ಪುತ್ತೂರು : ಫೆ 10 ; ನ್ಯಾಯಯುತ ವ್ಯವಹಾರ(Fair Deal)ಎಂಬ ಘೋಷವಾಕ್ಯ ಇಟ್ಟುಕೊಂಡು ಕರ್ನಾಟಕ ಮತ್ತು ಕೇರಳ ಅಡಿಕೆ ಬೆಳೆಗಾರರಿಗೆ ಅವರ ಸಂಕಷ್ಟದ ಕಾಲದಲ್ಲಿ  ಆಶಾಕಿರಣವಾಗಿ ಮೂಡಿಬಂದ ಬಹು ರಾಜ್ಯ ಸಹಕಾರಿ ಸಂಸ್ಥೆ ಕ್ಯಾಂಪ್ಕೊ. 1973 ರ ಜುಲೈ 11 ರಂದು ಸಹಕಾರಿ ರತ್ನ ಸುಬ್ರಾಯ ಭಟ್ಟರು ನೆಟ್ಟ ಸಸಿ ಇಂದು ಹೆಮ್ಮರವಾಗಿ ಬೆಳೆದಿದೆ. ಅಡಿಕೆ ಬೆಳೆಗಾರರ ಹಿತ ರಕ್ಷಣೆಯೇ ಕ್ಯಾಂಪ್ಕೋದ ಮುಖ್ಯ ಉದ್ದೇಶ, ಅದಕ್ಕಾಗಿಯೇ ಅಡಿಕೆ ಸಂಶೋಧನೆ ಮತ್ತು ಅಭಿವೃದ್ಧಿ ಪ್ರತಿಷ್ಠಾನವನ್ನು ಸ್ಥಾಪಿಸಿ ಅಡಿಕೆಯ ಪರ್ಯಾಯ ಉಪಯೋಗದ ಅನ್ವೇಷನೆಗೆ ಶ್ರಮಿಸುತ್ತಿದೆ.

ಕೊಕ್ಕೊ ಖರೀದಿಯನ್ನು ಬಹುರಾಷ್ಟ್ರೀಯ ಕಂಪೆನಿಗಳು ನಿಲ್ಲಿಸಿದಾಗ ಕ್ಯಾಂಪ್ಕೊ ಕೊಕ್ಕೊ ಬೆಳೆಗಾರರನ್ನು ಸಂಕಷ್ಟದಿಂದ ಪಾರು ಮಾಡಲು 1979ರಲ್ಲಿ ಕೊಕ್ಕೊ ಖರೀದಿ ಪ್ರಾರಂಭಿಸಿತು. ಮುಂದೆ1986ರಲ್ಲಿ ಪುತ್ತೂರಿನಲ್ಲಿ ಚಾಕಲೇಟ್ ಕಾರ್ಖಾನೆಯನ್ನು ಸ್ಥಾಪಿಸಿ ಕೊಕ್ಕೊ ಬೆಳೆಗಾರರ ಹಿತ ರಕ್ಷಣೆ ಮಾಡುವುದರ ಮೂಲಕ ಬಹುರಾಷ್ಟ್ರೀಯ ಕಂಪೆನಿಗಳ ಏಕಸೌಮ್ಯಕ್ಕೆ ಬಲವಾದ ಪೆಟ್ಟು ನೀಡಿದೆ ̤ .2010ರಲ್ಲಿ ರಬ್ಬರ್ ಬೆಳೆಗಾರರಿಗಾಗಿ ರಬ್ಬರ್ ಖರೀದಿ ಪ್ರಾರಂಬಿಸಿ ರೈತರನ್ನು ಆರ್ಥಿಕವಾಗಿ ಸಬಲೀಕರಣಗೊಳಿಸಲು ಶ್ರಮಿಸುತ್ತಿದೆ.2016 ರಲ್ಲಿ ಕಾಳುಮೆಣಸು ಖರೀದಿ ಮತ್ತು ಸುವರ್ಣ ಮಹೋತ್ಸವದ ಸುಸಂದರ್ಭದಲ್ಲಿ ತೆಂಗಿನಕಾಯಿ ಎಣ್ಣೆಯ ಉತ್ಪಾದನೆಯನ್ನು ಪ್ರಾರಂಭ ಮಾಡಿದೆ.

alt="Ad Widget"/>

ಹೀಗೆ ತನ್ನ ಕೊಂಬೆಗಳನ್ನು ವಿವಿಧ ಮಗ್ಗುಲಗಳಿಗೆ ವಿಸ್ತರಿಸುವ ಮೂಲಕ ಕ್ಯಾಂಪ್ಕೋ  ರೈತರ ಬಾಳಿನ ಕಲ್ಪವೃಕ್ಷವಾಗಿ ಅವರ ಹಿತವನ್ನು ಕಾಪಾಡುವಲ್ಲಿ ಯಶಸ್ಸು ಕಂಡಿದೆ. ಅಡಿಕೆ ಬೆಳೆಗಾರರನ್ನು ಮಿಶ್ರಬೆಳೆ ಕೃಷಿಯಲ್ಲಿ ತೊಡಗಿಸಲು ಪ್ರೇರಣೆ ನೀಡುವುದರ ಮೂಲಕ ರೈತರನ್ನು ಆರ್ಥಿಕ ಸದೃಢರನ್ನಾಗಿಸಿದೆ. 2005ರಲ್ಲಿ ಸರಕಾರದ ಷೇರನ್ನು ಹಿಂತಿರುಗಿಸಿದ ನಂತರ  ಸದೃಢವಾಗಿ ಬೆಳೆಯುತ್ತಿರುವ ಸಂಸ್ಥೆ ಸುಮಾರು 1.32 ಲಕ್ಷ ಸದಸ್ಯರ ಹಿತ ಕಾಯುವ ಕಾವಲುಗಾರ.

<>

 ಪ್ರಾರಂಭದಲ್ಲಿ ಮಂಗಳೂರಿನಲ್ಲಿ ಖರೀದಿ ಕೇಂದ್ರ ಆರಂಭಿಸಿದ ಸಂಸ್ಥೆ, ಇಂದು ಕರ್ನಾಟಕ ಮತ್ತು ಕೇರಳದಲ್ಲಿ 100ಕ್ಕಿಂತಲೂ ಹೆಚ್ಚು ಶಾಖೆಗಳನ್ನು ತೆರದು ಅಡಿಕೆ,ಕೊಕ್ಕೊ,ರಬ್ಬರ್ ಮತ್ತು ಕಾಳು ಮೆಣಸು ಖರೀದಿಸುತ್ತಿದೆ. ಉತ್ತರ ಭಾರತದಲ್ಲಿ 16 ಮಾರಾಟ ಮಳಿಗೆಗಳನ್ನು ನಡೆಸುತ್ತಿರುವ ಮೂಲಕ ರೈತರು ಮತ್ತು ಗ್ರಾಹಕರ ಮಧ್ಯೆ ಬೆಸುಗೆಯನ್ನು ಬೆಸೆದು ಇಬ್ಬರಿಗೂ ದರ ಮತ್ತು ಗುಣಮಟ್ಟದಲ್ಲಿ  ಭರವಸೆಯ ಭಾವ ಮೂಡಿಸಿದ. ಉತ್ತಮ ಗುಣಮಟ್ಟದ ಕೊಕ್ಕೊ ಉತ್ಪನ್ನಗಳನ್ನು ತಯಾರಿಸಿ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಟ್ಟದಲ್ಲಿ ಮನ್ನಣೆ ಪಡೆದಿದೆ.ಅದಕ್ಕಾಗಿ ಹತ್ತು ಹಲವು ಪ್ರಶಸ್ತಿಗಳನ್ನು ತನ್ನ ಮುಡಿಗೆರಿಸಿದೆ.

 ಸಂಸ್ಥೆಯೂ ಸ್ಥಳೀಯ ಯುವಕರಿಗೆ ಉದ್ಯೋಗವನ್ನು ನೀಡಿ ಆತ್ಮ ನಿರ್ಭರ ಭಾರತ ನಿರ್ಮಾಣಕ್ಕೆ ತನ್ನದೇ ಆದ ಕೊಡುಗೆ ನೀಡುತ್ತಿದೆ.ಉತ್ತರ ಕರ್ನಾಟಕಲ್ಲಿ ಪವನಯಂತ್ರ ಮತ್ತು ಪುತ್ತೂರಿನಲ್ಲಿ ಸೌರ ಶಕ್ತಿಯ ಮೂಲಕ ಗ್ರೀನ್ ಎನರ್ಜಿಗೆ ಒತ್ತು ನೀಡಿದೆ.  ಕಾರ್ಖಾನೆಗೆ ಬೇಕಾದ ವಿದ್ಯುತ್ ಉತ್ಪಾದನೆಯಲ್ಲಿ ಸ್ವಾವಲಂಬನೆ ಸಾಧಿಸಿದ ಕ್ಯಾಂಪ್ಕೊ ಪರಿಸರ ಸ್ನೇಹಿ ಸಂಸ್ಥೆ.  ಬಹುಕೋಟಿ ವೆಚ್ಚದಲ್ಲಿ ಸುಸಜ್ಜಿತವಾಗಿ ನಿರ್ಮಿಸಲ್ಪಟ್ಟ ಆಡಳಿತ ಕಚೇರಿಯನ್ನು ಹೊಂದಿರುವ ಚಾಕಲೇಟ್ ಕಾರ್ಖಾನೆ, ಬಹುರಾಷ್ಟ್ರೀಯ ಕಂಪೆನಿ ಶೈಲಿಯಲ್ಲಿ ಕಾರ್ಯನಿರ್ವಹಿಸುವ ರೈತರಿಂದ ಸ್ಥಳಿಯವಾಗಿ ಪ್ರಾರಂಭವಾದ ಒಂದು ಹೆಮ್ಮೆಯ ಸ್ವದೇಶಿ ಸಹಕಾರಿ ಸಂಸ್ಥೆ. 

ಕಾರ್ಖಾನೆ ಪ್ರಾರಂಭದ ದಿನಗಳಲ್ಲಿ ನಿಯೋಜಿಸಿರುವ ಯಂತ್ರಗಳಿಂದಲೇ ಪ್ರಸ್ತುತ ಉತ್ಪನ್ನಗಳ ಉತ್ಪಾದನೆಯನ್ನು ನಡೆಸುತ್ತಿದೆ. ಸ್ಥಾಪಕ ಅಧ್ಯಕ್ಷರು ತುಂಬಾ ಗುಣಮಟ್ಟದ ಯಂತ್ರಗಳನ್ನು ವಿದೇಶದಿಂದ ಆಮದು ಮಾಡಿ ನಿಯೋಜನೆ ಮಾಡಲಾಗಿತ್ತು.ಆದ್ದರಿಂದಲೇ ಮಾನ್ಯತೆ ಸಮಯ ಮೀರಿದರೂ ಯಾವುದೇ ತಾಂತ್ರಿಕ ತೊಂದರೆ ಇಲ್ಲದೆ ಅದು ಕಾರ್ಯನಿರ್ವಹಿಸುತ್ತಿದೆ. ಮುಂದಿನ 5 ವರ್ಷಗಳಲ್ಲಿ ಸುಮಾರು 100 ಕೋಟಿಗಳಷ್ಟು ಹಣ ಹೂಡಿಕೆ ಮಾಡಿ ಹಳೆಯ ಯಂತ್ರಗಳನ್ನು ಬದಲಿಸಿ ಹೊಸ ಯಂತ್ರಗಳನ್ನು ನಿಯೋಜಿಸುವ ಕ್ರಾಂತಿಕಾರಕ ಯೋಜನೆಯನ್ನು ಆಡಳಿತ ಮಂಡಳಿ ಕೈಗೆತ್ತಿಕೊಂಡಿದೆ.

ಅಡಿಕೆ ಮತ್ತು ಕಾಳುಮೆಣಸುಗಳ ಶೇಖರಣೆ ಮತ್ತು ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸುವ ದೃಷ್ಟಿಯಿಂದ ಪುತ್ತೂರಿನ ಕಾವು,ಸಾಗರ ಮತ್ತು ಭದ್ರಾವತಿಗಳಲ್ಲಿ ಬಹು ಉದ್ದೇಶ ಮತ್ತು ಬಹು ಸೌಲಭ್ಯಗಳುಳ್ಳ ಸರ್ವ ಋತುಗಳಲ್ಲೂ ಕಾರ್ಯನಿರ್ವಹಿಸಲು ಯೋಗ್ಯವಾದ ಗೋದಾಮ್ ಗಳನ್ನು ನಿರ್ಮಾಣ ಮಾಡಲಾಗಿದೆ.

ಕ್ಯಾಂಪ್ಕೊದ ಚಿತ್ತ ಸದಸ್ಯರ ಆರೋಗ್ಯದತ್ತ ಯೋಜನೆಯಲ್ಲಿ ಆನಾರೋಗ್ಯ ಪೀಡಿತ ಸಕ್ರೀಯ ಸದಸ್ಯರ ಚಿಕಿತ್ಸಗೆ ಧನ ಸಹಾಯ ಹಾಗೂ ಮೃತ ಸದಸ್ಯ ಮತ್ತು ಕೂಲಿಗಾರ ಕುಟುಂಬಕ್ಕೆ ಆರ್ಥಿಕ ನೆರವು ನೀಡುವ ಮೂಲಕ ರೈತ ಕುಟುಂಬಕ್ಕೆ ಆರ್ಥಿಕ ಭದ್ರತೆ ನೀಡುತ್ತಿದೆ.

ಕ್ಯಾಂಪ್ಕೊ ಓನ್ ವ಼ೀಲ್ ಮೂಲಕ ಮನೆ ಮನೆಯಿಂದ ಅಡಿಕೆ ಖರೀದಿಸುವ ಯೋಜನೆ,ಸಬ್ಸಿಡಿ ದರದಲ್ಲಿ ಮೈಲುತುತ್ತು ವಿತರಣೆ,ಕೌಶಲ್ಯ ತರಬೇತಿ ಕಾರ್ಯಾಗಾರದ ಮೂಲಕ ರೈತರ ತಾಂತ್ರಿಕ ಉನ್ನತೀಕರಣ,ಕೃಷಿ ಯಂತ್ರಮೇಳದ ಮೂಲಕ ಯಾಂತ್ರೀಕರಣಕ್ಕೆ ಉತ್ತೇಜನ,ಅಡಿಕೆಯ ಪರ್ಯಾಯ ಉಪಯೋಗದ ಸಂಶೋಧನೆಗೆ ಪ್ರೋತ್ಸಾಹ,ಗಳಿಸಿದ ಲಾಭದ ವಿತರಣೆ ಮತ್ತು ಮಾರಾಟ ಮಾಡಿದ ಉತ್ಪನ್ನಕ್ಕೆ ಪ್ರೋತ್ಸಾಹ ಧನದ ಘೋಷಣೆ ಮೂಲಕ ರೈತರಿಗೆ ಉತ್ತಮ ಸೇವೆ ನೀಡುವ ಕಾರ್ಯವನ್ನು ಸಂಸ್ಥೆ ಮಾಡುತ್ತಿದೆ.ಉದ್ಯೋಗಿಗಳಿಗೆ ಉತ್ತಮವಾದ ಬೋನಸ್ ಘೋಷಣೆ ಮಾಡುವ ಮೂಲಕ ಸಂಸ್ಥೆಯ ಬೆಳವಣಿಗೆಯಲ್ಲಿ ಅವರ ಕೊಡುಗೆಯನ್ನು ಗುರುತಿಸಿ ಪ್ರೋತ್ಸಾಹಿಸಿದೆ.ಕೋರೋನಾ ಮತ್ತು ಇತರ ಪ್ರಕೃತಿ ವಿಕೋಪಗಳ ಸಂದರ್ಭಗಳಲ್ಲಿ ಕ್ಯಾಂಪ್ಕೋ ಸರಕಾರದ ಸೇವಾ ಕಾರ್ಯಕ್ರಮಗಳಲ್ಲಿ ಕೈಜೋಡಿಸುವ ಮೂಲಕ ತನ್ನ ಸಾಮಾಜಿಕ ಬದ್ಧತೆಯನ್ನು ಮೆರೆದಿದೆ.

 ಕೊಳೆರೋಗ,ಹಳದಿ ಎಲೆ ರೋಗದ ಸಮಸ್ಯೆ,ಎಲೆಚುಕ್ಕಿ ರೋಗ ಮುಂತಾದ ಹತ್ತು ಹಲವು ಸಮಸ್ಯೆಗಳು ಅಡಿಕೆ ಕೃಷಿ ಮತ್ತು ಕೃಷಿಕರನ್ನು ಬಾಧಿಸುತ್ತಿದೆ.ಮಾರುಕಟ್ಟೆಗೆ ಸಂಬಂಧಿಸಿದಂತೆ ಬೆಲೆಯ ಏರಿಳಿತ,ವಿದೇಶಿ ಅಡಿಕೆಯ ಆಮದು,ಅಡಿಕೆ ವಿರದ್ಧದ ಕಪೋಲ ಕಲ್ಪಿತ ಲೇಖನಗಳು ,ಕಾಳಸಂತೆ ದಂಧೆ,ಪಾನ್ ಮಸಾಲೆ ನಿಷೇಧದ ಭೀತಿ ಮುಂತಾದ ಸಮಸ್ಯೆಗಳನ್ನು ಎದುರಿಸುವ ಜೊತೆಗೆ ಕಾನೂನಾತ್ಮಕ ಹೋರಾಟ ನಡೆಸಿ ರೈತರನ್ನು ಕಾಪಾಡುವ ಮಹತ್ತರ ಜವಾಬ್ಧಾರಿ ಕ್ಯಾಂಪ್ಕೊದ ಮೇಲಿದೆ.

ಈ ಸುದ್ದಿಯನ್ನು ಷೇರ್‌ ಮಾಡಿ

• WhatsApp
• Telegram
• Tweet
• Print

Related Topics:ಕ್ಯಾಂಪ್ಕೋCampcoDakshina KannadaPuttur

Up Next

 ಕ್ಯಾಂಪ್ಕೊ ನಿರ್ಮಿಸಲಿರುವ ʼಅಗ್ರಿಮಾಲ್‌ ʼ ಪರಿಕಲ್ಪನೆ ದೇಶದಲ್ಲೆ ಮೊದಲು – 50 ವರ್ಷ ಪೂರೈಸಿರುವುದೆ ಪ್ರಾಮಾಣಿಕತೆಗೆ ಸರ್ಟಿಫಿಕೆಟ್‌ – ದೇಶದಲ್ಲಿ 2 ಲಕ್ಷ ಪ್ಯಾಕ್ಸ್‌ ಸ್ಥಾಪನೆ : ಸುವರ್ಣ ಮಹೋತ್ಸವ ಉದ್ಘಾಟಿಸಿ ಅಮಿತ್‌ ಶಾ

Don't Miss

ಹಳದಿ ಹಾಗೂ ಎಲೆಚುಕ್ಕಿ ರೋಗದ ಬಗ್ಗೆ ಕೆನಾಡದ ವಿಜ್ಞಾನಿಗಳಿಂದ ಸಂಶೋಧನೆ : ಶೋಭಾ ಕರಂದ್ಲಾಜೆ – ಪುತ್ತೂರಿನಲ್ಲಿ ರಾಜ್ಯ ಮಟ್ಟದ ಬೃಹತ್ ಕೃಷಿ ಯಂತ್ರ ಮೇಳಕ್ಕೆ ಚಾಲನೆ