ಬಿಜೆಪಿ ರಾಜ್ಯಾಧ್ಯಕ್ಷರ ಆಪ್ತ ಮೂಲಗಳ ಪ್ರಕಾರ ಸಚಿವ ಅಂಗಾರರಿಗೆ ಈ ಬಾರಿ ಟಿಕೆಟ್ ಕೈ ತಪ್ಪಲಿದೆ. 1994 ರಿಂದ ಪ್ರತಿ ಚುನಾವಣೆಯಲ್ಲಿ ಜಯಭೇರಿ ಭಾರಿಸುತ್ತಿರುವ ಅವರ ಪರ ಸಹಜವಾಗಿಯೇ ದೊಡ್ಡ ಮಟ್ಟದ ಆಡಳಿತ ವಿರೋಧಿ ಅಲೆಯಿದೆ. ಸರಳ, ಸಚ್ಚಾರಿತ್ರ್ಯವಂತ, ಪ್ರಾಮಾಣಿಕ, ಅಜಾತಶತ್ರು, ಕಳಂಕ ರಹಿತ, ಸಜ್ಜನಿಕೆಯ ವ್ಯಕ್ತಿ ಎಂಬ ಕಾರಣಕ್ಕೆ ಅವರ ಪರ ಈಗಲೂ ಪಕ್ಷದ ಕಾರ್ಯಕರ್ತರಿಗೆ ಒಲವಿದ್ದರು, ಕ್ಷೇತ್ರದಲ್ಲಿ ಬಹಳಷ್ಟು ಕಾರ್ಯಗಳು ಆಗಿಲ್ಲ ಎಂಬ ಬೇಗುದಿಯು ಮನಸ್ಸಿನಲ್ಲಿದೆ. ಅಂಗಾರರು 6 ಬಾರಿ ಕ್ಷೇತ್ರವನ್ನು ಪ್ರತಿನಿಧಿಸಿದ ಬಳಿವು ಈಗಲೂ ಅಲ್ಲಿ ಮೂಲಭೂತ ಸೌಕರ್ಯಗಳಾದ ರಸ್ತೆ, ಕುಡಿಯುವ ನೀರು, ಸೇತುವೆ, ವಿದ್ಯುತ್, ಮೊಬೈಲ್ ನೆಟ್ ವರ್ಕ್, ಸಾರಿಗೆ ಹಾಗೂ ಗುಣಮಟ್ಟದ ಆಸ್ಫತ್ರೆಯ ಕೊರತೆಯಿದೆ. ಇದು ಕ್ಷೇತ್ರದ ಜನತೆಯನ್ನು ಕಾಡುತ್ತಿದ್ದು ಬದಲಾವಣೆಯ ಕೂಗು ಎದ್ದಿದೆ

ಕಲ್ಲಡ್ಕ ಮಧ್ಯಸ್ಥಿಕೆಯಲ್ಲಿ ನಿರ್ಧಾರ

ಕಳೆದ ಬಾರಿ ನಡೆದ ಎಸ್ಡಿಸಿಸಿ ಬ್ಯಾಂಕ್ ನಿರ್ದೇಶಕರ ಚುನಾವಣೆಯಲ್ಲಿ ಸುಳ್ಯದಲ್ಲಿ ಸಹಕಾರ ಭಾರತಿಯ ಬಳಿ ಚುನಾವಣೆ ಗೆಲ್ಲಲು ಬೇಕಾದಷ್ಟು ಮತಗಳಿದ್ದರೂ, ಅಡ್ಡ ಮತದಾನ ನಡೆದು ಅದರ ಅಭ್ಯರ್ಥಿ ಸೋಲು ಅನುಭವಿಸಿ ರಾಜೇಂದ್ರ ಕುಮಾರ್ ಬಣದ ಅಭ್ಯರ್ಥಿ ಗೆಲುವಿನ ನಗೆ ಬೀರಿದ್ದರು. ಸಹಕಾರಿ ಭಾರತಿಯು ಬಿಜೆಪಿಯದೇ ಅಂಗವಾಗಿದ್ದು, ಅಡ್ಡಮತದಾನದಂತಹ ಅಶಿಸ್ತು ನಡೆದರೂ, ಬಿಜೆಪಿ ತಪ್ಪಿತಸ್ಥರ ವಿರುದ್ದ ಶಿಸ್ತು ಕ್ರಮ ಕೈಗೊಂಡಿಲ್ಲ ಎಂದು ಒಂದು ಬಣ ಪಕ್ಷದ ವಿರುದ್ದ ತಿರುಗಿ ಬಿದ್ದಿತ್ತು. ಅಶಿಸ್ತು ತೋರಿದವರ ವಿರುದ್ದ ಸುಳ್ಯ ಬಿಜೆಪಿ ಕಠಿಣ ಕ್ರಮ ಕೈಗೊಂಡಿಲ್ಲ, ಅಂಗಾರರು ನಿರ್ಲಕ್ಷ್ಯ ವಹಿಸಿದ್ದಾರೆಂದು, ಹೀಗಾಗಿ ಅವರಿಗೆ ಮುಂದಿನ ಬಾರಿ ಎಂಎಲ್‌ ಎ ಟಿಕೆಟ್‌ ನೀಡಬಾರದೆಂದು ಈ ಬಣ ಆಗ್ರಹಿಸಿತ್ತು. ಇದಕ್ಕೂ ಪಕ್ಷ ಸೊಪ್ಪು ಹಾಕದಿದ್ದಾಗ, ಬಳಿಕ ನಡೆದ ಗ್ರಾ. ಪಂ ಚುನಾವಣೆಯಲ್ಲಿ ಪಕ್ಷದಿಂದ ಸಿಡಿದು ಪ್ರತ್ಯೇಕವಾಗಿ ಸ್ಪರ್ಧಿಸಿ ಹಲವೆಡೆ ವಿಜಯಿಯಾಗಿ ಒಂದೆರಡು ಪಂಚಾಯತಿನಲ್ಲಿ ಅಧಿಕಾರ ಕೂಡ ಪಡೆದಿತ್ತು.

ಬಣ ರಾಜಕೀಯ ಅಂತ್ಯ

ಒಂದು ಕಾಲದಲ್ಲಿ ಪಕ್ಷದ ಶಿಸ್ತಿಗೆ, ಸಂಘಟನೆಗೆ ಹೆಸರುವಾಸಿಯಾಗಿದ್ದ ಸುಳ್ಯದಲ್ಲಿ ಈ ಬಾರಿ ಬಣ ರಾಜಕೀಯ ವಿಪರೀತವಾಗಿ. ಪಕ್ಷದ ವರ್ಚಸ್ಸಿಗೆ ಡ್ಯಾಮೇಜ್ ಆಗುತ್ತಿರುವುದನ್ನು ಮನಗಂಡು, ಗೊಂದಲ ಪರಿಹರಿಸಲು ಮಧ್ಯಸ್ಥಿಕೆ ನಡೆಸಿದ ಕಲ್ಲಡ್ಕ ಪ್ರಭಾಕರ ಭಟ್, ಎರಡು ಬಣಗಳ ನಡುವಿನ ಮನಸ್ತಾಪ ಉಪಶಮನಗೊಳಿಸಲು ಪ್ರಯತ್ನಿಸಿದ್ದರು ಎನ್ನಲಾಗಿದೆ. ಈ ವೇಳೆ ಅವರು ಒಂದು ಬಣದ ಆಪೇಕ್ಷೆಯಂತೆ, ಮುಂದಿನ ಚುನಾವಣೆಯಲ್ಲಿ ಅಭ್ಯರ್ಥಿ ಬದಲಿಸುವ ಭರವಸೆ ನೀಡಿದ್ದು ಇದಕ್ಕೆ ರಾಜ್ಯ ಬಿಜೆಪಿ ಹೈಕಮಾಂಡ್ ಕೂಡ ಒಪ್ಪಿಗೆ ಸೂಚಿಸಿತ್ತು ಎಂದು ಹೇಳಲಾಗುತ್ತಿದೆ. ಈ ಒಪ್ಪಂದದೊಂದಿಗೆ ಸುಳ್ಯದಲ್ಲಿ ಬಣ ರಾಜಕೀಯಕ್ಕೆ ಅಂತ್ಯ ಹಾಡಲಾಗಿತ್ತು ಎನ್ನಲಾಗುತ್ತಿದೆ. ಅದರಂತೆ ಈಗ ಅಂಗಾರರನ್ನು ಬದಲಿಸಿ ತನ್ನ ಖಾಸ ಶಿಷ್ಯನನ್ನು ಅಭ್ಯರ್ಥಿಯಾಗಿಸಲು ಭಟ್ ಮುಂದಾಗಿದ್ದು, ಇದಕ್ಕೆ ರಾಜ್ಯಾಧ್ಯಕ್ಷ ಕಟೀಲು ಕೂಡ ಸಮ್ಮತಿಸಿದ್ದರೆಂದು ಮೂಲಗಳಿಂದ ತಿಳಿದು ಬಂದಿದೆ. ಅಭ್ಯರ್ಥಿ ಬದಲಿಸದಿದ್ದರೇ ವಿರೋಧಿ ಬಣದವರು ಗ್ರಾ. ಪಂ ಚುನಾವಣೆ ಮಾದರಿಯಲ್ಲಿ ಪಕ್ಷೇತರ ಅಭ್ಯರ್ಥಿ ಇಳಿಸುವ ಎಚ್ಚರಿಕೆಯನ್ನು ರವಾನಿಸಿದ್ದರು.

ಒಂದೆಡೆ ಸಹಜವಾಗಿ ಇರುವ 6 ಅವಧಿಯ ಅಡಳಿತ ವಿರೋಧಿ ಆಲೆ, ಇನ್ನೊಂದೆಡೆ ಹೊಸ ಅಭ್ಯರ್ಥಿಗೆ ಅವಕಾಶ ನೀಡಿ ಎಂಬ ಕೂಗು, ಮತ್ತೂಂದೆಡೆ ಪಕ್ಷದೊಳಗಿನ ಆತಂರಿಕ ಭಿನ್ನಮತ ಈ ಬಾರಿ ಅಂಗಾರರಿಂದ ಕೈ ಯಿಂದ ಟಿಕೆಟ್‌ ತಪ್ಪಿಸುವ ಸಾಧ್ಯತೆಯೆ ಅಧಿಕ ಎನ್ನುವುದು ರಾಜಕೀಯ ಪಡಸಾಲೆಯಲ್ಲಿ ಕೇಳಿ ಬರುತ್ತಿರುವ ಮಾತು. ಕಳೆದ ಬಾರಿಯೇ ಅಭ್ಯರ್ಥಿ ಬದಲಿಸುವ ಬಗ್ಗೆ ಚಿಂತನೆ ನಡೆಸಲಾಗಿತ್ತಾದರೂ , ಅಂಗಾರರನ್ನು ಸಚಿವರನ್ನಾಗಿಸುವ ಮೂಲಕ ಪಕ್ಷದ ವಿಧೇಯ ನಾಯಕನಿಗೆ ಗೌರವಯುತ ವಿದಾಯ ನೀಡಲು ಪಕ್ಷ ಹೈಕಮಾಂಡ್ ನಿರ್ಧರಿಸಿದ್ದರಿಂದ ಕೊನೆ ಕ್ಷಣದಲ್ಲಿ ಟಿಕೆಟ್‌ ಲಭಿಸಿತ್ತು ಎನ್ನುವುದು ರಾಜಕೀಯ ಪಂಡಿತರ ಅಂಬೋಣ.

ಹೊಸ ಅಭ್ಯರ್ಥಿ – ಅಮ್ಟೂರು ಬಹುತೇಕ ನಿಶ್ಚಿತ

ಹೀಗಾಗಿ ಅಂಗಾರರ ಬದಲು ಬಂಟ್ವಾಳ ತಾ.ಪಂ ಮಾಜಿ ಉಪಾಧ್ಯಕ್ಷ, ಬಿಜೆಪಿ ಎಸ್ ಸಿ ಮೋರ್ಚಾದ ಜಿಲ್ಲಾ ಮುಖಂಡ ದಿನೇಶ್ ಅಮ್ಟೂರು ಅವರನ್ನು ಸುಳ್ಯದಿಂದ ಕಣಕ್ಕಿಳಿಸಲು ಬಿಜೆಪಿ ಹೈಕಮಾಂಡ್ ಮುಂದಾಗಿದ್ದು, ಅಂಗಾರರಿಗೆ ಟಿಕೆಟ್ ಕೈ ತಪ್ಪಿದರೆ ಇವರಿಗೆ ಟಿಕೆಟ್ ಪಕ್ಕಾ ಪಕ್ಷದ ಮೂಲಗಳು ತಿಳಿಸಿವೆ. ಇವರು ಕಲ್ಲಡ್ಕ ಡಾ| ಪ್ರಭಾಕರ ಭಟ್ ಅವರ ಶಿಷ್ಯನಾಗಿದ್ದು, ಜಿಲ್ಲಾ ಮಟ್ಟದಲ್ಲಿ ಪಕ್ಷದ ವಿವಿಧ ಹುದ್ದೆಗಳನ್ನು ನಿರ್ವಹಿಸಿದ್ದಾರೆ. ಎಸ್ ಸಿ ಮೋರ್ಚಾದ ಜಿಲ್ಲಾಧ್ಯಕ್ಷ ಹುದ್ದೆಯನ್ನು ಅವರು ಅಲಂಕರಿಸಿದ್ದರು.

ಕಡು ಬಡತನ ಮಧ್ಯೆಯೂ 9 ನೇ ತರಗತಿಯವರೆಗೆ ವ್ಯಾಸಂಗ ಮಾಡಿರುವ ಅವರು, ಹಿಂದೂ ಸಂಘಟನೆಗಳಲ್ಲಿಯೂ ಸಕ್ರಿಯವಾಗಿ ಗುರುತಿಸಿಕೊಂಡಿದ್ದರು. ಹಿಂದೂ ಸೇವಾ ಪ್ರತಿಷ್ಠಾನ ಸಂಚಾಲಕರಾಗಿದ್ದ ಅವರು ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಕಟ್ಟಾಳು. ಪ್ರಸ್ತುತ ಎಸ್ಸಿ ಮೋರ್ಚಾದ ರಾಜ್ಯ ಕಾರ್ಯಕಾರಿಣಿ ಸದಸ್ಯರಾಗಿ, ಮಂಗಳೂರು ಉಡುಪಿ ಹಾಸನದ ಬಿಜೆಪಿ ಸಹ ಪ್ರಭಾರಿಯಾಗಿ, ಯುವಜನ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಉಳಿದ ಟಿಕೆಟ್ ಆಕಾಂಕ್ಷಿಗಳು

ಜಿ.ಪಂ ಸದಸ್ಯೆಯಾಗಿದ್ದ ಭಾಗೀರಥಿ ಮುರುಳ್ಯ, ಮಾಜಿ ತಾ. ಪಂ ಸದಸ್ಯರಾದ, ಚನಿಯ ಕಲ್ತಡ್ಕ ಹಾಗೂ ಮಂಡೆಕೋಲಿನ ಶಂಕರ ಪೆರಾಜೆ ಅವರ ಅಕಾಂಕ್ಷಿಗಳಾಗಿ ಪಕ್ಷದಲ್ಲಿ ಚಾಲ್ತಿಯಲ್ಲಿದೆ. ಹೊಸ ಮುಖಗಳಿಗೆ ಅದ್ಯತೆ ನೀಡಿದರೆ. ಸಂಘದ ಸಕ್ರಿಯ ಕಾರ್ಯಕರ್ತ 31 ರ ಹರೆಯದ ಎಂ.ಕಾಂ ಪದವೀಧರ ಶಿವ ಪ್ರಸಾದ್ ಪೆರುವಾಜೆ ಅವರ ಹೆಸರನ್ನು ಪರಿಗಣಿಸಬಹುದು ಎಂದು ಹೇಳಲಾಗುತ್ತಿದೆ