ರೋಚಕ ತನಿಖೆ :

 ಶೆಟ್ಟಿಯ ಹತ್ಯೆಯ ಬಳಿಕ ಈ ಪ್ರಕರಣ ಸೃಷ್ಟಿಸಿದ ಕೌತುಕ , ಪಡೆದ ತಿರುವುಗಳು, ತನಿಖೆ ಉಂಟು ಮಾಡಿದ ರೋಚಕತೆ, ಸಾರ್ವಜನಿಕ ವಲಯದಲ್ಲಿ ಹರಡುತ್ತಿದ್ದ ತರಹವೇರಿ ವದಂತಿಗಳು ಹತ್ಯೆಯಿಂದ ಮೊದಲುಗೊಂಡು ಆರೋಪಿ ಪತ್ತೆಯಾಗುವವರಿಗಿನ ನಿಗೂಢತೆಗಳು ನಿಜಕ್ಕೂ ಸಸ್ಪೆನ್ಸ್‌ ಸಿನಿಮಾಕ್ಕಿಂತ ಕಮ್ಮಿಯಿರಲಿಲ್ಲ.

ಕೊಲೆಯಾದ ವ್ಯಕ್ತಿಯೂ ಕ್ರಿಮಿನಲ್‌ ಹಿನ್ನಲೆಯವರೆ ಆಗಿದಿದ್ದು ಪ್ರಕರಣ ಭೇದಿಸಲು ಪೊಲೀಸರು ಹರ ಸಾಹಸ ಪಡುವಂತೆ ಮಾಡಿತ್ತು. ಪುತ್ತೂರಿನಲ್ಲಿ ನಡೆದಿದ್ದ ಗೋಪಿ ಮರ್ಡರ್‌ ಕೇಸಿನಲ್ಲಿ ಹತ್ಯೆಯಾದ ವಿಶ್ವನಾಥ ರೈಯೂ  ಜೈಲಿಗೆ ಹೋಗಿ ಬಂದಿದ್ದದ್ದು, ಅಲ್ಲದೆ ಕೋಡಿಬಾಂಡಿ ಮೂಲದ ಅಂದಿನ ಜಿ.ಪಂ ಅಧ್ಯಕ್ಷರಿಗೆ ಹಲ್ಲೆನಡೆಸಿದ ಆರೋಪಗಳು ಅವರ ಮೇಲಿದ್ದವು.   ಅಲ್ಲದೇ ಅವರು ಮಾಡುತ್ತಿದ್ದ ವ್ಯವಹಾರವೂ ಪ್ರಕರಣವನ್ನು ನಿಗೂಢತೆಗೆ ತಳ್ಳಿತ್ತು.  ಅವರಿಂದ ಫೈನಾನ್ಸ್‌ ನಲ್ಲಿ ಮೀಟರ್‌ ಬಡ್ಡಿಗೆ ಹಣ ಪಡೆದಿದ್ದ ಹಲವರು ಅವರಿಂದ ನೋವು ಅನುಭವಿಸಿದ್ದು, ಸಾಲ ಮರು ಪಾವತಿ ಮಾಡದವರ ಕರಿಮಣಿಯನ್ನು ಬಿಡದೆ ಕಿತ್ತುಕೊಂಡು ಹೋಗುತ್ತಿದ್ದರು ಎಂಬ ಆರೋಪಗಳು ಅವರ ಮೇಲಿದ್ದದ್ದು ಕೂಡ ಪ್ರಕರಣವನ್ನು ಜಟಿಲವಾಗಿಸಿತ್ತು.  

250 ಕಿಮೀ ದೂರದಲ್ಲಿ ಶವ ಪತ್ತೆ…!

ಇಬ್ಬರು ವಿಶ್ವನಾಥರನ್ನು ಯಾರೋ ಅಪಹರಿಸಿದ್ದರೇ, ಇಬ್ಬರು ಪರಾರಿಯಾಗಿದ್ದಾರೆ ಹೀಗೆ ಥರಹವೇರಿ ಅನುಮಾನಗಳು ಉಪ್ಪಿನಂಗಡಿ ಅಸುಪಾಸಿನಲ್ಲಿ ಕೇಳಿ ಬಂದಿತ್ತು . ಇದೇ ವೇಳೆ ಜೂ .11 ರಂದು ಉಪ್ಪಿನಂಗಡಿಯಿಂದ 250 ಕಿ.ಮೀ ದೂರದ  ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲೂಕಿನ ಗೇರುಸೊಪ್ಪಾ ಸಮೀಪದ ಮೂಡ್ಕಾಣಿ ಎಂಬಲ್ಲಿ ಸುಮಾರು 20 ಅಡಿ ಆಳದ ಪ್ರಪಾತದಲ್ಲಿ ಮೃತದೇಹವೊಂದು ಪತ್ತೆಯಾಗಿತ್ತು .ಇದನ್ನು ನೋಡಿ ಸ್ಥಳೀಯರು ಅಲ್ಲಿನ ಪೊಲೀಸರಿಗೆ ತಿಳಿಸಿದ್ದು ಅವರು ಶವವನ್ನು ಪರಿಶೀಲಿಸಿದಾಗ ಶಅದರ ಅಂಗಿಯಲ್ಲಿ ಪುತ್ತೂರು ಸಿಂಧು ಟೈಲರ್ ಎಂಬ ಸ್ಟಿಕ್ಕರ್‌ ಪತ್ತೆಯಾಗಿತ್ತು . ಹೀಗಾಗಿ ಶವದ ಗುರುತು ಪತ್ತೆಗೆ ಅವರು ಪುತ್ತೂರು ಪೊಲೀಸರ ನೆರವು ಪಡೆದಿದ್ದರು. ಪೊಲೀಸರು ಟೈಲರನ್ನು ಕರೆದೊಯ್ದು ಪರಿಶೀಲಿಸಿದಾಗ ಶವ ಸೂತ್ರಬೆಟ್ಟು ವಿಶ್ವನಾಥ ರೈ ಅವರದ್ದೆಂಬುದು ಖಚಿತವಾಗಿತ್ತು. ಆ ಮೂಲಕ ಕಣ್ಮರೆಯಾದ ವಿಶ್ವನಾಥ ರೈ ಹತ್ಯೆಯಾಗಿದ್ದಾರೆ ಎನ್ನುವುದು ಖಚಿತವಾಗಿತ್ತು.  ಆದರೇ ಇನ್ನೊಬ್ಬ ವಿಶ್ವನಾಥ್‌ ಪತ್ತೆಯಾಗದೇ ಆತನೂ ಕೊಲೆಯಾಗಿರಬಹುದೇ ಎಂಬ ಅನುಮಾನ ಜನಮಾನಸದಲ್ಲಿ ಸೃಷ್ಟಿಯಾಗಿತ್ತು.

ಅನಾಥ ಸ್ಥಿತಿಯಲ್ಲಿದ ರಕ್ತದ ಕಲೆಗಳುಳ್ಳ ಕಾರು :

ಇದೆ ವೇಳೆ ಮಂಗಳೂರಿನ ಕದ್ರಿ ಪಾರ್ಕ್‌ ಬಳಿ ಅನಾಥ ಸ್ಥಿತಿಯಲ್ಲಿ ಮಾರುತಿ ಝೆನ್‌ ಕಾರು ಹಲವು ದಿನಗಳಿಂದ ಪಾರ್ಕ್‌ ಮಾಡಿರುವುದನ್ನು ಸ್ಥಳೀಯರು ಪೊಲೀಸರ ಗಮನ ಸೆಳೆದರು . ಆ ಕಾರನ್ನು ಬಂದು ಪರೀಶೀಲನೆ ನಡೆದ ಪೊಲೀಸರಿಗೆ ಕಾರಿನಲ್ಲಿ ರಕ್ತದ ಕಲೆಗಳು ಪತ್ತೆಯಾಗಿದ್ದವು. ಹೀಗಾಗಿ ಕಾರಿನ ಮಾಲಕನ ಬೆನ್ನು ಹತ್ತಿ ಹೋದ ಪೊಲೀಸರಿಗೆ ಅದರ ನಿಜವಾದ  ಬಳಕೆದಾರ ಪರಾರಿಯಾಗಿರುವ ಕೋಡಿಂಬಾಡಿಯ ವಿಶ್ವನಾಥ ರೈ ಎಂದು ತಿಳಿದು ಬಂದಿತ್ತು.

ಸ್ಫೋಟಕ ತಿರುವು :

ಇಷ್ಟೆಲ್ಲಾ ಆಗುವಾಗ ಪ್ರಕರಣ ಮತ್ತೊಂದು ತಿರುವು ಪಡೆಯಿತು. ಕೊಲೆಯ ಪ್ರತ್ಯಕ್ಷದರ್ಶಿ ಸುಭಾಷ್‌ ಚಂದ್ರ ಗೌಡ ರಿಗೆ ಕಾರು ಮತ್ತು ಶವ ಸಿಕ್ಕಿದ್ದು ತಿಳಿಯುತ್ತಲೇ ಬೆಳ್ತಂಗಡಿಯ ವಕೀಲರೊಬ್ಬರಲ್ಲಿ ಘಟನೆಯ ವಿಷಯ ತಿಳಿಸಿದ್ದು, ಅವರ ಸಲಹೆಯಂತೆ ಜೂ  7 ರಂದು ರಾತ್ರಿ ನಡೆದ ಎಲ್ಲ ಘಟನೆಯನ್ನು ಪ್ರಕರಣದ ತನಿಖಾಧಿಕಾರಿಗೆ ತಿಳಿಸಿದರು.  ಈ ಮೂಲಕ  ವಿಶ್ವನಾಥ ರೈ ಯನ್ನು ಅವರ ಪರಮಾಪ್ತನಾಗಿದ್ದ ವಿಶ್ವನಾಥ ಶೆಟ್ಟಿಯೂ ಹತ್ಯೆ ಮಾಡಿ ಶವವನ್ನು ಹೊನ್ನಾವರದಲ್ಲಿ ಬೀಸಾಡಿ ವಾಪಸ್ಸು ಮಂಗಳೂರಿಗೆ ಬಂದು ಕದ್ರಿ ಪಾರ್ಕ್‌ ಬಳಿ ಕಾರಿಟ್ಟು ಪರಾರಿಯಾಗಿದ್ದಾನೆ ಎಂಬ ಅಂಶವು ಬಯಲಾಯಿತು. ಕೊಲೆಗೆ ಸಹಕರಿಸಿದ ಆರೋಪದಲ್ಲಿ ಬಂಧಿಸಲ್ಪಟ್ಟ ಸುಭಾಷ್‌ ಹಲವು ದಿನಗಳ ಬಳಿಕ ಜಾಮೀನಿನ ಮೇಲೆ ಬಿಡುಗಡೆ ಹೊಂದಿದ್ದರು

ಬಳಿಕ ನಡೆದದ್ದು ಆರೋಪಿಯ ಪತ್ತೆಗಾಗಿ ನಡೆದ ಕಾರ್ಯಚರಣೆ :

ಮಂಗಳೂರಿನಲ್ಲಿ ಕಾರು ಪತ್ತೆಯಾದ ಹಿನ್ನಲೆಯಲ್ಲಿ ವಿಶ್ವನಾಥ ಶೆಟ್ಟಿ ವಿದೇಶಕ್ಕೆ ಅದರಲ್ಲೂ ವಿಶೇಷವಾಗಿ ಕರಾವಳಿ ಬಹುತೇಕರು ಹೋಗುವ ಗಲ್ಫ್‌ ದೇಶಕ್ಕೆ ವಿಶ್ವನಾಥ ಶೆಟ್ಟಿ ಪರಾರಿಯಾಗಿದ್ದಾನೆ ಎಂಬ ವದಂತಿಗಳು ಹಬ್ಬಿತ್ತು. ಪೊಲೀಸರು ಹಲವು ತಿಂಗಳುಗಳ ಕಾಲ ವಿಶ್ವನಾಥ ಶೆಟ್ಟಿಯ ಆಪ್ತ ಬಳಗದಲ್ಲಿ ತಡಕಾಡಿದರು ಆರೋಪಿ ಪತ್ತೆಯಾಗಲೇ ಇಲ್ಲ. ಹೀಗೆ ಈ ಪ್ರಕರಣ ನಿಧಾನಕ್ಕೆ ಹಳ್ಳ ಹಿಡಿಯಲು ಆರಂಭಿಸಿತ್ತು. ಜನರ ಮನಸ್ಸಿನ ಪರದೆಯಿಂದಲೂ ಮೆಲ್ಲಮೆಲ್ಲನೆ ಮರೆಯಾಗಲು ಶುರುವಾಯಿತು.

ಹತ್ಯೆ ನಡೆದ ಬರೋಬ್ಬರಿ 13 ವರ್ಷಗಳ ಬಳಿಕ  , 2014ರ ಆಗಸ್ಟ್ 11ರಂದು ಆರೋಪಿ ವಿಶ್ಚನಾಥ ಶೆಟ್ಟಿಯನ್ನು ತಮಿಳುನಾಡಿನಲ್ಲಿ ಪೊಲೀಸರು ಬಂಧಿಸಿದ್ದಾರೆ ಎನ್ನುವ ವಿಚಾರ ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಲೇ ಜನರ ನೆನಪಿನ ಪುಟಗಳು ಮತ್ತೆ ತೆರೆಯಲು ಆರಂಭಿಸಿತ್ತು.

ಸಿನಿಮೀಯ ಶೈಲಿಯಲ್ಲಿ ಅಡಗಿ ಸಹಜ ಜೀವನ ನಡೆಸುತ್ತಿದ್ದ ಆರೋಪಿ :

ಹತ್ಯೆ ಮಾಡಿ ತಮಿಳುನಾಡಿಗೆ ಪರಾರಿಯಾಗಿದ್ದ ಪಂಚಮಿ ವಿಶ್ವ ಅಲ್ಲಿ ರಾಜ್‌ ಎಂದು ಹೆಸರು ಬದಲಾಯಿಸಿಕೊಂಡು ಆಸ್ಪತ್ರೆಯೊಂದರ ಅಂಬ್ಯುಲೆನ್ಸ್‌ ಚಾಲಕನಾಗಿ ಕೆಲಸಕ್ಕೆ ಸೇರಿಕೊಂಡಿದ್ದ. ಬಳಿಕ ಆ ಅಸ್ಪತ್ರೆಯಲ್ಲಿ ಪರಿಚಿತರಾದ ವೈದ್ಯರೊಬ್ಬರ ಸತ್ಯ ಮಂಗಲ ಸಮೀಪದ ಕಡಂಬೂರು ಎಂಬಲ್ಲಿದ್ದ ತೋಟವನ್ನು  ನೋಡಿಕೊಳ್ಳುವ  ರೈಟರ್‌ ಆಗಿ ಸುಮಾರು 8 ವರ್ಷ ಕೆಲಸ ಮಾಡಿಕೊಂಡಿದ್ದ.

ಇದಾದ ಬಳಿಕ ಆತ ಕಡಂಬೂರು ನಲ್ಲಿ ʼರಾಜ್‌ ಪೈನಾನ್ಸ್‌ ಚಿಟ್‌ ಫಂಡ್‌ʼ ಅನ್ನು ಆರಂಭಿಸಿ ವ್ಯವಹಾರ ನಡೆಸುತ್ತಿದ್ದ. ಈ ವೇಳೆ ಅಲ್ಲಿಯ ಯಾರಿಗೂ ಈತನ ಬಗ್ಗೆ ಸಂಶಯಗೊಂಡು ಮಾಹಿತಿ ನೀಡಿದ್ದು , ಹೀಗಾಗಿ ಈತನ ಚಲನವಲನದ ಬಗ್ಗೆ ಕಣ್ಣಿಟ್ಟ ತಮಿಳುನಾಡು ಪೊಲೀಸರಿಗೆ ಈತನಿಗೆ ಪುತ್ತೂರಿನ ಲಿಂಕ್‌ ಇರುವುದು ಪತ್ತೆಯಾಗಿದೆ. ಈ ಹಿನ್ನಲೆಯಲ್ಲಿ ಅವರು .ದ.ಕ. ಪೊಲೀಸರಿಗೆ ಮಾಹಿತಿ ನೀಡಿದ್ದರು.

ದ.ಕ. ಅಪರಾಧ ಪತ್ತೆದಳದ ಪೊಲೀಸರು ಹಾಗೂ ತಮಿಳುನಾಡು ಪೊಲೀಸರು ನಡೆಸಿದ  ಜಂಟಿ ತನಿಖೆಯ ವೇಳೆ ಈತ ಉಪ್ಪಿನಂಗಡಿ ಪೊಲೀಸರಿಗೆ ಬೇಕಾಗಿರುವ (ವಾಂಟೆಡ್‌ ಕ್ರಿಮಿನಲ್) ವಿಶ್ವನಾಥ ರೈ ಮರ್ಡರ್‌ ನ ಪ್ರಮುಖ ಆರೋಪಿ ಎಂಬುದು ಪತ್ತೆಯಾಗಿತ್ತು. ಈ ಹಿನ್ನಲೆಯಲ್ಲಿ ಆತನನ್ನು ಬಂಧಿಸಿ ಪುತ್ತೂರು ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಯಿತು. ಈ ವೇಳೆ ಪ್ರಕರಣದ ಇತರ ತನಿಖೆ ಮಹಜರು ಕಾರ್ಯ ಪೂರ್ಣಗೊಳಿಸಿ ನ್ಯಾಯಾಲಯಕ್ಕೆ ದೋಷರೋಪಣ ಪಟ್ಟಿಯನ್ನು ಸಲ್ಲಿಸಿದ್ದರು.

ಮಾಫಿ ಸಾಕ್ಷಿ

ಈ ವೇಳೆ ಕೊಲೆಯ ರಾತ್ರಿ ಆ ಕೃತ್ಯದ ಪ್ರತ್ಯಕ್ಷದರ್ಶಿಯಾಗಿದ್ದ ಸುಭಾಷ್‌ ಮಾಫಿ ಸಾಕ್ಷಿಯಾಗಿ ಬದಲಾಗಿದ್ದರು. ಅಲ್ಲದೇ ನ್ಯಾಯಲಯದಲ್ಲಿ ಆರೋಪಿ ವಿರುದ್ದ ಪ್ರಭಲ ಸಾಕ್ಷಿ ನುಡಿದಿದ್ದರು. ಇದು ಆರೋಪಿಗೆ ಶಿಕ್ಷೆ ಕೊಡಿಸುವಲ್ಲಿ ಪ್ರಧಾನ ಪಾತ್ರವಹಿಸಿತ್ತು. ಉಳಿದ ಸಾಂಧರ್ಬಿಕ ಸಾಕ್ಷ್ಯಗಳು ಆರೋಪಿಗೆ ಶಿಕ್ಷೆಯನ್ನು ನಿಗದಿಗೊಳಿಸಿತು.

ಡಿ .13 ರಂದು ಪ್ರಕರಣದ ವಿಚಾರಣೆ ಮುಕ್ತಾಯಗೊಳಿಸಿದ ಪುತ್ತೂರಿನ ನ್ಯಾಯಲಯವು ಆರೋಪಿಯನ್ನು ತಪಿತಸ್ಥ ಎಂದು ಘೋಷಿಸಿತ್ತು. ಡಿ.15 ರಂದು ಸಂಜೆ ಆಪರಾಧಿ ಅನುಭವಿಸಬೇಕಾದ ಶಿಕ್ಷೆಯ ಸ್ವರೂಪವನ್ನು ಘೋಷಿಸಿತ್ತು. ಪ್ರವೀಣ್‌ ಕುಮಾರ್‌ ಪ್ರಾಷಿಕ್ಯೂಷನ್‌ ಪರವಾಗಿ ವಾದಿಸಿದರು.