ಯಕ್ಷಗಾನದ ಸ್ತ್ರೀವೇಷಕ್ಕೆ ಹೊಸ ಭಾಷ್ಯ ಬರೆದ, ತೆಂಕು ಮತ್ತು ಬಡಗು ತಿಟ್ಟುಗಳೆರಡರಲ್ಲೂ ಸವ್ಯಸಾಚಿಯಾಗಿದ್ದ ಹಿರಿಯ ಕಲಾವಿದ, ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಪಾತಾಳ ವೆಂಕಟರಮಣ ಭಟ್ (92) ಶನಿವಾರ ಇಲ್ಲಿನ ತಮ್ಮ ಸ್ವಗೃಹದಲ್ಲಿ ಹೃದಯಾಘಾತದಿಂದ ನಿಧನರಾದರು.

ಉಪ್ಪಿನಂಗಡಿ, ಜುಲೈ 19: ಯಕ್ಷಗಾನದ ಸ್ತ್ರೀವೇಷಕ್ಕೆ ಹೊಸ ಭಾಷ್ಯ ಬರೆದ, ತೆಂಕು ಮತ್ತು ಬಡಗು ತಿಟ್ಟುಗಳೆರಡರಲ್ಲೂ ಸವ್ಯಸಾಚಿಯಾಗಿದ್ದ ಹಿರಿಯ ಕಲಾವಿದ, ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಪಾತಾಳ ವೆಂಕಟರಮಣ ಭಟ್ (92) ಶನಿವಾರ ಇಲ್ಲಿನ ತಮ್ಮ ಸ್ವಗೃಹದಲ್ಲಿ ಹೃದಯಾಘಾತದಿಂದ ನಿಧನರಾದರು.

alt="Ad Widget"/>

ಅಡುಗೆ ಭಟ್ಟರಾಗಿ ವೃತ್ತಿ ಆರಂಭಿಸಿ, ತಮ್ಮೊಳಗಿನ ಕಲಾಸಕ್ತಿಯಿಂದ ಯಕ್ಷರಂಗದ ಅನರ್ಘ್ಯ ರತ್ನವಾಗಿ ಬೆಳೆದ ಪಾತಾಳರು, ತಮ್ಮ ಭಾವಪೂರ್ಣ ಅಭಿನಯ ಹಾಗೂ ಲಾಸ್ಯಮಯ ನೃತ್ಯದಿಂದ ಯಕ್ಷಗಾನ ಲೋಕದಲ್ಲಿ ವಿಶಿಷ್ಟ ಛಾಪು ಮೂಡಿಸಿದ್ದರು.

<>

ಕೇವಲ ಮೂರನೇ ತರಗತಿವರೆಗೆ ಶಿಕ್ಷಣ ಪಡೆದಿದ್ದ ಭಟ್ಟರು, 1951ರಲ್ಲಿ ಕಾಂಚನ ನಾಟಕ ಕಂಪನಿಗೆ ಅಡುಗೆಯವರಾಗಿ ಸೇರಿದ್ದರು. ಆದರೆ, ಅವರ ಸಹಜ ಪ್ರತಿಭೆಯನ್ನು ಗುರುತಿಸಿದ ಕಂಪನಿಯು ಅವರನ್ನು ಪ್ರಧಾನ ಸ್ತ್ರೀ ವೇಷಧಾರಿಯಾಗಿ ರಂಗಕ್ಕೆ ಪರಿಚಯಿಸಿತು. 1953ರಲ್ಲಿ ವೃತ್ತಿಪರ ಯಕ್ಷಗಾನ ಮೇಳಕ್ಕೆ ಸೇರಿದ ಅವರು, 1981ರಲ್ಲಿ ನಿವೃತ್ತರಾಗುವವರೆಗೆ ಧರ್ಮಸ್ಥಳ (1964-81), ಸೌಕೂರು, ಮೂಲ್ಕಿ, ಸುರತ್ಕಲ್ ಸೇರಿದಂತೆ ಹಲವು ಪ್ರಸಿದ್ಧ ಮೇಳಗಳಲ್ಲಿ ತಿರುಗಾಟ ನಡೆಸಿ ಕಲಾಭಿಮಾನಿಗಳ ಮನಸೂರೆಗೊಂಡಿದ್ದರು.

ಶಿಲ್ಪಕಲೆಯ ಅಧ್ಯಯನ:
ಪಾತಾಳರ ಹೆಗ್ಗಳಿಕೆ ಎಂದರೆ, ಬೇಲೂರಿನ ಶಿಲಾಬಾಲಿಕೆಯರ ಅಂಗವಿನ್ಯಾಸ ಮತ್ತು ಭಂಗಿಗಳನ್ನು ಸ್ವತಃ ಆಳವಾಗಿ ಅಧ್ಯಯನ ಮಾಡಿ, ಅದನ್ನು ತಮ್ಮ ಪಾತ್ರಗಳಲ್ಲಿ ಅಳವಡಿಸಿಕೊಂಡಿದ್ದು. ರಂಭೆ, ಊರ್ವಶಿ, ಸತ್ಯಭಾಮೆ, ದ್ರೌಪದಿ, ಸುಭದ್ರೆ, ಮೀನಾಕ್ಷಿಯಂತಹ ಪಾತ್ರಗಳಿಗೆ ಅವರು ನೀಡುತ್ತಿದ್ದ ಜೀವಂತಿಕೆ ಮತ್ತು ದೃಶ್ಯಕಾವ್ಯದ ಸೊಬಗು ಅವಿಸ್ಮರಣೀಯ.

ಅವರ ಅನುಪಮ ಕಲಾ ಸೇವೆಗೆ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ, ಕರ್ನಾಟಕ ಜಾನಪದ ಅಕಾಡೆಮಿ ಪ್ರಶಸ್ತಿ, ಕಲ್ಕೂರ ಪ್ರಶಸ್ತಿ, ದೇರಾಜೆ ಪ್ರಶಸ್ತಿ, ಅಗರಿ ಪ್ರಶಸ್ತಿ, ಯಕ್ಷ ಕಲಾನಿಧಿ ಸೇರಿದಂತೆ ಹಲವಾರು ಗೌರವ, ಬಿರುದುಗಳು ಸಂದಿದ್ದವು.

ಮೃತರು ಹಿರಿಯ ಪುತ್ರ, ಯಕ್ಷಗಾನ ಭಾಗವತ ಅಂಬಾಪ್ರಸಾದ್ ಪಾತಾಳ, ಕಿರಿಯ ಪುತ್ರ ಉಪ್ಪಿನಂಗಡಿ ಸಿ.ಎ. ಬ್ಯಾಂಕ್ ನಿರ್ದೇಶಕ ಶ್ರೀರಾಮ ಭಟ್ ಪಾತಾಳ, ನಾಲ್ವರು ಪುತ್ರಿಯರು, ಮೊಮ್ಮಕ್ಕಳು ಹಾಗೂ ಅಪಾರ ಕಲಾಭಿಮಾನಿಗಳನ್ನು ಅಗಲಿದ್ದಾರೆ. ಪಾತಾಳರ ನಿಧನಕ್ಕೆ ಯಕ್ಷಗಾನ ಕ್ಷೇತ್ರ ಕಂಬನಿ ಮಿಡಿದಿದೆ.

ಈ ಸುದ್ದಿಯನ್ನು ಷೇರ್‌ ಮಾಡಿ

• WhatsApp
• Telegram
• Tweet
• Print

Related Topics:ಯಕ್ಷಗಾನದ ಸ್ತ್ರೀವೇಷಉಪ್ಪಿನಂಗಡಿಹಿರಿಯ ಕಲಾವಿದವೆಂಕಟರಮಣ ಭಟ್Venkataramana Bhatt

Up Next

Puttur-ಪುತ್ತೂರಿನ ವಾಸ್ತುತಜ್ಞ ಪಿ.ಜಿ. ಜಗನ್ನಿವಾಸ ರಾವ್ ಗೆ ‘ವಾತುಲಾಗಮ ಪ್ರವೀಣ’ ಪದವಿ

Don't Miss

Philomena-ಸಂತ ಫಿಲೋಮಿನಾ ಕಾಲೇಜು: ವಿದ್ಯಾರ್ಥಿ ಪ್ರೇರಣಾ ಕಾರ್ಯಕ್ರಮ