Environment Awareness ವಿಟ್ಲ : ಜೂ 7 : ರಸ್ತೆ ಬದಿ ತ್ಯಾಜ್ಯ ಎಸೆಯುವ ಮೂಲಕ  ಸುಂದರ ಪರಿಸರ ಹಾಗೂ ಹಚ್ಚ ಹಸುರಿನಿಂದ ಕೂಡಿದ ಪ್ರಕೃತಿಯ ಮೇಲೆ ದೌರ್ಜನ್ಯ ಎಸಗುತ್ತಿದ್ದವರನ್ನು ಪತ್ತೆ ಹಚ್ಚಿದ ಸ್ಥಳೀಯ ಯುವಕರ ತಂಡ  ಕೃತ್ಯ ಎಸಗಿದವರಿಂದಲೇ ತ್ಯಾಜವನ್ನು ಹೆಕ್ಕಿಸಿ ಪರಿಸರ ಪ್ರೇಮದ ಪ್ರಾಕ್ಟಿಕಲ್‌  ಪಾಠ  ಮಾಡಿದ ಅಪರೂಪದ ಹಾಗೂ ಅನುಕರಣೀಯ ಯೋಗ್ಯ  ಘಟನೆಯೊಂದು  ಬಂಟ್ವಾಳ ತಾಲೂಕಿನ ಕೊಲ್ನಾಡು ಗ್ರಾಮದ  ಕಳೆಂಜಿಮಲೆ ರಕ್ಷಿತಾರಣ್ಯದಲ್ಲಿ ಜೂ 6 ರಂದು ರಾತ್ರಿ ನಡೆದ ಬಗ್ಗೆ ವರದಿಯಾಗಿದೆ.  ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗುತ್ತಲೇ  ಮಾದರಿ ಕಾರ್ಯ ಮಾಡಿದ  ಸ್ಥಳೀಯ  ಯುವಕರ ಪರಿಸರ ಕಾಳಜಿ ಸಾರ್ವಜನಿಕರ ಪ್ರಶಂಸೆಗೆ ಪಾತ್ರವಾಗಿದೆ.

ಕನ್ಯಾನ – ಬೊಳ್ಪಾದೆ ಸಂಪರ್ಕ ರಸ್ತೆಯು ಕಳೆಂಜಿಮಲೆ ರಕ್ಷಿತಾರಣ್ಯದಲ್ಲಿ ಹಾದು ಹೋಗುತ್ತದೆ. ಈ ಮಾರ್ಗದಲ್ಲಿ ವಾಹನದಲ್ಲಿ  ಹಾದು ಹೋಗುವ ಸಂದರ್ಭ ಕೆಲವರು ತಮ್ಮ ಬಳಿ ಇರುವ ತ್ಯಾಜಗಳನ್ನು ರಕ್ಷಿತಾರಣ್ಯದ ನಿರ್ಜನ ಪ್ರದೇಶದಲ್ಲಿ ಕಳೆದ ಕೆಲವು ಸಮಯದಿಂದ ಎಸೆಯುತ್ತಿದ್ದರು. ಇದರಿಂದ ಈ ರಸ್ತೆ ತುಂಬಾ ತ್ಯಾಜಗಳು ತುಂಬಿದ್ದು ಪರಿಸರವಿಡಿ  ಕೊಳೆತು ನಾರುತಿತ್ತು .   ಆ ರಸ್ತೆಯಲ್ಲಿ ನಡೆದುಕೊಂಡು ಹೋಗುವವರು ಮೂಗು ಮುಚ್ಚಿಕೊಂಡು ಹೋಗುವ ಪರಿಸ್ಥಿತಿಯಿತ್ತು.   ಕುಡ್ತಮುಗೇರು, ಮಂಕುಡೆ, ಕುದ್ರಿಯ, ಕುಳಾಲು ಪರಿಸರದ ಹಸುಗಳು, ಆಡುಗಳು, ನಾಯಿ-ಬೆಕ್ಕುಗಳೆಲ್ಲಾ  ಈ ತ್ಯಾಜ್ಯ ತಿಂದು ಮಾರಕ ರೋಗಗಳಿಗೆ ತುತ್ತಾಗುತ್ತಿವೆ. ರಕ್ಷಿತಾರಣ್ಯದ ಹಚ್ಚ ಹಸಿರಿನ ತಪ್ಪಲಿನಲ್ಲಿ ನಿರಂತರವಾಗಿ ನಡೆಯುತ್ತಿದ್ದ ಈ  ದುಷ್ಕೃತ್ಯ ಪರಿಸರ ಪ್ರೇಮಿಗಳಿಗೆ ಅತೀವ ನೋವುಂಟು ಮಾಡುತಿತ್ತು.  

alt="Ad Widget"/>

ಇದನ್ನು ಗಮನಿಸಿದ  ಪ್ರಕೃತಿ ಪ್ರೇಮಿಗಳು  ಕೃತ್ಯ ಎಸಗುವವರಿಗೆ ಮರೆಯಲಾಗದ ಪಾಠ ಕಲಿಸಲು ಮುಂದಾಗಿದ್ದಾರೆ.     ಮಂಗಳವಾರ ಮುಸ್ಸಂಜೆ ಗೂಡ್ಸ್ ಟೆಂಪೋದಲ್ಲಿ ಬಂದ ಇಬ್ಬರು ದುರ್ನಾತ ಬರುತ್ತಿದ್ದ ತ್ಯಾಜ್ಯಗಳ ಮೂಟೆಗಳನ್ನು ರಸ್ತೆ ಬದಿ ಎಸೆದಿದ್ದಾರೆ. ಇವರ ಬರುವಿಕೆಗೆ ಹೊಂಚು ಹಾಕಿ ಕೂತಿದ್ದ   ಸ್ಥಳೀಯರು ತಮ್ಮ  ಮೊಬೈಲ್  ನಲ್ಲಿ ಅದನ್ನು  ಚಿತ್ರೀಕರಿಸಿದ್ದರು. ಬಳಿಕ ಈ ವಿಡಿಯೋವನ್ನು ವೈರಲ್‌ ಮಾಡಲಾಗಿತ್ತು.

<>

ಈ ವಿಡಿಯೋ ಸಹಾಯದಿಂದ ತ್ಯಾಜ ಎಸೆದವರನ್ನು ಪತ್ತೆ ಹಚ್ಚಿದ  ಪ್ರಕೃತಿ ಪ್ರೇಮಿ ಯುವಕರು ಅರಣ್ಯ ಇಲಾಖೆಗೂ  ಮಾಹಿತಿ ಒದಗಿಸಿದ್ದಾರೆ. ಅವರ ಸಹಾಯದಿಂದ   ತ್ಯಾಜ್ಯ ಎಸೆದವರನ್ನು ಸ್ಥಳಕ್ಕೆ ಕರೆಯಿಸಿ ಅವರಿಂದಲೇ ತ್ಯಾಜ್ಯಗಳ ಮೂಟೆಗಳನ್ನು ಪುನಹ ಟೆಂಪೋ ಗೆ ತುಂಬಿಸಿ ರಕ್ಷಿತಾರಣ್ಯ ಪರಿಸರವನ್ನು ಶುಚಿಗೊಳಿಸಿದ್ದಾರೆ. ಪ್ರಕೃತಿ ಪ್ರೇಮಿಗಳ ಕಾರ್ಯಾಚರಣೆಗೆ ಅರಣ್ಯ ಸಿಬ್ಬಂದಿಗಳು ಸಾಥ್ ನೀಡಿದ್ದು ಸಾರ್ವಜನಿಕರ ಪ್ರಶಂಸೆಗೆ ಪಾತ್ರವಾಗಿದೆ.