ಇನ್ನೂ ರಾಜ್ಯದ ಕಾಂಗ್ರೆಸ್ ಸರಕಾರಕ್ಕೆ ಹಾನಿಯುಂಟಾಗಬಲ್ಲ ವರ್ಚಸ್ಸಿಗೆ ಕುಂದು ತರಬಲ್ಲ ಅಜೆಂಡಾಗಳನ್ನು, (ವಿಶೇಷವಾಗಿ ಕೋಮು ಆಧಾರಿತ, ಸರಕಾರದ ಇಮೇಜಿಗೆ ಕಪ್ಪು ಚುಕ್ಕೆ ಬೀರಬಲ್ಲ ಲಾ ಅಂಡ್ ಆರ್ಡರ್ ವಿಚಾರಗಳನ್ನು ) ಬಿಜೆಪಿ ಕರಾವಳಿಯಿಂದಲೇ ತರಲು ಯತ್ನಿಸುತ್ತದೆ. ಅದಕ್ಕೆ ಈ ಎರಡು ಜಿಲ್ಲೆಯಲ್ಲಿ ಅಗತ್ಯ ಬೆಂಬಲ ಸಿಗುವುದರಿಂದ ಆ ಅಜೆಂಡಾವನ್ನು ಬಳಿಕ ಯಶಸ್ವಿಯಾಗಿ ಬಿಜೆಪಿ ರಾಜ್ಯವ್ಯಾಪಿ ವಿಸ್ತರಿಸುತ್ತದೆ. ಹೀಗಾಗಿ ಇದನ್ನು ಆರಂಭದಲ್ಲೆ ಮೊಟಕಿ ಹಾಕಲು ಒಬ್ಬ ಸಮರ್ಥ ನಾಯಕ ಕಾಂಗ್ರೆಸ್ ಗೆ ಉಭಯ ಜಿಲ್ಲೆಯಲ್ಲಿ ಬೇಕಾಗಿದೆ ಎನ್ನುತ್ತವೆ ಕಾಂಗ್ರೆಸ್ ಥಿಂಕ್ ಟ್ಯಾಂಕ್. ಎರಡು ಜಿಲ್ಲೆಯ ಸಮಗ್ರ ಪರಿಚಯ ಇರುವ ಹಾಗೂ ಪಕ್ಷದ ಕಾರ್ಯಕರ್ತರ ಪರಿಚಯ ಇರುವ ನಾಯಕರಲ್ಲಿ ರಮಾನಾಥ ರೈ ಮುಂಚೂಣಿಗರು. ಹೀಗಾಗಿ ಅವರ ಹೆಸರನ್ನು ವಿಧಾನ ಪರಿಷತ್ ಟಿಕೆಟ್ ಆಕಾಂಕ್ಷಿಗಳ ಯಾದಿಯಲ್ಲಿ ಕಾಂಗ್ರೆಸ್ ಸೇರಿಸಿದ್ದು, ಪಟ್ಟಿ ದಿಲ್ಲಿ ತಲುಪಿದೆ.

ಮೊನ್ನೆ ನಡೆದ ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದ ಚುನಾವಣೆಯಲ್ಲಿ ಪ್ರಚಾರ ಸಮಿತಿ ಅಧ್ಯಕ್ಷರಾಗಿ ಬಿ ರಮಾನಾಥ ರೈಯವರು ಪಕ್ಷದ ಅಭ್ಯರ್ಥಿ ಪದ್ಮರಾಜ್ ಆರ್ ಪೂಜಾರಿಯವರ ಹೆಗಲಿಗೆ ಹೆಗಲು ಕೊಟ್ಟು ಕೆಲಸ ಮಾಡಿದ್ದರು. ತನ್ನ 70ರ ಇಳಿ ವಯಸ್ಸಿನಲ್ಲೂ ಪಾದರಸದಂತೆ ಕೆಲಸ ಮಾಡಿದ ರೈವರು 8 ವಿಧಾನಸಭಾ ಕ್ಷೇತ್ರದಲ್ಲೂ ಭರಪೂರ ಪ್ರಚಾರ ಮಾಡಿದರು. ಕಳೆದೆರಡು ದಶಕದ ಕಾಂಗ್ರೆಸ್ ಪ್ರಚಾರದ ವೈಖರಿಯನ್ನು ಗಮನಿಸಿರುವ ಹಿರಿಯ ರಾಜಕೀಯ ವಿಶ್ಲೇಷಕರುಗಳು ಕೂಡ ಈ ಬಾರಿಯ ಕಾಂಗ್ರೆಸ್ ಪ್ರಚಾರ ಈ ಹಿಂದಿಗಿಂತ ಹೆಚ್ಚು ಎಪೆಕ್ಟಿವ್ ಆಗಿತ್ತು ಎನ್ನುವುದನ್ನು ಒಪ್ಪುತ್ತಾರೆ. ಈ ಹಿಂದೆಯೆಲ್ಲ ಒಡೆದ ಮನೆಯಂತಾಗಿದ್ದ ಪಕ್ಷದೊಳಗೆ ಏಕಸ್ವರ ಮೂಡಿಸುವಲ್ಲಿ ರಮಾನಾಥ ರೈ ಯಶಸ್ವಿಯಾಗಿದ್ದರು.

ಮೊನ್ನೆಯ ಲೋಕಸಭಾ ಚುನಾವಣೆ ಸಂದರ್ಭ 8 ವಿದಾನಸಭಾ ಕ್ಷೇತ್ರದ ಬ್ಲಾಕ್ ಗಳು ರಮಾನಾಥ ರೈ ಯವರ ಹೆಸರನ್ನು ಶಿಫಾರಸ್ಸು ಮಾಡಿ ಕೆಪಿಸಿಸಿಗೆ ಕಳುಹಿಸಿತ್ತು. ಆದರೇ ಕೊನೆ ಕ್ಷಣದಲ್ಲಿ ಪಕ್ಷ ಟಿಕೆಟ್ ಪದ್ಮರಾಜ್ ಆರ್ ಪೂಜಾರಿಗೆ ನೀಡಿತ್ತು . ಹೀಗಿದ್ದೂ ಅವರು ಒಂದಿಷ್ಟು ಬೇಸರ ವ್ಯಕ್ತಪಡಿಸದೇ ಪಕ್ಷದ ಪರವಾಗಿ ವ್ಯಾಪಕ ಪ್ರಚಾರ ಕೈಗೊಂಡಿದ್ದು, ಲೋಕಸಭಾ ಚುನಾವಣೆಯಲ್ಲಿ ರೈ ಕಾರ್ಯವೈಖರಿ ಕಾಂಗ್ರೆಸ್ ಹೈಕಮಾಂಡ್ ಗೆ ಖುಷಿ ಕೊಟ್ಟಿದೆ. ಇದರ ಪ್ರತಿಫಲವಾಗಿ ಅವರಿಗೆ MLC ಟಿಕೆಟ್ ನೀಡಲು ಪಕ್ಷ ಮನಸ್ಸು ಮಾಡಿದೆ ಎನ್ನಲಾಗಿದೆ.

ಬಂಟ್ವಾಳದಲ್ಲಿ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದಾಗ ಜಿಲ್ಲೆಯಾದ್ಯಂತ ನಡೆಸಿದ ಅಭಿವೃದ್ದಿ ಕಾರ್ಯಗಳು ಅವರೊಬ್ಬ ಉತ್ತಮ ಅಡಳಿತಗಾರ ಎಂಬುವುದನ್ನು ನಿರೂಪಿಸಿದೆ. ಚುನಾವಣೆಯಲ್ಲಿ ಸೋಲಲ್ಲಿ ಗೆಲ್ಲಲ್ಲಿ ನಿರಂತರವಾಗಿ ಜನ ಸಂಪರ್ಕದಲ್ಲಿರುವುದು, ಅವರ ಸಮಸ್ಯೆಗಳಿಗೆ ಸ್ಪಂದಿಸುವುದು ಅವರ ಹೆಚ್ಚುಗಾರಿಕೆ . ಪ್ರತಿ ನಿತ್ಯ ಅವರ ಮನೆ ಮುಂದೆ ಇರುವ ಜನ ಸಂದಣಿ ಅದಕ್ಕೆ ಉದಾಹರಣೆ . ಇದು ಕೂಡ ಅವರನ್ನು ಅಭ್ಯರ್ಥಿಯನ್ನಾಗಿಸುವುದಕ್ಕೆ ತನ್ನದೇ ಕೊಡುಗೆ ಕೊಡುವ ಸಾಧ್ಯತೆಯಿದೆ.