ಬಿಜೆಪಿಯಿಂದ ಅನ್ಯಾಯವಾಗಿದೆ ಎಂದು ಫಲಾನುಭವಿಗಳ ಆರೋಪ

ಹಕ್ಕುಪತ್ರ ಸ್ವೀಕರಿಸಿದ ಫಲಾನುಭವಿ ವಿಜಯಭಟ್ ಮಾತನಾಡಿ, “ನಾವು ಇಷ್ಟು ವರ್ಷ ಬಿಜೆಪಿಯವರನ್ನು ನಂಬಿದ್ದೆವು. ಹಕ್ಕುಪತ್ರ ಕೊಡಿಸುವುದಾಗಿ ಹೇಳಿ 18 ವರ್ಷಗಳಿಂದ ಅಲೆದಾಡಿಸಿದ್ದಾರೆ. ಬಿಜೆಪಿ ಕಚೇರಿಗೆ ಹಲವು ಬಾರಿ ತೆರಳಿದರೂ ಯಾವುದೇ ಪ್ರಯೋಜನವಾಗಿರಲಿಲ್ಲ. ನಾಳೆ, ನಾಡಿದ್ದು ಎಂದು ಹೇಳುತ್ತಲೇ ಕಾಲಹರಣ ಮಾಡಿದರು. ಇತ್ತೀಚೆಗೆ ಗ್ರಾಮಕ್ಕೆ ಬಂದ ಶಾಸಕ ಅಶೋಕ್ ರೈ ಅವರಿಗೆ ಸಮಸ್ಯೆ ತಿಳಿಸಿದ್ದೆವು. ಒಂದೂವರೆ ತಿಂಗಳಲ್ಲೇ ಅವರು ಹಕ್ಕುಪತ್ರ ಕೊಡಿಸಿದ್ದಾರೆ. ಇನ್ನು ಮುಂದೆ ಬಿಜೆಪಿಯವರ ಹಿಂದೆ ಹೋಗುವುದಿಲ್ಲ” ಎಂದು ಆರೋಪಿಸಿದರು.

ಮತ್ತೊಬ್ಬ ಫಲಾನುಭವಿ ಸಂತೋಷ್ ಮಾತನಾಡಿ, “ಮನೆಯ ಅಡಿಸ್ಥಳಕ್ಕೆ ದಾಖಲೆಗಳಿಲ್ಲದೆ ಸಾಕಷ್ಟು ಕಷ್ಟ ಅನುಭವಿಸಿದ್ದೇವೆ. ಮಟಂದೂರು ಶಾಸಕರಾಗಿದ್ದಾಗಲೂ ಹಕ್ಕುಪತ್ರಕ್ಕಾಗಿ ಮನವಿ ಮಾಡಿದ್ದೆವು. ಹಕ್ಕುಪತ್ರವಿಲ್ಲದ ಕಾರಣ ಮನೆಗೆ ಸಾಲ ಪಡೆಯುವುದೂ ಕಷ್ಟವಾಗಿತ್ತು. ನಾವು ನಂಬಿದ್ದವರು ನೆರವಾಗಲಿಲ್ಲ. ಶಾಸಕ ಅಶೋಕ್ ರೈ ನಮಗೆ ನ್ಯಾಯ ಕೊಡಿಸಿದ್ದಾರೆ. ಇದು ನಮ್ಮ ಜೀವನದಲ್ಲಿ ಮರೆಯಲಾಗದ ದಿನ” ಎಂದು ಹೇಳಿದರು.

ಹಕ್ಕುಪತ್ರ ದೊರೆಯದಿದ್ದರಿಂದ ತಾವು ಅನುಭವಿಸಿದ ತೊಂದರೆಗಳನ್ನು ವಿವರಿಸಿದ ಫಲಾನುಭವಿಗಳು, ಶಾಸಕ ಅಶೋಕ್ ರೈ ಅವರ ಮಧ್ಯಪ್ರವೇಶದಿಂದ ಸಮಸ್ಯೆ ಪರಿಹಾರವಾಗಿದೆ ಎಂದು ಸಂತಸ ವ್ಯಕ್ತಪಡಿಸಿದರು.

‘ಬಡವರ ಸಂತೋಷವೇ ನನ್ನ ತೃಪ್ತಿ’

ಶಾಸಕ ಅಶೋಕ್ ರೈ ಮಾತನಾಡಿ, “ನಾನು ಪುಚ್ಚೆಗುತ್ತಿಗೆ ಭೇಟಿ ನೀಡಿದಾಗ ಈ ಕುಟುಂಬಗಳು ತಮ್ಮ ಸಮಸ್ಯೆಯನ್ನು ಹೇಳಿಕೊಂಡಿದ್ದವು. ಹಲವು ವರ್ಷಗಳಿಂದ ಮನೆ ಮಾಡಿಕೊಂಡು ವಾಸಿಸುತ್ತಿದ್ದರೂ, ಮನೆ ಅಡಿಸ್ಥಳಕ್ಕೆ ಹಕ್ಕುಪತ್ರ ದೊರೆತಿರಲಿಲ್ಲ. ತಕ್ಷಣವೇ ಬಂಟ್ವಾಳ ತಹಶೀಲ್ದಾರ್‌ಗೆ ಕರೆ ಮಾಡಿ ಹಕ್ಕುಪತ್ರ ಸಿದ್ಧಪಡಿಸುವಂತೆ ಸೂಚಿಸಿದ್ದೆ. ಇದೀಗ ಹಕ್ಕುಪತ್ರ ಸಿದ್ಧವಾಗಿದ್ದು, ಕುಟುಂಬಗಳಿಗೆ ವಿತರಿಸಿದ್ದೇನೆ” ಎಂದು ತಿಳಿಸಿದರು.

“ಈ ಕುಟುಂಬಗಳು ಬಡವರಾಗಿದ್ದು, ತಾವು ವಾಸಿಸುತ್ತಿರುವ ಮನೆಯ ಅಡಿಸ್ಥಳಕ್ಕೆ ಹಕ್ಕುಪತ್ರವನ್ನಷ್ಟೇ ಕೇಳಿದ್ದರು. ಅದನ್ನು ಕೊಡಿಸುವುದು ಜನಪ್ರತಿನಿಧಿಯಾಗಿ ನನ್ನ ಕರ್ತವ್ಯ. ಅದನ್ನೇ ಮಾಡಿದ್ದೇನೆ. ಈ ಹಿಂದೆ ಮತ ಪಡೆದವರು ತಮಗೆ ಮೋಸ ಮಾಡಿದ್ದಾರೆ ಎಂದು ಫಲಾನುಭವಿಗಳು ಹೇಳಿದ್ದಾರೆ. ಬಡವರ ಸಂತೋಷವೇ ನನ್ನ ತೃಪ್ತಿ” ಎಂದರು.