ರೆಡ್‌ ಹ್ಯಾಂಡ್‌ ಆಗಿ ಸಿಕ್ಕಿ ಬಿದ್ದಾಗ …!
ಮನೆ ಮಂದಿಗೆ ಸರ್ಪ್ರೈಸ್‌ ನೀಡಲೇಂದು ಬೆಳಗ್ಗಿನ ಜಾವ ಮೈಸೂರಿನಿಂದ ಆಗಮಿಸಿದ ರಾಮಚಂದ್ರ ಎಡಪತ್ಯ ಪುತ್ರ ನಿಷ್ಕಲ್ ರಾಮ್ ಎಡಪತ್ಯ ಅವರಿಗೇ ಮನೆ ಎದುರಿನಲ್ಲಿ ಸರ್ಪ್ರೈಸ್‌ ಕಾದಿತ್ತು. ಅವರು ಮನೆಗೆ ತಲುಪಿದಾಗ ಸೋಲಾರ್ ಕೊಠಡಿಯಲ್ಲಿ ಒಣ ಹಾಕಿದ್ದ ಅಡಕೆಯನ್ನು ಕಳ್ಳ ಕಾರಿಗೆ ತುಂಬುತ್ತಿದ್ದ. ನಿಷ್ಕಲ್ ಪರಿಚಯವಿಲ್ಲದ ಕಳ್ಳ ಆತ ಮನೆ ಸದಸ್ಯ ಎಂಬ ಅರಿವಿಲ್ಲದೆ ಆತನಲ್ಲಿಯೇ ಪಾಲುದಾರಿಕೆಗೆ ಮುಂದಾಗಿದ್ದರು ಎಂದು ತಿಳಿದು ಬಂದಿದೆ. ಕಳ್ಳತನ ನಡೆಸುವದನ್ನು ಬಹಿರಂಗ ಪಡಿಸಿದೆ ಮುಚ್ಚಿಡಲು ಎಷ್ಟು ಪಾಲು ಕೊಡಬೇಕೆಂದು ಕಳ್ಳ ನಿಷ್ಕಲ್‌ ಬಳಿಯೇ ಕೇಳಿದ್ದಾನೆ. ಕಳ್ಳತನದ ಮಾಲಿನಲ್ಲಿ ದೊಡ್ಡ ಪಾಲು ನೀಡುವ ಆಫರನ್ನು ಕಳ್ಳರಿಬ್ಬರು ನಿಷ್ಕಲ್‌ ಗೆ ನೀಡಿದ್ದರು. ಆದರೇ ಮನೆ ಮಗನೆಂದು ತಿಳಿದಾಗ ತಬ್ಬಿಬ್ಬಾಗಿದ್ದರು

ಕಳ್ಳರ ತಂಡ ಅತೀ ಹೆಚ್ಚು ಅಡಕೆ ಬೆಳೆಯುವ ರೈತರ ಮಾಹಿತಿಯನ್ನು ಸ್ಥಳೀಯರ ಮೂಲಕ ಪಡೆದು ಬಳಿಕ ಕೃತ್ಯ ಎಸಗುತ್ತಿದೆ ಎಂಬ ಸ್ಫೋಟಕ ಮಾಹಿತಿಯನ್ನು ವಿಚಾರಣೆ ವೇಳೆ ಬಂಧಿತ ಪೊಲೀಸರಿಗೆ ನೀಡಿರುವುದಾಗಿ ಮೂಲಗಳಿಂದ ತಿಳಿದು ಬಂದಿದೆ. ಮಾಹಿತಿ ದೊರೆತ ಬಳಿಕ ಮನೆಯವರ ಚಲನವಲನಗಳ ಮೇಲೆ ಕಣ್ಣಿಟ್ಟು ಬಳಿಕ ಅಡಕೆ ದೋಚಲು ಮುಂದಾಗುತ್ತಿದ್ದರು. ಕಳ್ಳರ ಗುಂಪಿನಲ್ಲಿ ಮಹಿಳೆಯರಿದ್ದು ಅವರು ಮಾಹಿತಿ ಸಂಗ್ರಹದಲ್ಲಿ ಪ್ರಧಾನ ಪಾತ್ರ ವಹಿಸುತ್ತಿರುವುದು ಬೆಳಕಿಗೆ ಬಂದಿದೆ. ಪುತ್ತೂರು, ಸುಳ್ಯ ಕಡಬ ತಾಲೊಕಿನ ಬಹುತೇಕ ಅಡಕೆ ಬೆಳೆಗಾರರ ಮಾಹಿತಿ ಕಳ್ಳರಲ್ಲಿದೆ. ಒಂದೊಂದೆ ಕಡೆ ಕಳ್ಳತನ ನಡೆಸಲು ಅವರು ಮುಂದಾಗಿರುವುದು ವಿಚಾರಣೆ ವೇಳೆ ಬಯಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ನಾಲ್ಕು ದಶಕದ ಹಿಂದೆ ಅಡಕೆ ಬೆಳೆಗಾರರಿಗೆ ಕಳ್ಳರ ಹಾವಾಳಿ ತೀವ್ರ ಮಟ್ಟದಲ್ಲಿದ್ದು, ಬಂದೂಕು ಹಿಡಿದು ತಾವೇ ತಮ್ಮ ಬೆಳೆಯನ್ನು ರಕ್ಷಣೆ ಮಾಡುವ ಅನಿವಾರ್ಯತೆ ಆಸಂದರ್ಭದಲ್ಲಿತ್ತು. ಈಗ ಮತ್ತೆ ಅದೇ ಕಾಲ ಬರುತ್ತಿದೆಯಾ ಎಂಬ ಆತಂಕದಲ್ಲಿ ಬೆಳೆಗಾರರಿದ್ದಾರೆ.

ಭಕ್ತಕೋಡಿಯಲ್ಲಿ

ಪುತ್ತೂರು ಸುಬ್ರಹ್ಮಣ್ಯ ಹೆದ್ದಾರಿಯ ಅಂಚಿನಲ್ಲಿರುವ ಭಕ್ತಕೋಡಿಯಲ್ಲಿ ಕಟ್ಟಡವೊಂದು ನಿರ್ಮಾಣ ಹಂತದಲ್ಲಿದ್ದು, ಇದಕ್ಕಾಗಿ ತಂದಿಟ್ಟ ಸುಮಾರು 500 ಕೆ.ಜಿ. ಕಬ್ಬಿಣ ಇತ್ತೀಚೆಗೆ ಕಳ್ಳತನವಾಗಿತ್ತು. ಈ ಬಳಿಕ ಕಟ್ಟದ ಮಾಲೀಕರು ಪ್ರತಿ ರಾತ್ರಿ ಕಟ್ಟಡ ನಿರ್ಮಾಣ ಸ್ಥಳಕ್ಕೆ ಹೋಗಿ ಪರಿಶೀಲಿಸುವ ಪರಿಪಾಠ ಇರಿಸಿಕೊಂಡಿದ್ದರು. ಇತ್ತೀಚೆಗೆ ಒಂದು ದಿನ ರಾತ್ರಿ 12.30ರ ಸುಮಾರಿಗೆ ಆರೋಪಿ ಬಶೀರ್ ಕಟ್ಟಡದ ಒಳಗೆ ಕಾರು ನಿಲ್ಲಿಸಿ ಬಳಿಯಲ್ಲಿ ನಿಂತಿದ್ದ. ಇದನ್ನು ಗಮನಿಸಿದ ಕಟ್ಟಡದ ಮಾಲೀಕರು ಆ ಕಾರಿಗೆ ತನ್ನ ಕಾರನ್ನು ಅಡ್ಡವಿಟ್ಟು, ಪೊಲೀಸರು ಬರದೆ ಹೋಗುವಂತಿಲ್ಲ ಎಂದು ತಿಳಿಸಿದ್ದರು. ಆಗ ತಕ್ಷಣ ಬಶೀರ್‌ ಕಾರನ್ನು ಜಲ್ಲಿ ರಾಶಿಯ ಮೇಲೆ ಹತ್ತಿಸಿ ಪಲಾಯನಕ್ಕೆ ಮುಂದಾಗಿದ್ದು, ಮಾಲೀಕರು ಕಾರನ್ನು ಅಡ್ಡ ಇಟ್ಟಿದ್ದು, ಅದಕ್ಕೆ ತನ್ನ ಕಾರನ್ನು ಗುದ್ದಿ ಬಶೀರ್‌ ಪರಾರಿಯಾಗಿದ್ದ.

ಕಟ್ಟಡದ ಮಾಲೀಕರು ಕಾರು ನಂಬರ್ ಕೊಟ್ಟು ಸಂಪ್ಯ ಠಾಣೆಗೆ ದೂರು ನೀಡಿದ್ದರು. ಕಾರು ಮುಸ್ಲಿಂ ಮಹಿಳೆಗೆ ಸೇರಿದ್ದಾಗಿದ್ದು, ಆಕೆಯನ್ನು ಠಾಣೆಗೆ ಕರೆಸಿದಾಗ ಏನೂ ಗೊತ್ತಿಲ್ಲದವರ ಹಾಗೇ ಪೆದ್ದು ಪೆದ್ದಾಗಿ ವರ್ತಿಸಿದ್ದರು ಎಂದು ತಿಳಿದು ಬಂದಿದೆ. ಮಧ್ಯಪಾನ ಮಾಡಲೇಂದು ಬಂದಿದ್ದು ಅದೇ ಸಮಯಕ್ಕೆ ಕಟ್ಟಡದ ಮಾಲೀಕರು ಬಂದಿದ್ದರಿಂದ ಹೆದರಿ ವಾಹನಕ್ಕೆ ಗುದ್ದಿಕೊಂಡು ಹೋಗಿದ್ದಾಗಿ ಆಗ ಪೊಲೀಸರು ದೂರುದಾರರಿಗೆ ತಿಳಿಸಿದ್ದರು. ಅಲ್ಲದೇ ಈ ಪ್ರಕರಣ ಠಾಣೆಯಲ್ಲಿ ರಾಜಿ ಪಂಚಾತಿಕೆಯಲ್ಲಿ ಮುಗಿದಿದ್ದು ವಾಹನಕ್ಕಾದ ಹಾನಿಯ ಬಾಬ್ತು 15 ಸಾವಿರ ರೂಪಾಯಿ ಕಾರಿನ ಮಾಲಕರು ಕಟ್ಟಡದ ಮಾಲಕರಿಗೆ ನೀಡಿದ್ದರು ಎನ್ನಲಾಗುತ್ತಿದೆ