ಪುತ್ತೂರು: ಸರಕಾರಿ ಮೆಡಿಕಲ್ ಕಾಲೇಜು ಸ್ಥಾಪನೆಗೆ ಕನಸು ಕಂಡವರೇ ನಾವು ಎಂದು ಬಿಜೆಪಿ ಪತ್ರಿಕಾಗೋಷ್ಟಿಲ್ಲಿ ಹೇಳಿದ್ದು,  ಕಾಲೇಜು ಹೋರಾಟ ಅಭಿಯಾನವು ಕಾಂಗ್ರೆಸ್‌ನ ಟೂಲ್ ಕಿಟ್ ಎಂದು  ಆರೋಪಿಸಿದೆ. ಮೆಡಿಕಲ್ ಕಾಲೇಜ್‌  ಕನಸು ಬಿಜೆಪಿ  ಕಂಡಿದ್ದು ನಿಜವೇ ಆಗಿದ್ದಲ್ಲಿ, ಪುತ್ತೂರು ಶಾಸಕರು ಯಾಕೆ ಮೆಡಿಕಲ್ ಕಾಲೇಜಿಗೆ ಮೀಸಲಿಟ್ಟ ಜಾಗದಲ್ಲಿ ಸೀಫುಡ್ ಕಾರ್ಖಾನೆ ತರಲು ಹೊರಟರು ಎಂದು ಕಾಂಗ್ರೆಸ್ ಪ್ರಶ್ನಿಸಿದೆ.

ಪುತ್ತೂರು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರಾದ ಎಂ.ಬಿ. ವಿಶ್ವನಾಥ ರೈ ಅವರು ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಜಿಲ್ಲಾ ಓಬಿಸಿ ಮೋರ್ಚಾ ಅಧ್ಯಕ್ಷ ಆರ್.ಸಿ. ನಾರಾಯಣ್ ಅವರು ಇತ್ತೀಚೆಗೆ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ ಅಭಿಯಾನದ ಕುರಿತು ವ್ಯಂಗ್ಯವಾಡಿ ಅದೊಂದು ರಾಜಕೀಯ ಪ್ರೇರಿತ ಅಭಿಯಾನ ಎಂದು ಕುಹಕವಾಡಿದ್ದಾರೆ. ಆದರೇ  ಸರಕಾರಿ ಮೆಡಿಕಲ್ ಕಾಲೇಜು ಹೋರಾಟ ಸಮಿತಿ ಪಕ್ಷಾತೀತವಾದುದು. ಜಾತ್ಯತೀತವಾದುದು ಮತ್ತು ಧರ್ಮಾತೀತವಾದುದು. ಇದರಲ್ಲಿ ಎಲ್ಲ ಜಾತಿ, ಪಕ್ಷ, ಧರ್ಮದವರಿದ್ದಾರೆ. ಈ ಹೋರಾಟ ಪುತ್ತೂರು ಮತ್ತು ಪಕ್ಕದ ತಾಲೂಕುಗಳ ಜನರ ಆರೋಗ್ಯ ರಕ್ಷಣೆಗಾಗಿ ಮಾಡಲಾಗುತ್ತಿದೆಯೇ ಹೊರತು ಕಾಂಗ್ರೆಸ್‌ನ ಟೂಲ್‌ಕಿಟ್ ಅಲ್ಲ ಎಂದವರು ಸ್ಪಷ್ಟಪಡಿಸಿದರು.

alt="Ad Widget"/>

ಹೋರಾಟ ಸಮಿತಿಯ ಅಧ್ಯಕ್ಷನನ್ನಾಗಿ ಮಾಡುವ ಸಂದರ್ಭ ಪಕ್ಷವನ್ನು ನೋಡಿ ಮಾಡಿಲ್ಲ. ವೈದ್ಯಕೀಯ ಕಾಲೇಜು ಆಗಬೇಕೆಂಬ ತುಡಿತ ಸಾಮೆತ್ತಡ್ಕ ಮೂಲದ ಯು.ಎಸ್.ಎ. ನಲ್ಲಿ ವೈದ್ಯ ಸಂದೀಪ್ ಅವರದ್ದಾಗಿದ್ದು, ಈ ಹೋರಾಟಕ್ಕೆ ಪ್ರೇರಣೆಯಾಗಿದೆ. ಕಾಂಗ್ರೆಸ್ ಪಕ್ಷದ ಕರಾವಳಿ ಪ್ರಣಾಳಿಕೆಯ ಪ್ರಧಾನಾಂಶ  ಸರ್ಕಾರಿ ವೈದ್ಯಕೀಯ ಕಾಲೇಜು ಸ್ಥಾಪನೆಯಾಗಿದೆ.  ಅಧಿಕಾರಕ್ಕೆ ಯಾವ ಪಕ್ಷ ಬಂದರೂ ಹಕ್ಕೊತ್ತಾಯದ ಕಾರ್ಯ ಖಂಡಿತವಾಗಿಯೂ ಮುಂದಿನ ದಿನಗಳಲ್ಲಿ ನಡೆಯುತ್ತದೆ

<>

ನಾನು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ನಿಜ. ಹಾಗೆಂದು ಈ ಹುದ್ದೆಯ ಹೆಸರಿನಲ್ಲಿ ನಾನು ಆ ಸಮಿತಿಗೆ ಅಧ್ಯಕ್ಷನಾಗಿದ್ದಲ್ಲ. ಸಮಾಜದ ಮೇಲಿನ ತುಡಿತದಿಂದ ಆ ಹೋರಾಟಕ್ಕೆ ಇಳಿದೆವು. ಎಲ್ಲ ವರ್ಗದ ಜನರಿಂದ ಅದ್ಭುತ ಸ್ಪಂದನೆ ಸಿಕ್ಕಿದೆ. ಎಲ್ಲ ಪಕ್ಷದವರೂ ನಮ್ಮೊಂದಿಗಿದ್ದಾರೆ. ಹೋರಾಟಗಾರರು ನನ್ನನ್ನು ಅಧ್ಯಕ್ಷನಾಗಿ ಮಾಡಿದಾಗ ಪ್ರೀತಿಯಿಂದ ಒಪ್ಪಿಕೊಂಡಿದ್ದೇನೆ. ಇದರಲ್ಲಿ ಯಾವುದೇ ರಾಜಕೀಯವಿಲ್ಲ. ಪಕ್ಷದಲ್ಲಿರುವ ಒಬ್ಬ ವ್ಯಕ್ತಿ ಸಾಮಾಜಿಕ ಹೋರಾಟದಲ್ಲಿ ಭಾಗವಹಿಸಬಾರದು ಎಂದೇನಿಲ್ಲವಲ್ಲ? ಕೇಂದ್ರ, ರಾಜ್ಯದಲ್ಲಿ ಬಿಜೆಪಿ ಸರಕಾರ ಇರುವ ಕಾರಣ ಈ ಅಭಿಯಾನ ನಮ್ಮ ಸರಕಾರದ ವಿರುದ್ಧ ಎಂದು ಬಿಜೆಪಿಯವರಿಗೆ ಅನಿಸಿದೆಯೋ ಏನೋ. ಆದರೆ ಇದು ಸರಕಾರ, ಪಕ್ಷದ ವಿರುದ್ಧದ ಅಭಿಯಾನವಲ್ಲ. ಜನರ ಹಕ್ಕೊತ್ತಾಯ ಮಂಡಿಸುವ ಜನಾಂದೋಲನವಾಗಿದೆ ಎಂದರು.

ನಾಳೆ ನಮ್ಮ ಸರಕಾರ ಬಂದ ಮೇಲೂ ನಮ್ಮ ಈ ಹೋರಾಟ ಮುಂದುವರಿಯುತ್ತದೆ. ಪುತ್ತೂರಿನಲ್ಲಿ ನಮ್ಮ ಪಕ್ಷದ ಶಾಸಕರು ಬಂದರೂ ನಾವು ಅವರಿಗೂ ಈ ಹಕ್ಕೊತ್ತಾಯ ಮಾಡುತ್ತೇವೆ ಎಂದು ಹೇಳಿದ ಅವರು, ಸರಕಾರಿ ಮೆಡಿಕಲ್ ಕಾಲೇಜು ಪುತ್ತೂರಿನಲ್ಲಿ ಸ್ಥಾಪಿಸುವ ಬಗ್ಗೆ ಮೊದಲು ಕನಸು ಕಂಡವರೇ ನಾವು ಎಂದು ಬಿಜೆಪಿಗರು ಹೇಳುವುದರಲ್ಲಿ ಅರ್ಥವಿಲ್ಲ. ಯಾಕೆಂದರೆ ಸೇಡಿಯಾಪು ಬಳಿ ಸರಕಾರಿ ಮೆಡಿಕಲ್ ಕಾಲೇಜಿಗೆ 40 ಎಕರೆ ಜಾಗ ಮಂಜೂರು ಮಾಡಿದ್ದು ಶಕುಂತಳಾ ಶೆಟ್ಟಿಯವರು. ಇದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಒಂದು ವೇಳೆ ಬಿಜೆಪಿಗರು ಸರಕಾರಿ ಮೆಡಿಕಲ್ ಕಾಲೇಜಿಗೆ ಪರವಾಗಿದ್ದಿದ್ದರೆ ಶಾಸಕ ಸಂಜೀವ ಮಠಂದೂರು ಯಾಕೆ  ಕಾಲೇಜಿಗೆ ಮಂಜೂರಾದ ಜಾಗದಲ್ಲಿ ಸೀ ಫುಡ್ ಕಾರ್ಖಾನೆ ನಿರ್ಮಿಸಲು ಮುಂದಾದರು? ಅದಕ್ಕೆ ಬೇರೆ ಜಾಗ ನೋಡಬಹುದಿತ್ತಲ್ಲವೇ? ಸಾರ್ವಜನಿಕರ ಪ್ರಬಲ ವಿರೋಧ ಬಂದಾಗ ಸೀಫುಡ್ ಕಾರ್ಖಾನೆ ಯೋಜನೆಯಿಂದ ಹಿಂದೆ ಸರಿದರು. ಇದು ಸತ್ಯವಲ್ಲವೇ ಎಂದರು.

ಬೇಕಾದ ಮಾನದಂಡ ಪುತ್ತೂರಿನಲ್ಲಿಲ್ಲ ಎಂದಿದ್ದರು ಶಾಸಕರು

ಪುತ್ತೂರು ಬ್ಲಾಕ್ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ, ಕೆಪಿಸಿಸಿ ವಕ್ತಾರ ಅಮಳ ರಾಮಚಂದ್ರ ಮಾತನಾಡಿ, ಶಾಸಕ ಸಂಜೀವ ಮಠಂದೂರು ಅವರಿಗೆ ಪುತ್ತೂರಿನಲ್ಲಿ ಸರಕಾರಿ ಮೆಡಿಕಲ್ ಕಾಲೇಜು ಸ್ಥಾಪಿಸುವುದು ಇಷ್ಟವಿರಲಿಲ್ಲ. ಕಾಲೇಜಿನ ಜಾಗಕ್ಕೆ ಸೀಫುಡ್ ಕಾರ್ಖಾನೆ ತರುವ ಸಂದರ್ಭ ಅವರೇ ಪತ್ರಿಕಾ ಹೇಳಿಕೆ ನೀಡಿ, ಪುತ್ತೂರಿಗೆ ಸರಕಾರಿ ಮೆಡಿಕಲ್ ಕಾಲೇಜು ಬರುವುದಿಲ್ಲ. ಅದಕ್ಕೆ ಬೇಕಾದ ಮಾನದಂಡ ಇಲ್ಲಿ ಇಲ್ಲ ಎಂದು ಹೇಳಿದ್ದರು. ಈಗ ಮೆಡಿಕಲ್ ಕಾಲೇಜು ಪರವಾಗಿ ದೊಡ್ಡ ಮಟ್ಟದ ಆಂದೋಲನ ನಡೆಯುತ್ತಿರುವುದನ್ನು ಕಂಡು ನಾವು ಕೂಡ ಮೆಡಿಕಲ್ ಕಾಲೇಜು ಪರವಾಗಿದ್ದೇವೆ ಎಂದು ಹೇಳುತ್ತಿದ್ದಾರೆ.

ಕಾಲೇಜು ಹೋರಾಟ ಸಮಿತಿಯವರು ಶಾಸಕರಿಗೆ ಆರಂಭದಲ್ಲಿ ತಿಳಿಸಿಲ್ಲ ಎಂದು ಬಿಜೆಪಿ ನಾಯಕ ಆರ್. ಸಿ. ನಾರಾಯಣ್ ಮಾಡಿರುವ ಆರೋಪ ಸುಳ್ಳು. ಯಾಕೆಂದರೆ ಹೋರಾಟ ಸಮಿತಿ ರಚನೆಯಾದ ಕೆಲವೇ ದಿನಗಳಲ್ಲಿ ನಡೆದ ಪುತ್ತೂರು ಸರಕಾರಿ ಆಸ್ಪತ್ರೆಯ ಆರೋಗ್ಯ ರಕ್ಷಾ ಸಮಿತಿ ಸಭೆಯಲ್ಲಿ ಸ್ವತಃ ಹೋರಾಟ ಸಮಿತಿಯ ಗೌರವಾಧ್ಯಕ್ಷರಾದ ಅಣ್ಣಾ ವಿನಯಚಂದ್ರ ಭಾಗವಹಿಸಿದ್ದರು. ಆ ಸಭೆಯಲ್ಲಿ ಶಾಸಕರು ವಿನಯಚಂದ್ರರ ಜತೆ ಮೆಡಿಕಲ್ ಕಾಲೇಜು ರಚನೆಯ ಬಗ್ಗೆ ಚರ್ಚೆ ನಡೆಸಿದ್ದರು. ಸಿಆರ್‌ಎಫ್ ಫಂಡ್ ತರಲು ಪ್ರಯತ್ನಿಸಿ ಎಂದು ವಿನಯಚಂದ್ರರು ಶಾಸಕರಿಗೆ ಮನವಿ ಮಾಡಿದ್ದರು. ಇದು ಬಿಜೆಪಿಗರಿಗೆ ಮರೆತು ಹೋಯಿತೇ ಎಂದರು.

ಕಾಂಗ್ರೆಸ್‌ನ ಟೂಲ್ ಕಿಟ್ ಆಗಿದ್ದರೆ ಸಮಿತಿ ರಚನೆಯಾದ ಸಂದರ್ಭದಲ್ಲೇ ಹೇಳಬೇಕಿತ್ತು. ಯಾಕೆ ಹೇಳಿಲ್ಲ. ಈಗ ಜನಾಂದೋಲನ ಕಂಡು ಭಯಪಟ್ಟು ಆರೋಪ ಮಾಡುತ್ತಿದ್ದಾರೆ. ಸಿದ್ದರಾಮಯ್ಯ ಸರಕಾರದ ಅವಧಿಯಲ್ಲಿ ರಾಜ್ಯದಲ್ಲಿ ೬ ಸರಕಾರಿ ಮೆಡಿಕಲ್ ಕಾಲೇಜು ಮಂಜೂರಾಗಿತ್ತು. ಈ ಬಾರಿ ಕಾಂಗ್ರೆಸ್ ಪಕ್ಷದ ಜಿಲ್ಲಾ ಪ್ರಣಾಳಿಕೆಯಲ್ಲಿ ಈ ಅಂಶ ಸೇರಿಸುತ್ತೇವೆ ಎಂದವರು ನುಡಿದರು.

ಬ್ಲಾಕ್ ಕಾಂಗ್ರೆಸ್ ಉಪಾಧ್ಯಕ್ಷರಾದ ಮೌರೀಸ್ ಮಸ್ಕರೇನಸ್, ಅಲ್ಪಸಂಖ್ಯಾತ ವಿಭಾಗದ ಅಧ್ಯಕ್ಷರಾದ ಶಕೂರ್ ಹಾಜಿ, ಎಸ್‌ಸಿ ಘಟಕದ ಅಧ್ಯಕ್ಷರಾದ ಕೇಶವ ಪಡೀಲ್ ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.

ಈ ಸುದ್ದಿಯನ್ನು ಷೇರ್‌ ಮಾಡಿ

• WhatsApp
• Telegram
• Tweet
• Print

Related Topics:ದಕ್ಷಿಣ ಕನ್ನಡಪುತ್ತೂರುDakshina KannadaPuttur

Up Next

ಮಂಗಳೂರು : ಯುವತಿ ನಾಪತ್ತೆ – ಪತ್ತೆಯಾದಲ್ಲಿ ಮಾಹಿತಿ ನೀಡುವಂತೆ ಮನವಿ

Don't Miss

ಮಲ್ಟಿ ಬ್ರ್ಯಾಂಡೆಡ್ ಉಡುಪುಗಳ ಶೋರೂಮ್ ‘ವೈಟ್ ಟ್ಯಾಗ್’ ನ ಮೂರನೇ ಶಾಖೆ ಎ.1ರಂದು ಜಿ.ಎಲ್ ವನ್ ಮಾಲ್ ನಲ್ಲಿ ಉದ್ಘಾಟನೆ – 10% ಡಿಸ್ಕೌಂಟ್