2015ರಲ್ಲಿ ಅವರು ವಿಟಿವಿ ಗುಜರಾತಿಯನ್ನು ಸೇರಿಕೊಂಡರು. ಗುಜರಾತ್ ಮಾಧ್ಯಮದ ಅತ್ಯಂತ ಕಿರಿಯ ಚಾನೆಲ್ ಮುಖ್ಯಸ್ಥರೆನಿಸಿಕೊಂಡರು. ಮುಂದಿನ ಐದು ವರ್ಷ, 2021ರವರೆಗೂ ಅವರು ಪ್ರೈಮ್ ಟೈಮ್ ಟಿವಿ ಶೋ ‘ಮಹಾಮಂಥನ್’ ಅನ್ನು ವಿಟಿವಿ ಗುಜರಾತಿಯಲ್ಲಿ ನಡೆಸಿಕೊಟ್ಟರು. ಈ ಕಾರ್ಯಕ್ರಮದಲ್ಲಿ ಅವರು, ಸ್ಟುಡಿಯೋದಲ್ಲಿ ಪ್ಯಾನೆಲಿಸ್ಟ್‌ಗಳ ಜತೆ ವಿವಿಧ ವಿಚಾರಗಳ ಬಗ್ಗೆ ಚರ್ಚೆ ನಡೆಸುವುದರ ಜತೆಗೆ, ಸಾರ್ವಜನಿಕರೊಂದಿಗೆ ಆ ಸಮಸ್ಯೆಗಳ ಕುರಿತು ಫೋನ್- ಇನ್ ಚರ್ಚೆಯನ್ನೂ ಮಾಡಿ, ಅವರ ಅಭಿಪ್ರಾಯ ಪಡೆಯುತ್ತಿದ್ದರು. ರಾತ್ರಿ 8-9ರವರೆಗೆ ಪ್ರಸಾರವಾಗುತ್ತಿದ್ದ ಕಾರ್ಯಕ್ರಮ, ಜನರ ಬೇಡಿಕೆಯೊಂಗೆ 9.30ರವರೆಗೂ ವಿಸ್ತರಣೆಯಾಗಿತ್ತು. ಈ ಕಾರ್ಯಕ್ರಮ ಗುಜರಾತ್‌ನಲ್ಲಿ, ಮುಖ್ಯವಾಗಿ ಗ್ರಾಮೀಣ ಪ್ರದೇಶಗಳಲ್ಲಿ ಜನಮನ್ನಣೆ ಗಳಿಸಿತ್ತು. ರೈತರು ಪ್ರಮುಖ ಹಾಗೂ ಸಣ್ಣಪುಟ್ಟ ಸಮಸ್ಯೆಗಳನ್ನು ಅವರೊಂದಿಗೆ ಹಂಚಿಕೊಳ್ಳುತ್ತಿದ್ದರು. ಈ ಸಮಸ್ಯೆಗಳ ಬಗ್ಗೆ ಇಸದಾನ್ ತಮ್ಮ ಕಾರ್ಯಕ್ರಮದಲ್ಲಿ ವಿಸ್ತೃತವಾಗಿ ಮಾತನಾಡುತ್ತಿದ್ದರು.

ರಾಜಕಾರಣ ಪ್ರವೇಶ
2021ರ ಜೂನ್‌ನಲ್ಲಿ ಇಸದಾನ್ ಗಡ್ವಿ ಅವರು ಮಾಧ್ಯಮ ಜಗತ್ತಿಗೆ ಗುಡ್‌ಬೈ ಹೇಳಿ ಆಮ್ ಆದ್ಮಿ ಪಕ್ಷ ಸೇರ್ಪಡೆಯಾದರು. ಎಎಪಿ ರಾಜ್ಯ ಕೇಂದ್ರ ಕಚೇರಿಯನ್ನು ಉದ್ಘಾಟಿಸಲು ಅರವಿಂದ್ ಕೇಜ್ರಿವಾಲ್ ಅಹಮದಾಬಾದ್‌ಗೆ ಬಂದಿದ್ದಾಗ, ಅವರ ಸಮ್ಮುಖದಲ್ಲಿ ಪಕ್ಷ ಸೇರಿಕೊಂಡರು.

ಆಡಳಿತಾರೂಢ ಪಕ್ಷವು (ಬಿಜೆಪಿ), ಕಾಂಗ್ರೆಸ್ ಜತೆಗೂಡಿ ಗುಜರಾತ್‌ನಲ್ಲಿ ಉಂಟುಮಾಡಿರುವ ಕೊಳಕನ್ನು ಸ್ವಚ್ಛಗೊಳಿಸುವ ಸಲುವಾಗಿ ಗಡ್ವಿ ಅವರು ತಮ್ಮ ಭರವಸೆಯ ವೃತ್ತಿಯನ್ನು ತೊರೆದು ದೊಡ್ಡ ತ್ಯಾಗ ಮಾಡಿದ್ದಾರೆ ಎಂದು ಕೇಜ್ರಿವಾಲ್ ಶ್ಲಾಘಿಸಿದ್ದರು. “ಎಎಪಿಗಾಗಿ ಅವರು ತಮ್ಮ ಉಜ್ವಲ ವೃತ್ತಿಯನ್ನು ತ್ಯಜಿಸಿದ್ದಾರೆ. ನೀವು ವ್ಯವಸ್ಥೆಯ ಹೊರಗಿನಿಂದ ಬದಲಾವಣೆ ತರಬಹುದು. ಆದರೆ ಇದಕ್ಕೆ ಮಿತಿ ಇದೆ. ಹೀಗಾಗಿ ಗಡ್ವಿ ಅವರು ವ್ಯವಸ್ಥೆಯನ್ನು ಸೇರಲು ಮತ್ತು ಕೊಳಕನ್ನು ಸ್ವಚ್ಛಗೊಳಿಸಲು ನಿರ್ಧರಿಸಿದ್ದಾರೆ” ಎಂದಿದ್ದರು.
“ನಾನು ಜನರ ಸೇವೆಗಾಗಿ ಮಾಧ್ಯಮ ಸೇರಿಕೊಂಡಿದ್ದೆ. ಗುಜರಾತ್ ಜನರು ನನ್ನನ್ನು ಪ್ರೀತಿಸಿದ್ದರು. ಮಾಧ್ಯಮ ಉದ್ಯಮದಲ್ಲಿ ಇದ್ದಾಗ, ನಾನು ಕೆಲವೇ ಜನರ ಸೇವೆ ಮಾಡಬಹುದು ಎನ್ನುವುದು ಅರಿವಾಯಿತು. ಅದಕ್ಕಾಗಿ ಉದ್ಯಮವನ್ನು ಬಿಟ್ಟು ರಾಜಕಾರಣ ಸೇರಿಕೊಂಡಿದ್ದೇನೆ. ಇದರಿಂದ ದೊಡ್ಡ ಸಂಖ್ಯೆಯ ಜನರ ಸೇವೆ ಮಾಡಬಹುದು” ಎಂದು ಗಡ್ವಿ ತಿಳಿಸಿದ್ದರು.

ಗುಜರಾತ್ ರಾಜಕಾರಣದಲ್ಲಿ ಬದಲಾವಣೆ ತರುವ ಉದ್ದೇಶದೊಂದಿಗೆ 2022ರ ಮೇ ತಿಂಗಳಲ್ಲಿ ಎಎಪಿ ನಾಯಕರು ಮತದಾರರು ಮತ್ತು ನಾಗರಿಕರ ಜತೆ ಸಂವಾದಿಸುವ ಯೋಜನೆ ನಡೆಸಿತ್ತು. ಗುಜರಾತ್‌ನ ಐದು ಭಾಗಗಳಲ್ಲಿ ಪರಿವರ್ತನ ಯಾತ್ರೆಯನ್ನು ನಡೆಸಲಾಗಿತ್ತು. ದ್ವಾರಕಾದಲ್ಲಿ ಇಸುದಾನ್ ಗಡ್ವಿ ಅವರು ಯಾತ್ರೆಯನ್ನು ಮುನ್ನಡೆಸಿದ್ದರು.