“ಹಣ ನೀಡಿದವರು ಇಂದಿಲ್ಲದಿದ್ದರೆ ನಾಳೆ ವೀಸಾ ಸಿಗಬಹುದು ಎಂದು ತಿಂಗಳುಗಟ್ಟಲೆ ಕಾಯುತ್ತಾರೆ. ಇದರಿಂದ ವಂಚನೆಯ ಬಗ್ಗೆ ದೂರು ದಾಖಲಾಗುವಾಗ ತಡವಾಗಿರುತ್ತದೆ. ಆಗಲೇ ಆರೋಪಿಗಳು ನೂರಾರು ಜನರನ್ನು ವಂಚಿಸಿ ತಲೆಮರೆಸಿಕೊಂಡಿರುತ್ತಾರೆ” ಎಂದು ಅವರು ವಿವರಿಸಿದರು.
“ವಂಚನೆ ಮಾಡಿರುವ ಆರೋಪಿಗಳು ತಮ್ಮ ವಿರುದ್ಧ ಎಫ್‌ಐಆರ್ ದಾಖಲಾಗುವುದನ್ನೇ ಕಾಯುತ್ತಿರುತ್ತಾರೆ. ಇಂತಹ ಪ್ರಕರಣಗಳಲ್ಲಿ ಆರೋಪಿಗಳಿಗೆ ಏಳು ವರ್ಷಕ್ಕಿಂತ ಕಡಿಮೆ ಶಿಕ್ಷೆಯಿದ್ದು, ಸುಲಭವಾಗಿ ಜಾಮೀನು ಸಿಗುತ್ತದೆ. ಕೆಲವು ವರ್ಷ ಜೈಲಿನಲ್ಲಿದ್ದು ಹೊರಬಂದರೂ, ಅನಧಿಕೃತವಾಗಿ ಗಳಿಸಿದ ಕೋಟಿಗಟ್ಟಲೆ ಹಣಕ್ಕೆ ಏನೂ ಆಗದು ಎಂಬ ದುರಾಲೋಚನೆಯಲ್ಲಿ ಇವರು ಇರುತ್ತಾರೆ” ಎಂದು ಒಬ್ಬ ಪೊಲೀಸ್ ಅಧಿಕಾರಿ ತಿಳಿಸಿದರು.

“ವಿದೇಶದಲ್ಲಿ ಉದ್ಯೋಗದ ಭರವಸೆಯೊಡ್ಡಿ ಹಣ ಪಡೆದು ವಂಚಿಸುವವರನ್ನು ಕಾನೂನಿನ ಕಟ್ಟುಪಾಡಿಗೆ ಒಳಪಡಿಸಲು, ಆರೋಪಿಗಳ ಹಿಂದಿನ ಅಪರಾಧ ಚಟುವಟಿಕೆಗಳ ಮಾಹಿತಿಯನ್ನು ಸಂಗ್ರಹಿಸಿ, ಕರ್ನಾಟಕ ಸಂಘಟಿತ ಅಪರಾಧ ತಡೆ ಕಾಯ್ದೆ (ಕೋಕಾ) ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳುತ್ತಿದ್ದೇವೆ” ಎಂದು ಅಪರಾಧ ವಿಭಾಗದ ಡಿಸಿಪಿ ಕೆ. ರವಿಶಂಕರ್ ತಿಳಿಸಿದರು.

“ಎಸಿಪಿ ಅಥವಾ ಇನ್ಸ್‌ಪೆಕ್ಟರ್‌ಗಳು ತಮ್ಮ ವ್ಯಾಪ್ತಿಯಲ್ಲಿರುವ ವಿದೇಶಿ ಉದ್ಯೋಗ ಏಜೆನ್ಸಿಗಳ ಕಚೇರಿಗಳಿಗೆ ಭೇಟಿ ನೀಡಿ ಮಾಹಿತಿ ಸಂಗ್ರಹಿಸುತ್ತಾರೆ. ಪೊಲೀಸ್ ಅಧಿಕಾರಿಗಳಿಗೆ ಮತ್ತು ಸಿಬ್ಬಂದಿಗೆ ವಲಸೆ ನಿಯಮಗಳ ಬಗ್ಗೆ ಇಮಿಗ್ರೇಷನ್ ಅಧಿಕಾರಿಗಳಿಂದ ತರಬೇತಿ ನೀಡಿಸಲಾಗಿದೆ. ಕಾಲೇಜು ವಿದ್ಯಾರ್ಥಿಗಳಿಗೆ ಜಾಗೃತಿ ಮೂಡಿಸಲಾಗುತ್ತಿದೆ. ಸಾಮಾಜಿಕ ಮಾಧ್ಯಮಗಳ ಮೂಲಕ ಇಂತಹ ವಂಚನೆಯ ಬಗ್ಗೆ ಅರಿವು ಮೂಡಿಸಲಾಗುತ್ತಿದೆ” ಎಂದು ಅವರು ಹೇಳಿದರು.

ಕಂಪನಿಯಿಂದ 289 ಜನರಿಗೆ ವೀಸಾ ವಂಚನೆ
ಆರೋಪಿಗಳಾದ ದಿಲ್ ಶಾದ್ ಸತ್ತಾರ್ ಖಾನ್ ಮತ್ತು ಸಾಹುಕಾರಿ ಕಿಶೋರ್ ಕುಮಾರ್, ಮಸಿವುಲ್ಲಾ ಖಾನ್ ಎಂಬಾತನನ್ನು ತಮ್ಮ ಸಂಸ್ಥೆಗೆ ಸೇರಿಸಿಕೊಂಡು, ಬೆಂದೂರುವೆಲ್‌ನ ‘ಎಸ್ಸೆಲ್ ವಿಲ್ಕಾನ್’ ಕಟ್ಟಡದಲ್ಲಿ ‘ಹೈರ್ ಗ್ಲೋ ಎಲೆಗಂಟ್ ಓವರ್‌ಸೀಸ್ ಇಂಟರ್‌ನ್ಯಾಷನಲ್ (ಒಪಿಸಿ) ಪ್ರೈ. ಲಿ.’ ಕಂಪನಿಯನ್ನು ಪ್ರಾರಂಭಿಸಿದ್ದರು. ‘ಮರೈನ್ ಆಫ್‌ಶೋರ್’ ಕಂಪನಿಯಿಂದ ಉದ್ಯೋಗಕ್ಕೆ ವೀಸಾ ಕೊಡಿಸುವ ಜಾಹೀರಾತು ನೀಡಿ, 289 ಅಭ್ಯರ್ಥಿಗಳಿಂದ ₹4.5 ಕೋಟಿ ಹಣ ಪಡೆದು ವಂಚಿಸಿದ್ದರು. ಈ ಬಗ್ಗೆ 2025ರ ಮೇ ತಿಂಗಳಲ್ಲಿ ನಗರ ಪೂರ್ವ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಕರ್ನಾಟಕ ಸಂಘಟಿತ ಅಪರಾಧ ನಿಯಂತ್ರಣ ಕಾಯ್ದೆಯಡಿ ತನಿಖೆ ನಡೆಯುತ್ತಿದೆ ಎಂದು ಡಿಸಿಪಿ ಮಾಹಿತಿ ನೀಡಿದರು.

ವಂಚಕ ಆರೋಪಿಯ ಬಂಧನ
ಉದ್ಯೋಗ ವೀಸಾ ಕೊಡಿಸುವುದಾಗಿ ನಂಬಿಸಿ, ಸಾರ್ವಜನಿಕರಿಂದ ಲಕ್ಷಾಂತರ ರೂಪಾಯಿ ಪಡೆದು 30ಕ್ಕೂ ಹೆಚ್ಚು ಜನರನ್ನು ವಂಚಿಸಿದ ಆರೋಪಿಯಾದ ಸುಧೀರ್ ರಾವ್ ವಿ.ಆರ್. (42) ಎಂಬಾತನನ್ನು 2023ರ ಏಪ್ರಿಲ್‌ನಲ್ಲಿ ಸಿಸಿಬಿ ಪೊಲೀಸರು ಬಂಧಿಸಿದ್ದರು. ಆತನ ವಿರುದ್ಧ ಸುರತ್ಕಲ್, ಮಂಗಳೂರು ಪೂರ್ವ, ಮಂಗಳೂರು ದಕ್ಷಿಣ, ಕಂಕನಾಡಿ, ನಗರ, ಮೂಡುಬಿದಿರೆ, ಮತ್ತು ಬಂಟ್ವಾಳ ಠಾಣೆಗಳಲ್ಲಿ ಎಫ್‌ಐಆರ್‌ಗಳು ದಾಖಲಾಗಿವೆ.

ಅನಧಿಕೃತ ಏಜೆನ್ಸಿ ನಡೆಸುವುದು ಅಪರಾಧ
ವಿದೇಶಾಂಗ ವ್ಯವಹಾರ ಸಚಿವಾಲಯದಿಂದ ಅಧಿಕೃತ ಪ್ರಮಾಣಪತ್ರವಿಲ್ಲದೆ ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯು ವಿದೇಶದಲ್ಲಿ ಉದ್ಯೋಗ ಒದಗಿಸುವ ವ್ಯವಹಾರದಲ್ಲಿ ತೊಡಗುವುದು 1983ರ ವಲಸೆ ಕಾಯ್ದೆಯ ಸೆಕ್ಷನ್ 10ರ ಅಡಿ ಅಪರಾಧವಾಗಿದೆ. ಸೆಕ್ಷನ್ 24ರ ಅಡಿ ಇಂತಹವರಿಗೆ ಶಿಕ್ಷೆ ವಿಧಿಸಬಹುದು ಎಂದು ವಲಸಿಗರ ರಕ್ಷಣಾ ವಿಭಾಗದ ಅಧಿಕಾರಿ ಅವನೀಶ್ ಶುಕ್ಲ ತಿಳಿಸಿದರು. ಇತ್ತೀಚೆಗೆ ಮಂಗಳೂರಿಗೆ ಭೇಟಿ ನೀಡಿದ್ದ ಅವರು ಮಾಧ್ಯಮಗಳೊಂದಿಗೆ ಮಾತನಾಡಿದರು. “ವಿದೇಶಕ್ಕೆ ಉದ್ಯೋಗಕ್ಕಾಗಿ ತೆರಳುವವರು ಏಜೆನ್ಸಿಗಳ ಸಹಾಯ ಪಡೆಯುವಾಗ ಅವು ಅಧಿಕೃತವೇ ಎಂಬುದನ್ನು ಖಾತರಿಪಡಿಸಿಕೊಳ್ಳಬೇಕು. ಕೇಂದ್ರ ಸರ್ಕಾರದ ವೆಬ್‌ಸೈಟ್ (www.emigrate.gov.in) ಅಥವಾ ವಲಸಿಗರ ರಕ್ಷಣಾ ವಿಭಾಗಕ್ಕೆ (poebengaluru@mea.gov.in) ಇಮೇಲ್ ಮೂಲಕ ಇದನ್ನು ಪರಿಶೀಲಿಸಬಹುದು” ಎಂದು ಅವರು ಸಲಹೆ ನೀಡಿದರು. 1983ರ ವಲಸೆ ಕಾಯ್ದೆಯಡಿ ಏಜೆನ್ಸಿಗಳು ನೋಂದಣಿ ಮಾಡಿಸಿಕೊಳ್ಳುವುದು ಕಡ್ಡಾಯವಾಗಿದೆ. ಇದಕ್ಕಾಗಿ ಪಿಒಇ ಸಹಾಯವಾಣಿ (1800-11-3090) ಸಂಪರ್ಕಿಸಬಹುದು ಎಂದರು.

ಪ್ರಮುಖ ದಾಖಲಾದ ಪ್ರಕರಣಗಳು (2023ರ ನಂತರ)
• ಕಂಕನಾಡಿಯ ‘ದಿ ಲೆಜಂಡ್ಸ್ ಐಇಎಲ್‌ಟಿಎಸ್’ ಸಂಸ್ಥೆಯ ಹೆಸರಿನಲ್ಲಿ ಜಾಹೀರಾತು ನೀಡಿ, ಜಿಲ್ಲೆಯ ನೂರಾರು ಜನರನ್ನು ವಂಚಿಸಿದ ಆರೋಪದ ಮೇಲೆ ಅಲ್ವಿನ್ ಡಿಮೆಲ್ಲೊ ವಿರುದ್ಧ ವಿವಿಧ ಠಾಣೆಗಳಲ್ಲಿ ದೂರು.
• ಸಿಂಗಪುರದಲ್ಲಿ ಉದ್ಯೋಗ ಕೊಡಿಸುವ ಆಮಿಷವೊಡ್ಡಿ ₹4.70 ಲಕ್ಷ ಪಡೆದು ಮಹಿಳೆಯನ್ನು ವಂಚಿಸಿದ ಬಗ್ಗೆ 2024ರ ಆಗಸ್ಟ್‌ನಲ್ಲಿ ಸುರತ್ಕಲ್ ಠಾಣೆಯಲ್ಲಿ ಎಫ್‌ಐಆರ್.
• ಉದ್ಯೋಗ ವೀಸಾ ಕೊಡಿಸುವುದಾಗಿ ₹1.97 ಲಕ್ಷ ಪಡೆದು ವಂಚಿಸಿದ ಆರೋಪದ ಮೇಲೆ ಕದ್ರಿ ಶಿವಭಾಗ್‌ನ ಮರಿಯ ಜೋಸೆಫ್ (54) ಮತ್ತು ಜೋಸೆಫ್ (59) ವಿರುದ್ಧ 2024ರ ಆಗಸ್ಟ್‌ನಲ್ಲಿ ಬಜಪೆ ಠಾಣೆಯಲ್ಲಿ ಎಫ್‌ಐಆರ್.
• ಇಸ್ರೇಲ್‌ನಲ್ಲಿ ಉದ್ಯೋಗ ವೀಸಾ ಕೊಡಿಸುವುದಾಗಿ ₹7.5 ಲಕ್ಷ ಪಡೆದು ಮಹಿಳೆಯನ್ನು ವಂಚಿಸಿದ ಬಗ್ಗೆ 2025ರ ಜನವರಿಯಲ್ಲಿ ಮಂಗಳೂರು ಗ್ರಾಮಾಂತರ ಠಾಣೆಯಲ್ಲಿ ಎಫ್‌ಐಆರ್.
• ಉದ್ಯೋಗ ವೀಸಾ ಭರವಸೆಯೊಡ್ಡಿ ₹19.20 ಲಕ್ಷ ವಂಚಿಸಿದ ಆರೋಪದ ಮೇಲೆ ಮೊಹಮ್ಮದ್ ಅಜ್ಞಾನ್ ಮತ್ತು ತೌಸೀಫ್ ವಿರುದ್ಧ 2025ರ ಅಕ್ಟೋಬರ್ 28ರಂದು ಕಂಕನಾಡಿ ಠಾಣೆಯಲ್ಲಿ ಎಫ್‌ಐಆರ್.

“ವಿದೇಶದಲ್ಲಿ ಉದ್ಯೋಗ ಒದಗಿಸುವ ಏಜೆನ್ಸಿಗಳು ಅಧಿಕೃತವೇ ಎಂಬುದನ್ನು ಪರಿಶೀಲಿಸದೆ ವ್ಯವಹಾರ ಮಾಡಬಾರದು. ಇದರಿಂದ ಕೈಸುಟ್ಟುಕೊಳ್ಳುವ ಸಾಧ್ಯತೆ ಇದೆ” – ಸುಧೀರ್ ಕುಮಾರ್ ರೆಡ್ಡಿ ಸಿ.ಎಚ್., ಮಂಗಳೂರು ಪೊಲೀಸ್ ಕಮಿಷನರ್.

“ವಿದೇಶದಲ್ಲಿ ಉದ್ಯೋಗ ಭರವಸೆಯೊಡ್ಡಿ ಹಣ ಪಡೆಯುವವರ ಬಗ್ಗೆ ಜನರು ಎಚ್ಚರಿಕೆಯಿಂದ ಇರಬೇಕು. ಯುವ ವಿದ್ಯಾರ್ಥಿಗಳಲ್ಲಿ ಈ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದೇವೆ” – ಕೆ. ರವಿಶಂಕರ್, ಡಿಸಿಪಿ, ಅಪರಾಧ ತಡೆ ವಿಭಾಗ.