ಈಡಿಯಿಂದ ನೋಟೀಸ್ ಬಂದೊಡನೆ ಮಹರಾಷ್ಟ್ರದ ನಾರಾಯಣ ರಾಣೆಯವರನ್ನು ಪಕ್ಷಕ್ಕೆ ಸೇರಿಸಿಕೊಂಡು ಕೇಂದ್ರ ಸಚಿವರನ್ನಾಗಿಸಿದ ಬಿಜೆಪಿಯವರು, ಕುಸಿದು ಹೋದ ವಿಮಾನ ನಿಲ್ದಾಣ ಅಯೋದ್ಯೆಯ ರಾಮ ಪಥ, ಸೋರುವ ಮಂದಿರ ನಿರ್ಮಿಸಿದ ಬಿಜೆಪಿಯವರು, ಅಂಬಾನಿ-ಅದಾನಿಗಳಿಗೆ ದೇಶವನ್ನು ಒತ್ತೆ ಇಟ್ಟಿದ್ದಾರೆ.  ಚುನಾವಣಾ ಬಾಂಡ್ ಹಗರಣದಲ್ಲಿ 8000 ಕೋಟಿಗೂ ಅಧಿಕ ಹಣವನ್ನು ಕೊಳ್ಳೆ ಹೊಡೆದ ಬಿಜೆಪಿಯ ರಾಷ್ಟ್ರೀಯ ನಾಯಕರು, ಸೆಬಿ ಅಧ್ಯಕ್ಷೆ ಮಾಧವಿ ಬುಚ್ ಬಗ್ಗೆ ಕ್ರಮ ಕೈಗೊಳ್ಳದ ಬಿಜೆಪಿಯವರು ಭ್ರಷ್ಟಾಚಾರದ ಬಗ್ಗೆ ಮಾತನಾಡುತ್ತಿರುವುದು ಅತ್ಯಂತ ನಾಚಿಕೆಗೇಡಿನ ಸಂಗತಿಯಾಗಿದೆ. ಬಿಜೆಪಿಯವರಾದರೆ ಈಡಿಯೂ ಇಲ್ಲ,  ಸಿಬಿಐಯೂ ಇಲ್ಲ, ಐಟಿಯೂ ಇಲ್ಲ, ಭ್ರಷ್ಟಾಚಾರವೂ ಇಲ್ಲ, ಕೇಸೂ ಇಲ್ಲ, ರಾಜೀನಾಮೆಯೂ ಇಲ್ಲ ಎಂಬುದೇ ಇವರ ನೀತಿಯಾಗಿದೆ.

ರಾಚೇನಹಳ್ಳಿ ಅಕ್ರಮ ಡಿನೋಟಿಫಿಕೇಶನ್ ಹಗರಣದಲ್ಲಿ ರಾಜ್ಯಪಾಲರು ಅನುಮತಿ ನೀಡಿ ಚಾರ್ಜ್‌ಶೀಟ್ ಸಲ್ಲಿಕೆಯಾದರೂ ರಾಜೀನಾಮೆ ನೀಡದೆ ಗಣಿ ಹಗರಣದಲ್ಲಿ    ಬಂಧನಕ್ಕೊಳಗಾಗುವ ಸ್ಥಿತಿ ಬಂದಾಗ ಅನಿವಾರ್ಯವಾಗಿ ರಾಜೀನಾಮೆ ನೀಡಿದ ಯಡಿಯೂರಪ್ಪನವರು ಈಗ ಸಿದ್ಧರಾಮಯ್ಯನವರ ರಾಜೀನಾಮೆ ಕೇಳುತ್ತಿರುವುದು, 40℅ಭ್ರಷ್ಟಾಚಾರದ ಚಾಂಪಿಯನ್‌ಗಳಾದ ಬಿಜೆಪಿ ನಾಯಕರು, ಪಿ.ಎಸ್.ಐ. ಹಗರಣದ ರೂವಾರಿಗಳಾದ ಅರಗ ಜ್ಞಾನೇಂದ್ರ, ಕೋವಿಡ್ ಖರೀದಿ ಹಗರಣದ ಸುದಾಕರ್,  ಬಿಡಿಎ ಅಪಾರ್ಟ್ಮೆಂಟ್ ಅಕ್ರಮ ಟೆಂಡರ್ ಕೇಸ್ ನಲ್ಲಿ ಎಂಟು ಕೋಟಿ ಅವ್ಯವಹಾರದ ಆರೋಪ ಹೊತ್ತ ವಿಜಯೇಂದ್ರ ಸಿದ್ಧರಾಮಯ್ಯನವರಿಗೆ ನೈತಿಕತೆಯ ಪಾಠ  ಮಾಡುತ್ತಿರುವುದು ಹಾಸ್ಯಸ್ಪದವಾಗಿದೆ.

 ನೈತಿಕತೆಯ ಪ್ರಶ್ನೆ:  ಪ್ರಕರಣದ ನೈತಿಕ ಹೊಣೆಯನ್ನು ಹೊತ್ತು ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ರಾಜೀನಾಮೆ ನೀಡಬೇಕೆಂದು ಬಿಜೆಪಿ ಇಂದು ಅಗ್ರಹಿಸುತ್ತದೆ.  ಒಂದು ವೇಳೆ ಈ ಪ್ರಕರಣದಲ್ಲಿ ಹುರುಳಿರುತ್ತಿದ್ದರೆ ಅಥವಾ  ಈ ಆರೋಪದ ಹಿಂದೆ ಯಾವುದೇ ಷಢ್ಯಂತ್ರಗಳು ಇಲ್ಲದೆ ಇರುತ್ತಿದ್ದರೆ ಸಿದ್ದರಾಮಯ್ಯನವರು ರಾಜೀನಾಮೆ ನೀಡಲು ಹಿಂದು ಮುಂದು ಯೋಚಿಸುತ್ತಿರಲಿಲ್ಲ. ಆದರೆ ಈ ಆರೋಪವೇ ಒಂದು ಅನೈತಿಕ ಷಡ್ಯಂತ್ರ. ಬಿಜೆಪಿಯ  ರಾಜ್ಯದ ಮತ್ತು ರಾಷ್ಟ್ರೀಯ ನಾಯಕರೆಲ್ಲರೂ ಸೇರಿಕೊಂಡು ಈ ಷಡ್ಯಂತ್ರವನ್ನು ರೂಪಿಸಿದ್ದಾರೆ.  ಇಡೀ ದೇಶದಲ್ಲಿ  ವಿರೋಧ ಪಕ್ಷದ ಆಡಳಿತವಿರುವ  ಸರಕಾರಗಳನ್ನು ಅಸ್ಥಿರಗೊಳಿಸಬೇಕೆನ್ನುವ ಬಿಜೆಪಿಯ “ಕಾಂಗ್ರೆಸ್ ಮುಕ್ತ ಭಾರತ”  ಎಂಬ ಚಿಂತನೆಯ ಫಲವಾಗಿಯೇ ಈ ಷಡ್ಯಂತ್ರ ರೂಪಿಸಲಾಗಿದೆ.

 ಮೊದಲಿಗೆ ಆಪರೇಷನ್ ಕಮಲದ ಮೂಲಕ ರಾಜ್ಯ ಸರ್ಕಾರಗಳನ್ನು ಉರುಳಿಸಿದರು. ಈಗ ಆಪರೇಷನ್‌ಗೆ ಬಗ್ಗದ ರಾಜ್ಯ ಸರಕಾರಗಳನ್ನು ಈಡಿ, ಸಿಬಿಐ, ಐಟಿ ಮತ್ತು ರಾಜ್ಯಪಾಲರ ಮುಖಾಂತರ ಅಸ್ಥಿರಗೊಳಿಸುವ ಪ್ರಯತ್ನ ನಡೆಯುತ್ತಿದೆ. ದೆಹಲಿಯಲ್ಲಿ ಲಿಕ್ಕರ್ ಹಗರಣವನ್ನು ಸೃಷ್ಠಿಸಿ ಆಪ್ ಪಕ್ಷದ ಮುಖ್ಯಮಂತ್ರಿ ಅರವಿಂದ್ ಕೇಜ್ರೀವಾಲ್‌ರವರನ್ನು ಜೈಲಿಗಟ್ಟಲಾಯಿತು. ಜೂನ್ 26ರಂದು ಅವರಿಗೆ ಇ.ಡಿ. ಕೇಸಿನಿಂದ ಜಾಮೀನು ದೊರೆತ ತಕ್ಷಣ ಸಿ.ಬಿ.ಐ.ಯಿಂದ ಮತ್ತೆ ಬಂಧಿಸಲಾಯಿತು. ಮನೀಷ್ ಸಿಸೋಡಿಯಾರನ್ನು 17 ತಿಂಗಳು ಜೈಲಿನಲ್ಲಿ ಕೊಳೆಸಲಾಯಿತು. ಕಟ್ಟಕಡೆಗೆ ಕೇಜ್ರೀವಾಲರಿಗೆ ಜಾಮೀನು ನೀಡಿದ ಸು.ಕೋರ್ಟ್ ಇ.ಡಿ. ಮತ್ತು ಸಿ.ಬಿ.ಐ.ಗಳನ್ನು ಪಂಜರದ ಗಿಣಿಗಳೆಂದು ಕರೆದದ್ದು ಇಡೀ ಪ್ರಕರಣ ಹೇಗೆ ರಾಜಕೀಯ ಪ್ರೇರಿತವಾಗಿದೆ ಎಂಬುದಕ್ಕೆ ಸು.ಕೋರ್ಟ್ ಹಿಡಿದ ಕೈಗನ್ನಡಿಯಾಗಿದೆ.

 ಜಾರ್ಖಂಡ್ ರಾಜ್ಯದಲ್ಲಿ ಕಾಂಗ್ರೆಸ್ ಮುಖ್ಯಮಂತ್ರಿ ಹೇಮಂತ್ ಸೊರೇನ್‌ರನ್ನು ರಾಂಚಿ ನಗರದ ತುಂಡು ಭೂಮಿಯ ಪ್ರಕರಣದಲ್ಲಿ ಸಿಲುಕಿಸಿ ಜೈಲಿಗೆ ಕಳುಹಿಸಲಾಯಿತು, ತಮಿಳುನಾಡಿನ ಸಚಿವ ಸೆಂತಿಲ್ ಬಾಲಾಜಿಯವರನ್ನು ಜೈಲಿಗೆ ಹಾಕಲಾಯಿತು, ಕೇರಳದ ರಾಜ್ಯಪಾಲರು  ಅಲ್ಲಿನ ಕಮ್ಯುನಿಸ್ಟ್ ಸರಕಾರಕ್ಕೆ , ಮಹರಾಷ್ಟ್ರದ ಮಹಾ ಅಗಾಡಿ ಸರ್ಕಾರವನ್ನು ಆಪರೇಷನ್  ಮಾಡಿ ಮುಗಿಸಿತು. ಬಿಹಾರದಲ್ಲಿ ನಿತೀಶ್‌ಕುಮಾರ್‌ರವರನ್ನೇ ನುಂಗಲಾಯಿತು, ಪ.ಬಂಗಾಳದ ರಾಜ್ಯಪಾಲರು ತೃಣಮೂಲ ಕಾಂಗ್ರೆಸ್ ಸರಕಾರಕ್ಕೆ ಪ್ರತಿದಿನ ಕಿರುಕುಳ ಕೊಟ್ಟು ಸುಪ್ರೀಂ ಕೋರ್ಟ್‌ನಿಂದ ಛೀಮಾರಿ ಹಾಕಿಸಿಕೊಂಡಿದ್ದಾರೆ. ಹೀಗೆ ಎಲ್ಲೆಲ್ಲಾ ವಿಪಕ್ಷಗಳ ಸರಕಾರಗಳಿವೆಯೋ ಅಲ್ಲಿನ ಸರಕಾರಗಳನ್ನು ಅಸ್ಥಿರಗೊಳಿಸುವುದು ಕೇಂದ್ರದ ನರೇಂದ್ರ ಮೋದಿ ಸರಕಾರದ ಪ್ರಥಮ ಆದ್ಯತೆಯಾಗಿದೆ. ದೇಶದ ಎಲ್ಲಾ ಕಡೆಯಲ್ಲೂ ವಿಪಕ್ಷಗಳ ಸರಕಾರಗಳನ್ನು ಅಸ್ಥಿರಗೊಳಿಸಿದ ನಂತರ ಇದೀಗ ಕೇಂದ್ರದ ಮೋದಿ ನೇತೃತ್ವದ ಸರಕಾರ ಇದೀಗ ಕರ್ನಾಟಕದ ಸಿದ್ಧರಾಮಯ್ಯನವರನ್ನು ಹಗರಣವೇ ಅಲ್ಲದ ಕ್ಷುಲ್ಲಕ ಮುಡಾ ಹಗರಣದಲ್ಲಿ ಸಿಲುಕಿಸಲು ವಿಫಲ ಯತ್ನ ನಡೆಸುತ್ತಿದೆ.

6 ತಿಂಗಳಲ್ಲಿ ಸರ್ಕಾರ ಪತನ:

ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಹಿನ್ನಡೆ ಅನುಭವಿಸಿದ ಬಿಜೆಪಿ ಅಧಿಕಾರದ ದಾಹದಿಂದ ಕೊತಕೊತ ಕುದಿಯುತ್ತಿದೆ. ಆಪರೇಷನ್ ಕಮಲಕ್ಕೂ ವಿಫಲ ಪ್ರಯತ್ನ ನಡೆಸಲಾಯಿತು. ಕಳೆದ ಲೋಕಸಭಾ ಚುನಾವಣಾ ಸಂದರ್ಭದಲ್ಲಿ ಮುಂದಿನ 6 ತಿಂಗಳಲ್ಲಿ ಸಿದ್ದರಾಮಯ್ಯ ಸರ್ಕಾರವನ್ನು ಉರುಳಿಸುತ್ತೇವೆ ಎಂದು ಬಿಜೆಪಿ ನಾಯಕರು ಘಂಟಾಘೋಷವಾಗಿ ಹೇಳುತ್ತಿದ್ದರು. ಅಂದಿನಿಂದಲೇ ಸಿದ್ಧರಾಮಯ್ಯನವರ ಪತನಕ್ಕಾಗಿ ಷಢ್ಯಂತ್ರ ರೂಪಿಸಿದ್ದಾರೆ. ಈಗ ಒಂದೊಂದೇ ನಾಟಕ ಮಾಡುತ್ತಿದ್ದಾರೆ.

ಕರ್ನಾಟಕದ ಈ ವಿದ್ಯಾಮಾನ ದೇಶದ ಇತರ ರಾಜ್ಯಗಳ ವಿದ್ಯಾಮಾನಕ್ಕಿಂತ ಭಿನ್ನವೇನಲ್ಲ, ವಿಪಕ್ಷಗಳ ಸರಕಾರಗಳನ್ನು ಮುಗಿಸಿ ಪ್ರಜಾಸತ್ತೆಯನ್ನು ಕುಸಿಯುವಂತೆ ಮಾಡುವುದೇ ಮೋದಿ -ಶಾ ಜೋಡಿಯ ಉದ್ದೇಶ. ದೇಶದ ಎಲ್ಲ ಕಡೆ ಮಾಡಿದಂತೆ ಇಲ್ಲೂ ರಾಜ್ಯಪಾಲರನ್ನು ದುರುಪಯೋಗ ಪಡಿಸಿ ಜನ ಬೆಂಬಲದೊಂದಿಗೆ ಅಧಿಕಾರಕ್ಕೆ ಬಂದ ಸಿದ್ಧರಾಮಯ್ಯನವರನ್ನು ಅಧಿಕಾರದಿಂದ ಇಳಿಸುವುದೇ ಈ ಷಢ್ಯಂತ್ರದ ಉದ್ದೇಶವಾದುದರಿಂದ , ಬಿಜೆಪಿಯ ಈ ಕುತಂತ್ರವನ್ನು ವಿಫಲಗೊಳಿಸಲೇಬೇಕಾಗಿರುವುದು ರಾಜ್ಯದ, ದೇಶದ ಮತ್ತು ಪ್ರಜಾಪ್ರಭುತ್ವದ ಹಿತದೃಷ್ಠಿಯಿಂದ ಅನಿವಾರ್ಯವಾದುದರಿಂದ ಮುಡಾ ಹಗರಣದ ತನಿಖೆ ಹೆದರುವ ಪ್ರಶ್ನೆಯೂ ಇಲ್ಲ, ಮುಖ್ಯಮಂತ್ರಿಗಳು ರಾಜಿನಾಮೆ ನೀಡುವ ಪ್ರಶ್ನೆಯೂ ಇಲ್ಲ.

ಪ್ರಜಾಪ್ರಭುತ್ವದ ಉಳಿವಿಗಾಗಿ ರಾಜಿನಾಮೆಗೆ ನಕಾರ: ಶತಾಯ ಗತಾಯ ರಾಜ್ಯದ ಜನಮೆಚ್ಚಿದ ಮುಖ್ಯಮಂತ್ರಿಗಳ ಮುಖಕ್ಕೆ ಮಸಿ ಬಳಿದು, ಅವರನ್ನು ಅಧಿಕಾರದಿಂದ ಇಳಿಸಿ, ಗ್ಯಾರಂಟಿ ಯೋಜನೆಗಳು ನಿಲ್ಲುವಂತೆ ಮಾಡಿ, ಸಿದ್ಧರಾಮಯ್ಯನವರನ್ನು ಜೈಲಿಗಟ್ಟಿ ಕಾಂಗ್ರೆಸ್ ಸರಕಾರವನ್ನು ಅಸ್ಥಿರಗೊಳಿಸುವ ಏಕ ಮಾತ್ರ ಉದ್ದೇಶದಿಂದಲೇ ಈ ಪ್ರಕರಣ ಸೃಷ್ಠಿಸಲಾಗಿದೆ. ಇದೇ ಉದ್ದೇಶಕ್ಕಾಗಿ ಪೂರ್ವಭಾವಿ ರಂಗ ನಿರ್ಮಾಣಕ್ಕಾಗಿ ಬಿಜೆಪಿ ಪಾದಯಾತ್ರೆ ನಡೆಸಿ, ತರಾತುರಿಯಲ್ಲಿ ರಾಜ್ಯಪಾಲರಿಂದ ಅನುಮತಿ ಕೊಡಿಸಿ ಈಗ ಪ್ರಕರಣವನ್ನು ಸಿಬಿಐಗೆ ಒಪ್ಪಿಸಿ, ರಾಜೀನಾಮೆ ಕೊಡಿ, ಪ್ರಕರಣ ಸಿಬಿಐಗೆ ಒಪ್ಪಿಸಿ ಎಂದು ಬೀದಿ ರಂಪ ಮಾಡುತ್ತಿದ್ದಾರೆ. ಪ್ರಕರಣ ಸಿಬಿಐಗೆ ಹೋದರೆ ಕೇಜ್ರೀವಾಲ್‌ರನ್ನು ಜೈಲಿಗಟ್ಟಿದಂತೆ ಸಿದ್ಧರಾಮಯ್ಯನವರನ್ನೂ ಜೈಲಿಗಟ್ಟಬಹುದೆಂಬ ದುರಾಲೋಚನೆಯಿಂದ ಇದನ್ನು ಮಾಡುತ್ತಿದ್ದಾರೆ. ಈ ಎಲ್ಲಾ ಕಾರಣಗಳಿಂದ ಈ ಪ್ರಕರಣದಲ್ಲಿ ತನಿಖೆಗೆ ಹೆದರುವ ಪ್ರಶ್ನೆಯೂ ಇಲ್ಲ, ರಾಜಿನಾಮೆ ನೀಡುವ ಅಗತ್ಯವೂ ಇಲ್ಲ. ದೇಶದ ಪ್ರಜಾಪ್ರಭುತ್ವವನ್ನು ಕಾಪಾಡಬೇಕಾಗಿದ್ದರೆ ಬಿಜೆಪಿಯ ಈ ಷಢ್ಯಂತ್ರಕ್ಕೆ ಸೆಡ್ಡು ಹೊಡೆದು , ರಾಜೀನಾಮೆ ನೀಡದೆ, ಸಿದ್ಧರಾಮಯ್ಯ ಅಧಿಕಾರದಲ್ಲಿ ಉಳಿಯಬೇಕಾಗಿರುವುದು ಇಂದಿನ ಕಾಲದ ಅನಿವಾರ್ಯತೆಯಾಗಿದೆ ಎಂದರು

ಕಾಂಗ್ರೆಸ್‌ ಮುಖಂಡರಾದ  ಮೌನೀಸ್ ಮಸ್ಕರೇನಿಯಸ್,  ಹರೀಶ್ ಕೊಟ್ಯಾನ್  ಮಹಾಲಿಂಗ ನಾಯ್ಕ ಮತ್ತು ರಿಯಾಝ್ ಪರ್ಲಡ್ಕ ಪತ್ರಿಕಾಗೋಷ್ಟಿಯಲ್ಲಿ ಉಪಸ್ಥಿತರಿದ್ದರು.