ಕರಾವಳಿಯಲ್ಲಿ ವಿದೇಶಿಗರು ಬರಲು ಬಲು ಮುಖ್ಯವಾಗಿ ದೇವಾಲಯಗಳು ಮತ್ತು ಪರಿಸರ ಪ್ರವಾಸೋದ್ಯಮ ಇದಕ್ಕೆ ಪ್ರಮುಖ ಕಾರಣ. ಈ ಮೊದಲು ಗೋವಾಕ್ಕೆ ಆದ್ಯತೆ ನೀಡಿದ್ದ ಪ್ರವಾಸಿಗರು ಅದನ್ನು ಬಿಟ್ಟು ದಕ್ಷಿಣ ಕನ್ನಡ, ಉಡುಪಿ, ಕೊಡಗು ಮತ್ತು ಕೇರಳ ಸೇರಿದಂತೆ ದಕ್ಷಿಣ ಭಾರತದ ಸ್ಥಳಗಳನ್ನು ಅನ್ವೇಷಿಸುತ್ತಿದ್ದಾರೆ ಎನ್ನುತ್ತಾರೆ ದಕ್ಷಿಣ ಕನ್ನಡ ಪ್ರವಾಸೋದ್ಯಮ ಇಲಾಖೆಯ ಉಪನಿರ್ದೇಶಕ ದಿಲೀಪ್‌ ಕುಮಾರ್‌.

ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು ಎರಡು ಪ್ರವಾಸಿ ತಾಣಗಳಿಗೆ ಹತ್ತಿರವಾಗಿರುವುದರಿಂದ ಹೆಚ್ಚಿನ ವಿದೇಶಿಯರು ಕೊಡಗು ಅಥವಾ ಕೇರಳಕ್ಕೆ ತೆರಳುವಾಗ ದಕ್ಷಿಣ ಕನ್ನಡದಲ್ಲಿಒಂದು ದಿನದ ನಿಂತು ಮುಂದೆ ಪ್ರಯಾಣ ಬೆಳೆಸುತ್ತಾರೆ. ಈ ಪ್ರದೇಶದ ಆಧ್ಯಾತ್ಮಿಕ ಆಕರ್ಷಣೆಯು ಅವರನ್ನು ಉಡುಪಿ ಜಿಲ್ಲೆಯ ದೇವಾಲಯಗಳು ಸೇರಿದಂತೆ ಇಲ್ಲಿನ ನಾನಾ ಪ್ರಾಚೀನ ದೇವಾಲಯಗಳಿಗೆ ಕರೆದೊಯ್ಯುತ್ತದೆ. ಇದರ ನಂತರ ಬೀಚ್‌ ಮತ್ತು ಸ್ಥಳೀಯ ದೃಶ್ಯ ವೀಕ್ಷಣೆಯ ತಾಣಗಳು ಬರುತ್ತವೆ ಎನ್ನುತ್ತಾರೆ ಹೋಟೆಲ್‌ ಉದ್ಯಮಿ ರವಿಕಿರಣ್‌ ಮಂಗಳೂರು.

ವಿದೇಶಿಯರು ಭೇಟಿನೀಡುವ ಸ್ಥಳಗಳು
ವಿದೇಶಿಯರು ಆಗಾಗ್ಗೆ ಭೇಟಿ ನೀಡುವ ಸ್ಥಳಗಳಲ್ಲಿ ಸುರತ್ಕಲ್‌, ಪಣಂಬೂರು, ಉಳ್ಳಾಲ, ಸೋಮೇಶ್ವರ, ಕಟೀಲು, ಮೂಡುಬಿದಿರೆ, ತಣ್ಣೀರುಬಾವಿ, ಪಿಲಿಕುಳ, ಸಸಿಹಿತ್ಲು ಬೀಚ್‌ ಮತ್ತು ಪಾಂಡೇಶ್ವರದಲ್ಲಿರುವ ಅಂಚೆ ಕಾರ್ಡ್‌ ಸಂಗ್ರಹಣಾ ಕೇಂದ್ರ, ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನ, ಧರ್ಮಸ್ಥಳ ಮತ್ತು ವೇಣೂರು ಸೇರಿವೆ.

ವಿದೇಶಿ ಪ್ರಯಾಣಿಕರ ಹೊರತಾಗಿ, ಕರಾವಳಿ ಜಿಲ್ಲೆಯಲ್ಲಿ ದೇಶೀಯ ಪ್ರವಾಸಿಗರ ಸಂಖ್ಯೆಯಲ್ಲೂ ಗಣನೀಯ ಏರಿಕೆ ಕಂಡು ಬಂದಿದೆ. 2023ರಲ್ಲಿ 32,852,907 ಮಂದಿ ಪ್ರವಾಸಿಗರು ದಕ್ಷಿಣ ಕನ್ನಡಕ್ಕೆ ಭೇಟಿ ನೀಡಿದ್ದಾರೆ ಎಂದು ಪ್ರವಾಸೋದ್ಯಮ ಇಲಾಖೆಯ ದತ್ತಾಂಶ ವರದಿ ಮಾಡಿದೆ.

ಇದು 2024ರಲ್ಲಿ 50,621,478ಕ್ಕೆ ಏರಿದೆ. ದೇವಾಲಯಗಳು ಮತ್ತು ಕಡಲತೀರಗಳಿಗೆ ಪ್ರವಾಸಿಗರು ಭೇಟಿ ನೀಡಲು ಬಯಸುತ್ತಾರೆ. ಇದರ ಜತೆಗೆ ಇತರ ದೇಶೀಯ ಪ್ರವಾಸಿಗರ ತಾಣಗಳಲ್ಲಿಎರ್ಮಾಯಿ, ದಿಡುಪೆ ಮತ್ತು ಇತರ ಜಲಪಾತಗಳನ್ನು ನೋಡಲು ಬಯಸುತ್ತಾರೆ ಎನ್ನುವುದು ಇಲಾಖೆ ನೀಡುವ ಮಾಹಿತಿ.