ಆಹಾರ ಮಳಿಗೆಯತ್ತ ಕಾಯುತ್ತಿದ್ದರು :
ಉಗ್ರರು ಬೈಸರನ್‌ ಕಣಿವೆಯಲ್ಲಿ ಆಹಾರ ಮಳಿಗೆ ಬಳಿ ಹೊಂಚು ಹಾಕಿ ಕುಳಿತಿದ್ದರು. ಪ್ರವಾಸಿಗರು ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ ಎಂಬುದನ್ನು ಮನಗಂಡು ನಂತರ ಗುಂಡು ಹಾರಿಸಿ, ಅಲ್ಲಿಂದ ಅರಣ್ಯ ಪ್ರದೇಶದೊಳಕ್ಕೆ ಪರಾರಿಯಾದರು ಎಂದು ವರದಿಗಳು ಹೇಳಿವೆ.

ಉಗ್ರರಲ್ಲಿ ಒಬ್ಬಾತ ಪಾಕ್‌ನ ಮಾಜಿ ಸೈನಿಕ
ಪಹಲ್ಗಾಮ್‌ ದಾಳಿಯಲ್ಲಿ ಭಾಗಿಯಾಗಿದ್ದ ಲಷ್ಕರೆ ಉಗ್ರನೊಬ್ಬ ಪಾಕಿಸ್ತಾನ ಸೇನೆಯ ಮಾಜಿ ಸೈನಿಕನಾಗಿದ್ದು, ಕಠಿಣ ರೀತಿಯ ಪ್ಯಾರಾ ಕಮಾಂಡೊ ತರಬೇತಿ ಪಡೆದಿದ್ದ ಎಂದು ಮೂಲಗಳು ಹೇಳಿವೆ. ಹಾಶಿಮ್‌ ಮೂಸಾ ಹತ್ಯಾಕಾಂಡ ನಡೆಸುವ ಉದ್ದೇಶಕ್ಕಾಗಿಯೇ ಸೇನೆ ತೊರೆದು, ಲಷ್ಕರೆ ಎ ತಯ್ಬಾ ಉಗ್ರ ಸಂಘಟನೆ ಸೇರಿದ್ದ ಎಂದು ತಿಳಿದುಬಂದಿದೆ.

20ರ ಆಜು ಬಾಜು ಇರುವ ಹಾಶಿಮ್‌ ಮೂಸಾ ಕಥುವಾ ಹಾಗೂ ಸಾಂಬಾ ಸೆಕ್ಟರ್‌ ಮೂಲಕ ಭಾರತದ ಗಡಿ ನುಸುಳಿ ರಜೌರಿ-ಪೂಂಚ್‌ ವಲಯದ ಡೇರಾ ಕಿ ಗಲಿ ಪ್ರದೇಶಕ್ಕೆ ಬಂದು ಅಲ್ಲಿ ಸಕ್ರಿಯನಾಗಿದ್ದುಕೊಂಡು ಉಗ್ರ ಚಟುವಟಿಕೆಗಳಲ್ಲಿ ಭಾಗಿಯಾಗಿದ್ದ. ಭದ್ರತಾ ಪಡೆಗಳ ಮೇಲೆ ಉಗ್ರರು ಈ ಹಿಂದೆ ನಡೆಸಿದ ಕೆಲವು ದಾಳಿಗಳಲ್ಲಿ ಈತ ಭಾಗಿಯಾಗಿದ್ದ ಎಂದು ತನಿಖಾ ವರದಿಗಳನ್ನು ಉಲ್ಲೇಖಿಸಿ ಕೆಲವು ಆಂಗ್ಲಮಾಧ್ಯಮಗಳು ವರದಿ ಮಾಡಿವೆ.

ದಾಳಿಯ ಮಾಸ್ಟರ್‌ಮೈಂಡ್‌ ಹಾಶಿಮ್‌ ಮೂಸಾ ಎಂಬುದು ತಿಳಿದುಬಂದಿದೆ. ಗುಡ್ಡಗಾಡು ಪ್ರದೇಶದಲ್ಲಿ ಹೇಗೆ ಕಾರ್ಯಾಚರಣೆ ನಡೆಸಬೇಕು, ಅತ್ಯಾಧುನಿಕ ಶಸ್ತ್ರಾಸ್ತ್ರಗಳನ್ನು ಹೇಗೆ ಬಳಸಬೇಕು ಎಂಬ ಬಗ್ಗೆ ತರಬೇತಿ ಪಡೆದುಕೊಂಡಿದ್ದ.

48 ಪ್ರವಾಸಿ ತಾಣಗಳಿಗೆ ಪ್ರವೇಶವಿಲ್ಲ
ಭದ್ರತೆ ದೃಷ್ಟಿಯಿಂದ ಜಮ್ಮು-ಕಾಶ್ಮೀರ ಸರಕಾರವು 48 ಪ್ರವಾಸಿ ತಾಣಗಳನ್ನು ಬಂದ್‌ ಮಾಡಿದೆ. ಕಣಿವೆಯಲ್ಲಿ ಇನ್ನಷ್ಟು ಭಯೋತ್ಪಾದಕ ದಾಳಿ ನಡೆಯುವ ಸಾಧ್ಯತೆಗಳ ಕುರಿತು ಗುಪ್ತಚರ ಇಲಾಖೆಯ ವರದಿ ಆಧರಿಸಿ ಜಮ್ಮು-ಕಾಶ್ಮೀರ ಸರಕಾರ ಈ ನಿರ್ಧಾರ ಕೈಗೊಂಡಿದೆ. ಕಣಿವೆಯಲ್ಲಿಉಗ್ರ ಸಂಘಟನೆಗಳ ಕೆಲವು ಸ್ಲೀಪರ್‌ ಸೆಲ್‌ಗಳು ಸಕ್ರಿಯವಾಗಿವೆ. ಪ್ರವಾಸಿಗರು, ಕಾಶ್ಮೀರಿ ಪಂಡಿತರು, ಗುಪ್ತಚರ, ಸಿಐಡಿ, ರೈಲ್ವೆ ಹೀಗೆ ಕೆಲವು ಇಲಾಖೆಗಳ ಅಧಿಕಾರಿಗಳನ್ನು ಗುರಿಯಾಗಿಸಿಕೊಂಡು ಉಗ್ರರು ದಾಳಿ ನಡೆಸುವ ಸಾಧ್ಯತೆಯೂ ಇದೆ ಎಂದು ಗುಪ್ತಚರ ವರದಿಗಳು ಎಚ್ಚರಿಸಿವೆ.

ಪಾಕ್‌ ವಿಮಾನಗಳಿಗೆ ಭಾರತದ ವಾಯುಪ್ರದೇಶ ಬಂದ್‌
ಪಹಲ್ಗಾಮ್‌ ನರಮೇಧದ ಬೆನ್ನಲ್ಲೇ ಪಾಕಿಸ್ತಾನವನ್ನು ಆರ್ಥಿಕವಾಗಿ ಬಗ್ಗುಬಡಿಯಲು ಭಾರತವು ಹಲವು ಕ್ರಮಗಳನ್ನು ಈಗಾಗಲೇ ಕೈಗೊಂಡಿದೆ. ಈಗ, ಪಾಕಿಸ್ತಾನದ ವಿಮಾನಯಾನ ಸಂಸ್ಥೆಗಳು ಭಾರತದ ವಾಯುಪ್ರದೇಶವನ್ನು ಬಳಸದಂತೆ ನಿರ್ಬಂಧ ಹೇರಲು ಮುಂದಾಗಿದೆ ಎಂದು ಮೂಲಗಳು ಹೇಳಿವೆ. ಈಗಾಗಲೇ ಪಾಕಿಸ್ತಾನದ ಕೆಲವು ಏರ್‌ಲೈನ್ಸ್‌ಗಳು ಭಾರತದ ವಾಯುಪ್ರದೇಶವನ್ನು ಬಳಸದೇ ಬೇರೆ ಮಾರ್ಗಗಳನ್ನು ಹುಡುಕಿಕೊಂಡಿವೆ. ಭಾರತದ ವಾಯುಪ್ರದೇಶ ಬಂದ್‌ ಆದರೆ ಪಾಕಿಸ್ತಾನದ ವಿಮಾನಗಳು ಮಲೇಷ್ಯಾದಂಥ ಆಗ್ನೇಯ ಏಷ್ಯಾದ ರಾಷ್ಟ್ರಗಳನ್ನು ತಲುಪಲು ಚೀನಾ ಅಥವಾ ಶ್ರೀಲಂಕಾದ ಮೂಲಕ ತೆರಳಬೇಕಾಗುತ್ತದೆ ಎಂದು ಮೂಲಗಳು ತಿಳಿಸಿವೆ.

ಪಾಕ್‌ನಿಂದ ಗಡಿಯಲ್ಲಿ ರೇಡಾರ್‌ ಸಿಸ್ಟಮ್‌
ಪಹಲ್ಗಾಮ್‌ ದಾಳಿಗೆ ಭಾರತ ಪ್ರತೀಕಾರ ತೀರಿಸಿಕೊಳ್ಳುವುದು ನಿಶ್ಚಿತವಾಗಿದೆ. ಆದರೆ, ಈ ಪ್ರತೀಕಾರದ ಭೀತಿಯಲ್ಲಿಪಾಕಿಸ್ತಾನ ಸೇನೆಯು ಸಿಯಾಲ್‌ಕೋಟ್‌ ಸೆಕ್ಟರ್‌ ಸೇರಿದಂತೆ ಕೆಲವು ಗಡಿ ಭಾಗದ ಆಯಕಟ್ಟಿನ ಪ್ರದೇಶಗಳಲ್ಲಿ ಟಿಪಿಎಸ್‌-77 ರೇಡಾರ್‌ ಸಿಸ್ಟಮ್‌ಗಳನ್ನು ರವಾನಿಸುತ್ತಿದೆ. ಭಾರತ ಸೇನೆಯ ಚಲನವಲನಗಳ ಮೇಲೆ ಕಣ್ಣಿಡಲು ಎಲೆಕ್ಟ್ರಾನಿಕ್ಸ್‌ ಯುದ್ಧ ಸಲಕರಣೆಗಳನ್ನು ಗಡಿ ಭಾಗಕ್ಕೆ ರವಾನಿಸುತ್ತಿದೆ ಎಂದು ಮೂಲಗಳು ಹೇಳಿವೆ.