ಯು.ಟಿ ಖಾದರ್‌ ಮಧ್ಯಸ್ಥಿಕೆಯಲ್ಲಿ ಈ ಹಿಂದೆಯೂ ಸಂಧಾನ:
ಈ ನಡುವೆ ಹಕೀಂ ಕೂರ್ನಡ್ಕ ಹಾಗೂ ಸಚಿವ ಯು.ಟಿ ಖಾದರ್‌ ಅವರ ನಡುವೆ ಆತ್ಮೀಯ ಒಡನಾಟವಿದೆ ಎಂಬ ಮಾತುಗಳು ರಾಜಕೀಯ ವಲಯದಲ್ಲಿ ಕೇಳಿಬಂದಿದ್ದವು. ಇದಕ್ಕೆ ಪುಷ್ಟಿ ನೀಡುವಂತೆ, ಸುಮಾರು ಒಂದೂವರೆ ವರ್ಷದ ಹಿಂದೆ ಇಬ್ಬರ ನಡುವಿನ ಸಂಘರ್ಷ ತಾರಕಕ್ಕೇರಿದ್ದ ಸಂದರ್ಭದಲ್ಲಿ ಕೂರ್ನಡ್ಕ ಮಸೀದಿಗೆ ಭೇಟಿ ನೀಡಿದ್ದ ಖಾದರ್‌, ಅಶೋಕ್‌ ರೈ ಹಾಗೂ ಹಕೀಂ ಕೂರ್ನಡ್ಕ ಅವರ ನಡುವೆ ಹಸ್ತಲಾಘವ ಮಾಡಿಸಿ ಸಂಧಾನಕ್ಕೆ ಮುಂದಾಗಿದ್ದರು. ಆ ಬಳಿಕ ಸುಮಾರು ಒಂದು ವರ್ಷದವರೆಗೆ ಹಕೀಂ ಅವರು ಅಶೋಕ್‌ ರೈ ವಿರುದ್ಧ ಯಾವುದೇ ಬಹಿರಂಗ ಟೀಕೆಗಳನ್ನು ಮಾಡಿರಲಿಲ್ಲ.

ಆದರೆ, ಈ ಮೌನ ಹೆಚ್ಚು ಕಾಲ ಮುಂದುವರಿಯಲಿಲ್ಲ. ಮತ್ತೆ ತಮ್ಮ ಟೀಕಾ ಪ್ರವೃತ್ತಿಯನ್ನು ಆರಂಭಿಸಿದ ಹಕೀಂ, ಪತ್ರಿಕಾಗೋಷ್ಠಿ ಹಾಗೂ ಸಾಮಾಜಿಕ ಜಾಲತಾಣಗಳ ವಾಯ್ಸ್‌ ಮೆಸೇಜ್‌ಗಳ ಮೂಲಕ ಶಾಸಕರ ವಿರುದ್ಧ ವಾಗ್ದಾಳಿ ಮುಂದುವರಿಸಿದ್ದರು.

ಪ್ರೆಸ್‌ ಕ್ಲಬ್‌ ಎದುರಿನ ಗಲಾಟೆ ರಾಜಕೀಯ ಸಂಘರ್ಷಕ್ಕೆ ಹೊಸ ತಿರುವು
ತಿಂಗಳ ಹಿಂದೆ ಪುತ್ತೂರು ಪ್ರೆಸ್‌ ಕ್ಲಬ್‌ ಮುಂಭಾಗ ಹಕೀಂ ಕೂರ್ನಡ್ಕ ಹಾಗೂ ಅಶೋಕ್‌ ರೈ ಅವರ ಬೆಂಬಲಿಗರ ನಡುವೆ ಮಾತಿನ ಚಕಮಕಿ ನಡೆದು, ಅದು ಕೈಕೈ ಮಿಲಾಯಿಸುವ ಹಂತಕ್ಕೂ ತಲುಪಿತ್ತು. ಈ ಘಟನೆಯ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡಿತ್ತು.
ಘಟನೆಗೆ ಸಂಬಂಧಿಸಿದಂತೆ ಅಶೋಕ್‌ ರೈ ಅವರ ಬೆಂಬಲಿಗರು ತಮ್ಮ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಿ ಹಕೀಂ ಕೂರ್ನಡ್ಕ ಪುತ್ತೂರು ನಗರ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದರು. ಅದರಂತೆ ಪ್ರಕರಣವೂ ದಾಖಲಾಗಿತ್ತು. ಅಷ್ಟೇ ಅಲ್ಲದೆ, ತಮ್ಮನ್ನು ಕೊಲ್ಲಿಸುವ ಉದ್ದೇಶದಿಂದಲೇ ಅಶೋಕ್‌ ರೈ ಅವರು ಬೆಂಬಲಿಗರನ್ನು ಪ್ರೆಸ್‌ ಕ್ಲಬ್‌ ಬಳಿ ಕಳುಹಿಸಿದ್ದರು ಎಂಬ ಗಂಭೀರ ಆರೋಪವನ್ನೂ ಹಕೀಂ ಮಾಡಿದ್ದರು. ಈ ಪ್ರಕರಣದಲ್ಲಿ ಬಿಜೆಪಿ ಕೂಡ ಹಕೀಂ ಅವರ ಬೆಂಬಲಕ್ಕೆ ಪರೋಕ್ಷವಾಗಿ ನಿಂತಿತ್ತು.

ನಿರೀಕ್ಷಣಾ ಮಂದಿರದಲ್ಲಿ ಒಂದೂವರೆ ಗಂಟೆ ಮಾತುಕತೆ!
ಇಷ್ಟೆಲ್ಲ ರಾಜಕೀಯ ಸಂಘರ್ಷಗಳ ನಡುವೆಯೇ ಇದೀಗ ಇಬ್ಬರ ನಡುವೆ ಸಂಧಾನದ ಮಾತುಗಳು ಕೇಳಿಬರುತ್ತಿವೆ. ಪುತ್ತೂರಿನ ಹಿರಿಯ ಕಾಂಗ್ರೆಸ್‌ ಮುಖಂಡರೊಬ್ಬರ ಮಧ್ಯಸ್ಥಿಕೆಯಲ್ಲಿ ಅಶೋಕ್‌ ರೈ ಹಾಗೂ ಹಕೀಂ ಕೂರ್ನಡ್ಕ ನಡುವೆ ರಾಜಿ ಮಾತುಕತೆ ನಡೆದಿದೆ ಎಂಬ ಚರ್ಚೆ ಕಾಂಗ್ರೆಸ್‌ ವಲಯದಲ್ಲಿ ನಡೆಯುತ್ತಿದೆ.

ಪಕ್ಷದ ಮೂಲಗಳು ನಿಖರ ನ್ಯೂಸ್‌ಗೆ ನೀಡಿರುವ ಮಾಹಿತಿಯ ಪ್ರಕಾರ, ಕಳೆದ ಶನಿವಾರ ಪುತ್ತೂರಿನ ನಿರೀಕ್ಷಣಾ ಮಂದಿರದಲ್ಲಿ ಅಶೋಕ್‌ ರೈ ಹಾಗೂ ಹಕೀಂ ಕೂರ್ನಡ್ಕ. ಮುಚ್ಚಿದ ಕೋಣೆಯೊಳಗೆ ಇಬ್ಬರೇ ಕೂತು ಸುಮಾರು ಒಂದೂವರೆ ಗಂಟೆಗಳ ಕಾಲ ಮಾತುಕತೆ ನಡೆಸಿ ಭಿನ್ನಾಭಿಪ್ರಾಯಕ್ಕೆ ಪರಿಹಾರ ಕಂಡುಕೊಳ್ಳುವ ಯತ್ನ ಮಾಡಿದ್ದಾರೆ ಎನ್ನಲಾಗಿದೆ ಈ ವೇಳೆ, ಮಾತುಕತೆಯ ಮೂಲಕ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳುವ ಪ್ರಯತ್ನ ನಡೆದಿದೆ ಎನ್ನಲಾಗಿದೆ.

ಕೂರ್ನಡ್ಕ ಪ್ರೀಮಿಯರ್‌ ಲೀಗ್‌ಗೆ ಅಶೋಕ್‌ ರೈ ಆಹ್ವಾನ!
ಇಬ್ಬರ ನಡುವಿನ ಸಂಬಂಧ ಸುಧಾರಿಸಿರುವುದಕ್ಕೆ ಮತ್ತೊಂದು ಬೆಳವಣಿಗೆಯೂ ಸಾಕ್ಷಿಯಾಗಿದೆ. ಹಕೀಂ ಕೂರ್ನಡ್ಕ ಪ್ರತಿವರ್ಷ ಆಯೋಜಿಸುವ ‘ಕೂರ್ನಡ್ಕ ಪ್ರೀಮಿಯರ್‌ ಲೀಗ್‌ – ನಾಡ ಹಬ್ಬ‘ ಕ್ರಿಕೆಟ್‌ ಪಂದ್ಯಾವಳಿಗೆ ಈ ಬಾರಿ ಸಚಿವ ಯುಟಿ ಖಾದರ್‌ ಅವರೊಂದಿಗೆ ಶಾಸಕ ಅಶೋಕ್‌ ರೈ ಕೂಡ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ ಎಂಬ ಮಾಹಿತಿ ಲಭಿಸಿದೆ.

ಇಂದು (ಶನಿವಾರ) ಪುತ್ತೂರು ಶಾಸಕರ ಕಚೇರಿಗೆ ಭೇಟಿ ನೀಡಿದ ಹಕೀಂ ಕೂರ್ನಡ್ಕ, ಅಶೋಕ್‌ ರೈ ಅವರನ್ನು ಕಾರ್ಯಕ್ರಮಕ್ಕೆ ಅಧಿಕೃತವಾಗಿ ಆಹ್ವಾನಿಸಿದ್ದಾರೆ. ಈ ಬೆಳವಣಿಗೆ ಇಬ್ಬರ ನಡುವಿನ ಹಿಂದಿನ ಕಹಿ ಘಟನೆಗಳನ್ನು ಮರೆತು ಮತ್ತೆ ಸೌಹಾರ್ದ ಸಂಬಂಧ ಬೆಳೆಸುವ ಪ್ರಯತ್ನ ನಡೆಯುತ್ತಿರುವುದರ ಸ್ಪಷ್ಟ ಸೂಚನೆಯಾಗಿ ರಾಜಕೀಯ ವಲಯದಲ್ಲಿ ವಿಶ್ಲೇಷಿಸಲಾಗುತ್ತಿದೆ.

ಒಟ್ಟಿನಲ್ಲಿ, ನಿರಂತರ ಟೀಕೆ, ಆರೋಪ-ಪ್ರತ್ಯಾರೋಪ ಹಾಗೂ ಪೊಲೀಸ್‌ ಠಾಣೆಯ ಮೆಟ್ಟಿಲೇರಿದ್ದ ರಾಜಕೀಯ ಸಂಘರ್ಷಕ್ಕೆ ಈಗ ಸಂಧಾನದ ಮೂಲಕ ವಿರಾಮ ಸಿಗಲಿದೆಯೇ ಎಂಬ ಕುತೂಹಲ ಪುತ್ತೂರಿನ ಕಾಂಗ್ರೆಸ್‌ ವಲಯದಲ್ಲಿ ಮೂಡಿದೆ. ಈ ಸಂಧಾನ ಎಷ್ಟು ಕಾಲ ಮುಂದುವರಿಯಲಿದೆ? ಹಕೀಂ ಕೂರ್ನಡ್ಕ ಅವರು ಇನ್ನು ಮುಂದೆ ಅಶೋಕ್‌ ರೈ ವಿರುದ್ಧದ ಟೀಕಾಸ್ತ್ರಗಳನ್ನು ಕೆಳಗಿಡಲಿದ್ದಾರೆಯೇ? ಅಥವಾ ಇದು ತಾತ್ಕಾಲಿಕ ರಾಜಕೀಯ ಕದನ ವಿರಾಮವೇ? ಎಂಬುದನ್ನು ಕಾದು ನೋಡಬೇಕಿದೆ.