ಬಳಿಕ ದುಷ್ಕರ್ಮಿಗಳು ನಮ್ಮ ಬಳಿ  ಕೋಟ್ಯಂತರ ರೂ. ಚಿನ್ನದ ಗಟ್ಟಿಗಳಿವೆ. ನಮಗೆ ಅದನ್ನು ಇಲ್ಲಿ ಮಾರಾಟ ಮಾಡಲು ಸಾಧ್ಯವಿಲ್ಲ. ನೀವು ಬಂದರೆ ನಾವು ಅದನ್ನು ಕೇವಲ 50 ಲಕ್ಷ ರೂ. ಗಳಿಗೆ ನೀಡುತ್ತೇವೆ ಎಂದು ಇಸಾಖ್‌ ಅವರನ್ನು  ನಂಬಿಸಿದ್ದಾರೆ ಎನ್ನಲಾಗಿದೆ. ಇದಕ್ಕೆ ಇಸಾಖ್‌ ಸಮ್ಮತಿ ಸೂಚಿಸಿರಬಹುದು. ಇಸಾಕ್ ಅವರು 2 ವರ್ಷದ ಹಿಂದೆ  ವಿದೇಶದಿಂದ ಮರಳಿದ್ದು, ಆರ್ಥಿಕವಾಗಿ  ತೊಂದರೆಯಲ್ಲಿ ಇದ್ದರೆಂದು ಹೇಳಲಾಗುತ್ತಿದೆ.  ಅವರು ಗುರುವಾಯನಕೆರೆಯ ಮನೆ ಮಾರಿ ಮದ್ದಡ್ಕದಲ್ಲಿ ಬಾಡಿಗೆ ಮನೆಯಲ್ಲಿ ಸದ್ಯಕ್ಕೆ ನೆಲೆಸಿದ್ದರು.

ಕಡಿಮೆ ಬೆಲೆಗೆ ಚಿನ್ನ ಸಿಕ್ಕರೇ, ಅದನ್ನು ಮಾರಾಟ ಮಾಡಿ ಸುಲಭದಲ್ಲಿ ಹಣ ಗಳಿಸ ಬಹುದೆಂಬ ಇರಾದೆಯಿಂದ ದುಷ್ಕರ್ಮಿಗಳು ತೋಡಿದ ಖೆಡ್ಡಾಕ್ಕೆ ಬಿದ್ದಿದ್ದಾರೆ. ಅವರ ಬಳಿ ಮನೆ ಮಾರಿದ ಹಣ ಹಾಗೂ ಮಗಳ ಚಿನ್ನ ಅಡವಿಟ್ಟ ಹಣ ಒಟ್ಟು ಸೇರಿ ಸಮಾರು 35 ಲಕ್ಷ ಹಣವಿತ್ತು ಎನ್ನಲಾಗಿದೆ. ಮೂಲಗಳ ಪ್ರಕಾರ ಅವರು ಉಳಿದ ಹಣಕ್ಕಾಗಿ ಶಾಹುಲ್‌ ಹಾಗೂ ಇಮ್ತಿಯಾಜ್‌ ಸಿದ್ದಿಕ್‌  ನೆರವು ಪಡೆದಿದ್ದರು. ಆ ಉಳಿದಿಬ್ಬರು ಸೇರಿ ಸ್ನೇಹಿತರ ಬಳಿ ಕೈ ಸಾಲ ಪಡೆದು ಸುಮಾರ 15 ಲಕ್ಷದಷ್ಟು ಒಂದುಗೂಡಿಸಿದ್ದರು ಎನ್ನಲಾಗುತ್ತಿದೆ.

 ಇಷ್ಟು ಹಣವನ್ನು ಒಂದು ಗೂಡಿಸಿದ ಬಳಿಕ, 11 ದಿನಗಳ ಹಿಂದೆ ಸ್ನೇಹಿತ ಮದ್ದಡ್ಕ ರಫೀಕ್‌ ರವರ ಕಾರನ್ನು ಇಸಾಖ್‌  ಕೆಲ ದಿನಗಳಿಗಾಗಿ ಪಡೆದುಕೊಂಡಿದ್ದಾರೆ. ಬಳಿಕ ಮೂವರು ಸುಮಾರು 50 ಲಕ್ಷ ರೂ ನಗದಿನೊಂದಿಗೆ ತುಮಕೂರಿಗೆ ಪ್ರಯಾಣ ಬೆಳೆಸಿದ್ದಾರೆ. ಗುರುವಾರ (ಮಾ. 21) ಸಂಜೆಯವರೆಗೂ ಇಸಾಕ್ ತನ್ನ ಕುಟುಂಬಸ್ಥರ ಜೊತೆ  ಹಾಗೂ ಕಾರು ನೀಡಿದ ರಫೀಕ್‌ ಜತೆ ಸಂಪರ್ಕದಲ್ಲಿದ್ದರು. ಗುರುವಾರ ರಾತ್ರಿಯಿಂದ  ಇಸಾಕ್ ಮೊಬೈಲ್ ಸ್ವಿಚ್ ಆಫ್ ಆಗಿತ್ತು.

ಏನಾಗಿರಬಹುದು?

  ಬೆಳ್ತಂಗಡಿಯಿಂದ ಹೊರಟ ಅವರು ತುಮಕೂರು ಅಥಾವ ಕೋಲಾರದಲ್ಲಿ  ಸ್ವಾಮಿಯನ್ನು ಕಂಡು ಹಣ ಹಸ್ತಾಂತರಿಸಿ ಚಿನ್ನ ಪಡೆದುಕೊಂಡಿದ್ದಾರೆ ಎಂದು ಮೂಲಗಳಿಂದ ತಿಳಿದುಬಂದಿದೆ. ಆದರೇ ಇದನ್ನು ಅವರು ಮಾರಾಟಕ್ಕೆ ಪ್ರಯತ್ನಿಸಿದಾಗ ಅದು  ನಕಲಿ ಚಿನ್ನ ಎಂದು ಗೊತ್ತಾಗಿ ಮತ್ತೆ ಅವರು ಸ್ವಾಮಿಯನ್ನು ಸಂಪರ್ಕಿಸಿ ತಮ್ಮ ಹಣ ವಾಪಸ್ಸು ನೀಡುವಂತೆ ಬೇಡಿಕೆ ಇಟ್ಟಿರಬಹುದು ಎಂದು ಶಂಕಿಸಲಾಗಿದೆ. ಇಲ್ಲದಿದ್ದರೇ ಪೊಲೀಸರಿಗೆ ದೂರು ನೀಡುವ ಎಚ್ಚರಿಕೆ ನೀಡಿರಬಹುದು. ಹೀಗಾಗಿ ಅವರನ್ನು ಮತ್ತೆ ಕರೆಸಿಕೊಂಡ ದುಷ್ಕರ್ಮಿಗಳ ತಂಡ ಅವರ ಕೈಕಾಲು ಕಟ್ಟಿ ಹಲ್ಲೆ ನಡೆಸಿ ಹತ್ಯೆ ಮಾಡಿರಬಹುದು. ಹೀಗಾಗಿಯೇ ಅವರು ಬೆಳ್ತಂಗಡಿಯಿಂದ ತೆರಳಿ 11 ದಿನವಾದರೂ ವಾಪಸ್ಸು ಬಾರದಿರುವುದು. ಹಣ ಹಾಗೂ ನಕಲಿ ಚಿನ್ನ ಹಸ್ತಾಂತರ ಪ್ರಕ್ರಿಯೆ ಬೆಳ್ತಂಗಡಿಯಿಂದ ಹೋದ ಒಂದೆರಡು ದಿನದಲ್ಲಿ ನಡೆದಿರುವ ಸಾಧ್ಯತೆಯಿದೆ . ಅದಾದ ಬಳಿಕವು 9 ದಿನಗಳ ಕಾಲ ಅಲ್ಲಿಯೇ ಈ ಮೂವರು ಉಳಿದಿರುವುದರ ಹಿಂದೆ ಹಣ ವಾಪಸ್ಸು ಪಡೆಯುವುದೇ ಆಗಿತ್ತು ಎಂದು ಶಂಕಿಸಲಾಗುತ್ತಿದೆ.  

ಮೂವರ ಹತ್ಯೆ ಮಾಡಿದ   ಬಳಿಕ ಸಾಕ್ಷ್ಯ ನಾಶ ಮಾಡುವ ಉದ್ದೇಶದಿಂದ  ಶವಗಳನ್ನು ಕಾರಿನೊಳಗಡೆ ಹಾಕಿ ಹುಚ್ಚಂಗಿ ಕೆರೆಯ ಬಳಿ ತಂದು ಪೆಟ್ರೋಲ್‌ ಸುರಿದು ಬೆಂಕಿ ಕೊಟ್ಟಿರಬಹುದೆಂದು ಶಂಕಿಸಲಾಗಿದೆ. ಬಳಿಕ ಕಾರಿನ ಕುರುಹು ಸಿಗಬಾರದೆಂಬ ಕಾರಣಕ್ಕೆ ಸುಟ್ಟ ಕಾರನ್ನು ಕೆರೆಗೆ ಎಸೆದಿರಬಹುದು. ಗುರುತು ಪತ್ತೆ ಹಚ್ಚಲು ಆಗದ ಸ್ಥಿತಿಯಲ್ಲಿ ಕಾರು ಸಮೇತ ಸುಟ್ಟು ಹಾಕುವುದೇ ಆರೋಪಿಗಳ ಉದ್ದೇಶವಾಗಿತ್ತೆಂದು ಪೊಲೀಸರು ತಿಳಿಸಿದ್ದಾರೆ. ಈ ಮೂಲಕ ಇದೊಂದು ಅಪಘಾತ ಎಂದು ಬಿಂಬಿಸುವ ಯತ್ನ ಹಂತಕರದಾಗಿತ್ತು.

ಆದರೆ ಕುಚ್ಚಂಗಿ ಕೆರೆಯ ಮಧ್ಯದಲ್ಲಿ ಕಾರೊಂದು ಸುಟ್ಟ ಸ್ಥಿತಿಯಲ್ಲಿರುವುದನ್ನು  ನೋಡಿದ ಜೆಸಿಬಿ ಕಾರ್ಮಿಕ ನಾಗರಾಜು ಅವರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.  ತಕ್ಷಣ ಕಾರ್ಯ ಪ್ರವೃತ್ತರಾದ ಪೊಲೀಸ್ ಅಧಿಕಾರಿ, ಗುಪ್ತಚರ ವಿಭಾಗದ ಸಿಬಂದಿ ಚೇತನ್ ಕುಮಾರ್ ಅವರ ಜತೆ ಇಲಾಖಾ ವಾಹನದಲ್ಲಿ ತೆರಳಿ ಪರಿಶೀಲಿಸಿದಾಗ ತ್ರಿಬಲ್‌ ಮರ್ಡರ್‌ ಬೆಳಕಿಗೆ ಬಂದಿದೆ. ಕಾರಿನ ಢಿಕ್ಕಿಯಲ್ಲಿ ಇಬ್ಬರ ಮೃತದೇಹ ಹಾಗೂ ಹಿಂಬದಿ ಸೀಟಿನಲ್ಲಿ  ಒಬ್ಬರ ಶವ ಸಂಪೂರ್ಣ ಸುಟ್ಟ ರೀತಿಯಲ್ಲಿ  ಸಿಕ್ಕಿದೆ. ಢಿಕ್ಕಿಯಲ್ಲಿ ಮೃತದೇಹ ಸಿಕ್ಕ ಕಾರಣ ಇದೊಂದು ಕೊಲೆ ಎಂಬ ನಿರ್ಧಾರಕ್ಕೆ ಪೊಲೀಸರು ಸುಲಭದಲ್ಲಿ ಬಂದಿದ್ದಾರೆ  

ಕುಚ್ಚಂಗಿ ಕೆರೆಯಲ್ಲಿ ಸುಟ್ಟ ಕಾರಿನ ನಂಬರ್ ಪ್ಲೇಟ್ ಮಾಹಿತಿಗಾಗಿ ತಡಕಾಡಿದ ಪೊಲೀಸರಿಗೆ ಅದು ಬೆಳ್ತಂಗಡಿಯ ರಫೀಕ್ ಎಂಬುವರ ಕಾರು ಎಂಬುದು ಗೊತ್ತಾಗಿತ್ತು. ತನ್ನನ್ನು ಸಂಪರ್ಕಿಸಿದ ತುಮಕೂರು ಪೊಲೀಸರಿಗೆ ಈ ವೇಳೆ ಇಸಾಕ್ ಗೆ 15 ದಿನಗಳ ಹಿಂದೆ ಕಾರು ಕೊಟ್ಟಿದ್ದಾಗಿ ಕಾರು ಮಾಲೀಕ ರಫೀಕ್ ಹೇಳಿದ್ದರು. ಒಂದು ಡೀಲ್ ಇದೆ ಎಂದು ಕಾರು ಪಡೆದು ಹೋಗಿದ್ದಾಗಿ ರಫೀಕ್ ಹೇಳಿದ್ದ.

ಇಸಾಕ್‌ ಅವರ ಮೊಬೈಲ್‌ ಕರೆಗಳು ಹಾಗೂ ಟವರ್‌ ಲೊಕೇಶನ್‌ ಪರಿಶೀಲಿಸಿದ ಪೊಲೀಸರಿಗೆ   ತುಮಕೂರಿನ ಸ್ವಾಮಿ ಇದರ ಹಿಂದಿರುವುದು ಗೊತ್ತಾಗಿದೆ. ಅತನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ ಪೊಳಿಸರಿಗೆ ಅವನ ಇನ್ನು ಸಹಚರರು ಸಿಕ್ಕಿ ಬಿದ್ದಿದ್ದಾರೆ.  ಕೋರಾ ಪೊಲೀಸರಿಂದ ತನಿಖೆ ಮುಂದುವರಿದಿದೆ.