈವೇದ್ಯ ರೂಪದಲ್ಲಿ ಅನ್ನಪ್ರಸಾದ ಸ್ವೀಕರಿಸಿದರು. ರಾತ್ರಿ ಎಷ್ಟೇ ಹೊತ್ತಾದರೂ ಅನ್ನಪ್ರಸಾದ ಬಯಸಿ ಬಂದ ಭಕ್ತರಿಗೆ ಏನಿಲ್ಲದಿದ್ದರೂ ಅನ್ನಮತ್ತು ಪಾಯಸ ನೀಡುವ ಕಾರ್ಯ ಹಲವು ವರ್ಷಗಳಿಂದ ನಿರಂತರ ನಡೆಯುತ್ತಾ ಬಂದಿದೆ. ಎಲ್ಲೂ ಕೂಡಾ ಕಡಿಮೆ ಅಂತ ಆಗಿಲ್ಲ. ಎಷ್ಟು ಮಂದಿ ಬೇಕಾದರೂ ಬರಲಿ ಮಹಾಗಣಪತಿಯ ಆಶೀರ್ವಾದದಿಂದ ಅನ್ನಪ್ರಸಾದ ವಿತರಣೆ ನಿತ್ಯ ನಡೆಯುತ್ತಿದೆ.- ಹರೀಶ್ ರಾವ್, ಬಾಣಸಿಗರು

ವಿಗ್ರಹ ವಿಸರ್ಜನೆ
7 ದಿನಗಳ ಪರ್ಯಂತ ನಡೆದ ಶ್ರೀ ಮಹಾಗಣಪತಿಯ ಶೋಭಾಯಾತ್ರೆ ರಾತ್ರಿ ಕೋರ್ಟ್‌ ರಸ್ತೆಯಿಂದ ಹೊರಟು ಮುಖ್ಯ ರಸ್ತೆಯನ್ನು ಸಂಪರ್ಕಿಸಿ, ಅಲ್ಲಿಂದ ದರ್ಬೆ, ಪರ್ಲಡ್ಕ, ತಾಲೂಕು ಆಫೀಸ್ ರಸ್ತೆಯಾಗಿ ರಾಧಾಕೃಷ್ಣ ಮಂದಿರದ ಬಳಿಯಿಂದ ಬೊಳುವಾರು ಮಾರ್ಗವಾಗಿ ತೆರಳಿ ಮಂಜಲ್ಪಡು ಕೆರೆಯಲ್ಲಿ ವಿಗ್ರಹ ವಿಸರ್ಜನೆ ನಡೆಯಿತು.