ಮಳೆಯನ್ನೇ ಅವಲಂಬಿಸಿರುವ ಪ್ರದೇಶಗಳಲ್ಲಿ ಬಿತ್ತನೆ, ಬೆಳೆಗಳ ಬೆಳವಣಿಗೆ ಹಾಗೂ ಮುಂದಿನ ಹಂತದ ಕೃಷಿ ಕಾರ್ಯಗಳ ಬಗ್ಗೆ ಅನಿಶ್ಚಿತತೆ ಉಂಟಾದಾಗ ರಸಗೊಬ್ಬರ ಬಳಕೆಯೂ ಸಹಜವಾಗಿ ಕಡಿಮೆಯಾಗುತ್ತದೆ. ಕಳೆದ ವರ್ಷ ರಸಗೊಬ್ಬರ ಮಾರಾಟ ಗರಿಷ್ಠ ಮಟ್ಟ ತಲುಪಿದ್ದರೆ, ಪ್ರಸಕ್ತ ಸಾಲಿನಲ್ಲಿ ಬೇಡಿಕೆ ಕುಸಿಯುತ್ತಿರುವ ಲಕ್ಷಣಗಳು ಕಂಡುಬರುತ್ತಿವೆ. 2025-26ರ ಏಪ್ರಿಲ್‌ನಿಂದ ಮಾರ್ಚ್‌ವರೆಗಿನ ಅವಧಿಯಲ್ಲಿ ದೇಶದಲ್ಲಿ ಒಟ್ಟು 39.6 ದಶಲಕ್ಷ ಟನ್ ರಸಗೊಬ್ಬರ ಮಾರಾಟವಾಗಿತ್ತು.

ಕಚ್ಚಾವಸ್ತುಗಳ ಬೆಲೆ ಏರಿಕೆಯ ಬಿಸಿ
ರಸಗೊಬ್ಬರ ವಲಯದ ಮೇಲೆ ಕಚ್ಚಾವಸ್ತುಗಳ ಬೆಲೆ ಏರಿಕೆಯೂ ತೀವ್ರ ಪರಿಣಾಮ ಬೀರಿದೆ. ಎಫ್‌ಎಐ ವರದಿಯ ಪ್ರಕಾರ, 2025ರ ಏಪ್ರಿಲ್-ಸೆಪ್ಟೆಂಬರ್ ಅವಧಿಗೆ ಹೋಲಿಸಿದರೆ 2026ರ ಇದೇ ಅವಧಿಯಲ್ಲಿ ಸಂಕೀರ್ಣ ರಸಗೊಬ್ಬರಗಳ ದೇಶೀಯ ಉತ್ಪಾದನೆ ಶೇ.35.5ರಷ್ಟು ಹಾಗೂ ಎಸ್‌ಎಸ್‌ಪಿ ಉತ್ಪಾದನೆ ಶೇ.10.4ರಷ್ಟು ಕುಸಿದಿದೆ.

ವಿಶೇಷವಾಗಿ ಗಂಧಕದ ಆಮದು ಬೆಲೆ ಏರಿಕೆಯು ಉತ್ಪಾದನಾ ವೆಚ್ಚವನ್ನು ಹೆಚ್ಚಿಸಿದೆ. ಕಳೆದ ವರ್ಷ ಟನ್‌ಗೆ 300ರಿಂದ 400 ಡಾಲರ್ ಇದ್ದ ಗಂಧಕದ ಬೆಲೆ ಪ್ರಸ್ತುತ 1,000ರಿಂದ 1,100 ಡಾಲರ್‌ಗೆ ತಲುಪಿದೆ. ಕಚ್ಚಾವಸ್ತುಗಳ ದುಬಾರಿ ದರ ಮತ್ತು ಉತ್ಪಾದನಾ ವೆಚ್ಚದ ಹೆಚ್ಚಳ ರಸಗೊಬ್ಬರ ತಯಾರಿಕಾ ವಲಯಕ್ಕೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.

2027ರ ಆರಂಭದವರೆಗೂ ಎಲ್‌ನಿನೋ ಆತಂಕ..!
2027ರ ಜನವರಿಯಿಂದ ಮಾರ್ಚ್‌ವರೆಗಿನ ಅವಧಿಯವರೆಗೂ ಎಲ್‌ನಿನೋ ಪ್ರಭಾವ ಪ್ರಬಲವಾಗಿರುವ ಸಾಧ್ಯತೆಯಿದೆ ಎಂಬ ಜಾಗತಿಕ ಹವಾಮಾನ ಸಂಸ್ಥೆಗಳ ಮುನ್ಸೂಚನೆ ಕೃಷಿ ವಲಯದಲ್ಲಿ ಆತಂಕ ಮೂಡಿಸಿದೆ.

ಆದರೆ ರಸಗೊಬ್ಬರ ಮಾರಾಟ ಕುಸಿತಕ್ಕೆ ಎಲ್‌ನಿನೋ ಒಂದೇ ಕಾರಣವಲ್ಲ. ಮಳೆಯ ಪ್ರಮಾಣ, ಬೆಳೆ ಪ್ರದೇಶ, ಕೃಷಿ ಚಟುವಟಿಕೆಗಳು, ರಸಗೊಬ್ಬರಗಳ ಬೆಲೆ ಹಾಗೂ ರೈತರ ಖರೀದಿ ಸಾಮರ್ಥ್ಯವೂ ಬೇಡಿಕೆಯನ್ನು ನಿರ್ಧರಿಸುತ್ತವೆ. ಮಳೆ ಕೊರತೆ ಮುಂದುವರಿದು ಕೃಷಿ ಚಟುವಟಿಕೆಗಳು ಕುಂಠಿತಗೊಂಡರೆ ರಸಗೊಬ್ಬರ ಬಳಕೆ ಮಾತ್ರವಲ್ಲದೆ ಬೆಳೆ ಉತ್ಪಾದನೆಯ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯಿದೆ.

ಮುಂಗಾರು ಮತ್ತು ಹಿಂಗಾರು ಹಂಗಾಮಿನ ಮಳೆಯ ಸ್ಥಿತಿ, ರಸಗೊಬ್ಬರಗಳ ಲಭ್ಯತೆ, ಬೆಲೆ ಹಾಗೂ ರೈತರ ಖರೀದಿ ಪ್ರವೃತ್ತಿ ಮುಂದಿನ ದಿನಗಳಲ್ಲಿ ಕೃಷಿ ವಲಯದ ಭವಿಷ್ಯವನ್ನು ನಿರ್ಧರಿಸಲಿವೆ.

ದರ ಏರಿಕೆಯಿಂದ ರೈತರಿಗೆ ಹೆಚ್ಚುವರಿ ಹೊರೆ
ಈ ಕುರಿತು ಮಾತನಾಡಿರುವ ಪ್ರಗತಿಪರ ರೈತ ಬಲಾಡಿ ಸಂತೋಷ್ ಶೆಟ್ಟಿ, ಮಳೆ ಕೊರತೆಯ ನಡುವೆಯೇ ಸಂಕೀರ್ಣ ರಸಗೊಬ್ಬರಗಳ ಬೆಲೆ ಏರಿಕೆಯಾಗಿರುವುದು ರೈತರ ಮೇಲೆ ಪ್ರತಿಕೂಲ ಪರಿಣಾಮ ಬೀರಿದೆ ಎಂದು ತಿಳಿಸಿದ್ದಾರೆ.

20:20:0:13 ದರ್ಜೆಯ ರಸಗೊಬ್ಬರದ ಪ್ರತಿ ಚೀಲದ ಬೆಲೆ 2,100 ರೂ. ಹಾಗೂ 12:32:16 ಮತ್ತು 10:26:26 ದರ್ಜೆಯ ರಸಗೊಬ್ಬರಗಳ ಪ್ರತಿ ಚೀಲದ ಬೆಲೆ ಸುಮಾರು 2,400 ರೂ. ತಲುಪಿದೆ. ಈಗಾಗಲೇ ಮಳೆ ಕೊರತೆಯಿಂದ ಸಂಕಷ್ಟದಲ್ಲಿರುವ ರೈತರಿಗೆ ಈ ಬೆಲೆ ಏರಿಕೆ ಮತ್ತಷ್ಟು ಹೊರೆಯಾಗಿದೆ. ಹೆಚ್ಚಿನ ಬೆಲೆ ನೀಡಿ ಗೊಬ್ಬರ ಖರೀದಿಸುವುದು ಕಷ್ಟವಾಗುತ್ತಿದ್ದು, ಇದು ರೈತರ ಖರೀದಿ ನಿರ್ಧಾರದ ಮೇಲೂ ಪರಿಣಾಮ ಬೀರುತ್ತಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.