ಅಧಿಕಾರ ಹಿಂಪಡೆದದ್ದು ಸರಿಯಲ್ಲ

ಯಾವುದೇ ಅರಣ್ಯದಲ್ಲಿ ಅರಣ್ಯ ಅಪರಾಧಗಳು ನಡೆದಾಗ ತಕ್ಷಣವೇ ಅಲ್ಲಿಗೆ ಧಾವಿಸಿ ಪರಿಶೀಲಿಸಲು ಸಾಧ್ಯವಾಗುವುದು ಆರ್‌ಎಫ್‌ಓಗಿಂತ ಕೆಳ ಹಂತದ ಅಧಿಕಾರಿಗಳಿಗೆ ಮಾತ್ರ. ಹೀಗಾಗಿ ಕೆಳಹಂತದ ಅಧಿಕಾರಿಗಳ ಬಗ್ಗೆ ಅರಣ್ಯ ಅಪರಾಧ ಮಾಡುವವರಲ್ಲಿ ಒಂದು ರೀತಿಯ ಭಯ ಇತ್ತು. ಇನ್ನು ಮುಂದೆ ಆ ಭಯ ಇರುವುದಿಲ್ಲ. ಕರ್ನಾಟಕ ಅರಣ್ಯ ಸಂಹಿತೆಯಡಿ ಇವರಿಗೆ ಎಫ್‌ಐಆ‌ರ್ ದಾಖಲಿಸುವ ಅಧಿಕಾರ ನೀಡಲಾಗಿತ್ತು ಎಂದು ಅರಣ್ಯ ಇಲಾಖೆ ಮೂಲಗಳು ತಿಳಿಸಿವೆ.

ಅರಣ್ಯ ಅಪರಾಧ ನಡೆದಾಗ ಆರ್‌ಎಫ್‌ಓ ಸ್ಥಳಕ್ಕೆ ಬರುವವರೆಗೆ ಕಾಯಬೇಕಾಗುತ್ತದೆ. ಒಂದು ವೇಳೆ ವಲಯ ಅರಣ್ಯ ಅಧಿಕಾರಿ ತನ್ನ ವಲಯದಿಂದ ಹೊರಗೆ ಹೋದಾಗ, ರಜೆಯಲ್ಲಿ ಇದ್ದಾಗ ಆ ಕಾರ್ಯವನ್ನು ಯಾರು ನಿರ್ವಹಿಸಬೇಕು ಎಂಬ ಸ್ಪಷ್ಟತೆ ಇಲ್ಲ. ಬೇಟೆ, ಅರಣ್ಯ ಒತ್ತುವರಿ ಮತ್ತು ಮರ ಕಳ್ಳತನ ಅರಣ್ಯದ ಯಾವುದೋ ಮೂಲೆಯಲ್ಲಿ ನಡೆಯುತ್ತದೆ. ಆರ್‌ಎಫ್‌ಒ ಅಲ್ಲಿಗೆ ತಲುಪಲು ಬಹಳ ಸಮಯ ಹಿಡಿಯುತ್ತದೆ. ಅಷ್ಟರಲ್ಲಿ ಅಪರಾಧಿ ತಪ್ಪಿಸಿಕೊಂಡು ಹೋಗುವ ಸಾಧ್ಯತೆಯೂ ಇರುತ್ತದೆ ಎಂದು ಮೂಲಗಳು ಹೇಳಿವೆ.

ತಮ್ಮ ಅಧಿಕಾರ ಕಸಿದುಕೊಂಡ ವಿಚಾರವಾಗಿ ಒಂದಷ್ಟು ಕೆಳಹಂತದ ಅಧಿಕಾರಿಗಳು ಸಮಾಧಾನದ ನಿಟ್ಟುಸಿರು ಬಿಟ್ಟಿದ್ದಾರೆ. ಇದಕ್ಕೆ ಮುಖ್ಯ ಕಾರಣ ಅವರ ಮೇಲಿರುತ್ತಿದ್ದ ವಿವಿಧ ರೀತಿ ಒತ್ತಡಗಳು ಕಡಿಮೆ ಆಗಲಿದೆ ಎನ್ನುವುದು. ಆದರೆ, ಇವರಿಗೆ ಇನ್ನು ಮುಂದೆ ಬೀಟ್ ಹೋಗುವ ಕೆಲಸ ಬಿಟ್ಟರೆ ಬೇರೇನೂ ಕೆಲಸ ಇರುವುದಿಲ್ಲ ಎಂದು ಅಧಿಕಾರಿಯೊಬ್ಬರು ವಿವರಿಸಿದರು.

ಅರಣ್ಯ ಇಲಾಖೆಯಲ್ಲಿ ಆಡಳಿತದ ಉದ್ದೇಶಕ್ಕಾಗಿ ಕರ್ನಾಟಕ ಅರಣ್ಯ ಸಂಹಿತೆ ಮತ್ತು ಅರಣ್ಯ ಕೈಪಿಡಿಯಲ್ಲಿನ ಮಾರ್ಗಸೂಚಿಗಳನ್ನು ಪಾಲಿಸಲಾಗುತ್ತದೆ. ಕೆಳಹಂತದ ಅಧಿಕಾರಿಗಳ ಜವಾಬ್ದಾರಿಗಳನ್ನು ಇದರಲ್ಲಿ ವಿವರಿಸಲಾಗಿದೆ. ಆದರೆ, ಅಧಿಕಾರದ ವಿಚಾರ ಬಂದಾಗ ಸಂಹಿತೆ ಮತ್ತು ಕೈಪಿಡಿಗಳಿಗೆ ಕಾನೂನಿನ ಮಾನ್ಯತೆ ಇಲ್ಲ ಎಂಬ ಸಮಜಾಯಿಷಿ ನೀಡಲಾಗುತ್ತದೆ. ಕಾನೂನಿನಲ್ಲಿ ತಿದ್ದುಪಡಿ ತಂದು ಇವೆರಡಕ್ಕೂ ಕಾನೂನು ಮಾನ್ಯತೆ ನೀಡಬೇಕು ಎಂದು ಹೆಸರು ಹೇಳಲು ಬಯಸದ ಉಪವಲಯ ಅರಣ್ಯಾಧಿಕಾರಿಯೊಬ್ಬರು ಹೇಳಿದರು.