ಸೇತುವೆಗೆ ಇಲ್ಲ ಬಲ..!
ಶಿಥಿಲ ಗೊಂಡ ಸೇತುವೆ ಸಹಿತ ಹಾರಾಡಿ – ರೈಲ್ವೇ ನಿಲ್ದಾಣದ ರಸ್ತೆಯನ್ನು ಅಭಿವೃದ್ಧಿ ಮಾಡುವ ಬಗ್ಗೆ ಹೇಳಿಕೊಳ್ಳಲಾಗಿತ್ತಾದರೂ, ರೈಲ್ವೇ ನಿಲ್ದಾಣದ ಪಕ್ಕದಲ್ಲಿ 50 ವರ್ಷದ ಹಿಂದೆ ನಿರ್ಮಾಣವಾದ ಸೇತುವೆ ಬಲವನ್ನು ಕಳೆದುಕೊಂಡಿದೆಯಾದರೂ, ಅದನ್ನು ಬದಲಾವಣೆ ಮಾಡದೆ ಕಾಂಕ್ರೀಟಿಕರಣವನ್ನು ಪೂರ್ಣಗೊಳಿಸಲಾಗಿದೆ. ಹಳೆಯ ಸೇತುವೆಯ ಬಳಿ ತಡೆಗೋಡೆ ಕುಸಿದು ಸ್ವಲ್ಪ ಜಾಗದಲ್ಲಿ ಕಾಮಗಾರಿ ನಡೆಯದೆ ಅಪಾಯವನ್ನು ಆಹ್ವಾನಿಸುತ್ತಿದೆ.

ಕಾಮಗಾರಿಯ ಮಾಹಿತಿ ನಿರಾಕರಣೆ..!
ಸಾಮಾಜಿಕ ಹೋರಾಟಗಾರರು ಗುಣಮಟ್ಟದ ಬಗ್ಗೆ ಅನುಮಾನಗಳು ಮೂಡುತ್ತಿದ್ದಂತೆ ಮಾಹಿತಿ ಹಕ್ಕು ಅಧಿನಿಯಮದಲ್ಲಿ ಕಾಮಗಾರಿಯ ಮಾಹಿತಿಯನ್ನು ಕೇಳಿದ್ದು, ತಿಂಗಳು ಉರುಳಿದರೂ ಅಧಿಕಾರಿಗಳು ಮಾಹಿತಿಯನ್ನು ನೀಡುವ ಕಾರ್ಯಕ್ಕೆ ಮುಂದಾಗಿಲ್ಲ. ಚುನಾವಣೆಯ ಮೊದಲು ವಾರಕ್ಕೊಮ್ಮೆ ಕಾಮಗಾರಿಯ ಪ್ರಗತಿ ಪರಿಶೀಲನೆ ನಡೆಸುತ್ತಿದ್ದವರು ಕಳಪೆ ಗಾಮಗಾರಿಯ ದಿವ್ಯದರ್ಶನವಾಗುತ್ತಿದ್ದಂತೆ ಅತ್ತ ಸುಳಿಯುವುದನ್ನೇ ನಿಲ್ಲಿಸಿದ್ದಾರೆ.

ರಸ್ತೆಯಲ್ಲಿಲ್ಲ ಸುರಕ್ಷತೆ ..!
ರೈಲ್ವೇ ನಿಲ್ದಾಣವನ್ನು ಸಂಪರ್ಕಿಸುವ ರಸ್ತೆಯ ಇಕ್ಕೆಲಗಳಲ್ಲಿ ಸುರಕ್ಷತಾ ತಡೆಗಳಿಲ್ಲದ ಕಾರಣ ಅಪಾಯವನ್ನು ಆಹ್ವಾನಿಸುತ್ತಿದೆ. ಹಾರಾಡಿಯಿಂದ ಬರುವ ರಸ್ತೆಯ ಇಕ್ಕೆಲಗಳಲ್ಲಿ ಕಂದಕಗಳು, ಕೆರೆಗಳಿದ್ದರೂ, ಯಾವುದೇ ಸುರಕ್ಷತಾ ಕ್ರಮಗಳನ್ನು ತೆಗೆದುಕೊಂಡಿರುವುದಿಲ್ಲ. ವಾಹನ ಸವಾರರರು ಸ್ವಲ್ಪ ನಿಯಂತ್ರಣ ತಪ್ಪಿದರೂ, ದೊಡ್ಡ ಅಪಾಯ ನಿಶ್ವಿತ. ಇದರ ಜತೆಗೆ ಖಾಸಗೀ ಕಂಪನಿಗಳ ವಾಹನಗಳೂ ರಸ್ತೆಯಲ್ಲೇ ಠಿಕ್ಕಾಣಿ ಹೂಡುತ್ತಿದೆ. ಕೆಲವು ವಾಹನಗಳ ದುರಸ್ಥಿ ಕಾರ್ಯವೂ ರಸ್ತೆಯಲ್ಲೇ ನಡೆಯುತ್ತಿರುವುದರಿಂದ ವಾಹನ ಸವಾರರಿಗೆ ಇಲ್ಲಿ ಸಂಚರಿಸುವುದು ಸವಾಲಾಗಿದೆ.

ಪುತ್ತೂರಿನ ಬಹು ನಿರೀಕ್ಷಿತ ಹಾರಾಡಿ-ರೈಲ್ವೇ ಸ್ಟೇಷನ್ ಸಂಪರ್ಕ ರಸ್ತೆ ಪುತ್ತೂರಿನಿಂದ ನೇರ ಉಪ್ಪಿನಂಗಡಿ, ಧರ್ಮಸ್ಥಳ ಪ್ರಯಾಣಿಸುವವರಿಗೆ ಒಳ್ಳೆಯ ಬೈಪಾಸ್ ರಸ್ತೆ. ರಸ್ತೆಯ ಇಕ್ಕೆಲಗಳಲ್ಲಿ ಇರುವ ಆಳವಾದ ಕಂದಕಗಳಿಂದ ವಾಹನ ಸವಾರರಿಗೆ ಸಂಕಕಷ್ಟವಾಗಿದೆ. ಅಪಾಯದ ಬಗ್ಗೆ ಅರಿವಿದ್ದರೂ, ನಗರಸಭೆ ಕಾಮಗಾರಿಯಲ್ಲಿ ಅಗತ್ಯವ್ಯವಸ್ಥೆಯನ್ನು ಸೇರಿಸದೇ ಇದ್ದದ್ದು ಆಶ್ಚರ್ಯಕರವಾಗಿದೆ. ರಸ್ತೆಯಲ್ಲಿರುವ ಶಿಥಿಲಗೊಂಡ ಸೇತುವೆಯನ್ನು ಹಾಗೆಯೇ ಇಟ್ಟು, ಅದರ ಮೇಲೆಯೇ ಕಾಂಕ್ರೀಟೀಕರಣ ಮಾಡಿದ್ದು ನಗರಸಭೆಯ ಇಂಜಿನಿಯರಿಂಗ್ ಕೌಶಲ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ ಎಂದು ಸಾಮಾಜಿಕ ಹೋರಾಟಗಾರ ರಾಜೇಶ್ ಕೃಷ್ಣ ಪ್ರಸಾದ್ ತಿಳಿಸಿದ್ದಾರೆ.

ಹೊಸ ಸೇತುವೆ ನಿರ್ಮಾಣದ ಪ್ರಸ್ತಾಪ ಕಾಂಕ್ರೀಟೀಕರಣದ ಸಂದರ್ಭದಲ್ಲಿರಲಿಲ್ಲ. ಸೇತುವೆ ಸಮೀಪ ತಡೆಗೋಡೆ ಕುಸಿದಿದ್ದು, 3 ಮೀಟರ್ ಕಾಂಕ್ರೀಟೀಕರಣ ಮಾಡಲಾಗಿದೆ. ಉಳಿಕೆ ಹಣದಲ್ಲಿ ತಡೆಗೋಡೆ ಮಾಡುವ ಆಲೋಚನೆಯನ್ನು ಮಾಡಲಾಗಿದ್ದು, ರೈಲ್ವೇ ಇಲಾಖೆಯವರಿಗೂ ತಡೆಗೋಡೆಗೆ ನಿರ್ಮಾಣ ಮಾಡುವಂತೆ ಕೇಳಲಾಗಿದೆ. ಕಾಂಕ್ರಿಟ್ ನಲ್ಲಿ ಬಿರುಕು ಬಿಟ್ಟ ಪ್ರದೇಶದ ಜಿ.ಪಿ.ಎಸ್. ಚಿತ್ರವನ್ನು ಮಾಡಿ, ಆ ಪ್ರದೇಶದಲ್ಲಿ ಕಾಂಕ್ರೀಟ್ ತುಂಡರಿಸಿ ತೆಗೆದು ಮರು ಕಾಮಗಾರಿ ನಡೆಸುವಂತೆ ಗುತ್ತಿಗೆದಾರರಿಗೆ ನೋಟೀಸ್ ಜಾರಿ ಮಾಡಲಾಗಿದೆ. ಅದನ್ನು ಸರಿಪಡಿಸಿದ ಬಳಿಕವೇ ಹಣ ಪಾವತಿಯನ್ನು ಮಾಡಲಾಗುವುದು ಎಂದು ನಗರಸಭೆಯ ಅಸಿಸ್ಟೆಂಟ್ ಇಂಜನಿಯರ್ ಕೃಷ್ಣ ಮೂರ್ತಿ ಹೇಳಿದ್ದಾರೆ .