ಈಗ ಧಾರ್ಮಿಕ ವಿದ್ವಾಂಸರು ಮತ್ತು ಕಾನೂನು ಪರಿಣತರು ಇದರ ದಾಖಲೆ ತಯಾರಿಸಿದ್ದಾರೆ. ಇದು ಶಾಂಭವಿ ಪೀಠಾಧೀಶ್ವರ ಆನಂದ್ ಸ್ವರೂಪ್ ಅವರ ನಾಯಕತ್ವದ ಅಡಿ ನಡೆಯುತ್ತಿರುವ ದಾಖಲೀಕರಣದ ಭಾಗವಾಗಿದೆ. ಈ ಮಾರ್ಗದರ್ಶಿ ಪುಸ್ತಕ 750 ಪುಟಗಳದ್ದಾಗಿರಲಿದೆ.

ಪ್ರಸ್ತುತ ಸಿದ್ಧಪಡಿಸಿರುವ 32 ಪುಟಗಳ ಕರಡಿನಲ್ಲಿ ಅನೇಕ ಅಚ್ಚರಿಯ ಅಂಶಗಳಿವೆ. ಇದರ ಪ್ರಕಾರ, ಭಾರತದ ರಾಜಧಾನಿಯನ್ನು ದಿಲ್ಲಿಯ ಬದಲು ವಾರಾಣಸಿ ಎಂದು ಮಾಡುವಂತೆ ಪ್ರಸ್ತಾವಿಸಲಾಗಿದೆ. ವಾರಾಣಸಿಯು ಸರ್ವಜ್ಞತೆಯ ಕೇಂದ್ರ. ಹೀಗಾಗಿ ಅದನ್ನು ಹಿಂದೂ ರಾಷ್ಟ್ರದ ರಾಜಧಾನಿಯನ್ನಾಗಿ ಮಾಡಬೇಕು ಎಂದು ಕರಡು ಹೇಳಿದೆ.

ಆದರೆ ಈ ಹೆಸರನ್ನು ಚರ್ಚೆಗಾಗಿ ಮಾತ್ರ ಇರಿಸಲಾಗಿದೆ. ಇದನ್ನು ಅಂತಿಮಗೊಳಿಸಲಾಗಿಲ್ಲ. ಉಜ್ಜಯನಿಯಂತಹ ಬೇರೆ ಸ್ಥಳವನ್ನು ಕೂಡ ಪರಿಗಣಿಸಬಹುದಾಗಿದೆ ಎಂದು ಸ್ವಾಮಿ ಆನಂದ್ ಸ್ವರೂಪ್ ತಿಳಿಸಿದ್ದಾರೆ.

ಪ್ರಸ್ತುತದ ಕರಡಿನ ಪ್ರಕಾರ, ಹಿಂದೂಗಳಿಗೆ ಮಾತ್ರ ಭಾರತದಲ್ಲಿ ಮತ ಚಲಾಯಿಸುವ ಹಕ್ಕು ಇರಲಿದೆ. ಮತದಾನದ ಹಕ್ಕನ್ನು ಹೊರತುಪಡಿಸಿ ಮುಸ್ಲಿಮರು ಮತ್ತು ಕ್ರೈಸ್ತರಿಗೆ ಬೇರೆ ಎಲ್ಲ ಹಕ್ಕುಗಳು ಸಿಗಲಿವೆ. ಶಿಕ್ಷಣ ಪಡೆದ ಬಳಿಕ ಅವರು ಉದ್ಯೋಗ ಮತ್ತು ವ್ಯವಹಾರ ನಡೆಸುವ ಅವಕಾಶ ಪಡೆಯಲಿದ್ದಾರೆ. ಆದರೆ ಅವರಿಗೆ ಮತ ಹಾಕುವ ಹಕ್ಕು ಇಲ್ಲ. ಹಿಂದೂಗಳ ಜತೆ, ಬೌದ್ಧರು, ಸಿಖ್ಖರು ಮತ್ತು ಜೈನರಿಗೆ ಸಹ ಮತದಾನದ ಹಕ್ಕು ಇರುತ್ತದೆ.

“ಬೇರೆ ದೇಶಗಳಲ್ಲಿ ಈ ನಿಯಮ ಇರುವಾಗ, ಭಾರತದಲ್ಲಿ ಏಕೆ ಇರಬಾರದು? ಇಸ್ಲಾಮಿಕ್ ದೇಶಗಳಲ್ಲಿ ವಾಸಿಸುತ್ತಿರುವ ಹಿಂದೂಗಳಿಗೆ ಮತದಾನದ ಹಕ್ಕು ಇದೆಯೇ?” ಎಂದು ಆನಂದ್ ಸ್ವರೂಪ್ ಪ್ರಶ್ನಿಸಿದ್ದಾರೆ.

ಶಿಕ್ಷಣ, ಕಾನೂನು ಮತ್ತು ಸುವ್ಯವಸ್ಥೆ, ರಕ್ಷಣೆಯಂತಹ ವಿಷಯಗಳನ್ನು ಈ ಕರಡು ಒಳಗೊಂಡಿದೆ. ಕೃಷಿಯನ್ನು ತೆರಿಗೆ ಮುಕ್ತಗೊಳಿಸುವುದು ಮತ್ತು ಗುರುಕುಲವನ್ನ ಕಡ್ಡಾಯಗೊಳಿಸುವ ಪ್ರಸ್ತಾಪ ಮಾಡಲಾಗಿದೆ. ಸಮಾಜದಲ್ಲಿನ ಅರ್ಹತೆಗಳನ್ನು ವ್ಯಾಖ್ಯಾನಿಸಲು ವರ್ಣ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ.

ಬ್ರಿಟಿಷರ ಕಾಲದ ಎಲ್ಲ ನಿಯಮಗಳನ್ನೂ ರದ್ದುಗೊಳಿಸುವುದು, ಮತದಾನದ ಕನಿಷ್ಠ ವಯೋಮಾನವನ್ನು 16 ವರ್ಷಕ್ಕೆ ಇಳಿಸುವುದು ಹಾಗೂ ಚುನಾವಣೆಗೆ ಸ್ಪರ್ಧಿಸುವ ವಯಸ್ಸನ್ನು 25 ವರ್ಷಕ್ಕೆ ನಿಗದಿಪಡಿಸುವುದು ಸೇರಿದೆ.

30 ಸದಸ್ಯರ ತಂಡ ಈ ಕರಡು ಸಿದ್ಧಪಡಿಸಿದೆ. ಶಾಂಭವಿ ಪೀಠಾಧೀಶ್ವರ ಸ್ವಾಮಿ ಆನಂದ್ ಸ್ವರೂಪ್, ಕಾಮೇಶ್ವರ್ ಉಪಾಧ್ಯಾಯ, ಸುಪ್ರೀಂಕೋರ್ಟ್ ವಕೀಲ ಬಿಎನ್ ರೆಡ್ಡಿ, ರಕ್ಷಣಾ ಪರಿಣತ ಆನಂದ್ ವರ್ಧನ್, ವಿಶ್ವ ಹಿಂದೂ ಸಂಘಟನೆ ಅಧ್ಯಕ್ಷ ಅಜಯ್ ಸಿಂಗ್ ಮತ್ತು ಸನಾತನ ಧರ್ಮದ ಪರಿಣತ ಚಂದ್ರಮಣಿ ಮಿಶ್ರಾ ಅವರನ್ನು ಒಳಗೊಂಡಿದೆ. ‘ಅಖಂಡ ಭಾರತ’ದ ಚಿತ್ರಣದಲ್ಲಿ ಪಾಕಿಸ್ತಾನ ಮತ್ತು ಬಾಂಗ್ಲಾದೇಶ ಸಹ ಸೇರಿವೆ.