ಮಹತೋಭಾರ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವರ ಜಾತ್ರೆಯ ಕೊಡಿ ಇಳಿದ ಮರುದಿನ ಬಲ್ನಾಡಿನಲ್ಲಿ ಗೊನೆ ಮುಹೂರ್ತ ನಡೆದು ಏ.28ರಂದು ಪೂರ್ವಾಹ್ನ ದಂಡನಾಯಕ, ಉಳ್ಳಾಲ್ತಿ ವಗೈರೆ ದೈವಗಳ ವಾರ್ಷಿಕ ನೇಮ ನಡೆಯುತ್ತದೆ.

ಪ್ರಧಾನ’ ದೈವವೆಂದು ನಂಬಿಕೆಯಲ್ಲಿ ಭಕ್ತರು ಸಹಸ್ರಾರು ಸಂಖ್ಯೆಯಲ್ಲಿ ಆಗಮಿಸಿ ಕಾಣಿಕೆ, ಕುಂಕುಮ, ಮಲ್ಲಿಗೆ ಚೆಂಡುಗಳು, ಎಳನೀರು, ಸೀರೆ ಅರ್ಪಿಸಿ ದೈವಗಳ ಅಭಯ ಪಡೆಯುತ್ತಾರೆ.

ನೇಮಕ್ಕೆ ಮಲ್ಲಿಗೆ ಮುಗುಳು:
ಶತಮಾನಗಳ ಹಿಂದೆ ಕೊಡಿಪಾಡಿ ಶ್ಯಾರ ಮನೆತನದ ಒಡತಿ ಶ್ರೀಮತಿ ದುಗ್ಗಮ್ಮ ಅವರು ಅಂದಿನ ಕಾಲದ ಆಭರಣಗಳಾದ ಕೊಪ್ಪು ಬುಗುಡಿ, ಅವಲಕ್ಕಿಸರ, ತಲೆಗೆ ಸ್ವರ್ಣದ ಮಲ್ಲಿಗೆ ಮುಗುಳು ಧರಿಸಿ ಪುತ್ತೂರು ಜಾತ್ರೆ ನೋಡಲು ಸನಿಹದ ಹಾದಿ ಬಲ್ನಾಡನ್ನು ಬಳಸಿ ಬರುತ್ತಾರೆ, ಜಾತ್ರೆ ಮುಗಿದು ಹಿಂತಿರುಗಿ ಮತ್ತೆ ಅದೇ ದಾರಿಯಲ್ಲಿ ಬಂದು ಉಳ್ಳಾಲ್ತಿ ಸ್ಥಾನದ ಬಳಿ ಕುಸಿದು ಬಿದ್ದಾಗ ಸ್ಥಳೀಯರು ಕಂಡು ಉಪಚರಿಸಿ ಮನೆಗೆ ತಲುಪಿಸುತ್ತಾರೆ . ಮುಂದೆ ನಡೆದ ನೇಮದಲ್ಲಿ ಶ್ಯಾರ ಮನೆಯ ಯಜಮಾನ ಈ ಘಟನೆಯ ಬಗ್ಗೆ ದೈವದಲ್ಲಿ ಕೇಳಿದಾಗ ಹೆಂಗಸು ತಲೆಯಲ್ಲಿ ಧರಿಸಿದ ಬಂಗಾರದ ಮುಗುಳು ಮಲ್ಲಿಗೆ ನನಗೆ ಇಷ್ಟವಾಗಿದೆ. ಪ್ರತಿವರ್ಷ ನೇಮದ ದಿನ ಧರಿಸಲು ನನಗೆ ಒಪ್ಪಿಸಬೇಕು ಎಂದು ನುಡಿಯಲ್ಲಿ ಹೇಳಿದಂತೆ ಅಂದಿನಿಂದ ಇಂದಿನ ತನಕ ಅದೇ ಆಭರಣದಿಂದ ಸಿಂಗರಿಸಲಾಗುತ್ತದೆ.ಹಿರಿಯರಾದ ಶ್ಯಾರ ದಿನೇಶ ರಾಯರು ಈ ಕಾರ್ಯ ಮಾಡುತ್ತಿದ್ದಾರೆ. ನೇಮದ ನಂತರ ಮಹಾಪ್ರಸಾದದೊಂದಿಗೆ ಆಭರಣ ಹಿಂದಿರುಗಿಸುವ ಪದ್ಧತಿ ಇಂದಿಗೂ ಪಾಲನೆಯಾಗುತ್ತಿದೆ.

ಉಳ್ಳಾಲ್ತಿ ಅಮ್ಮ ಪುತ್ತೂರಿಗೆ ಬಂದ ಮಾರಣಾಂತಿಕ ಕಾಯಿಲೆಯನ್ನು ಮಾಯ ಮಾಡಿದ ಕೀರ್ತಿಗೆ ಪಾತ್ರಳಾಗಿದ್ದಾಳೆ.ಇಲ್ಲಿ ಮಹಿಳೆಯರು ಉಳ್ಳಾಲ್ಲಿ ನೇಮ ವೀಕ್ಷಿಸುವಂತಿಲ್ಲ. ಪರಿಸರದಲ್ಲಿ ರಂಗುಹಚ್ಚುವಂತಿಲ್ಲ.ಗೆಜ್ಜೆ ಕಟ್ಟುವಂತಿಲ್ಲ ಅಂಗಡಿ ವ್ಯಾಪಾರ ಮಾಡುವಂತಿಲ್ಲ ಇಂತಹ ಅನೇಕ ಕಟ್ಟುಪಾಡುಗಳಿವೆ.

ಮದುವಣಗಿತ್ತಿಯ ಶೃಂಗಾರ:
ಕರದಲ್ಲಿ ಕಲಶ ಕನ್ನಡಿ ಹಿಡಿದು ಮಲ್ಲಿಗೆಯ ಜಿಲ್ಲೆ ಮುಡಿದು ಮದುಮಗಳ ಶೃಂಗಾರದಲ್ಲಿ ನಿಂತು ಹಲವು ಸುತ್ತು ಬಲಿಗಳೊಂದಿಗೆ ಅಭಯಪ್ರದಾನ ನಡೆದು ನೇಮ ಸಂಪನ್ನಗೊಳ್ಳುತ್ತದೆ. ಹಿಂದಿನ ರಾತ್ರಿಯೂ ನೇಮದ ದಿನ ಮಧ್ಯಾಹ್ನವೂ ನೆರೆದ ಭಕ್ತಾದಿಗಳಿಗೆ ಅನ್ನದಾನವೂ ನಡೆಯುತ್ತದೆ.

ಮೂಗುತ್ತಿ ತೊಡುವಾಗ ಆವಾಹನೆ:
ತುಳುನಾಡಿನಲ್ಲಿ ನಡೆಯುವ ದೈವಾರಾಧನೆಯಲ್ಲಿ ಇತರ ದೈವಗಳಿಗೆ ಕಾಲಿಗೆ ಗಗ್ಗರ ಧರಿಸುವಾಗ, ಮುಖ ಕವಚ ಧರಿಸುವಾಗ ದೈವದ ಆವಾಹನೆಯಾದರೆ, ಅದಕ್ಕಿಂತಲೂ ಭಿನ್ನವಾಗಿ ಇಲ್ಲಿ ಉಳ್ಳಾಲ್ತಿ ದೈವದ ದೈವಾರಾಧಕನು ಅಣಿ ಕಟ್ಟಿ, ಕಾಲಿಗೆ ಗಗ್ಗರ ಧರಿಸಿ ಮೂಗಿಗೆ ವಜ್ರದ ಮೂಗುತ್ತಿ ಧರಿಸುವಾಗ ದೈವದ ಆವೇಶವಾಗುವ ಅಪೂರ್ವ ಕ್ಷಣ. ಇದು ಬಲ್ನಾಡಿನ ಕಾರ್ಣಿಕ ಕ್ಷೇತ್ರದ ವಿಶೇಷ.

ಈ ಬಾರಿ ಭಕ್ತರಿಂದ ಏನೆಲ್ಲ ಸಮರ್ಪಣೆ:

400 ಗ್ರಾಂ ತೂಕದ ಚಿನ್ನದ ಮೊಗ್ಗಿನ ಮಾಲೆ, ಚಿನ್ನ ಬೆಳ್ಳಿಯ ಸೊಂಟಪಟ್ಟಿ, ಬೆಳ್ಳಿಯ ಕನ್ನಡಿ , ಕಂಚು ತಾಮ್ರ ಕೊಪ್ಪರಿಗೆ , ಬೆಳ್ಳಿಯ ಚೆಂಬು, ಬೆಳ್ಳಿಯ ಜೋಡು ದೀಪ, ಬೆಳ್ಳಿಯ ಅರಿವಾಣ ನಿನ್ನೆ ದಿನ ಸಮರ್ಪಣೆಯಾಗಿದೆ. ಬಿಂಬಕ್ಕೆ ದಿನನಿತ್ಯ ಉಪಯೋಗಕ್ಕೆ ಸಣ್ಣ ಚಿನ್ನದ ಮೊಗ್ಗಿನ ಮಾಲೆಯೂ ಮಾಡಿಸಲಾಗಿದೆ. ದೊಡ್ಡ ಮಾಲೆಯನ್ನು ನೇಮೋತ್ಸವದ ದಿನ ಮಾತ್ರ ಉಪಯೋಗಿಸಲಾಗುತ್ತದೆ. ಇದೀಷ್ಟು ಯಾವೂದೇ ಸಮಿತಿ ಇಲ್ಲದೆ ಭಕ್ತರೇ ಪ್ರಮುಖರ ಮುಂದಾಳತ್ವದಲ್ಲಿ ಹಣ ಸಂಗ್ರಹಿಸಿ ಸಮರ್ಪಿಸಲಾಗಿದೆ. ಇದಿಷ್ಟು ವಸ್ತುಗಳಿಗೆ ಅಂದಾಜು 50 ಲಕ್ಷ ರೂಪಾಯಿ ವೆಚ್ಚವಾಗಿದೆ. ಇಂದು ನಡೆಯುವ ನೇಮೋತ್ಸವದಲ್ಲಿ ಉಳ್ಳಾಲ್ತಿ ಅಮ್ಮ ಚಿನ್ನದ ಮೊಗ್ಗಿನ ಮಾಲೆ ಧರಿಸಲಿದ್ದಾರೆ.