ಸುಳಿವು ಸಿಕ್ಕಿದು ಹೀಗೆ
ಶೂನ್ಯ ಸುಳಿವಿನ ಈ ಪ್ರಕರಣದಲ್ಲಿ ಮುಳುಗುವವನಿಗೆ ಹುಲ್ಲುಕಡ್ಡಿ ಆಸರೆ ಎಂಬಂತೆ ಸಿಕ್ಕಿದ್ದು ಹಳೇ ಫೀಯೇಟ್ ಕಾರು. ಇದರ ಬೆನ್ನು ಬಿದ್ದ ಪೊಲೀಸರಿಗೆ ಇದು ದರೋಡೆ ಕೃತ್ಯದ ಬಳಿಕ (ಆ ದಿನ ಮಧ್ಯಾಹ್ನ) ತಲಪಾಡಿ ಟೋಲ್ ಗೇಟ್ ಪಾಸಾಗಿರುವುದು ಕಾಣಿಸಿದೆ. ಆದರೇ ಅದರ ಹಿಂದಿನ ಸಿಸಿಟಿವಿಗಳನ್ನು ಪರಿಶೀಲಿಸಿದಾಗ ಕೃತ್ಯ ಎಸಗಲು ಆ ಕಾರು ತಲಪಾಡಿ ಟೋಲ್ ಗೇಟ್ ಮೂಲಕ ಉಳ್ಳಾಲಕ್ಕೆ ಬಂದಿಲ್ಲ ಎನ್ನುವುದು ಖಚಿತವಾಗಿದೆ. ಇದಾಗುತ್ತಲೇ ಉಳ್ಳಾಲಕ್ಕೆ ಬರುವ ಎಲ್ಲ ಮಾರ್ಗಗಳ ಸಿಸಿಟಿವಿ ಗಳ ಪರಿಶೀಲನೆಗೆ ಪೊಲೀಸರು ಇಳಿದಿದ್ದಾರೆ. ಇನ್ನು ಕಾರಿಗೆ ಅಳವಡಿಸಿದ ನಂಬರ್ ಪ್ಲೇಟ್ ಕೂಡ ನಕಲಿ ಎನ್ನುವುದು RTO ದತ್ತಾಂಶದ ಮೂಲಕ ಪತ್ತೆಯಾಗಿದೆ.

ಸಿಸಿಟಿವಿ ಪರಿಶೀಲನೆ ವೇಳೆ ಈ ಕಾರು ಕೃತ್ಯ ನಡೆದ ದಿನ ಬೆಳಿಗ್ಗೆ ಉಡುಪಿ ಮಾರ್ಗವಾಗಿ ಮಂಗಳೂರು ಪ್ರವೇಶಿಸಿರುವುದು ಗೊತ್ತಾಗಿದೆ ಹಾಗೂ ಆಗಲೂ ಅ ಕಾರಿನಲ್ಲಿ ನಕಲಿ ನಂಬರ್ ಪ್ಲೇಟ್ ಬಳಸಲಾಗಿತ್ತು. ಆದರೇ ಕೃತ್ಯ ನಡೆದ ದಿನ ಬೆಳಿಗ್ಗೆ ಆ ಕಾರು ಶಿರೂರು ಟೋಲ್ ಗೇಟ್ ಬಳಿ ಮಹಾರಾಷ್ಟ್ರ ನೋಂದಣಿಯ ನಂಬರ್ ಪ್ಲೇಟ್ ನೊಂದಿಗೆ ಪತ್ತೆಯಾಗಿದೆ. ಇದರ ಜಾಡು ಹಿಡಿದು ಕಾರಿನ ಮಾಲೀಕನ ಪತ್ತೆಗಿಳಿದ ಪೊಲೀಸರು ಕೊನೆಗೆ ತಲುಪಿದ್ದು ಮಹಾರಾಷ್ಟ್ರದ ಕುಖ್ಯಾತ ಸ್ಲಮ್ ಧಾರಾವಿಗೆ. ಅಲ್ಲಿನ ಖಬರಿಗಳು ಪೊಲೀಸರಿಗೆ ಕೆಲವು ಟಿಪ್ಟ್ ನೀಡಿದ್ದು , ಇದನ್ನು ಬಳಸಿ ಪೊಲೀಸರು ತನಿಖೆಯ ಇನ್ನಷ್ಟು ಆಳಕ್ಕೆ ಇಳಿದಾಗ , ಪ್ರಕರಣಕ್ಕೆ ತಮಿಳುನಾಡು ನಂಟು ಇರುವುದು ಗೊತ್ತಾಗಿದೆ.

ಮುರುಗಂಡಿ ಆ ಕಾರು ಬಳಸುತ್ತಿದ್ದ ಎಂಬ ಮಾಹಿತಿ ಪೊಲೀಸರಿಗೆ ಧಾರಾವಿಯಲ್ಲಿ ಸಿಕ್ಕಿದೆ. ಆತನ ಗ್ಯಾಂಗಿನ ಇತರ ಸದಸ್ಯರನ್ನು ತೀವ್ರ ತನಿಖೆಗೆ ಒಳಪಡಿಸಿದ್ದಾರೆ. ಕೆಲವು ಸದಸ್ಯರಿಗೆ ದರೋಡೆಯಲ್ಲಿ ತಮ್ಮನ್ನು ಆತ ಸೇರಿಸಿಕೊಳ್ಳದ ಕೋಪವು ಇತ್ತು. ಹೀಗಾಗಿ ಅವರು ದರೋಡೆಯ ಕುರಿತಾಗಿ ತಮಗಿದ್ದ ಎಲ್ಲ ಮಾಹಿತಿಯನ್ನು ಪೊಲೀಸರಿಗೆ ಅರುಹಿದ್ದಾರೆ.

ಈ ವೇಳೆ ದರೋಡೆಯ ಪಾಲು ಪಡೆಯಲು ರೈಲಿನಲ್ಲಿ ಮಹಾರಾಷ್ಟ್ರದಿಂದ ತಮಿಳು ನಾಡಿಗೆ ತೆರಳಿರುವ ಕಣ್ಣನ್ ಮಣಿಯ ಬಗ್ಗೆ ಪೊಲೀಸರಿಗೆ ಮಾಹಿತಿ ಸಿಕ್ಕಿದೆ. ಆತನನ್ನು ತಿರುನಲ್ವೇಲಿ ರೈಲ್ವೇ ನಿಲ್ದಾಣದಲ್ಲಿ ಪೊಲೀಸರು ಲಾಕ್ ಮಾಡಿದ್ದಾರೆ. ಬಳಿಕ ಆತನನ್ನು ಬಾಯ್ಬಿಡಿಸಿದ ಪೊಲೀಸರು ಇತರ ಆರೋಪಿಗಳನ್ನು ಖೆಡ್ಡಾಕ್ಕೆ ಕೆಡವಿದ್ದಾರೆ.

ಪತ್ತೆಯಾದ ಸ್ವತ್ತಿನ ವಿವರ :
ಕಳವಾಗಿದ್ದ ಸುಮಾರು 18.67 ಕೆಜಿ ಚಿನ್ನಾಭರಣಗಳ ಪೈಕಿ 18.314 ಕೆಜಿ ಚಿನ್ನಾಭರಣ ಹಾಗೂ 11,67,044ರೂ ನಗದು ಪೈಕಿ 3,80,500ರೂ.ಗಳನ್ನು ಪೋಲಿಸರು ವಶ ಪಡಿಸಿಕೊಂಡಿದ್ದು ಪ್ರಕರಣಕ್ಕೆ ಸಂಬಂಧಪಟ್ಟಂತೆ ನಾಲ್ವರು ಆರೋಪಿಗಳನ್ನು ಬಂದಿಸಿದ್ದಾರೆ.

ಪ್ರಕರಣದ ಪ್ರಮುಖ ಆರೋಪಿಗಳು ತಲೆಮರೆಸಿಕೊಂಡಿದ್ದು ಬ್ಯಾಂಕಿನ ಕುರಿತು ಮಾಹಿತಿ ಮತ್ತು ಸಹಕಾರ ನೀಡಿದ ಸ್ಥಳೀಯ ವ್ಯಕ್ತಿ ಸೇರಿದಂತೆ ಇನ್ನೂ ನಾಲ್ವರು ಆರೋಪಿಗಳ ಪತ್ತೆಗೆ ಪೋಲಿಸರು ಬಲೆಬೀಸಿದ್ದಾರೆ. ದರೋಡೆ ನಡೆದ ಮೂರೇ ದಿನಗಳಲ್ಲಿ ಆರೋಪಿಗಳಾದ ತಮಿಳುನಾಡಿನ ಅಮ್ಮನ್ ಕೋವಿಲ್ ನಿವಾಸಿ ಮುರುಗಂಡಿ ಥೇವರ್ (36), ಮುಂಬೈ ಡೊಂಬಿವಿಲಿಯ ಯೊಸುವಾ ರಾಜೇಂದ್ರನ್ (35), ಮುಂಬೈ ತಿಲಕನಗರದ ಕಣ್ಣನ್ ಮಣಿ (36) ಎಂಬವರನ್ನು ಪೊಲೀಸರು ಬಂಧಿಸುವಲ್ಲಿ ಯಶ್ವಸ್ವಿಯಾಗಿದ್ದು ವಿಚಾರಣೆ ತೀವ್ರಗೊಳಿಸಲಾಗಿದೆ.

6 ತಿಂಗಳ ಹಿಂದೆಯೇ ಸ್ಕೆಚ್
ಕೋಟೆಕಾರ್ ಬ್ಯಾಂಕ್ ದರೋಡೆಗೆ ಆರು ತಿಂಗಳ ಮೊದಲೇ ಸ್ಕೆಚ್ ಮಾಡಲಾತ್ತು ಮತ್ತು ಪ್ರಕರಣದಲ್ಲಿ ಭಾಗಿಯಾಗಿ ತಪ್ಪಿಸಿಕೊಂಡಿರುವ, ಮುಂಬೈನಲ್ಲಿ ನೆಲೆಸಿರುವ ಮಂಗಳೂರು ಮೂಲದವ ಎನ್ನಲಾಗಿರುವ ಶಶಿ ಥೇವರ್ ಎಂಬಾತ ಕೋಟೆಕಾರ್ ವ್ಯವಸಾಯ ಸಹಕಾರಿ ಬ್ಯಾಂಕ್ನಲ್ಲಿ ಭದ್ರತಾ ಸಿಬ್ಬಂದಿ ಕೊರತೆಯಿರುವ ಬಗ್ಗೆ ಆರೋಪಿಗಳಿಗೆ ಮಾಹಿತಿ ನೀಡಿದ್ದು, ಸ್ಥಳ ಪರಿಶೀಲನೆ ಕೂಡಾ ನಡೆಸಿದ್ದ ಎಂಬುದು ತಿಳಿದು ಬಂದಿದೆ. ಅದರಂತೆ ಶುಕ್ರವಾರ ಮಧ್ಯಾಹ್ನ ನಮಾಜ್ ಸಮಯದಲ್ಲೇ ದರೋಡೆ ಮಾಡಬೇಕೆಂದು ಆರೋಪಿಗಳು ಸ್ಕೆಚ್ ಮಾಡಿದ್ದರು.

ದರೋಡೆ ನಡೆದ ದಿನ ಮಧ್ಯಾಹ್ನ 12.20ರ ವೇಳೆಗೆ ಆಗಮಿಸಿದ್ದ ಆರೋಪಿಗಳು ಅಲ್ಲಿರುವ ಶಾಲೆಯ ಬಳಿ ಸ್ವಲ್ಪ ಹೊತ್ತು ಕಾದು 1.10ರ ವೇಳೆಗೆ ಬ್ಯಾಂಕ್ಗೆ ನುಗ್ಗಿ ಕೃತ್ಯ ಎಸಗಿ, ಮೂವರು ಆರೋಪಿಗಳು ಫಿಯೆಟ್ ಕಾರಿನಲ್ಲಿ ಪರಾರಿಯಾದರೇ ಉಳಿದ ಮೂವರು ರೈಲು, ಬಸ್ಸಿನಲ್ಲಿ ಮುಂಬೈಗೆ ಹೋಗಿ ಅಲ್ಲಿಂದ ತಮಿಳುನಾಡಿಗೆ ತೆರಳಿದ್ದರು.

ಬ್ಯಾಂಕ್ ದರೋಡೆಯ ಕಿಂಗ್ ಪಿನ್ ಶಶಿ ಥೇವರ್ʼನ ಬೆನ್ನ ಹಿಂದೆ ಇನ್ನೊಬ್ಬ ಆರೋಪಿಯಿದ್ದು ಆತನೇ ಪ್ರಕರಣದ ಸಂಚುಕೋರ ಎಂಬ ಬಗ್ಗೆ ಬಾತ್ಮೀದಾರರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ ಎನ್ನಲಾಗಿದೆ. ಹೀಗಾಗಿ ಪೊಲೀಸರು ಈ ಇಬ್ಬರು ಆರೋಪಿಗಳ ಬೆನ್ನು ಬಿದ್ದಿದ್ದು ವಿವಿಧ ಮೂಲಗಳಿಂದ ಅವರ ಕುರಿತು ಮಾಹಿತಿ ಸಂಗ್ರಹಕ್ಕೆ ಮುಂದಾಗಿದ್ದಾರೆ.

ಬಂಧಿತರ ನೀಡಿದ ಮಾಹಿತಿಯನ್ನ ಆಧರಿಸಿ ಶಶಿ ಥೇವರ್ ರೇಖಾಚಿತ್ರವನ್ನು ಪೊಲೀಸರು ಆರ್ಟಿಸ್ಟ್ʼಗಳ ನೆರವಿನಿಂದ ರಚಿಸಿದ್ದು, ತಂತ್ರಜ್ಙಾನದ ನೆರವಿನಿಂದಲೂ ಆತನ ಚಹರೆಯ ಚಿತ್ರವನ್ನು ರಚಿಸಿದ್ದಾರೆ ಎಂದು ತಿಳಿದು ಬಂದಿದೆ. ಆದರೇ ಇದೇ ವೇಳೆ ಶಶಿಗೆ ಸಹಾಯ ಮಾಡಿದ ಲೋಕಲ್ ವ್ಯಕ್ತಿಯ ಕುರಿತಾಗಿ ಅವರು ಎಲ್ಲೂ ಏನೂ ಹೇಳದಿರುವುದು ಕುತೂಹಲ ಮೂಡಿಸಿದೆ.

ಇದಲ್ಲದೇ ಈ ದರೋಡೆಯ ಕುರಿತು ಇನ್ನೂ ಒಂದು ಥಿಯೋರಿ ಹೊರಬಿದ್ದಿದೆ. ಈ ಹಿಂದೆ ಉಳ್ಳಾಲದ ದರೋಡೆಯಲ್ಲಿ ಭಾಗಿಯಾದ ಕುಖ್ಯಾತ ಸಾಹೇಬ್ ಗಂಜ್ ದರೋಡೆ ಗ್ಯಾಂಗ್ಗೂ ಶಶಿ ಥೇವರ್ ಹಿಂದಿರುವ ವ್ಯಕ್ತಿಗೂ ಪರಸ್ಪರ ಸಂಬಂಧವಿದೆ. ಶಶಿ ಥೇವರ್ ಗೆ ಯೋಜನೆ ರೂಪಿಸಲು ಇದೆ ಗ್ಯಾಂಗ್ ಮಾಹಿತಿ ನೀಡಿರಬೇಕೆಂಬ ಶಂಕೆಯೂ ಗುಪ್ತಚಾರ ಪೊಲೀಸರಲ್ಲಿದೆ ಎಂದು ಮೂಲಗಳು ತಿಳಿಸಿವೆ.

ಈ ರಹಸ್ಯ ವ್ಯಕ್ತಿ ಮೂಲತ : ದಕ್ಷಿಣ ಕನ್ನಡದವನಾದರೂ ಒಂದೇ ಕಡೆ ನೆಲೆ ನಿಲ್ಲುವುದಿಲ್ಲ. ಗುಜರಾತ್, ಮುಂಬಯಿ, ಪುಣೆ, ಸೂರತ್, ಮಧ್ಯ ಪ್ರದೇಶ, ತ್ರಿಶೂರ್, ಪಂಜಾಬ್ ಹೀಗೆ ಹತ್ತಾರು ನಗರಗಳಲ್ಲಿ ನಡೆದ ಕೃತ್ಯದಲ್ಲಿ ಭಾಗಿಯಾಗಿದ್ದಾನೆ. ಜತೆಗೆ ಬೇರೆ ಬೇರೆ ಗ್ಯಾಂಗ್ಗಳಲ್ಲಿ ಬೇರೆ ಬೇರೆ ಹೆಸರಿನೊಂದಿಗೆ ಗುರುತಿಸಿಕೊಳ್ಳುತ್ತಾನೆ ಎಂಬ ವಂದತಿಯೂ ಇದೆ. ಇದೇ ಗ್ಯಾಂಗಿನ ಒಬ್ಬ ಶಶಿ ಥೇವರ್ ಗೆ ಯೋಜನೆ ರೂಪಿಸಲು ಸಹಾಯ ಮಾಡಿರಬಹುದೆಂದು ಮಾಹಿತಿ ಇದೆ.