ಶ್ರೀರಾಮಸೇನೆ ವಿರೋಧ

ಇನ್ನೊಂದು ಧರ್ಮದ ಮೀನುಗಾರರನ್ನು ಕೆರಳಿಸುವ ರೀತಿಯಲ್ಲಿ ಪ್ರಚೋದನೆ ನೀಡಿರುವುದು ಖಂಡನೀಯ ಎಂದು ಶ್ರೀರಾಮಸೇನಾ ರಾಜ್ಯ ಪ್ರಧಾನ ಕಾರ್ಯದರ್ಶಿ ಆನಂದ ಶೆಟ್ಟಿ ಅಡ್ಯಾರ್‌ ತಿಳಿಸಿದ್ದಾರೆ.

“ಬ್ಯಾನರ್‌ನಿಂದ ಗೊಂದಲವಾಗಿಲ್ಲ – ಅನ್ಯೋನ್ಯತೆಯಿಂದ ಇದ್ದೇವೆ’

ಬ್ಯಾನರ್‌ ಅಳವಡಿಸಿರುವುದರಿಂದ ಮೀನು ಗಾರರಲ್ಲಿ ಯಾವುದೇ ಗೊಂದಲ ಉಂಟಾಗಿಲ್ಲ. ಎಲ್ಲ ಧರ್ಮಗಳ ಹಬ್ಬಗಳಿಗೂ ರಜೆ ನಿಗದಿಗೊಳಿಸಿ ನಿರ್ಣಯಿಸಲಾಗಿದೆ. ರಜೆಯ ಸಂದರ್ಭ ಮುಂಜಾನೆ 3.45ರ ನಂತರ ಹಸಿಮೀನು ವ್ಯಾಪಾರಸ್ಥರು ವ್ಯಾಪಾರ ನಡೆಸುವಂತಿಲ್ಲ. ಆದರೆ ಕೆಲವು ಮೀನು ವ್ಯಾಪಾರಸ್ಥರು ಬೆಳಗ್ಗೆ ಗಂಟೆಯ ನಂತರ ರಜೆ ಎಂದು ತಿಳಿದು ವ್ಯಾಪಾರ ಮಾಡುತ್ತಾರೆ. ಇದನ್ನು ತಪ್ಪಿಸುವ ನಿಟ್ಟಿನಲ್ಲಿ ಹಾಗೂ ಗೊಂದಲಕ್ಕೆ ತೆರೆ ಎಳೆಯಲು ಬ್ಯಾನರ್ ಅಳವಡಿಸಲಾಗಿದೆ. ಇದು ಸಂಘದ ಎಲ್ಲ ಸಮುದಾಯದ ಮೀನು ವ್ಯಾಪಾರಸ್ಥರು ಸೇರಿಕೊಂಡು ತೆಗೆದುಕೊಂಡ ನಿರ್ಣಯವಾಗಿದೆ ಎಂದು ಮಂಗಳೂರು ಯಾಂತ್ರಿಕ ಮೀನುಗಾರರ ಪ್ರಾಥಮಿಕ ಸಹಕಾರಿ ಸಂಘದ ಅಧ್ಯಕ್ಷ ಉಮೇಶ್‌ ಟಿ. ಕರ್ಕೇರಾ ಹೇಳಿದ್ದಾರೆ.

ಆದರೆ ಕೆಲವರು ರಜೆ ಇದ್ದರೂ, ಬೆಳಗ್ಗೆ 6 ಗಂಟೆಯವರೆಗೂ ಕೆಲಸ ಮಾಡುತ್ತಾರೆ. ಈ ಹಿನ್ನೆಲೆಯಲ್ಲಿ ಹಸಿ ಮೀನು ವ್ಯಾಪಾರಸ್ಥರ ಸಂಘದವರು ಬ್ಯಾನರ್‌ ಹಾಕಿರಬಹುದು. ಎಲ್ಲರೂ ಅನ್ಯೋನ್ಯತೆಯಿಂದ ಮೀನುಗಾರಿಕೆ ನಡೆಸುತ್ತಿದ್ದಾರೆ ಎಂದು ಕರ್ಕೇರ ಮತ್ತು ಮೊಗವೀರ ವ್ಯವಸ್ಥಾಪಕ ಮಂಡಳಿಯ ಕಾರ್ಯಾಧ್ಯಕ್ಷ ಭರತ್‌ ಕುಮಾರ್‌ ಉಳ್ಳಾಲ್‌ ಪ್ರತಿಕ್ರಿಯಿಸಿದ್ದಾರೆ.

“ಸಂಘಗಳಲ್ಲಿ ನಿರ್ಣಯಿಸಿದಂತೆ ಬ್ಯಾನರ್‌’

ಸಂಘಗಳ ನಿರ್ಣಯದಂತೆ ಪೂರ್ವ ನಿರ್ಧರಿತ ಪದ್ಧತಿಯಂತೆ ಸೆ. 28ರಂದು ಈದ್‌ ಮಿಲಾದ್‌ ಪ್ರಯುಕ್ತ ಕಡ್ಡಾಯ ರಜೆ ಪಾಲಿಸುವ ಬಗ್ಗೆ ಫ್ಲೆಕ್ಸ್‌ ಅಳವಡಿಸಲಾಗಿದೆ. ಬಾರ್ಕೂರು ಪೂಜೆ, ಉಚ್ಚಿಲ ಪೂಜೆ, ಗಣೇಶ ಚತುರ್ಥಿ, ಈದ್‌ ಉಲ್‌ ಫಿತರ್‌, ಬಕ್ರೀದ್‌, ಈದ್‌ ಮಿಲಾದ್‌, ಗುಡ್‌ ಫ್ರೈಡೇ ಮತ್ತು ಕ್ರಿಸ್ಮಸ್‌ ಎಂಬಿತ್ಯಾದಿ ಶುಭ ದಿನಗಳಲ್ಲಿ ಕೂಡಾ ಸಂಘಗಳ ನಿರ್ಣಯದಂತೆ ಮಾರಾಟಗಾರರು ಕಡ್ಡಾಯ ರಜೆ ಹೊಂದಿ ಆ ದಿನ ಮೀನು ಮಾರಾಟ ಚಟುವಟಿಕೆ ಸ್ಥಗಿತಗೊಳಿಸುವುದು ಅನೇಕ ವರ್ಷಗಳಿಂದ ನಡೆದುಕೊಂಡು ಬಂದಿದೆ. ಕೆಲವರು ತಪ್ಪು ಗ್ರಹಿಕೆಯ ಮಾಹಿತಿ ಹಂಚುತ್ತಿದ್ದಾರೆ ಎಂದು ಮಂಗಳೂರು ದಕ್ಕೆ ಹಸಿಮೀನು ಮಾರಾಟಗಾರರ, ಕಮಿಷನ್‌ ಏಜೆಂಟರ ಸಂಘದ ಅಧ್ಯಕ್ಷ ಕೆ. ಅಶ್ರಫ್ ತಿಳಿಸಿದ್ದಾರೆ.

ಮತೀಯ ಬಣ್ಣ ಕಟ್ಟಬೇಡಿ:ಡಿವೈಎಫ್‌ಐ

ಗಣೇಶ ಚತುರ್ಥಿ, ಬಾರ್ಕೂರು (ಮೊಗವೀರರ ಕುಲದೇವತೆ) ಜಾತ್ರೆ, ಉಚ್ಚಿಲ (ಮೊಗವೀರರ ಪ್ರಧಾನ ದೇವರ) ದೇವಸ್ಥಾನದ ಜಾತ್ರೆ, ಈದ್ ಮಿಲಾದ್, ರಮ್ಯಾನ್, ಬಕ್ರೀದ್, ಕ್ರಿಸ್ ಮಸ್, ಗುಡ್ ಪ್ರೈಡೆ ಹಬ್ಬಗಳ ದಿನ ಮಂಗಳೂರಿನ ಮೀನುಗಾರಿಕಾ ಬಂದರಿಗೆ ಕಡ್ಡಾಯ ರಜೆ ಇದು ಮೀನುಗಾರಿಕಾ ಬಂದರಿನ ಎಲ್ಲ ವಿಭಾಗದ . ಮೀನುಗಾರರು ಒಟ್ಟಾಗಿ ಕಳೆದ 15 ವರ್ಷಗಳಿಂದ ಅನುಸರಿಸುತ್ತಿರುವ ನಿಯಮ. ಹಬ್ಬದ ದಿನ ಅರ್ಧದಷ್ಟು ವ್ಯಾಪಾರಿಗಳು, ಮೀನುಗಾರರು ರಜೆ ಹಾಕಿದರೆ ಮೀನು ವ್ಯಾಪಾರದಲ್ಲಿ ಏರುಪೇರು ಉಂಟಾಗಿ ಆ ದಿನಗಳಂದು ಮೀನುಗಾರರು ದೊಡ್ಡ ನಷ್ಟ ಅನುಭವಿಸುವಂತಾಗುತ್ತಿತ್ತು. ಅದಕ್ಕಾಗಿ ಮೀನುಗಾರಿಕೆಯ ಎಲ್ಲಾ ವಿಭಾಗದವರು ಒಂದಾಗಿ ತೆಗೆದುಕೊಂಡ ನಿರ್ಧಾರ. ಇದೀಗ ಗೊಂದಲ ಸೃಷ್ಟಿಸಲು ಯತ್ನಿಸುತ್ತಿರುವವರಿಗೆ ಇದು ಗೊತ್ತಿದ್ದೂ ಉದ್ದೇಶ ಪೂರ್ವಕವಾಗಿ ಮಾಡುತ್ತಿದ್ದಾರೆ ಎಂದು ಡಿವೈಎಫ್‌ಐ ಮುನೀರ್‌ ಕಾಟಿಪಳ್ಳ ಹೇಳಿದ್ದಾರೆ.

ಚೌತಿಯಂದು ನಿಯಮ ಮೀರಿದ್ದಾರೆ

ಪ್ರತಿಕ್ರಿಯಿಸಿರುವ ಹಸಿ ಮೀನು ವ್ಯಾಪಾರಸ್ಥರ ಸಂಘದ ಅಧ್ಯಕ್ಷ ಇಸ್ಲಾಯಿಲ್, ಈ ಬಾರಿ ಚೌತಿ ಹಬ್ಬಕ್ಕೆ ನಿಯದು ಇದ್ದರೂ ಮೀನು ತೆಗೆದಿದ್ದಾರೆ. ಹಾಗಾಗಿ ಎಲ್ಲರೂ ನಿಯಮ ಪಾಲಿಸಲಿ ಎಂಬ ಉದ್ದೇಶದಿಂದ ಬ್ಯಾನರ್‌ ಹಾಕಿದ್ದೇವೆ. ಇದರಲ್ಲಿ ಜಾತಿ ಧರ್ಮ ಎನ್ನುವ ಪ್ರಶ್ನೆ ಬರಲ್ಲ . ಈ ಹಿಂದೆ ಹಬ್ಬದ ಪ್ರಯುಕ್ತ ರಜೆ ಇದೆ ಎನ್ನುವ ಬ್ಯಾನರ್ ಹಾಕುತ್ತಿದ್ದವು, ಆದರೆ ಈ ಬಾರಿ ಕಂಡೀಶನ್ ಹಾಕಿದ್ದೇವೆ. ಎಲ್ಲರಿಗೂ ಬಂದ್ ಮಾಡಿ ಅಂತ ಹೇಳಿದ್ದರೂ ಕೆಲವರು ಚೌತಿಗೆ ಮೀನು ತೆಗೆದು ನಿಯಮ ಉಲ್ಲಂಘಿಸಿದ್ದಾರೆ. ಹೀಗಾಗಿ ಬ್ಯಾನರ್‌ ಹಾಕಿ ಎಚ್ಚರಿಕೆ ನೀಡಲಾಗಿದೆ ಎಂದು ತಿಳಿಸಿದ್ದಾರೆ.