ದೇವಾಲಯ ಜೀರ್ಣೋದ್ಧಾರ ಕಾರ್ಯದ ಅಂಗವಾಗಿ 2009ರಿಂದ ಕರಸೇವೆ ನಡೆದುಕೊಂಡು ಬಂದಿದೆ. 2023ರಲ್ಲಿ ವರುಣ ಮಂಟಪ ಮರು ನಿರ್ಮಾಣದ ಸಂದರ್ಭದಲ್ಲಿಯೂ ಭಕ್ತರಿಂದ ಕರಸೇವೆ ನಡೆದಿದೆ. ಇತ್ತಿಚೆಗೆ ಮನೆಗಳ ತೆರವು ವಿಚಾರದಲ್ಲಿ ಶಾಸಕ ಅಶೋಕ್ ರೈ ಮತ್ತು ವ್ಯವಸ್ಥಾಪನ ಸಮಿತಿ ಅಧ್ಯಕ್ಷರಾದ ಪಂಜಿಗುಡ್ಡೆ ಈಶ್ವರ ಭಟ್ ನೇತೃತ್ವದಲ್ಲಿ ನಡೆದ ಕರಸೇವೆಯಲ್ಲಿ ಕೇಸರಿ ಶಾಲು ಹಾಕಿಕೊಂಡು ಭಕ್ತರು ಭಾಗವಹಿಸಿದ್ದಾರೆ. ಸುಮಾರು 3ಸಾವಿರ ಮಂದಿಗೆ ಮಾಡಲಾದ ಊಟ ಸಂಪೂರ್ಣ ಖಾಲಿಯಾಗಿದೆ. ಈ ಮೂಲಕ 3ಸಾವಿರಕ್ಕೂ ಅಧಿಕ ಮಂದಿ ಭಾಗವಹಿಸಿದ್ದಾರೆ ಎನ್ನಲಾಗಿದೆ.

20 ದಿನದಲ್ಲಿ ಜಾಗ ಸ್ವಾಧೀನ..!
ದೇವಸ್ಥಾನದ ಪುಷ್ಕರಣಿಯ ಒಂದು ಭಾಗದಲ್ಲಿ 9ಕ್ಕೂ ಅಧಿಕ ಮನೆಗಳನ್ನು ದೇವಾಲಯದಲ್ಲಿ ಕೆಲಸ ಮಾಡುತ್ತಿದ್ದವರಿಗೆ ವಸತಿಗಾಗಿ ಬಾಡಿಗೆ ಆಧಾರದಲ್ಲಿ ನೀಡಲಾಗಿತ್ತು. ಜ.24ರಂದು ಮೂರು ಮನೆಗಳನ್ನು, ಫೆ.1ರಂದು ಎರಡು ಮನೆಗಳನ್ನು ದೇವಸ್ಥಾನಕ್ಕೆ ಹಿಂದಿರುಗಿಸಿದ್ದರು. ಫೆ. 3ರಂದು ಮನೆಯೊಂದರ ಮೇಲೆ ಬೃಹತ್ ಮರ ಬಿದ್ದು ಮತ್ತೊಂದು ಮನೆ ತೆರವಾಗಿತ್ತು. ತೆರವಿಗೆ ತೀವ್ರ ವಿರೋಧ ವ್ಯಕ್ತಪಡಿಸಿದ ಮುಖಂಡನ ಮನೆ ಫೆ.5ರಂದು ಬೆಳಗ್ಗೆ ಕೆಡವಿಹಾಕಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಉಳಿದ ಎರಡು ಮನೆಗಳನ್ನು ಫೆ.11ರಂದು ಕರ ಸೇವೆಯ ಮೂಲಕ ತೆರವು ಮಾಡಲಾಯಿತು.

ಯಾರಿಂದಲೂ ಆಗದ ಕಾರ್ಯ..!
ದೇವಸ್ಥಾನದ ಹಿಂದಿನ ವ್ಯವಸ್ಥಾಪನಾ ಸಮಿತಿಗಳು ದೇವಸ್ಥಾನದ ಜಾಗವನ್ನು ಅನ್ಯ ಉದ್ದೇಶಗಳಿಗೆ ಬಳಸುತ್ತಿದ್ದರೂ ಅದನ್ನು ತಡೆದು ಭೂಮಿಯನ್ನು, ಕಟ್ಟಡವನ್ನು ಮರಳಿ ಪಡೆಯುವ ಕಾರ್ಯಕ್ಕೆ ಪ್ರಯತ್ನ ಪಟ್ಟರೂ ಹಲವು ಅಡಚಣೆಗಳ ಮೂಲಕ ಕಾರ್ಯ ಯಶಸ್ವಿಯಾಗಿರಲಿಲ್ಲ. ಮಾಸ್ಟರ್ ಪ್ಲಾನ್ ಸಿದ್ದವಾದರೂ ಮನೆ ಬಿಟ್ಟುಕೊಡದೆ ನ್ಯಾಯಾಲಯಗಳ ಮೂಲಕ ದೇವಸ್ಥಾನದ ಜಾಗದಲ್ಲಿ ಹಕ್ಕು ಸ್ಥಾಪನೆಗೆ ಕೆಲವು ವ್ಯಕ್ತಿಗಳು ಮುಂದಾಗಿದ್ದರು. ಆದರೆ ಇದೆಲ್ಲವನ್ನು ದೈರ್ಯದಿಂದ ಎದುರಿಸಿದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಪಂಜಿಗುಡ್ಡೆ ಈಶ್ವರ ಭಟ್ ಜಾಗ ಮರಳಿ ಪಡೆದಿದ್ದಾರೆ.

ಅನೈತಿಕ ಚಟುವಟಿಕೆ ಕೇಂದ್ರ..?
ದೇವಸ್ಥಾನದ ಚಾಕರಿಯವರಿಗೆ ಎಂದು ನೀಡಲಾದ ಮನೆಗಳನ್ನು ಬೇರೆಯವರಿಗೆ ಬಾಡಿಗೆ ನೀಡುವ ಕಾರ್ಯ ನಡೆಯುತ್ತಿತ್ತು. ಕೆಲವು ಸಮಯದಿಂದ ಮನೆಗಳನ್ನು ನಾಯಿ ಸಾಕಣೆ ಸೇರಿ ಬೇರೆ ಬೇರೆ ಉದ್ದೇಶಕ್ಕೆ ಬಳಕೆ ಮಾಡುವ ಕಾರ್ಯವಾಗಿತ್ತು. ಮನೆ ತೆರವಿನ ನಂತರ ಸಿಡಿ, ಮದ್ಯದ ಬಾಟಲು ಸೇರಿ ವಿವಿಧ ವಸ್ತುಗಳು ಸಿಕ್ಕಿರುವುದನ್ನು ಪೊಲೀಸರು ದಾಖಲಿಸಿಕೊಂಡಿದ್ದಾರೆನ್ನಲಾಗಿದೆ. ಏನೆಲ್ಲ ಸಿಕ್ಕಿದೆ ಎಂಬುದನ್ನು ಹೇಳುವುದಕ್ಕೆ ನಾಚಿಕೆಯಾಗುತ್ತದೆ ಎಂದು ಶಾಸಕ ಅಶೋಕ್ ಕುಮಾರ್ ರೈ ಹೇಳುವ ಮೂಲಕ ಪುಷ್ಠಿನೀಡಿದ್ದಾರೆ.

ಅಭಿವೃದ್ಧಿ ಬಗ್ಗೆ ತಾಂಬೂಲ ಪ್ರಶ್ನೆ:
ಮಹಾಲಿಂಗೇಶ್ವರ ದೇವಸ್ಥಾನದಲ್ಲಿ ಫೆ. 16ರಂದು ಬೆಳಿಗ್ಗೆ 10.30ರಿಂದ ಸಂಜೆ 5ರವರೆಗೆ ದೇವಳದ ಅಭಿವೃದ್ದಿ ಬಗ್ಗೆ ಜ್ಯೋತಿಷಿ ನಿಟ್ಟೆ ಪ್ರಸನ್ನ ಆಚಾರ್ಯ ನೇತೃತ್ವದಲ್ಲಿ ತಾಂಬೂಲ ಪ್ರಶ್ನೆ ನಡೆಯಲಿದೆ. ಭಕ್ತಾದಿಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಬೇಕೆಂದು ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಈಶ್ವರ ಭಟ್ ಹಾಗೂ ಕಾರ್ಯನಿರ್ವಹಣಾಧಿಕಾರಿ ಕೆ.ವಿ ಶ್ರೀನಿವಾಸ ವಿನಂತಿಸಿದ್ದಾರೆ.