ಅಲ್ಲದೇ ಮನೆಯವರ ಬಳಿಯಿದ್ದ ಫೋನ್ ಹಾಗೂ ಟಾರ್ಚ್‌ಗಳನ್ನು ಬೆದರಿಸಿ ಪಡೆದುಕೊಂಡು ಖಾಲಿ ಬಕೇಟ್‌ಗೆ ನೀರು ತುಂಬಿಸಿ ಅದರಲ್ಲಿ ಹಾಕಿದ್ದಾರೆ. ತಮ್ಮ ಜತೆ ಕೃತ್ಯ ಎಸಗಲು ತಂದಿದ್ದ ಸಾಮಾಗ್ರಿಗಳನ್ನು ಒಂಚೂರು ಬಿಡದೆ ದರೋಡೆಯ ಬಳಿಕ ಜಾಗೂರುಕತೆಯಿಂದ ತೆಗೆದುಕೊಂಡು ಹೋಗಿದ್ದಾರೆ. ಹೀಗೆ ಆರೋಪಿಗಳು ಯಾವುದೇ ಸುಳಿವು ಬಿಡದೆ ಅತ್ಯಂತ ಬುದ್ದಿವಂತಿಕೆ ಉಪಯೋಗಿಸಿ ಎಸಗಿದ ಕ್ಲಿಷ್ಟಕರ ಪ್ರಕರಣವನ್ನು ಪತ್ತೆ ಮಾಡುವಲ್ಲಿ ತನಿಖಾ ತಂಡ ಸಾಕಷ್ಟು ಶ್ರಮವನ್ನು ವಹಿಸಿದೆ ಎಂದು ಪುತ್ತೂರು ಉಪಧೀಕ್ಷಕರ ಕಛೇರಿಯಲ್ಲಿ ಶುಕ್ರವಾರ ಸುದ್ದಿಗೋಷ್ಠಿ ನಡೆಸಿ ಅವರು ತಿಳಿಸಿದರು.

ಬಂಧಿತರು ಹಾಗೂ ಅವರ ಅಪರಾಧ ಹಿನ್ನಲೆ

ಪೆರುವಾಯಿ ನಿವಾಸಿ ಸುದೀರ್ ಕುಮಾರ್ ಕೆ. (38) ಮೇಲೆ ಕಾಳು ಮೆಣಸು ದರೋಡೆ ಸಹಿತ 2 ಪ್ರಕರಣ, ಪೈವಳಿಕೆ ಅಟ್ಟೆಗೋಳಿ ನಿವಾಸಿ ಕಿರಣ್ ಟಿ. (29) ಮೇಲೆ ಸುಲಿಗೆ ಹಾಗೂ ಗಾಂಜಾ ಸೇರಿ 3 ಪ್ರಕರಣ, ಕಾಂಞಂಗಾಡು ನಿವಾಸಿ ಸನಾಲ್ ಕೆ.ವಿ. (34) ಮೇಲೆ ಕೇರಳದ ವಿವಿಧ ಭಾಗದಲ್ಲಿ 15 ಪ್ರಕರಣ, ಸೀತಂಗೋಳಿ ನಿವಾಸಿ ಮಹಮ್ಮದ್ ಫೈಝಲ್ (37 ) ಮೇಲೆ ಚೈನ್ ಎಳೆದ, ಕುದ್ದುಪದವು ಪೆಟ್ರೋಲ್ ಪಂಪ್ ದರೋಡೆ ಸೇರಿ 3 ಪ್ರಕರಣ, ಸೀತಂಗೋಳಿ ನಿವಾಸಿ ಅಬ್ದುಲ್ ನಿಝಾರ್ (21) ಮೇಲೆ ಚೈನ್ ಹಾಗೂ ಕುದ್ದುಪದವು ಪೆಟ್ರೋಲ್ ಪಂಪ್ ದರೋಡೆ ಸೇರಿ 2 ಪ್ರಕರಣ, ಶೇಣಿ ನಿವಾಸಿ ವಸಂತ ಎಂ.(31) ಮೇಲೆ ಕುಂಬಳೆ ಠಾಣೆಯಲ್ಲಿ 4 ಪ್ರಕರಣಗಳಿವೆ. ಈ ಎಲ್ಲಾ ಆರೋಪಿಗಳು ಪದೇಪದೇ ವಿವಿಧ ಕೃತ್ಯದಲ್ಲಿ ಭಾಗಿಯಾದ ಹಳೆಯ ಆರೋಪಿಗಳು ಎಂದರು

ಪೆರೋಲ್ ಮೇಲೆ ಹೊರ ಬಂದು ಕೃತ್ಯ ಎಸಗಿದ್ದ

ಕೆಲವು ವರ್ಷಗಳ ಹಿಂದೆ ಇಡೀ ಕರಾವಳಿ ಮತ್ತು ಕಾಸರಗೋಡು ಜಿಲ್ಲೆಗಳನ್ನೇ ಬೆಚ್ಚಿ ಬೀಳಿಸಿದ ಪೆರ್ಲ ಜಬ್ಬಾರ್ ಕೊಲೆ ಪ್ರಕರಣದ ಪ್ರಮುಖ ಆರೋಪಿ ಪಚ್ಚಂಬಳ ರವಿ ಜೀವಾವಧಿ ಶಿಕ್ಷೆಗೆ ಒಳಪಟ್ಟು ಕೇರಳದ ಕಣ್ಣೂರು ಸೆಂಟ್ರಲ್ ಜೈಲ್ ನಲ್ಲಿದ್ದ. ಇತ್ತೀಚೆಗೆ ಪೆರೋಲ್ ಮೇಲೆ ಹೊರ ಬಂದು ಈ ಕೃತ್ಯವನ್ನು ನಡೆಸಿಬಳಿಕ ಮತ್ತೆ ಜೈಲಿನೊಳಗೆ ಸೇರಿಕೊಂಡಿದ್ದ ಎಂದು ತಿಳಿದು ಬಂದಿದೆ. ಈತ ಸುಮಾರು 5 ಪ್ರಕರಣದಲ್ಲಿ ಆರೋಪಿಯಾಗಿದ್ದಾನೆ. ಈ ಪ್ರಕರಣದಲ್ಲಿ ಈತನನ್ನು ಇನ್ನಷ್ಟೇ ವಶಕ್ಕೆ ಪಡೆಯಬೇಕಾಗಿದೆ. ಈತ ಸೇರಿದಂತೆ ಒಟ್ಟು ಏಳು ಮಂದಿ ಸೇರಿ ದರೋಡೆ ಎಸಗಿದ್ದು ಈ ಪೈಕಿ ಆರು ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಮನೆಯನ್ನು ದರೋಡೆಗೆ ಆಯ್ಕೆ ಮಾಡಿದ್ದು ಹೀಗೆ

ಆರೋಪಿಗಳು ಜೈಲಿನಲ್ಲಿ ಒಬ್ಬರಿಗೊಬ್ಬರು ಪರಿಚಯವಾಗಿದ್ದು, ಕೆಲವು ಮಂದಿ ಹೊರಗಡೆ ಪರಿಚಯವಾಗಿದ್ದಾರೆ. ಕುದ್ಕಾಡಿ ತರವಾಡಿನ ದೈವಗಳ ನೇಮೋತ್ಸವಕ್ಕೆ ಕೇರಳದಿಂದ ಕುಟುಂಬವೊಂದು ಬಂದಿದ್ದು ಅದರ ಕಾರು ಚಾಲಕನಾಗಿ ಸುಧೀರ್ ಮಣಿಯಾಣಿ ಬಂದಿದ್ದ. ಈ ಸಂದರ್ಭ ಗುರುಪ್ರಸಾದ್ ರೈ ಮನೆಯ ಸಮಗ್ರ ಮಾಹಿತಿ ಸಂಗ್ರಹಿಸಿದ್ದ. ಸಾಕಷ್ಟು ಜಮೀನು ಹೊಂದಿರುವ ಈ ಮನೆ ದರೋಡೆ ಮಾಡಿದ್ರೆ ತುಂಬಾ ಹಣ ಚಿನ್ನಾಭರಣ ಇರಬಹುದೆಂದು ಶಂಕಿಸಿದ ಆತ ದರೋಡೆ ತಂಡಕ್ಕೆ ಮಾಹಿತಿ ನೀಡಿದ್ದ. ಅದರಂತೆ ತಂಡ ಈ ಮನೆಯನ್ನು ದರೋಡೆಗೆ ಆಯ್ಕೆ ಮಾಡಿತ್ತು.

ಬೇಲ್‌ ಮೇಲೆ ಬಂದವರು ಮತ್ತೆ ಜೈಲು ಪಾಲಾದರು:

ವರ್ಷದ ಹಿಂದೆ ರೆಂಜ-ಮುಡ್ಪಿನಡ್ಕ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದ ನಿಡ್ಪಳ್ಳಿಯ ಮಹಿಳೆಯೊಬ್ಬರ ಕುತ್ತಿಗೆಯಲ್ಲಿದ್ದ ಕರಿಮಣಿ ಸರವನ್ನು ಬೈಕ್‌ ನಲ್ಲಿ ಬಂದ ಇಬ್ಬರು ಎಗರಿಸಿದ್ದರು. ಈ ಪ್ರಕರಣದ ಆರೋಪಿಗಳಾದ ಫೈಝಲ್ ಮತ್ತು ಅಬ್ದುಲ್ ಸಿಸಾರ್ ಅವರನ್ನು ಪೊಲೀಸರು ಬಂಧಿಸಿದ್ದು ಬಳಿಕ ಜಾಮೀನಿನ ಮೇಲೆ ಬಿಡುಗಡೆಗೊಂಡಿದ್ದರು. ತದ ನಂತರ ಪ್ರಕರಣಕ್ಕೆ ಸಂಬಂಧಿಸಿ ನ್ಯಾಯಾಲಯ ವಿಚಾರಣೆಗೆ ಹಾಜರಾಗದೆ ತಲೆಮರೆಸಿಕೊಂಡಿದ್ದರು. ಈ ಪೈಕಿ ಅಬ್ದುಲ್ ನಿಸಾರ್‌ನನ್ನು ಸಂಪ್ಯ ಪೊಲೀಸರು ಜುಲೈ 5 ರಂದು ಕುಂಬ್ಳೆಯಲ್ಲಿ ಪತ್ತೆ ಮಾಡಿ ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದರು. ನ್ಯಾಯಾಲಯ ಆತನಿಗೆ ನ್ಯಾಯಾಂಗ ಬಂಧನ ವಿಧಿಸಿತ್ತು.

ಆರೋಪಿ ಫೈಝಲ್ ಕುಂಬ್ಳೆ ಠಾಣಾ ವ್ಯಾಪ್ತಿಯಲ್ಲಿ ನಡೆದಿರುವ ಪ್ರಕರಣವೊಂದಕ್ಕೆ ಸಂಬಂಧಿಸಿ ಆ ಸಂದರ್ಭಲ್ಲಿ ಜೈಲಿನಲ್ಲಿದ್ದ. ನ್ಯಾಯಾಲಯದಿಂದ ಜಾಮೀನು ಪಡೆದು ಹೊರ ಬಂದ ಈ ಇಬ್ಬರು ದರೋಡೆ ಪ್ರಕರಣದಲ್ಲಿ ಭಾಗಿಯಾಗಿ ಮತ್ತೆ ಜೈಲು ಸೇರುವಂತಾಗಿದೆ.

ಆರೋಪಿಗಳ ಬಳಿಯಿಂದ ದರೋಡೆ ಮಾಡಿದ ಚಿನ್ನಾಭರಣ, ನಗದು ವಶಕ್ಕೆ ಪಡೆಯಲಾಗಿದೆ. ಇದರ ಜತೆಗೆ ಕೃತ್ಯಕ್ಕೆ ಬಳಸಿದ ಮಾರಕಾಯುದ್ದ ವಾಹನ ಜಪ್ತಿ ಮಾಡಲಾಗಿದೆ

ಪೊಲೀಸ್‌ ತಂಡ

ಪೊಲೀಸ್ ಉಪ ಅಧೀಕ್ಷಕಿ ಡಾ. ಗಾನ ಪಿ. ಕುಮಾರ್ ಮಾರ್ಗದರ್ಶನದಲ್ಲಿ ಪುತ್ತೂರು ಗ್ರಾಮಾಂತರ ವೃತ್ತ ನಿರೀಕ್ಷಕ ರವಿ ಬಿ. ಎಸ್. ನೇತೃತ್ವದಲ್ಲಿ ಪುತ್ತೂರು ಸಂಚಾರ ಪೊಲೀಸ್ ಠಾಣಾ ಉಪನಿರೀಕ್ಷಕ ಉದಯರವಿ ಎಂ. ವೈ., ಪುತ್ತೂರು ಗ್ರಾಮಾಂತರ ಠಾಣಾ ಉಪನಿರೀಕ್ಷಕ ಧನಂಜಯ ಬಿ. ಸಿ., ಉಪ್ಪಿನಂಗಡಿ ಠಾಣಾ ಉಪನಿರೀಕ್ಷಕ ರುಕ್ಮ ನಾಯ್ಕ, ಉಪ್ಪಿನಂಗಡಿ ಠಾಣಾ ಹೆಚ್ ಸಿ ಹರೀಶ್ಚಂದ್ರ, ವೇಣೂರು ಠಾಣಾ ಹೆಚ್ ಸಿ ಪ್ರವೀಣ್ ಮೂರುಗೋಳಿ, ವಿಟ್ಲ ಪೊಲೀಸ್ ಠಾಣಾ ಹೆಚ್ ಸಿ ಉದಯ ರೈ, ಪುತ್ತೂರು ಗ್ರಾಮಾಂತರ ವೃತ್ತ ಕಛೇರಿಯ ಹೆಚ್ ಸಿ ಅಬ್ದುಲ್ ಸಲೀಂ, ಪಿಸಿ ಜಗದೀಶ್ ಅತ್ತಾಜೆ, ಎ.ಹೆಚ್.ಸಿ ಹರೀಶ್, ಪುತ್ತೂರು ಗ್ರಾಮಾಂತರ ಠಾಣಾ ಎ.ಎಸ್.ಐ ಮುರುಗೇಶ್, ಹೆಚ್.ಸಿ. ಪ್ರವೀಣ್ ರೈ, ಹೆಚ್.ಸಿ. ಅದ್ರಾಮ್, ಹೆಚ್.ಸಿ. ಬಾಲಕೃಷ್ಣ, ಹೆಚ್.ಸಿ. ಹರೀಶ್, ಹೆಚ್.ಸಿ. ಪ್ರಶಾಂತ್, ಪಿ.ಸಿ. ಮುನಿಯ ನಾಯ್ಕ, ಪುತ್ತೂರು ಸಂಚಾರ ಠಾಣಾ ಹೆಚ್.ಸಿ. ಪ್ರಶಾಂತ್ ರೈ, ಪುತ್ತೂರು ನಗರ ಠಾಣಾ ಪಿಸಿ ವಿನಾಯಕ ಎಸ್. ಬಾರ್ಕಿ, ಪಿಸಿ ಶರಣಪ್ಪ ಪಾಟೀಲ್, ಬಂಟ್ವಾಳ ಸಂಚಾರ ಠಾಣಾ ಪಿಸಿ ವಿವೇಕ್, ಪಿಸಿ ಕುಮಾರ್ ಕೆ., ಜಿಲ್ಲಾ ಗಣಕಯಂತ್ರ ವಿಭಾಗದ ಎಹೆಚ್.ಸಿ ಸಂಪತ್ ಕುಮಾರ್, ಸಿಪಿಸಿ ದಿವಾಕರ್, ವಾಹನ ಚಾಲಕ ಪ್ರವೀಣ್ ಮತ್ತಿತರರು ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದಾರೆ.

ತಂಡಕ್ಕೆ ನಗದು ಬಹುಮಾನ:

ಪೊಲೀಸ್ ತಂಡದಲ್ಲಿ ಕಾರ್ಯ ನಿರ್ವಹಿಸಿದ ಸಿಬ್ಬಂದಿಗಳು ಪ್ರೋತ್ಸಾಹಿಸುವ ಹಾಗೂ ಇನ್ನಷ್ಟು ಪತ್ತೆಕಾರ್ಯದಲ್ಲಿ ಹುರಿದುಂಬಿಸುವ ನಿಟ್ಟಿನಲ್ಲಿ ನಗದು ಬಹುಮಾನವನ್ನು ಪೊಲೀಸ್ ಅಧೀಕ್ಷಕ ರಿಷ್ಯಂತ್ ಸಿ.ಬಿ. ಅವರು ಪುತ್ತೂರು ಗ್ರಾಮಾಂತರ ವೃತ್ತ ನಿರೀಕ್ಷಕ ರವಿ ಬಿ. ಎಸ್. ನೇತೃತ್ವದಲ್ಲಿ ಅವರಿಗೆ ಹಸ್ತಾಂತರಿಸಿದರು.