ಏನು ಹೇಳುತ್ತಾಳೆ ಮಹಿಳೆ?
ಕೃತ್ಯವು 2011ರಲ್ಲಿ, ಅಂದರೆ ಈ ವಿಡಿಯೊ ಚಿತ್ರೀಕರಣಕ್ಕಿಂತ 13ರಿಂದ 14 ವರ್ಷಗಳ ಹಿಂದೆ ನಡೆದಿದೆ ಎನ್ನಲಾಗಿದೆ. ಸಂತ್ರಸ್ತೆಗೆ ಆಗ 13 ಅಥವಾ 14 ವರ್ಷ ವಯಸ್ಸಾಗಿದ್ದು, 9ನೇ ತರಗತಿ ವ್ಯಾಸಂಗ ಮಾಡುತ್ತಿದ್ದಳು ಎಂದು ಆಕೆ ಹೇಳಿಕೊಂಡಿದ್ದಾಳೆ.
ತನ್ನ ತಾಯಿಯ ಗೆಳತಿಯೊಬ್ಬರ ಮೂಲಕ ಬೆಂಗಳೂರಿನ ಮಣಿಪಾಲ್‌ ಆಸ್ಪತ್ರೆಯ ಹತ್ತಿರದ ಅಪಾರ್ಟ್‌ಮೆಂಟ್‌ನ ನಾಲ್ಕನೇ ಮಹಡಿಯಲ್ಲಿದ್ದ ಕೊಠಡಿಗೆ ತನ್ನನ್ನು ಕರೆದುಕೊಂಡು ಹೋಗಲಾಗಿತ್ತು ಎಂದು ಆಕೆ ವಿವರಿಸಿದ್ದಾಳೆ. ಅಲ್ಲಿ ರಾಜ್ಯದ ಪ್ರಭಾವಿ ರಾಜಕೀಯ ನಾಯಕ ಸೇರಿದಂತೆ ಒಟ್ಟು ನಾಲ್ಕು ಮಂದಿ ಇದ್ದು, ಅಲ್ಲಿ ಎರಡು ಗಂಟೆಗಳ ಕಾಲ ತಾನು ಕಳೆದಿದ್ದಾಗಿ ವಿಡಿಯೊದಲ್ಲಿ ಬುರ್ಖಾಧಾರಿ ಮಹಿಳೆ ವಿವರಿಸಿದ್ದಾರೆ. ಹೊರಡುವಾಗ ತನ್ನನ್ನು ಕರೆತಂದ ಮಹಿಳೆಗೆ ಹಣ ಪಾವತಿಸಲಾಗಿತ್ತು ಎಂದು ಆಕೆ ತಿಳಿಸಿದ್ದಾಳೆ.

ಈ ಕಹಿ ಘಟನೆಯಿಂದಾಗಿ ಮುಂದಿನ ಜೀವನದುದ್ದಕ್ಕೂ ತೀವ್ರ ಮಾನಸಿಕ ಖಿನ್ನತೆ ಹಾಗೂ ಆಘಾತದಿಂದ ಬಳಲಿದ್ದಾಗಿ ಆಕೆ ತಿಳಿಸಿದ್ದಾರೆ. ಪ್ರಸ್ತುತ ತನಗೆ ಮದುವೆಯಾಗಿದ್ದು, ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ. ಈ ಎಲ್ಲ ವಿಚಾರವನ್ನು ಪತಿಗೆ ತಿಳಿಸಿರುವುದಾಗಿ ಆಕೆ ಹೇಳಿಕೊಂಡಿದ್ದಾಳೆ. ಪತಿಯು ತನ್ನ ನ್ಯಾಯದ ಹೋರಾಟಕ್ಕೆ ಸಾಥ್‌ ನೀಡುವುದಾಗಿ ತಿಳಿಸಿರುವುದಾಗಿಯೂ ಆಕೆ ಹೇಳಿದ್ದಾಳೆ.

ಈಗ ಸಂಬಂಧಪಟ್ಟ ರಾಜಕಾರಣಿಯೊಂದಿಗೆ ಮಾತನಾಡಿ ವಿಷಯವನ್ನು ‘ಸೆಟಲ್‌’ ಮಾಡಿಕೊಳ್ಳಲು ಬಯಸುವುದಾಗಿ ಆಕೆ ಹೇಳುತ್ತಿರುವುದು ವಿಡಿಯೊದಲ್ಲಿ ದಾಖಲಾಗಿದೆ. ಇದಕ್ಕೆ ಮಾಧ್ಯಮ ರಂಗದ ವ್ಯಕ್ತಿಯು ಬೆಂಗಳೂರಿನ ಯಾವುದಾದರೂ ರಹಸ್ಯ ಸ್ಥಳ ಅಥವಾ ಪಂಚತಾರಾ ಹೋಟೆಲ್‌ನಲ್ಲಿ ಕೆಲವೇ ಜನರ ಸಮ್ಮುಖದಲ್ಲಿ ಭೇಟಿ ಮಾಡಿಸಿ, ವಿಷಯ ಇತ್ಯರ್ಥಪಡಿಸಲು ಸಿದ್ಧರಿದ್ದೀರಾ ಎಂದು ಪ್ರಶ್ನಿಸಿದ್ದು, ಅದಕ್ಕೆ ಆಕೆ ಸಿದ್ಧ ಇರುವುದಾಗಿ ಹೇಳಿದ್ದಾಳೆ.
ಮುಂದೆ, ಆಕೆಯ ಎರಡು ಛಾಯಾಚಿತ್ರಗಳನ್ನು ಪಡೆದು ಸಂಬಂಧಪಟ್ಟ ರಾಜಕಾರಣಿಗೆ ತೋರಿಸಿ, ಅವರ ಪ್ರತಿಕ್ರಿಯೆ ತಿಳಿದುಕೊಂಡ ಬಳಿಕ ಮುಂದಿನ ಕ್ರಮ ಕೈಗೊಳ್ಳುವುದಾಗಿ ಟಿವಿ ಸಂಸ್ಥೆಯ ವ್ಯಕ್ತಿ ಹೇಳುತ್ತಿರುವುದು ಕೂಡ ವಿಡಿಯೊದಲ್ಲಿ ಕೇಳಿಸುತ್ತದೆ.

ಇದೇ ವೇಳೆ, ಭೇಟಿಯ ಬಳಿಕ ಕಾರಿನಲ್ಲಿ ಹಿಂದಿರುಗುವ ಸಂದರ್ಭದ ಸಂಭಾಷಣೆಯೂ ವಿಡಿಯೊದಲ್ಲಿ ದಾಖಲಾಗಿದೆ. ಆಗ ಮಹಿಳಾ ರಾಜಕಾರಣಿ ಪುತ್ತೂರು ವಿಧಾನಸಭಾ ಕ್ಷೇತ್ರದ ಟಿಕೆಟ್‌ ಹಾಗೂ ಸಚಿವ ಸ್ಥಾನಕ್ಕೆ ಬೇಡಿಕೆ ಇಡುವಂತೆ ಟಿವಿ ಸಂಸ್ಥೆಯ ವ್ಯಕ್ತಿಗೆ ಹೇಳುತ್ತಿರುವಂತೆ ದೃಶ್ಯಗಳಿವೆ. ಇದಕ್ಕೆ ಪ್ರತಿಯಾಗಿ, ಸಂತ್ರಸ್ತೆಗೂ ಹಣ ಕೊಡಿಸಿ ವಿಷಯವನ್ನು ಇತ್ಯರ್ಥಪಡಿಸುವ ಕುರಿತು ಚರ್ಚೆ ನಡೆದಿರುವುದು ವಿಡಿಯೊದಲ್ಲಿ ಕಂಡುಬರುತ್ತದೆ.

ಆದರೆ, ಟಿಕೆಟ್‌ ಸಿಕ್ಕೇ ಸಿಗುತ್ತದೆ ಎಂದು ನಂಬಿದ್ದ ಆ ಮಹಿಳಾ ರಾಜಕಾರಣಿ ಟಿಕೆಟ್‌ಗಾಗಿ ₹2 ಲಕ್ಷ ಕಟ್ಟಿ ಅರ್ಜಿ ಕೂಡ ಸಲ್ಲಿಸಿದ್ದರು ಎನ್ನಲಾಗಿದೆ. ಹೈಕಮಾಂಡ್‌ನ ‘ಕೃಪಾಕಟಾಕ್ಷ’ ತನ್ನ ಮೇಲಿರಬಹುದೆಂದು ನಂಬಿ ಕ್ಷೇತ್ರದಲ್ಲಿ ಚುನಾವಣಾ ಸಂದರ್ಭದಲ್ಲಿ ಓಡಾಟ ಕೂಡ ನಡೆಸಿದ್ದರು. ಚುನಾವಣೆಗೆ ಟಿಕೆಟ್‌ ಘೋಷಣೆಯಾಗುವ ಸಮಯದಲ್ಲಿ 6 ತಿಂಗಳ ಕಾಲ ರಾಜಕೀಯದಲ್ಲಿ ಸಕ್ರಿಯವಾಗಿದ್ದ ಆಕೆ ಇದರ ಮೊದಲು ಮತ್ತು ಬಳಿಕ ಯಾವುದೇ ರಾಜಕೀಯ ಚಟುವಟಿಕೆಯಲ್ಲಿ ಕಾಣಿಸಿಕೊಂಡಿಲ್ಲ. ಆ ಮಹಿಳೆಗೆ ಈ ಹಿಂದೆ ಭೂಗತ ಲೋಕದೊಂದಿಗೆ ನಿಕಟ ಸಂಪರ್ಕವಿದ್ದದ್ದು, ಅವರ ಕುರಿತಾಗಿ ಪಕ್ಷದ ವಲಯದಲ್ಲಿ ಗ್ಲಾಮರ್‌ ತಂದುಕೊಟ್ಟಿತ್ತು ಎನ್ನಲಾಗಿದೆ. ಆದರೆ, ಆಕೆ ಅಂದುಕೊಂಡಂತೆ ಯಾವುದೂ ಆಗದೇ ಅವರಿಗೆ ಟಿಕೆಟ್‌ ಕೈತಪ್ಪಿತ್ತು.

ಆದರೆ, ಈ ವಿಡಿಯೊಗಳನ್ನು ಯಾರು, ಯಾವ ಉದ್ದೇಶದಿಂದ ಚಿತ್ರೀಕರಿಸಿದ್ದಾರೆ ಎಂಬುದು ಸ್ಪಷ್ಟವಾಗಿಲ್ಲ. ಜೊತೆಗೆ, ವಿಡಿಯೊದಲ್ಲಿರುವ ಸಂಭಾಷಣೆಯ ಸಂಪೂರ್ಣ ಹಿನ್ನೆಲೆ, ಅದರ ಸತ್ಯಾಸತ್ಯತೆ ಹಾಗೂ ಅದರಲ್ಲಿ ಕೇಳಿಬರುವ ಆರೋಪಗಳಿಗೆ ಸಂಬಂಧಿಸಿದಂತೆ ಸ್ವತಂತ್ರ ದೃಢೀಕರಣವೂ ಲಭ್ಯವಾಗಿಲ್ಲ.
ವಿಡಿಯೊದಲ್ಲಿ ಸಂತ್ರಸ್ತೆ ಎಂದು ತೋರಿಸಲಾಗುತ್ತಿರುವ ಮಹಿಳೆಯ ಮುಖವನ್ನು ಮಸುಕುಗೊಳಿಸಲಾಗಿದ್ದು, ಆಕೆಯ ಗುರುತನ್ನು ಬಹಿರಂಗಪಡಿಸಲಾಗಿಲ್ಲ.

ರಾಜಕಾರಣಿ ಮಹಿಳೆ ಮತ್ತು ಟಿವಿ ಸಂಸ್ಥೆಯ ವ್ಯಕ್ತಿ ಮುಂಬೈನಲ್ಲಿ ವ್ಯವಹಾರ ಕುದಿರಿಸುವ ಮಾತುಕತೆ ನಡೆದಿತ್ತು ಎನ್ನಲಾಗಿದೆ. ಆದರೆ ಇವರಿಬ್ಬರ ಸಂಭಾಷಣೆಯನ್ನು ತನ್ನ ಕ್ಯಾಮೆರಾದಲ್ಲಿ ಚಿತ್ರಿಸಿದ ವ್ಯಕ್ತಿ ಯಾರೆನ್ನುವುದು ಗೌಪ್ಯವಾಗಿದೆ. ಆ ಚಾನೆಲ್ ನಲ್ಲಿ ಇನ್ನಷ್ಟು ವಿಡಿಯೋಗಳು ಸರಣಿ ಮೂಲಕ ಅಪ್ ಲೋಡ್ ಆಗುತ್ತಿದ್ದು, ರಾಜ್ಯ ರಾಜಕಾರಣದಲ್ಲಿ ಸಂಚಲನ ಸೃಷ್ಟಿಸಿದೆ.

ಅಪ್ರಾಪ್ತ ವಯಸ್ಸಿನಲ್ಲಿ ನಡೆದಿತ್ತೆಂದು ಆಕೆ ಹೇಳಿರುವ ಘಟನೆಯ ಕುರಿತೂ ಈ ವಿಡಿಯೊದಿಂದ ಮಾತ್ರ ನಿರ್ಧರಿಸಲು ಸಾಧ್ಯವಿಲ್ಲ.
ಹೀಗಾಗಿ, ರಾಜ್ಯ ರಾಜಕಾರಣದಲ್ಲಿ ನಡೆಯುತ್ತಿರುವ ಸ್ಟಿಂಗ್‌ ಆಪರೇಷನ್‌ ಚರ್ಚೆಗೂ, ಪುತ್ತೂರಿಗೆ ಸಂಬಂಧಿಸಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಈ ವಿಡಿಯೊಗಳಿಗೂ ನೇರ ಸಂಬಂಧವಿದೆಯೇ ಎಂಬುದು ಸದ್ಯಕ್ಕೆ ಚರ್ಚೆ ಮತ್ತು ಅನುಮಾನದ ಹಂತದಲ್ಲಷ್ಟೇ ಇದೆ.
ಈ ವಿಡಿಯೊಗಳ ಹಿಂದಿನ ಉದ್ದೇಶ, ಚಿತ್ರೀಕರಣದ ಸಂದರ್ಭ ಹಾಗೂ ಅದರಲ್ಲಿರುವ ಆರೋಪಗಳ ಸತ್ಯಾಸತ್ಯತೆ ಕುರಿತು ಅಧಿಕೃತ ಸ್ಪಷ್ಟನೆ ಹೊರಬಂದ ಬಳಿಕವಷ್ಟೇ ಪೂರ್ಣ ಚಿತ್ರಣ ದೊರೆಯಬೇಕಿದೆ.