ಯಾರು ಬೇಕಾದರೂ ಸ್ಯಾಟ್ ಫೋನ್ ಖರೀದಿ ಸಾಧ್ಯವೇ?

ಸೈದ್ಧಾಂತಿಕವಾಗಿ, ಯಾರು ಬೇಕಾದರೂ ಸ್ಯಾಟ್ ಫೋನ್ ಖರೀದಿಸಬಹುದು.ಆದರೆ ಭಾರತದಲ್ಲಿ ಇದಕ್ಕೆ ಕಾನೂನಿನ ಇತಿ ಮಿತಿಗಳಿವೆ.ಭಾರತದಲ್ಲಿ ಸ್ಯಾಟಲೈಟ್ ಫೋನ್ ಬಳಕೆಗೆ ಕೇಂದ್ರ ದೂರ ಸಂಪರ್ಕ ಸಚಿವಾಲಯದ ಅನುಮತಿ ಮತ್ತು ಅಗತ್ಯ ವ್ಯವಸ್ಥೆಗಳು ಬೇಕಾಗುವುದು.ಭಾರತದಲ್ಲಿ ಲೈಸೆನ್ಸ್ ಹೊಂದಿರುವ ಡೀಲರ್ ಮೂಲಕ ಮಾತ್ರ ಸ್ಯಾಟಲೈಟ್ ಫೋನ್ ಖರೀದಿಸಬೇಕಾಗಿದೆ.

ಸ್ಯಾಟಲೈಟ್ ಫೋನ್‌ಗಳು ಸಾಮಾನ್ಯ ಫೋನ್‌ಗಳಿಂದ ಹೆಚ್ಚು ದುಬಾರಿಯಾಗಿದ್ದು ಸ್ವರ್ಗ ಪಾಣಾಜೆ ವ್ಯಾಪ್ತಿಯಲ್ಲಿ ಇದರ ಬಳಕೆಯ ಅಗತ್ಯ ಏನೆಂಬುದರ ಬಗ್ಗೆ ಸಂಶಯ ಮೂಡಿದೆ.ಸ್ಯಾಟಲೈಟ್ ಫೋನ್ ನ ಪ್ರತಿ ತಿಂಗಳ, ವಾರ್ಷಿಕ ನೂರಾರು ಡಾಲರ್ ದರವಿದ್ದು ಕೆಲವು ಸಮಯದ ತನಕ ಮಾತ್ರ ಮಾತನಾಡಲು ಸಾಧ್ಯವಾಗುವುದು.ಆದ್ದರಿಂದ ಹೆಚ್ಚು ಮಾತನಾಡಬೇಕಾದರೆ ಇನ್ನೂ ಹೆಚ್ಚು ಹಣ ಪಾವತಿಸಬೇಕಾಗುತ್ತದೆ.ಇಷ್ಟೊಂದು ಹಣ ತೆತ್ತು ಸಾಮಾನ್ಯವಾಗಿ ವ್ಯಕ್ತಿಗಳು ಸ್ಯಾಟಲೈಟ್ ಫೋನ್ ಕೈವಶ ಇರಿಸಲಾರರು.ದೂರದೂರಿನ “ವಿವಿಐಪಿ” ವ್ಯಕ್ತಿಗಳು ರಜೆಯ ಅವಧಿಯಲ್ಲಿ ಊರಿಗೆ ಮರಳಿದಾಗ ಮೊಬೈಲ್‌ ನೆಟ್ ವರ್ಕ್ ಇಲ್ಲದ ಕಾರಣ ದೂರ ಪ್ರದೇಶಗಳಿಗೆ ಕರೆ ಮಾಡಲು ಸ್ಯಾಟಲೈಟ್ ಫೋನ್ ಬಳಸಿರಬಹುದೇ ಎಂಬ ಬಗ್ಗೆಯೂ ಸಂಶಯ ಮೂಡಿದೆ.ಸ್ಯಾಟಲೈಟ್ ಫೋನ್‌ಗಳನ್ನು ಬಾಡಿಗೆಗೆ ಪಡೆದುಕೊಂಡು ಬಳಸಿರುವ ಸಾಧ್ಯತೆಯ ಬಗ್ಗೆಯೂ ಶಂಕೆ ಮೂಡಿದೆ.

ಇರಿಡಿಯಂ, ಇನ್‌ಮಾರ್‌ಸ್ಯಾಟ್, ತುರಾಯ ಹಾಗೂ ಗ್ಲೋಬಲ್ ಸ್ಟಾರ್ ಮೊದಲಾದ ಖಾಸಗಿ ಸಂಸ್ಥೆಗಳು ಸ್ಯಾಟಲೈಟ್ ಸಂಪರ್ಕವನ್ನು ಒದಗಿಸುವ ಪ್ರಮುಖ ಸಂಸ್ಥೆಗಳಾಗಿವೆ.ಪ್ರತಿಯೊಂದು ಸ್ಯಾಟಲೈಟ್ ಫೋನ್ ಅದರದ್ದೇ ಆದ ಪೂರೈಕದಾರ ವ್ಯವಸ್ಥೆಯೊಡನೆ ಕಾರ್ಯಾಚರಿಸುತ್ತದೆ.

ಭಾರತದಲ್ಲಿ ಸ್ಯಾಟಲೈಟ್ ಫೋನ್ ಕೈವಶವಿರಿಸುವುದು, ಕೊಂಡೊಯ್ಯುವುದು ಅಪರಾಧ

ಭಾರತದಲ್ಲಿ ಅನುಮತಿ ಇಲ್ಲದೆ ಸ್ಯಾಟಲೈಟ್ ಫೋನ್ ಕೈವಶವಿರಿಸುವುದು, ಒಂದೆಡೆಯಿಂದ ಇನ್ನೊಂದೆಡೆಗೆ ಕೊಂಡೊಯ್ಯುವುದು ಕಾನೂನು ಪ್ರಕಾರ ಅಪರಾಧವಾಗಿದೆ‌.2011ರ ನವೆಂಬರ್‌ ತಿಂಗಳಲ್ಲಿ ಪಾಕಿಸ್ತಾನದ ಉಗ್ರಗಾಮಿಗಳು ಮುಂಬೈ ಮೇಲೆ ದಾಳಿ ನಡೆಸಿದಾಗ ಸ್ಯಾಟಲೈಟ್ ಫೋನ್‌ಗಳನ್ನು ಬಳಸಿ ಪಾಕಿಸ್ತಾನದಲ್ಲಿದ್ದ ಲಷ್ಕರ್ ಎ ತಯ್ಬಾ ಉಗ್ರ ಮುಖಂಡರೊಡನೆ ಸಂಪರ್ಕದಲ್ಲಿದ್ದರು.ಈ ಘಟನೆಯ ಬಳಿಕ ಭಾರತದಲ್ಲಿ ಸ್ಯಾಟಲೈಟ್ ಫೋನ್ ಬಳಕೆ ನಿಷೇಧಿಸಲಾಗಿದೆ.

ಕಾನೂನುಗಳು ಏನು ಹೇಳುತ್ತವೆ?

1993ರ ಭಾರತೀಯ ಟೆಲಿಗ್ರಫಿ ಆ್ಯಕ್ಟ್ ಸೆಕ್ಷನ್ 6ರ ಪ್ರಕಾರ ಕಾನೂನು ಉಲ್ಲಂಘನೆಯಾಗಿದೆ.ಭಾರತದಲ್ಲಿ ವೈರ್ ಲೆಸ್ ಟ್ರಾನ್ಸ್‌ಮೀಟರ್ ಹೊರತುಪಡಿಸಿ ಬೇರೆ ಯಾವುದೇ ವೈರ್ ಲೆಸ್ ಟೆಲಿಗ್ರಫಿ ಉಪಕರಣವನ್ನು ಬಳಸುವುದು ಕಾನೂನಿನ ಸೆಕ್ಷನ್ 3ರ ಪ್ರಕಾರ ಅಪರಾಧವಾಗಿದೆ‌.ಸೆಕ್ಷನ್ 3ರ ಪ್ರಕಾರ, ಸೆಕ್ಷನ್ 4ರ ರ ಹೊರತಾಗಿ, ಯಾರೂ ವೈರ್ ಲೆಸ್ ಟೆಲಿಗ್ರಫಿ ಉಪಕರಣಗಳನ್ನು ಲೈಸೆನ್ಸ್ ರಹಿತವಾಗಿ ಬಳಸುವಂತಿಲ್ಲ.

ಟೆಲಿ ಕಮ್ಯುನಿಕೇಷನ್ ವಿಭಾಗದ ವೆಬ್ ಸೈಟ್‌ನಲ್ಲಿರುವ ನೋಟಿಸ್ ಪ್ರಕಾರ, “ಸ್ಯಾಟಲೈಟ್ ಫೋನ್‌ಗಳನ್ನು ಬಳಸಲು ಅನುಮತಿ ಇದ್ದರೂ ಭಾರತ ಸರಕಾರದ ಟೆಲಿ ಕಮ್ಯುನಿಕೇಷನ್ ಡಿಪಾರ್ಟ್ಮೆಂಟ್ ನಿಂದ ನಿರ್ದಿಷ್ಟ ಅನುಮತಿ ಹಾಗೂ ಎನ್ಓಸಿ ಅಗತ್ಯವಿದೆ.ಅಲ್ಲದೆ ಈ ಲೈಸೆನ್ಸ್ ಅನ್ನು ಗೇಟ್ ವೇ ಮುಖಾಂತರ ಮಾತ್ರ ಒದಗಿಸಲು ಸಾಧ್ಯವಾಗುವುದು.

ವಿದೇಶಗಳಲ್ಲಿ ಸ್ಯಾಟಲೈಟ್ ಫೋನ್ ಬಳಕೆ

ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ ಮೂಲದ ತುರಾಯ ಕಂಪನಿ ಯುರೋಪ್, ಮಧ್ಯಪ್ರಾಚ್ಯ, ಉತ್ತರ, ಮಧ್ಯ ಮತ್ತು ಪೂರ್ವ ಆಫ್ರಿಕಾ, ಏಷ್ಯಾ ಮತ್ತು ಆಸ್ಟ್ರೇಲಿಯಾ ಸೇರಿದಂತೆ ಒಟ್ಟು 161 ದೇಶಗಳಿಗೆ ಧ್ವನಿ ಸೇವೆಗಳನ್ನು ನೀಡುತ್ತಿದೆ.ಆದರೆ ಭಾರತದಲ್ಲಿ ತುರಾಯ ಅಥವಾ ಇರಿಡಿಯಂ ಸ್ಯಾಟಲೈಟ್‌ ಫೋನ್‌ಗಳ ಬಳಕೆ ಅನಧಿಕೃತ ಹಾಗೂ ಅಕ್ರಮವಾಗಿದೆ‌.ವಿದೇಶದಿಂದ ಭಾರತಕ್ಕೆ ಬರುವ ಪ್ರಯಾಣಿಕರು ತಮ್ಮ ಸಾಮಾನು ಸರಂಜಾಮುಗಳಲ್ಲಿ ಸ್ಯಾಟಲೈಟ್ ಫೋನ್‌ಗಳನ್ನು ಸಾಗಿಸುವುದು ಕಂಡು ಬಂದರೆ ಅವರು ಅದನ್ನು ಕಸ್ಟಮ್ಸ್ ನಲ್ಲಿ ಹಾಜರುಪಡಿಸಿ, ಬಳಕೆ ಸಂಬಂಧಿಸಿದ ಅಧಿಕಾರಿಗಳಿಂದ ಅನುಮತಿ ಪಡೆಯಬೇಕಾಗಿದೆ.ಭಾರತದಲ್ಲಿ ಯಾರಾದರೂ ಅನಧಿಕೃತವಾಗಿ ಸ್ಯಾಟಲೈಟ್ ಫೋನ್ ಸಾಗಿಸುವುದು, ಭಾರತೀಯ ಕಾನೂನಿನ ಪ್ರಕಾರ ಶಿಕ್ಷಾರ್ಹ ಅಪರಾಧವಾಗಿದೆ.ಭಾರತದ ಕಾನೂನು ಜಾರಿ ಇಲಾಖೆಗಳು ಅನಧಿಕೃತ ಉಪಕರಣಗಳನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಬಹುದಾಗಿದೆ.ಭಾರತಕ್ಕೆ ಆಗಮಿಸುವ ವಿದೇಶಿ ಪ್ರವಾಸಿಗರು ಭಾರತದ ಕಾನೂನುಗಳನ್ನು ಪಾಲಿಸಬೇಕಾಗಿದ್ದು ಸರಕಾರದ ಅನುಮತಿಯಿಲ್ಲದೆ ಸ್ಯಾಟಲೈಟ್ ಫೋನ್‌ಗಳನ್ನು ಬಳಸುವಂತಿಲ್ಲ.

ಭಾರತದಲ್ಲಿ ಸ್ಯಾಟಲೈಟ್‌ ಫೋನ್‌ ಬಳಕೆಗೆ ನಿಷೇಧ:

ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ತರುತ್ತದೆ ಎಂಬ ಕಾರಣಕ್ಕೆ ಭಾರತದಲ್ಲಿ ಸ್ಯಾಟಲೈಟ್‌ ಫೋನ್‌ ಬಳಕೆಯನ್ನು ಕೇಂದ್ರ ಸರಕಾರ ನಿಷೇಧಿಸಿದೆ.ವೈರ್‌ಲೆಸ್ ಕಾಯ್ದೆಯ ಸೆಕ್ಷನ್ 6 ಮತ್ತು ಇಂಡಿಯನ್ ಟೆಲಿಗ್ರಾಫ್ ಆಕ್ಟ್‌ನ ಸೆಕ್ಷನ್ 20ರ ಅಡಿಯಲ್ಲಿ ಭಾರತದಲ್ಲಿ ತುರಾಯ, ಇರಿಡಿಯಮ್ ಸ್ಯಾಟಲೈಟ್ ಫೋನ್‌ಗಳ ಬಳಕೆಯನ್ನು ಕಾನೂನುಬಾಹಿರ ಎಂದು ಘೋಷಿಸಿದೆ.ವಿದೇಶಿಯರು ಭಾರತಕ್ಕೆ ಉಪಗ್ರಹ ಫೋನ್‌ಗಳನ್ನು ತರುವುದಕ್ಕೂ ನಿಷೇಧ ಹೇರಲಾಗಿದೆ.ಭಾರತಕ್ಕೆ ಬರುವಾಗ ಉಪಗ್ರಹ ಫೋನ್‌ಗಳಿದ್ದರೆ ಪ್ರಯಾಣಿಕರನ್ನು ಬಂಧಿಸಲಾಗುತ್ತದೆ. ಅಲ್ಲದೇ ಟೆಲಿಗ್ರಾಫ್ ಕಾಯಿದೆಯ ಸಂಬಂಧಿತ ವಿಭಾಗಗಳ ಅಡಿಯಲ್ಲಿ ದಂಡ ವಿಧಿಸಲಾಗುತ್ತದೆ.

ಕರ್ನಾಟಕದಲ್ಲಿ ಸ್ಯಾಟಲೈಟ್ ಫೋನ್ ಬಳಕೆ ?

2011ರ ಮುಂಬೈ ದಾಳಿಯ ಬಳಿಕ ಕರ್ನಾಟಕದಲ್ಲಿಯೂ ಸ್ಯಾಟಲೈಟ್ ಫೋನ್ ಬಳಕೆ ನಿಷೇಧ ಮಾಡಲಾಗಿತ್ತು.ಆದರೆ, ಕರ್ನಾಟಕದಲ್ಲಿ ಕಳೆದ 2020ರಲ್ಲಿ 256 ಮತ್ತು 2021ರಲ್ಲಿ 220 ಕರೆಗಳಲ್ಲಿ ಸ್ಯಾಟಲೈಟ್ ಫೋನ್ ಬಳಕೆ ಮಾಡುವುದು ಪತ್ತೆ ಮಾಡಲಾಗಿದೆ.ಕೇಂದ್ರ ಗುಪ್ತಚರ ಇಲಾಖೆ ಜೊತೆ ಸಂಪರ್ಕದಲ್ಲಿದ್ದು, ಈ ಬಗ್ಗೆ ಮಾಹಿತಿ ವಿನಿಮಯ ಮಾಡಿಕೊಳ್ಳಲಾಗುತ್ತಿದೆ.ದೇಶದ ಭದ್ರತೆ ವಿಷಯವೂ ಇದಾಗಿದ್ದು ಹೆಚ್ಚಿನ ಮಾಹಿತಿ ಬಹಿರಂಗ ಪಡಿಸಿಲ್ಲ.

ಮಂಗಳೂರು ಸ್ಫೋಟದ ಮುನ್ನಾ ದಿನ ಬೆಳ್ತಂಗಡಿಯಲ್ಲಿ ರಿಂಗಣಿಸಿದ ಸ್ಯಾಟಲೈಟ್ ಫೋನ್

ಮಂಗಳೂರು ಸ್ಫೋಟಕ್ಕೂ ಮುನ್ನ ಮಂಗಳೂರು ಸುತ್ತಮುತ್ತ ಸ್ಯಾಟಲೈಟ್ ಫೋನ್ ಕಾರ್ಯಾಚರಣೆ ಬಗ್ಗೆ ವರದಿಯಾಗಿತು.ಉತ್ತರ ಕನ್ನಡ, ದಕ್ಷಿಣ ಕನ್ನಡ ಮತ್ತು ಉಡುಪಿಯಲ್ಲಿ ಸ್ಯಾಟಲೈಟ್ ಫೋನ್ ಕಾರ್ಯಾಚರಣೆ ಕುರಿತು ತನಿಖಾ ತಂಡಕ್ಕೆ ಮಾಹಿತಿ ಲಭಿಸಿತ್ತು.ನವೆಂಬರ್‌ 19ರಂದು ಸಂಜೆ ಮಂಗಳೂರು ನಾಗುರಿಯಲ್ಲಿ ಅಟೋ‌ರಿಕ್ಷಾದಲ್ಲಿ ಕುಕ್ಕರ್ ಬಾಂಬ್ ಸ್ಫೋಟ ನಡೆದಿದ್ದರೆ ಅದರ ಮುನ್ನಾ ದಿನ ನ.18ರಂದು ದಕ್ಷಿಣ ಕನ್ನಡದ ಜಿಲ್ಲೆಯ ಬೆಳ್ತಂಗಡಿ ತಾಲೂಕಿನ ಕಕ್ಕಿಂಜೆಯಲ್ಲಿ ಸ್ಯಾಟಲೈಟ್ ಫೋನ್ ಮೂಲಕ ಕರೆ ಹೋಗಿರುವುದಾಗಿ ಮಾಹಿತಿ ಲಭಿಸಿತ್ತು.ಅರಣ್ಯ ಪ್ರದೇಶದಲ್ಲಿ ನಿಷೇಧಿತ ತುರಾಯ ಕಂಪನಿಯ ಸ್ಯಾಟಲೈಟ್ ಫೋನ್ ಬಳಸಿರುವ ಕುರಿತು ಮಾಹಿತಿ ಲಭಿಸಿದೆ.ಸ್ಯಾಟಲೈಟ್ ಫೋನ್ ಬಳಸಲಾದ ಜಾಗವನ್ನು ಬೇಹುಗಾರಿಕಾ ಏಜೆನ್ಸಿಗಳು ಪತ್ತೆ ಮಾಡಿದ್ದು ಪೊಲೀಸರು ಈ ಕೋನದಲ್ಲೂ ತನಿಖೆ ನಡೆಸುತ್ತಿದ್ದಾರೆ