“ಐಎನ್ಎಸ್ ಜಟಾಯು ಈ ಪ್ರದೇಶದ 90% ಜಾಗತಿಕ ವ್ಯಾಪಾರಕ್ಕೆ ಮಾರ್ಗವಾಗಿರುವ, ಮಹತ್ವದ 9 ಡಿಗ್ರಿ ಚಾನೆಲ್‌ನಿಂದ ಕೊಂಚ ಉತ್ತರದಲ್ಲಿದೆ. ಎರಡರಿಂದ ಮೂರು ದಶಕಗಳ ಹಿಂದೆ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳನ್ನು ಅಭಿವೃದ್ಧಿ ಪಡಿಸಿದ ರೀತಿಯಲ್ಲೇ ಈಗ ಕಾರ್ಯತಂತ್ರದ ಅವಶ್ಯಕತೆಗಳ ಕಾರಣದಿಂದ ಭಾರತದ ಗಮನ ಲಕ್ಷದ್ವೀಪದ ಕಡೆಗೆ ಸರಿದಿದೆ. ಇದಕ್ಕೆ ಮಾಲ್ಡೀವ್ಸ್ ದಿನೇ ದಿನೇ ಚೀನಾಗೆ ಹೆಚ್ಚು ಆತ್ಮೀಯವಾಗುತ್ತಿರುವುದು ಮತ್ತು ಈ ಪ್ರದೇಶದಲ್ಲಿ ಚೀನಾದ ಪ್ರಭಾವ ಹೆಚ್ಚುತ್ತಿರುವುದು ಮುಖ್ಯ ಕಾರಣವಾಗಿದೆ” ಎಂದು ನಿವೃತ್ತ ಕ್ಯಾಪ್ಟನ್ ಡಿಕೆ ಶರ್ಮಾ ಹೇಳಿದ್ದಾರೆ.

9 ಡಿಗ್ರಿ ಚಾನೆಲ್ ಎನ್ನುವುದು ಲಕ್ಷದ್ವೀಪ ಸಮೂಹದ ಉತ್ತರಕ್ಕೆ, ಸಮಭಾಜಕ ವೃತ್ತದ ಸಮೀಪದಲ್ಲಿ ಇರುವ ನೌಕಾ ಮಾರ್ಗವಾಗಿದೆ. ಈ ಕಾಲುವೆಗೆ ಇದು ಇರುವ ಅಕ್ಷಾಂಶವಾದ, ಸಮಭಾಜಕ ವೃತ್ತದ 9 ಡಿಗ್ರಿ ಉತ್ತರದ ಹೆಸರನ್ನೇ ಇಡಲಾಗಿದೆ. ಅರಬ್ಬೀ ಸಮುದ್ರ, ಹಿಂದೂ ಮಹಾಸಾಗರಗಳು ಮತ್ತು ಅವುಗಳಾಚೆಯಿಂದ ಚಲಿಸುವ ನೌಕೆಗಳಿಗೂ ಇದು ಮಾರ್ಗವಾಗಿರುವುದರಿಂದ, ಇದನ್ನು ಒಂದು ಮಹತ್ವದ ಮಾರ್ಗ ಎಂದು ಪರಿಗಣಿಸಲಾಗಿದೆ. ಈ ಪ್ರದೇಶದಲ್ಲಿ ನಡೆಯುವ ಜಾಗತಿಕ ವ್ಯಾಪಾರದ 90% ಈ ಕಾಲುವೆಯ ಮೂಲಕ ನಡೆಯುತ್ತದೆ ಎಂಬ ಅಂಕಿಅಂಶವೇ ಅಂತಾರಾಷ್ಟ್ರೀಯ ಸಾಗಾಣಿಕೆ ಮತ್ತು ವ್ಯಾಪಾರದಲ್ಲಿ ಈ ಮಾರ್ಗಕ್ಕಿರುವ ಪ್ರಾಮುಖ್ಯತೆಯನ್ನು ಸಾಬೀತುಪಡಿಸುತ್ತದೆ. ಇಂತಹ ಕಾಲುವೆಗಳು ಜಗತ್ತಿನಾದ್ಯಂತ ದಕ್ಷವಾಗಿ ಸರಕುಗಳ ಸಾಗಾಣಿಕೆ ನಡೆಸಲು ಮುಖ್ಯವಾಗಿರುವೆ. ಆದ್ದರಿಂದ ಸಮುದ್ರ ಮಾರ್ಗಗಳನ್ನು ಸುರಕ್ಷಿತಗೊಳಿಸಿ, ವಾಣಿಜ್ಯಿಕ ನೌಕೆಗಳಿಗೆ ಸುರಕ್ಷಿತ ಮಾರ್ಗ ಕಲ್ಪಿಸುವ ಉದ್ದೇಶ ಹೊಂದಿರುವ ದೇಶಗಳಿಗೆ ಇಂತಹ ಕಾಲುವೆಗಳು ಕಾರ್ಯತಂತ್ರದ ಬಿಂದುಗಳಾಗಿವೆ.

ಮಾಲ್ಡೀವ್ಸ್ ಅಧ್ಯಕ್ಷ ಮೊಹಮದ್ ಮುಯಿಝು ಅವರು ಭಾರತೀಯ ಸೈನಿಕರನ್ನು ಮಾಲ್ಡೀವ್ಸ್‌ನಿಂದ ಹಿಂದಕ್ಕೆ ಕರೆಸಿಕೊಳ್ಳುವಂತೆ ಅಧಿಕೃತ ಮನವಿ ಸಲ್ಲಿಸಿದ್ದರು. ಆದರೆ ಅದನ್ನು ಪಾಲಿಸುವ ಮುನ್ನವೇ ಐಎನ್ಎಸ್ ಜಟಾಯು ಉದ್ಘಾಟನೆ ನಡೆದಿರುವುದು ಹೆಚ್ಚಿನ ಮಹತ್ವ ಪಡೆದುಕೊಂಡಿದೆ.

ಐಎನ್ಎಸ್ ಜಟಾಯುವನ್ನು 1980ರ ದಶಕದಲ್ಲಿ ಮಿನಿಕಾಯ್‌ನ ನೌಕಾಪಡೆಯ ತುಕಡಿಯಾಗಿ ಸ್ಥಾಪಿಸಲಾಗಿತ್ತು. ಇದೊಂದು ಸಣ್ಣ ಘಟಕವಾಗಿದ್ದು, ಸೀಮಿತ ಜವಾಬ್ದಾರಿಗಳನ್ನು ಹೊಂದಿತ್ತು. ಆದರೆ ಈಗ ಐಎನ್ಎಸ್ ಜಟಾಯುವನ್ನು ಭಾರತೀಯ ನೌಕಾಪಡೆಯ ಕಾರ್ಯಾಚರಣಾ ಸಾಮರ್ಥ್ಯಗಳನ್ನು ವೃದ್ಧಿಸಬಲ್ಲ ಸ್ವತಂತ್ರ ನೌಕಾನೆಲೆಯಾಗಿ ಅಭಿವೃದ್ಧಿ ಪಡಿಸಲಾಗಿದೆ. ಈ ವಿಸ್ತರಣೆಯಿಂದಾಗಿ, ಐಎನ್ಎಸ್ ಜಟಾಯು ಈ ಪ್ರದೇಶದಲ್ಲಿ ಏನಾದರೂ ಸಮಸ್ಯೆ ಎದುರಾದರೆ ಮೊದಲ ಪ್ರತಿಕ್ರಿಯೆ ನೀಡುವುದರ ಜೊತೆಗೆ, ಭಾರತದ ಮುಖ್ಯಭೂಮಿಯೊಡನೆ ದ್ವೀಪದ ಸಂಪರ್ಕವನ್ನೂ ವೃದ್ಧಿಸಲಿದೆ.

ಆರಂಭದಲ್ಲಿ ನೌಕಾ ತುಕಡಿಯನ್ನು ವಿಚಕ್ಷಣೆ, ಕಣ್ಗಾವಲು ಮತ್ತು ಉದ್ದೇಶಿತ ಪ್ರದೇಶಕ್ಕೆ ಭದ್ರತೆ ಒದಗಿಸಿ, ಅದರಲ್ಲೂ ಭಾರತದ ಸಮುದ್ರ ವ್ಯಾಪ್ತಿಯನ್ನು ರಕ್ಷಿಸಲು ಸ್ಥಾಪಿಸಲಾಗಿತ್ತು. ಆದರೆ ಕಾಲಕ್ರಮೇಣ ಮಿನಿಕಾಯ್ ದ್ವೀಪದ ಆರಂಭಿಕ ಘಟಕ ವಿಕಾಸಗೊಂಡು, ಐಎನ್ಎಸ್ ಜಟಾಯುವಿನಂತಹ ಗಮನಾರ್ಹ ನೌಕಾನೆಲೆಯಾಗಿ ರೂಪುಗೊಂಡಿದ್ದು, ಭಾರತೀಯ ನೌಕಾಪಡೆಯ ಕಾರ್ಯಾಚರಣಾ ಸಾಮರ್ಥ್ಯ ಮತ್ತು ಕಾರ್ಯತಂತ್ರದ ಮಹತ್ವದ ಪ್ರದೇಶಗಳಲ್ಲಿ ಉಪಸ್ಥಿತಿಯನ್ನು ಹೆಚ್ಚಿಸಲಿವೆ.

ಐಎನ್ಎಸ್ ಜಟಾಯು ನೆಲೆಯ ಸ್ಥಾಪನೆಯೊಡನೆ, ಲಕ್ಷದ್ವೀಪದ ದ್ವೀಪ ಸಮುಚ್ಚಯದಲ್ಲಿ ಭಾರತೀಯ ನೌಕಾಪಡೆ ತನ್ನ ಸಾಗರ ಉಪಸ್ಥಿತಿ ಮತ್ತು ಸಾಮರ್ಥ್ಯವನ್ನು ಹೆಚ್ಚಿಸಲಿದೆ.

ಲಕ್ಷದ್ವೀಪದ ಪ್ರಮುಖ ದ್ವೀಪಗಳ ಅನ್ವೇಷಣೆ

ಲಕ್ಷದ್ವೀಪ ಭಾರತದ ಕೇಂದ್ರಾಡಳಿತ ಪ್ರದೇಶವಾಗಿದ್ದು, ಇದು 36 ದ್ವೀಪಗಳನ್ನು ಒಳಗೊಂಡಿದೆ. ಇವುಗಳ ಪೈಕಿ 10 ದ್ವೀಪಗಳು ಜನರಹಿತವಾಗಿವೆ. ಈ ದ್ವೀಪಗಳ ಪೈಕಿ, ಪ್ರಮುಖವಾದ ಕೆಲವು ದ್ವೀಪಗಳು ಇಂತಿವೆ:

1. ಕವರತ್ತಿ: ಕವರತ್ತಿ ದ್ವೀಪ ಲಕ್ಷದ್ವೀಪ ಕೇಂದ್ರಾಡಳಿತ ಪ್ರದೇಶದ ರಾಜಧಾನಿಯಾಗಿದೆ. ಕವರತ್ತಿ ಒಂದು ಅತ್ಯಂತ ಸುಂದರ ದ್ವೀಪವಾಗಿದ್ದು, ತನ್ನ ಸುಂದರ ಸಮುದ್ರ ತೀರಗಳು ಮತ್ತು ಸಾಗರ ಜೀವ ವೈವಿಧ್ಯತೆಗೆ ಹೆಸರಾಗಿದೆ.

2. ಮಿನಿಕಾಯ್: ಲಕ್ಷದ್ವೀಪದ ದ್ವೀಪ ಸಮುಚ್ಚಯದ ದಕ್ಷಿಣದ ಕೊನೆಯಲ್ಲಿರುವ ಮಿನಿಕಾಯ್, ಲಕ್ಷದ್ವೀಪದ ಎರಡನೇ ಅತಿದೊಡ್ಡ ದ್ವೀಪವಾಗಿದೆ. ಇಲ್ಲಿನ ಸಂಸ್ಕೃತಿ ಬಹಳಷ್ಟು ಭಿನ್ನವಾಗಿದ್ದು, ಮಾಲ್ಡೀವ್ಸ್ ಸಂಸ್ಕೃತಿಯನ್ನು ಹೋಲುತ್ತದೆ.

3. ಅಗತ್ತಿ: ಈ ದ್ವೀಪ ಲಕ್ಷದ್ವೀಪದ ಏಕೈಕ ವಿಮಾನ ನಿಲ್ದಾಣವನ್ನು ಹೊಂದಿದ್ದು, ಭಾರತದ ಮುಖ್ಯ ಭೂಮಿಯನ್ನು ಸಂಪರ್ಕಿಸುವ ಅತ್ಯಂತ ಮಹತ್ವದ ತಾಣವಾಗಿದೆ.

4. ಕಲ್ಪೇನಿ: ತನ್ನ ಪ್ರಕೃತಿ ಸೌಂದರ್ಯ ಮತ್ತು ಹವಳ ಜೀವಿಗಳಿಗೆ ಹೆಸರಾಗಿರುವ ಕಲ್ಪೇನಿ ಒಂದು ಪ್ರಸಿದ್ಧ ಪ್ರವಾಸಿ ತಾಣವಾಗಿದೆ.

5. ಬಂಗಾರಂ: ಮಾನವ ನಿವಾಸ ರಹಿತವಾಗಿರುವ ಬಂಗಾರಂ ದ್ವೀಪ ಒಂದು ಪ್ರಮುಖ ಪ್ರವಾಸಿ ತಾಣವಾಗಿದ್ದು, ಅಲ್ಲಿನ ರೆಸಾರ್ಟ್‌ಗಳು ಮತ್ತು ಸುಂದರ ಸಮುದ್ರ ತೀರಗಳಿಗೆ ಹೆಸರಾಗಿದೆ. ಈ ದ್ವೀಪ ಅಂತಾರಾಷ್ಟ್ರೀಯ ಪ್ರವಾಸಿಗರಿಗೂ ತೆರೆದಿದೆ.

ಈ ದ್ವೀಪಗಳು ಅರಬ್ಬೀ ಸಮುದ್ರದ ತಮ್ಮ ಕಾರ್ಯತಂತ್ರದ ಪ್ರಾಮುಖ್ಯತೆಯ ಜೊತೆಗೆ, ತಮ್ಮ ವಿಶಿಷ್ಟವಾದ ಪರಿಸರ ವ್ಯವಸ್ಥೆ, ಸಾಂಸ್ಕೃತಿಕ ಪರಂಪರೆ ಮತ್ತು ಪ್ರವಾಸೋದ್ಯಮ ಸಾಮರ್ಥ್ಯಗಳಿಂದ ಮುಖ್ಯವಾಗಿವೆ.

(ಈ ಲೇಖನದ ಬರಹಗಾರರಾದ ಗಿರೀಶ್ ಲಿಂಗಣ್ಣ ಅವರು ಬೆಂಗಳೂರು ಮೂಲದ ರಕ್ಷಣಾ, ಏರೋಸ್ಪೇಸ್ ಮತ್ತು ರಾಜಕೀಯ ವಿಶ್ಲೇಷಕರು. ಅವರು ಎಡಿಡಿ ಇಂಜಿನಿಯರಿಂಗ್ ಜಿಎಂಬಿಎಚ್ ಜರ್ಮನಿಯ ಅಂಗಸಂಸ್ಥೆಯಾದ ಎಡಿಡಿ ಇಂಜಿನಿಯರಿಂಗ್ ಕಾಂಪೊನೆಂಟ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ನಿರ್ದೇಶಕರಾಗಿದ್ದಾರೆ. ನಿಮ್ಮ ಅನಿಸಿಕೆ ಅಭಿಪ್ರಾಯಗಳನ್ನು ಅವರೊಡನೆ girishlinganna@gmail.com ಮೂಲಕ ತಿಳಿಸಬಹುದು)