ಸುಳ್ಯ/ಪುತ್ತೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಪ್ರಮುಖ ವಾಣಿಜ್ಯ ಬೆಳೆ ಅಡಿಕೆಯ ಜತೆ ತೋಟದಲ್ಲಿ ಉಪ ಬೆಳೆಯಾಗಿ ಬೆಳೆಸುವ ಕೊಕ್ಕೋ ದರ ಇತಿಹಾಸದಲ್ಲೆ ಮೊದಲ ಬಾರಿ ರೂ 200 ದಾಟಿದೆ. ಈ ಮೂಲಕ ಚಾಕಲೇಟ್ಗಳು, ಪೇಯಗಳ ತಯಾರಿಕೆಗೆ ಬಳಕೆಯಾಗುವ ಕೊಕ್ಕೊಗೆ ಚಿನ್ನದ ಬೆಲೆ ಬಂದಿದೆ. ಸಾಮಾನ್ಯವಾಗಿ ಹಸಿ ಕೊಕ್ಕೋ ಬೆಳೆಗೆ ಮಾರುಕಟ್ಟೆಯಲ್ಲಿ ರೂ.50-70ರವರೆಗೆ ಧಾರಣೆ ಇತ್ತು. ಕಳೆದ ಕೆಲವು ತಿಂಗಳಿನಿಂದ ಕೊಕ್ಕೋ ಧಾರಣೆ ಏರಿಕೆ ಕಂಡಿದೆ.

ಕ್ಯಾಂಪ್ಕೋ ಮಾರುಕಟ್ಟೆಯಲ್ಲಿ ಮಾ. 25ರಂದು ಹಸಿ ಕೊಕ್ಕೊ ಕೆ.ಜಿ.ಗೆ 205ಕ್ಕೆ ಖರೀದಿಯಾಗಿದೆ. ಕೆಲ ವರ್ಷಗಳ ಹಿಂದೆ ಕೆಜಿಗೆ ರೂ 30 ಇದ್ದ ಕೊಕ್ಕೊ ರೇಟ್ ಈ ಪಾಟಿ ನೆಗೆದಿರುವುದು ಇದೆ ಮೊದಲು. ಯಾವುದೇ ಸೀಸನಲ್ಲೂ ಕೊಕ್ಕೊ ದರ ಪ್ರತೀ ಕೆ.ಜಿ.ಗೆ 125 ರೂ ದಾಟಿದ್ದು ತೀರ ಅಪರೂಪ. ಹೀಗಾಗಿ ಸದಾ ನಷ್ಟದ ಬಾಬ್ತು ಆಗಿದ್ದ ಕೊಕ್ಕೊ ಬೆಳೆಗಾರರ ಮುಖದಲ್ಲಿ ಮಂದ ಹಾಸ ಬಂದಿದೆ. ಅಡಿಕೆ ಧಾರಣೆ ತೀರಾ ಸುಖಕರವಾಗಿಲ್ಲದ ದಿನಮಾನದಲ್ಲಿ ಉಪಬೆಳೆ ಕೈ ಹಿಡಿದಿರುವುದು ಕೃಷಿ ಕ್ಷೇತ್ರದ ಮಟ್ಟಿಗೆ ಉತ್ತಮ ಬೆಳವಣಿಗೆ.

alt="Ad Widget"/>

ರೈತಾಪಿ ವರ್ಗ ಯಾವತ್ತೂ ಒಂದು ಬೆಳೆಯನ್ನು ನಂಬಿ ಕೃಷಿ ಮಾಡಬಾರದು. ತೋಟ ಯಾವುತ್ತೂ ಹಲವು ಬೆಳೆಗಳಿಂದ ಕೂಡಿರಬೇಕು. ಆಗ ಮಾತ್ರ ಕೃಷಿಕ ನೆಮ್ಮದಿಯ ಬದುಕು ಸಾಗಿಸಲು ಸಾಧ್ಯ ಎಂಬ ಕೃಷಿ ತಜ್ಞರ ಮಾತಿಗೆ ಕೊಕ್ಕೋ ಬೆಲೆಯೆರಿಕೆ ಪುಷ್ಟಿ ನೀಡುತ್ತಿದೆ. ಕೆಲವು ವರ್ಷದ ಹಿಂದೆ ಅಡಿಕೆ ಧಾರಣೆ ರೂ.500 ಮೀರಿದಾಗ ಬೆಳೆಗಾರರು ಕೊಕ್ಕೂ ಬೆಳೆಯನ್ನು ಕೈಬಿಟ್ಟು ಅಡಿಕೆ ಬೆಳೆಗೆ ಹೆಚ್ಚಿನ ಗಮನ ಕೊಟ್ಟರು.. ಅಡಿಕೆ ತೋಟದ ಮಧ್ಯೆ ಕೊಕ್ಕೊ ಬೆಳೆದರೇ , ತೋಟಕ್ಕೆ ಹಾಕಿದ ಗೊಬ್ಬರ ತಿನ್ನುತ್ತದೆ, ಮದ್ದು ಸಿಂಪಡನೆಗೆ, ಸ್ಪಿಂಕ್ಲರ್ ಆಧಾರಿತ ನೀರಾವರಿಗೆ ತೊಂದರೆಯಾಗುತ್ತದೆ ಎಂದು ಅಡಿಕೆ ತೋಟದಲ್ಲಿದ್ದ ಕೊಕ್ಕೋ ಗಿಡಗಳನ್ನು ಕಡಿಯುವುದರ ಮೂಲಕ ಕೊಕ್ಕೋ ಬೆಳೆಯನ್ನು ನಾಶ ಮಾಡಿದರು.

<>

ವಿದೇಶಗಳಲ್ಲಿ ಕೊಕ್ಕೊ ಉತ್ಪಾದನೆ ಮತ್ತು ದಾಸ್ತಾನು ಭಾರೀ ಪ್ರಮಾಣದಲ್ಲಿ ಇಳಿಕೆ ಕಂಡಿರುವುದು, ದೇಶೀಯವಾಗಿ ಕೊಕ್ಕೊ ಉತ್ಪಾದನೆಯಲ್ಲಿ ಕುಸಿತ ಆಗಿರುವುದರಿಂದ ಮಾರುಕಟ್ಟೆಯಲ್ಲಿ ಕೊಕ್ಕೊ ಕೊರತೆ ಕಂಡುಬಂದಿದ್ದು, ಬೇಡಿಕೆ ಹೆಚ್ಚಾಗಿದೆ. ಬೇಡಿಕೆಗೆ ತಕ್ಕಂತೆ ಕೊಕ್ಕೊ ಪೂರೈಕೆ ಇಲ್ಲದಿರುವುದರಿಂದ ಧಾರಣೆ ಹೆಚ್ಚಾಗಿದೆ ಎನ್ನುತ್ತಾರೆ ಮಾರುಕಟ್ಟೆ ವಿಶ್ಲೇಷಕರು.

ಪ್ರಸ್ತುತ ಹಸಿ ಕೊಕ್ಕೋ ಸಾಕಷ್ಟು ಪ್ರಮಾಣದಲ್ಲಿ ಲಭ್ಯವಿಲ್ಲ. ಇರುವಲ್ಲಿಯೂ ಈಗಷ್ಟೇ ಕಟಾವಿಗೆ ಬರುತ್ತಿದೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ತೋಟಗಳಲ್ಲಿ ಹಣ್ಣು ಕಟಾವಿಗೆ ಬರಲಿದ್ದು, ಆಗಲೂ ಇದೇ ಧಾರಣೆ ಸ್ಥಿರವಾಗಿದ್ದಲ್ಲಿ ಉತ್ತಮ ಆದಾಯ ಸಿಗಲಿದೆ ಎಂಬ ಅಭಿಪ್ರಾಯ ಕೃಷಿಕರದು.

ಒಣ ಕೊಕ್ಕೊ
ಮಾ. 6ರಂದು ಕ್ಯಾಂಪ್ಕೋ ಮಾರುಕಟ್ಟೆಯಲ್ಲಿ ಹಸಿ ಕೊಕ್ಕೊಕೆ.ಜಿ.ಗೆ 150 ದಾಖಲಾಗಿತ್ತು. ಮಾ. 18 ರಂದು ಕೆ.ಜಿ.ಗೆ 170ರೂ., ಮಾ. 22ರಂದು ಹೊರ ಮಾರುಕಟ್ಟೆಯಲ್ಲಿ 190 ರೂ.ಗೆ ಖರೀದಿಸಲಾ ಗಿತ್ತು. ಅದಾದ ಎರಡೇದಿನದಲ್ಲಿ ಧಾರಣೆ 200 ಗಡಿ ದಾಟಿದೆ.

ಮಾ. 18ರಂದು 170 ರೂ. ಧಾರಣೆ ಇದ್ದ ಕ್ಯಾಂಪ್ಕೋದಲ್ಲಿ ಮಾ. 25ರಂದು 205 ರೂ.ಗೆ ಏರಿಕೆ ಕಂಡಿದೆ. ಹಸಿ ಕೊಕ್ಕೊ ಮಾತ್ರವಲ್ಲದೆ ಒಣ ಕೊಕ್ಕೊ ಧಾರಣೆಯಲ್ಲಿಯೂ ಹೆಚ್ಚಳ ಆಗಿದೆ. ಕ್ಯಾಂಪ್ಕೋ ಮಾರುಕಟ್ಟೆಯಲ್ಲಿ ಮಾ. 23ರಂದು ಒಣ ಕೊಕ್ಕೊಗೆ ಕೆ.ಜಿ. ಗೆ 500-575 ರೂ. ಇತ್ತು. ಮಾ. 25ರಂದು 575-650 ರೂ. ಆಗಿದೆ. ಅಂದರೆ ಕೆ.ಜಿ.ಗೆ 75 ರೂ.ನಷ್ಟು ಏರಿಕೆ ಕಂಡಿದೆ.

ಆವಕ ನಿರಾಶಾದಾಯಕ
ಪ್ರಸ್ತುತ ದಕ್ಷಿಣ ಕನ್ನಡ ಮಾರುಕಟ್ಟೆಯಲ್ಲಿ ಕೊಕ್ಕೊ ಧಾರಣೆ ಐತಿಹಾಸಿಕ ದಾಖಲೆ ಕಂಡಿದ್ದರೂ, ಮಾರುಕಟ್ಟೆಗೆ ಆವಕ ನಿರೀಕ್ಷಿತ ಪ್ರಮಾಣದಲ್ಲಾಗುತ್ತಿಲ್ಲ. ಜಿಲ್ಲೆಯ ಬೆಳೆಗಾರರು ಬಹುತೇಕ ಕೊಕ್ಕೊ ಬೆಳೆಯುವುದನ್ನು ನಿಲ್ಲಿಸಿದ್ದು, ಬೆರಳೆಣಿಕೆಯಷ್ಟು ರೈತರು ಮಾತ್ರ ಬೆಳೆಯುತ್ತಿದ್ದಾರೆ. ದಶಕಗಳ ಹಿಂದೆ ಅಡಕೆ ತೋಟದ ಮಧ್ಯೆ ಹೇರಳವಾಗಿ ಕೊಕ್ಕೊ ಬೆಳೆಸುತ್ತಿದ್ದ ರೈತರು ಇತ್ತೀಚಿನ ವರ್ಷಗಳಲ್ಲಿ ಕೊಕ್ಕೊ ಗಿಡಗಳನ್ನು ಕಡಿದು ಅಡಕೆ ತೋಟ ಮಾತ್ರ ಉಳಿಸಿಕೊಂಡಿದ್ದಾರೆ. ಏಷ್ಯಾದಲ್ಲೇ ಸಹಕಾರಿ ಕ್ಷೇತ್ರದ ಅತಿ ದೊಡ್ಡ ಚಾಕಲೇಟ್ ಕಾರ್ಖಾನೆ ಎಂಬ ಕೀರ್ತಿಯೊಂದಿಗೆ ಆರಂಭಗೊಂಡ ಕ್ಯಾಂಸ್ಕೋ ಚಾಕಲೇಟ್ ಕಾರ್ಖಾನೆ ಪುತ್ತೂರಿನಲ್ಲಿದ್ದರೂ, ಅದು ತನ್ನ ಚಾಕಲೇಟ್ ಉತ್ಪಾದನೆಗೆ ಬೇಕಾದ ಕೊಕ್ಕೊವನ್ನು ತಮಿಳುನಾಡು ಮತ್ತು ಆಂಧ್ರಪ್ರದೇಶವನ್ನು ಆಶ್ರಯಿಸಿದೆ.

ರೈತರ ನಿರಾಸಕ್ತಿಗೆ ಕಾರಣ
ಅಡಕೆ ತೋಟದ ಮಧ್ಯೆ ಕೊಕ್ಕೋ ಗಿಡಗಳಿದ್ದ ಕಾರಣ ಕೊಕ್ಕೋ ತಿನ್ನಲು ಅಪಾರ ಪ್ರಮಾಣದಲ್ಲಿ ಮಂಗಗಳು ದಾಳಿ ಮಾಡುತ್ತವೆ. ತೋಟಕ್ಕೆ ನುಗ್ಗಿದ ಮಂಗಗಳು ಕೇವಲ ಕೊಕ್ಕೊವನ್ನಷ್ಟೇ ತಿನ್ನದೆ ಅಡಕೆ ಮರಗಳ ಮೇಲೂ ದಾಳಿ ಮಾಡಲಾರಂಭಿಸಿದ ಕಾರಣ ಭಾರಿ ನಷ್ಟಕ್ಕೆ ಕಾರಣವಾಗತೊಡಗಿತು. ಅಡಕೆ ಮರಗಳಿಗೆ ಹಾಕಿದ ರಸಗೊಬ್ಬರವನ್ನು ಕೊಕ್ಕೊ ಗಿಡಗಳು ಹೇರಳವಾಗಿ ಹೀರಿಕೊಳ್ಳುವ ಕಾರಣ ಇದು ರೈತರಿಗೆ ನಷ್ಟದಾಯಕವಾಯಿತು. ಎಷ್ಟು ಬೆಳೆದರೂ ಕೊಕ್ಕೊಬೀಜಕ್ಕೆ ಧಾರಣೆ ನಿರಾಶದಾಯಕವಾಗಿದ್ದ ಕಾರಣ ರೈತರ ಆಸಕ್ತಿ ಕುಸಿಯಲಾರಂಭಿಸಿತು. ಈ ಎಲ್ಲ ಕಾರಣಗಳಿಂದ ವರ್ಷದಿಂದ ವರ್ಷಕ್ಕೆ ರೈತರು ಕೊಕ್ಕೊ ಗಿಡಗಳನ್ನು ಕಡಿಯುವ ಪ್ರಮಾಣ ಹೆಚ್ಚಾಗಿದ್ದು, ಹೊಸದಾಗಿ ಬೆಳೆಯುವವರು ಇಲ್ಲವೇ ಇಲ್ಲ ಎನ್ನುವಷ್ಟು ಕಡಿಮೆಯಾಗಿದೆ.

ಈ ಸುದ್ದಿಯನ್ನು ಷೇರ್‌ ಮಾಡಿ

• WhatsApp
• Telegram
• Tweet
• Print

Related Topics:Bumper rateBumper rate for raw cocoa – a price never seen before; A sub-crop at a time when arecanut prices have fallen

Up Next

‘Puttila Parivar’-ಮುಕ್ರಂಪಾಡಿ ಕಛೇರಿಯಿಂದ ಪುತ್ತಿಲ ಪರಿವಾರ’ ಫಲಕ ತೆರವು

Don't Miss

Lokayukta raids-ಕಡಬ ತಾಲೂಕು ಪಂಚಾಯತ್ ಗೆ ಲೋಕಾಯುಕ್ತ ದಾಳಿ – ಕಾರ್ಯ ನಿರ್ವಾಹಕ ಅಧಿಕಾರಿ ʼಲೋಕಾʼ ರಾಡರ್ ನಲ್ಲಿ