ಹಂತಕ ಬಂದು ಸಾಗಿದ ಜಾಡು

ಹಂತಕ ಉಡುಪಿಯ ಸಂತೆ ಕಟ್ಟೆಯಿಂದ, ತೃಪ್ತಿ ಲೇ ಔಟ್‌ ಗೆ ಶ್ಯಾಮ್‌ ಎಂಬವರ ಆಟೋದಲ್ಲಿ ಬಂದಿದ್ದ. ಕೃತ್ಯ ಎಸಗಿದ ಬಳಿಕ ಆರೋಪಿ ಘಟನೆ ನಡೆದ ಸ್ಥಳದಿಂದ ಅನ್ಯರ ಬೈಕ್‌ವೊಂದರಲ್ಲಿ ಸಂತೆಕಟ್ಟೆಗೆ ಆಗಮಿಸಿದ್ದಾನೆ. ಸಾಮಾನ್ಯವಾಗಿ ಅಪರಿಚಿತರನ್ನು ಬೈಕ್‌ ನವರು ಕರೆದುಕೊಂಡು ಹೋಗುವುದಿಲ್ಲ. ಆದರೇ ಕೃತ್ಯ ನಡೆದ ಸ್ಥಳದಿಂದ ಆತ ಬೈಕ್‌ ವೊಂದರಲ್ಲಿ ಸಾಗಿರುವುದು, ಪೂರ್ವ ಯೋಜಿತ ಯೋಜನೆಯ ಭಾಗವಾಗಿರಬಹುದು ಎಂಬ ಅನುಮಾನ ಮೂಡಿಸಿದೆ. ಆ ಬೈಕ್‌ ಸವಾರನಿಗೆ ಹಂತಕನ ಪರಿಚಯ ಇರಬಹುದು, ಅಥಾವ ಆತನೂ ಈ ಹತ್ಯೆಯ ಒಂದು ಭಾಗವಾಗಿರಬಹುದು ಎಂಬ ಅನುಮಾನಕ್ಕೆ ಕಾರಣವಾಗಿದೆ.

ಹತ್ಯೆ ನಡೆದ ಸ್ಥಳದಿಂದ ಬೈಕ್‌ ನಲ್ಲಿ ಸಂತೆ ಕಟ್ಟೆ ರಿಕ್ಷಾ ಸ್ಟ್ಯಾಂಡ್‌ ಗೆ ಬಂದ ಹಂತಕ ಅಲ್ಲಿಂದ ಕರಾವಳಿ ಬೈಪಾಸ್‌ಗೆ ಆಟೋರಿಕ್ಷಾದಲ್ಲಿ ತೆರಳಿದ್ದ. ಅನಂತರ ಅಲ್ಲಿಂದ ಉದ್ಯಾವರದ ಟೊಯೋಟಾ ಶೋರೂಂವರೆಗೆ ಅನ್ಯರ ಬೈಕ್‌ವೊಂದರಲ್ಲಿ ಬಂದಿರುವ ದೃಶ್ಯಾವಳಿಗಳು ಸ್ಥಳೀಯ ಸಿಸಿ ಟಿವಿಗಳಲ್ಲಿ ಸೆರೆಯಾಗಿವೆ.

ಚಾಲಕಿ ಹಂತಕ

ಕೊಲೆಗಾರ ಯಾವುದೇ ಸುಳಿವು ಕೊಡಬಾರದೆಂಬ ಉದ್ದೇಶದಿಂದ ಜಾಗರೂಕತೆ ಹಾಗೂ ಚಾಣಕ್ಷ್ಯತೆಯಿಂದ ಕೃತ್ಯ ಎಸಗಿರುವುದು ಕಂಡು ಬರುತ್ತಿದೆ. ಹಂತಕ ಕೃತ್ಯ ಎಸಗಲು ಸ್ವಂತ ವಾಹನ ಬಳಸಿರಲಿಲ್ಲ. ಕೃತ್ಯ ಎಸಗಿದ ಬಳಿಕ ಪರಾರಿಯಾಗುವ ವೇಳೆ ದೂರ ಕ್ರಮಿಸಲು ಬೇರೆ ವಾಹನ ಬಳಸಿದ್ದು ಸಿಸಿಟಿವಿ ದೃಶ್ಯಗಳಲ್ಲಿ ಗೋಚರಿಸಿದೆ. ಇದರಲ್ಲಿ ಎರಡು ದ್ವಿ ಚಕ್ರ ವಾಹನ ಬಳಸಿರುವುದು ಗಮನಾರ್ಹ. ಅಲ್ಲದೇ ಹಂತಕ ಮುಖಕ್ಕೆ ಮಾಸ್ಕ್‌ ಬಳಸುವ ಮೂಲಕ ಎಲ್ಲಿಯೂ ಮುಖ ಪ್ರದರ್ಶನವಾಗದಂತೆ ಎಚ್ಚರ ವಹಿಸಿದ್ದಾನೆ. ಅಲ್ಲದೇ , ಆಟೋ ಚಾಲಕನಿಗೆ ದಾರಿ ತಪ್ಪಿದ ಸಂದರ್ಭ ಹಂತಕನೇ ಮನೆ ದಾರಿ ತಿಳಿಸಿದ್ದು ಹೀಗಾಗಿ ಒಂದೋ ಆತನಿಗೆ ಮನೆ ಚಿರಪರಿಚಿತ ಅಥಾವ ಹಲವು ಬಾರಿ ಬಂದು ಮನೆಯನ್ನು ಸ್ಟಡಿ ಮಾಡಿದಂತೆ ಗೋಚರಿಸುತ್ತದೆ.

ಇನ್ನೂ ಆರೋಪಿ ಕೃತ್ಯ ನಡೆಸಲು ಹೋಗುವ ವೇಳೆ ಹಾಗೂ ಹತ್ಯೆಯ ಬಳಿಕ ಬೇರೆ ಬೇರೆ ಬಣ್ಣದ ಅಂಗಿ ಧರಿಸಿರುವುದು ಕಂಡು ಬಂದಿದ್ದು, ಹತ್ಯೆ ನಡೆಸಿ ಅದೇ ಮನೆಯಲ್ಲಿ ಬಟ್ಟೆ ಬದಲಿಸಿದಂತೆ ಕಂಡು ಬರುತ್ತದೆ. ಆದರೇ ಹತ್ಯೆ ನಡೆದ ಮನೆಯಲ್ಲಾಗಲ್ಲಿ, ಸುತ್ತಲಿನ ಪರಿಸರದಲ್ಲಾಗಲ್ಲಿ ಆರೋಪಿಯ ರಕ್ತ ಸಿಕ್ತ ಬಟ್ಟೆಯಾಗಲಿ ಅಥಾವ ಕೃತ್ಯಕ್ಕೆ ಬಳಸಿದ ಆಯುಧವಾಗಲಿ ಪತ್ತೆಯಾಗಿಲ್ಲ. ಮೆಟಲ್‌ ಡಿಟೆಕ್ಟರ್‌ ಬಳಸಿ ಹುಡುಕಿದರೂ ಸಿಕ್ಕಿಲ್ಲ.

ಆರೋಪಿಯ ವಿವಿಧ ವಾಹನಗಳಲ್ಲಿ ಸಂಚರಿಸಿರುವುದು, ರಕ್ತದ ಕಲೆಗಳಿದ್ದ ಬಟ್ಟೆ ಬದಲಾಯಿಸಿರುವುದು, ಕೃತ್ಯ ನಡೆಸಿದ ಆಯುಧ ಹಾಗೂ ಯಾವುದೇ ಸಾಕ್ಷ್ಯ ಇಲ್ಲದಂತೆ ಎಚ್ಚರವಹಿಸಿರುವುದು ನೋಡಿದಾಗ ಇದೊಂದು ಪೂರ್ವನಿಯೋಜಿತ ಕೃತ್ಯದಂತೆ ಕಂಡುಬರುತ್ತಿದೆ.

ಹತ್ಯೆಯ ಹೊರಬಿದ್ದ ಬಳಿಕ ಆ ಮನೆಗೆ ಆಗಮಿಸಿದ ಪೊಲೀಸರು 48 ಗಂಟೆ ಕಳೆದರೂ ಮನೆಯನ್ನು ಸಂಪೂರ್ಣವಾಗಿ ತಮ್ಮ ಸುಪರ್ದಿಯಲ್ಲಿ ಇಟ್ಟುಕೊಂಡಿದ್ದಾರೆ. .ಮನೆಮಂದಿ ಸೇರಿದಂತೆ ಯಾರೂ ಆ ಮನೆ ಪ್ರದೇಶಕ್ಕೆ ಬಾರದಂತೆ ಪೊಲೀಸರು ನಿರ್ಬಂಧ ವಿಧಿಸಿದ್ದಾರೆ. ಮೃತರ ಎಲ್ಲ ಮೊಬೈಲ್‌ ಇನ್ನಿತರ ಸೊತ್ತುಗಳನ್ನು ಪೊಲೀಸರು ತಮ್ಮ ವಶಕ್ಕೆ ಪಡೆದುಕೊಂಡಿದ್ದಾರೆ. ಮನೆ ಯಜಮಾನ ನೂರ್‌ ಮೊಹಮ್ಮದ್‌, ಅವರ ತಾಯಿ ಹಾಜಿರಾಬಿ ಮತ್ತು ನೂರ್‌ ಅವರ ಹಿರಿಯ ಪುತ್ರ ಅವರ ಸಂಬಂಧಿಕರ ಮನೆಯಲ್ಲಿ ಆಶ್ರಯ ಪಡೆದುಕೊಂಡಿದ್ದಾರೆ.

ನೂರ್‌ ಮೊಹಮ್ಮದ್‌ ಕುಟುಂಬ ಸಾಕಷ್ಟು ಸ್ಥಿತಿವಂತ ಕುಟುಂಬವಾಗಿತ್ತು . ನೂರು ಅವರು ಸ್ವತ: ವಿದೇಶದಲ್ಲಿ ಉದ್ಯೋಗ ಮಾಡಿಕೊಂಡು ಹಣ ಸಂಪಾದಿಸುತ್ತಿದ್ದು, ಇಬ್ಬರು ಪುತ್ರಿಯರು ಹಾಗು ಓರ್ವ ಪುತ್ರ ಕೂಡ ಉದ್ಯೋಗದಲ್ಲಿದ್ದು ಸಂಪಾದನೆ ಮಾಡುತ್ತಿದ್ದರು. ಈ ಹಣವನ್ನು ನೂರ್‌ ಪತ್ನಿ ಹಸಿನಾ ಅವರು ಬೇರೆ ಬೇರೆ ಕಡೆ ಹೂಡಿಕೆ ಮಾಡಿದ್ದು, ಈ ವ್ಯವಾಹರದಲ್ಲಿ ಉಂಟಾದ ಮನಸ್ತಾಪ ಈ ಕಗ್ಗೊಲೆಗೆ ಕಾರಣವಾಯಿತೇ ಎನ್ನುವ ಬಗ್ಗೆಯೂ ಚರಚೆ ನಡೆಯುತ್ತಿದೆ

ಅಣ್ಣನ ಮಗಳಿಂದ ದೂರು:

ಕೊಲೆಗೈದು ಪರಾರಿಯಾಗುತ್ತಿದ್ದ ಹಂತಕನನ್ನು ಪ್ರತ್ಯಕ್ಷದರ್ಶಿಯಾಗಿ ಕಂಡ ಮೃತ ಹಸೀನಾರ ಅಣ್ಣನ ಮಗಳು ಐಫಾ (24) ನೀಡಿದ ದೂರಿನಂತೆ ಮಲ್ಪೆ ಪೊಲೀಸ್ ಠಾಣೆಯಲ್ಲಿ ಕಲಂ: 449, 302, 307, 324 ಐಪಿಸಿಯಂತೆ ಪ್ರಕರಣ ದಾಖಲಾಗಿದೆ.

ಮನೆಯಲ್ಲಿ ವರ್ಕ್ ಫ್ರಂ ಹೋಮ್ ಕೆಲಸ ಮಾಡಿಕೊಂಡಿದ್ದ ಐಫಾ, ಪಕ್ಕದಲ್ಲಿ ರುವ ಅತ್ತೆಯ ಮನೆಯಲ್ಲಿ ಬೊಬ್ಬೆ ಕೇಳಿ ಓಡಿ ಬಂದಿದ್ದು, ಈ ವೇಳೆ ಹಂತಕ ಅಲ್ಲಿಂದ ಪರಾರಿಯಾದನು. ಈ ಬಗ್ಗೆ ಹಂತಕನನ್ನು ಕಣ್ಣಾರೆ ಕಂಡಿರುವ ಇವರು ಈ ಪ್ರಕರಣದ ಪ್ರಮುಖ ಸಾಕ್ಷಿಯಾಗಿದ್ದಾರೆ.