ಪೊಲೀಸರು ಕೂಡಾ ಅಕ್ರಮ ಮರಳುಗಾರಿಕೆ ಬಗ್ಗೆ ಸಕ್ರಿಯವಾಗಿ ಕಠಿಣ ಕ್ರಮ ವಹಿಸಬೇಕು ಎಂದು ಉಸ್ತುವಾರಿ ಸಚಿವರು ಸೂಚಿಸಿದಾಗ, ಪೊಲೀಸ್ ಆಯುಕ್ತ ಅನುಪಮ್ ಅಗ್ರವಾಲ್ ಪ್ರತಿಕ್ರಿಯಿಸಿ, ನನ್ನ ಮೊಬೈಲ್ ನೋಡಿ, ಒಂದೇ ಕಾಲ್ ಬಂದಿಲ್ಲ,ಪರ್ಸನಲ್ ನಂಬರ್ ಕೊಟ್ಟಿದ್ದೇನೆ ಎಂದು ಕಮೀಷನರ್‌, ಕೃಷ್ಣವೇಣಿ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದು, ಇಲಾಖೆಗೆ ಸಂಬಂಧಪಟ್ಟವರು ಸೂಕ್ತ ಮಾಹಿತಿ ನೀಡಿದರೆ, ಸಹಯೋಗ ನೀಡಲು ನಾವು ಸಿದ್ಧ ಎಂದರು. ಮರಳು ಸಾಗಾಟದ ವಾಹನ ವಶಪಡಿಸಿಕೊಂಡರೂ ಲೋಕ ಅದಾಲತ್‌ಗಳಲ್ಲಿ ಐದು ಸಾವಿರದಿಂದ 10 ಸಾವಿರ ದಂಡ ವಿಧಿಸಿ ಬಿಡಲಾಗುತ್ತಿದೆ ಎಂದು ಅವರು ಈ ಸಂದರ್ಭದಲ್ಲಿ ತಿಳಿಸಿದರು.

ಅಧಿಕಾರಿಗಳ ಆರೋಪ ಪ್ರತ್ಯಾರೋಪ ಕಂಡು ಪೆಚ್ಚಾದ ಸಚಿವ ಗುಂಡೂರಾವ್ ಅವರು ಕೃಷ್ಣವೇಣಿ ಮತ್ತು ಅನುಪಮ್ ಅಗರ್ವಾಲ್ ಅವರಿಗೆ ಎಲ್ಲವನ್ನೂ ಸರಿ ಮಾಡಿಕೊಂಡು ಹೋಗಿ ಎಂದು ಸಚಿವ ಗುಂಡೂರಾವ್ ತಿಳಿಸಿದ್ದಾರೆ.

ಬೆಳ್ತಂಗಡಿ ಶಾಸಕ ಹರೀಶ್ ಪುಂಜಾ ಪ್ರತಿಕ್ರಿಯಿಸಿ, ನಾನ್‌ಸಿಆರ್‌ಝಡ್ ವ್ಯಾಪ್ತಿಯ ಮರಳು ಬ್ಲಾಕ್ ಬ್ಲಾಕ್‌ಗಳ ವಿಲೇಯನ್ನು ಗ್ರಾ.ಪಂ.ಗಳಿಗೆ ಹಸ್ತಾಂತರಿಸಬೇಕು. ಇದರಿಂದ ಗ್ರಾಪಂಗೆ ಆದಾಯವೂ ಬರಲಿದೆ ಎಂದರು.

ಜಿಲ್ಲಾಧಿಕಾರಿ ಮುಲ್ಲೈ ಮುಹಿಲನ್ ಅವರನ್ನು ಸಹ ಈ ಸಂದರ್ಭದಲ್ಲಿ ಕೃಷ್ಣವೇಣಿ ಅವರು ದೂರಿದ್ದು ಕೃಷರ್,ಬಿಲ್ಡರ್, ಲಾರಿ ಮಾಲಕರ ಸಭೆ ಕರೆಯೋಣ ಅಂದ್ರೂ ಡಿಸಿ ಕೇಳಿಲ್ಲ. ಕಾರಣ ಇಲ್ಲದೇ ಸಭೆಗಳನ್ನು ಡಿಸಿ ಮುಂದೂಡಿದ್ದಾರೆ ಎಂದು ದೂರಿದ ಕೃಷ್ಣವೇಣಿ ವಿರುದ್ಧ ಡಿಸಿ ಗರಂ ಆಗಿ ಚೀಪ್ ಆಗಿ ಮಾತನಾಡಬೇಡಿ,ಈ ಸಭೆಯಲ್ಲಿ ಚರ್ಚೆ ಮಾಡಲು ಇಷ್ಟ ಇಲ್ಲ ಎಂದು ತಿಳಿಸಿದರು.

ರಾಷ್ಟ್ರೀಯ ಹಸಿರು ಪೀಠ (ಎನ್‌ಜಿಟಿ) ನಿರ್ದೇಶನದ ಮೇರೆಗೆ ಕಳೆದ ನಾಲ್ಕು ವರ್ಷಗಳಿಂದ ಸಿಆರ್‌ಝಡ್ ಪ್ರದೇಶಗಳಿಂದ ಮರಳು ತೆಗೆಯಲು ಸಾಧ್ಯವಾಗುತಿಲ್ಲ. ಸಾಂಪ್ರದಾಯಿಕ ವಿಧಾನ ಬಳಸಿ ಸಿಆರ್‌ಝಡ್‌ನ ಮರಳು ಬ್ಲಾಕ್‌ಗಳನ್ನು ತೆರವುಗೊಳಿಸಲು ಅನುಮತಿ ಕೋರಿ ರಾಜ್ಯ ಸಮಿತಿ ಈಗಾಗಲೇ ಸಿಆರ್‌ಝಡ್ ನಿಯಮಗಳನ್ನು ಕೇಂದ್ರಕ್ಕೆ ಕಳುಹಿಸಿದೆ. ಕೇಂದ್ರ ಸರಕಾರ ಸಿಆರ್‌ಝಡ್ ನಿಯಮಗಳ ಅಧಿಸೂಚನೆ ಹೊರಡಿಸಿದರೆ, ಮರಳು ತೆಗೆಯುವ ನಿರ್ಬಂಧ ಬಗೆಹರಿಯಲಿದೆ. ಕೇಂದ್ರದ ಅಧಿಸೂಚನೆಗೆ ಎದುರು ನೋಡಲಾಗುತ್ತಿದೆ ಎಂದು ಜಿಲ್ಲಾಧಿಕಾರಿ ಮುಲೈ ಮುಗಿಲನ್ ಹೇಳಿದರು.

ಬೇರೆ ರಾಜ್ಯಗಳಲ್ಲಿ ಸಿಆರ್‌ಝಡ್‌ನಲ್ಲಿ ಮರಳುಗಾರಿಕೆಗೆ ಅನುಮತಿಸಲಾಗಿದೆ. ಇಲ್ಲಿಗೆ ಯಾಕೆ ಸಾಧ್ಯವಾಗಿಲ್ಲ ಎಂದು ತಿಳಿದುಕೊಳ್ಳಿ ಎಂದು ಬೆಳ್ತಂಗಡಿ ಶಾಸಕ ಹರೀಶ್ ಪೂಂಜ ಹೇಳಿದರು.

ನಾನ್ ಸಿಆರ್‌ಝಡ್‌ನಡಿ 27 ಮರಳು ಬ್ಲಾಕ್‌ಗಳಿದ್ದು ಒಂಬತ್ತು ಬ್ಲಾಕ್‌ಗಳ ಗುತ್ತಿಗೆ ಅವಧಿ ಮುಗಿದಿದೆ. ಅಕ್ರಮ ಮರಳುಗಾರಿಕೆ ತಡೆಗೆ ಸಂಬಂಧಿಸಿ 60 ಸಿಸಿ ಕ್ಯಾಮರಾ ಅಳವಡಿಸಲಾಗಿದೆ. ಜಿಲ್ಲೆಯಲ್ಲಿ ಅಕ್ರಮ ಮರಳುಗಾರಿಕೆಗೆ ಸಂಬಂಧಿಸಿ 107 ಪ್ರಕರಣ ದಾಖಲಿಸಿದ್ದು, 98 ಲಕ್ಷ ರೂ. ದಂಡ ಸಂಗ್ರಹಿಸಲಾಗಿದೆ ಎಂದು ಮಾಹಿತಿ ನೀಡಿದರು.