ಆಡಿಯೋ ವೈರಲ್

ಈ ಆಡಿಯೋವು ಬೆಳ್ತಂಗಡಿ ತಾಲೂಕಿನ ಬಂದಾರಿನ ಹಿಂದೂ ಸಂಘಟನೆಯ ಹಿರಿಯ ಕಾರ್ಯಕರ್ತರೊಬ್ಬರ ಹಾಗೂ ಭಾಸ್ಕರ ಧರ್ಮಸ್ಥಳರವರ ನಡುವಿನ ಫೋನ್ ಸಂಭಾಷಣೆಯದು ಎಂದು ಹೇಳಲಾಗುತ್ತಿದೆ. ಅದರಲ್ಲಿ ಕಾರ್ಯಕರ್ತರಿಬ್ಬರು ಭಾಸ್ಕರ ಧರ್ಮಸ್ಥಳರವರನ್ನು ಯುವಕನ ಪೂರ್ವಾಪರ ವಿಚಾರಿಸದೇ ವಿವಾಹಕ್ಕೆ ಸೂಚಿಸಿರುವುದಾಗಿ ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಂಡಿರುವುದು ಕಂಡು ಬಂದಿದೆ.ನಿಮ್ಮ ಮನೆ ಮಗಳಾಗಿದ್ದಾರೇ ನೀವು ಹೀಗೆ ಮಾಡುತ್ತಿದ್ದೀರಾ ? ಎಂದು ಖಾರವಾಗಿ ಪ್ರಶ್ನಿಸಲಾಗಿದೆ

ಅರ್ಚಕರನ್ನು ಪ್ರಶ್ನಿಸುತ್ತಿರುವ ವಿಡಿಯೋ ವೈರಲ್‌

ಇನ್ನೂ ಅರ್ಚಕರು ಹಣದ ಆಮೀಷಕ್ಕೆ ಒಳಗಾಗಿ ಈ  ವಿವಾಹ ಮಾಡಿಸಿದ್ದಾರೆ ಎಂಬ ಆರೋಪಗಳು ಕೇಳಿ ಬರುತ್ತಿವೆ. ಅರ್ಥಿಕ ಸಂಕಷ್ಟದಲ್ಲಿದ್ದ ಕಾರಣ ಹಣದ ಅವಶ್ಯಕತೆಯಿದುದರಿಂದ ವಿವಾಹ ಮಾಡಿಸಿದೆ ಎಂದು ಅರ್ಚಕರು ಕೆಲ ಹಿಂದೂ ಕಾರ್ಯಕರ್ತರಲ್ಲಿ ತಿಳಿಸಿರುವುದಾಗಿ ಹೇಳಲಾಗುತ್ತಿದೆ. ಈ ಬಗ್ಗೆ ಖಚಿತ ಮಾಹಿತಿ ದೊರೆತಿಲ್ಲ.  ನಿಖರ ನ್ಯೂಸ್ ಅರ್ಚಕರನ್ನು ಸಂಪರ್ಕಿಸಲು ಯತ್ನಿಸಿತ್ತಾದರೂ ಅವರು ಫೋನ್ ಗೆ ಲಭ್ಯರಾಗಿಲ್ಲ.  ಆರ್ಚಕರನ್ನು ಹಿಂದೂ ಸಂಘಟನೆಯ ಕಾರ್ಯಕರ್ತರು ಸುತ್ತುವರಿದು ಇದೇ ವಿಚಾರವಾಗಿ ಪ್ರಶ್ನಿಸುತ್ತಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಆ ವಿಡಿಯೋದಲ್ಲಿ ಅರ್ಚಕರು  ಭಾಸ್ಕರ ಧರ್ಮಸ್ಥಳ ಹಾಗೂ ಸಂದೀಪ್‌ ಹೆಸರನ್ನು ಉಲ್ಲೇಖಿಸಿದ್ದಾರೆ.

ಭಾಸ್ಕರ ಧರ್ಮಸ್ಥಳ ಏನೂ ಹೇಳುತ್ತಾರೆ ?

ಇನ್ನು ಈ ಬಗ್ಗೆ ನಿಖರ ನ್ಯೂಸಿಗೆ ಪ್ರತಿಕ್ರಿಯಿಸಿರುವ ಭಾಸ್ಕರ ಧರ್ಮಸ್ಥಳ “ ನನ್ನ ಸ್ನೇಹಿತ ಬಿಜೆಪಿಯಲ್ಲಿ ಗುರುತಿಸಿಕೊಂಡಿರುವ ಸಂದೀಪ್‌ ರೈ ಎಂಬವರ ಮೂಲಕ  ನನ್ನನ್ನು ಅವರು ಸಂಪರ್ಕಿಸಿದ್ದು, ಈ ರೀತಿಯ ವಿವಾಹ ಮಾಡಿಕೊಡುವವರು ಯಾರದರೂ ಇದ್ದಾರೆಯೇ ಎಂದು ಪ್ರಶ್ನಿಸಿದ್ದಾರೆ. ಅದು ಕೂಡ ನೇರವಾಗಿ ನನ್ನನ್ನು ಸಂಪರ್ಕಿಸಿಲ್ಲ. ಸಂದೀಪ್‌ ರೈ ಮೂಲಕ ಕೇಳಿಸಿದ್ದು . ಈ ವೇಳೆ ಅರ್ಚಕರ ಬಳಿ ಮಾತನಾಡಿಸಿ ಬಳಿಕ ಅರ್ಚಕರ ನಂಬರ್‌ ಕೊಡುತ್ತೇನೆ  ಎಂದು ಅವರಿಗೆ ತಿಳಿಸಿದ್ದೆ.

ಅದೇ ಪ್ರಕಾರ ನಾನು ಅರ್ಚಕರಲ್ಲಿ ವಿಷಯವನ್ನು ವಿಷದವಾಗಿ ತಿಳಿಸಿದ್ದೆ . ಹಿಂದೂ ಧರ್ಮಕ್ಕೆ ಕನ್ವರ್ಟ್‌ ಆದ ಮುಸ್ಲಿಂ ಯುವಕ ಹಿಂದೂ ಯುವತಿಯನ್ನು ಮದುವೆಯಾಗಲು ಇಚ್ಚಿಸಿದ್ದಾನೆ . ಅವರು ಅರ್ಯ ಸಮಾಜದಲ್ಲಿ ಮದುವೆ ಮಾಡಿಸಲು ಹೋಗಿದ್ದು, ನಿಯಮದ ಬದಲಾವಣೆಯಿಂದ  ಅಲ್ಲಿ ವಿವಾಹ ಮಾಡಿಸಲು ನಿರಾಕರಿಸಿದರಂತೆ. ಹಾಗಾಗಿ ಬೇರೆ ಎಲ್ಲಿಯಾದರೂ ಈ ರೀತಿಯ ವಿವಾಹ ಮಾಡಿಸುತ್ತಾರೋ ಎಂದು ಆ ಕುಟುಂಬ ಹುಡುಕುತ್ತಿದ್ದು , ವಧುವಿಗೆ ಎನೋ ಸಮಸ್ಯೆಯಾಗಿದ್ದು ಹಾಗಾಗಿ ತ್ವರಿತವಾಗಿ ಮದುವೆ ಮಾಡಿಸುವ ಹವಣಿಕೆಯಲ್ಲಿ ಅವರಿದ್ದರು ಎಂದು ತಿಳಿಸಿದ್ದರು .

ಹೀಗಾಗಿ ವಧುವಿನ ಕುಟುಂಬದವರು ನನ್ನನ್ನೂ ಸಂಪರ್ಕಿಸಿರುವ ವಿಚಾರವನ್ನು ದೇವಸ್ಥಾನದ ಅರ್ಚಕರಲ್ಲಿ ತಿಳಿಸಿದೆ.  ವರನು ಕಳೆದ ನಾಲ್ಕು ವರ್ಷದಿಂದ ಹಿಂದೂ ಧರ್ಮದಲ್ಲಿಯೇ ಇದ್ದಾನಂತೆ, ಅವನು ಅಷ್ಟು ವರ್ಷಗಳಿಂದ ಮಸೀದಿಗೆಲ್ಲ ಹೋಗುತ್ತಿಲ್ಲ ಎಂದು ವಧುವಿನ ಕಡೆಯವರು ತನಗೆ ತಿಳಿಸಿರುವುದನ್ನು ನಾನು ಅರ್ಚಕರ ಗಮನಕ್ಕೆ ತಂದು ಈಗ ಏನೂ ಮಾಡಬಹುದೆಂದು ನಾನು ಅವರಲ್ಲಿ ಪ್ರಶ್ನಿಸಿದ್ದಾಗಿ ಭಾಸ್ಕರ ಧರ್ಮಸ್ಥಳ ನಿಖರ ನ್ಯೂಸಿಗೆ ಸ್ಪಷ್ಟನೆ ನೀಡಿದರು.

ಆಗ ಅರ್ಚಕರು “ ಅದಕ್ಕೆ ಹಲವು ಕ್ರಮಗಳು ಇವೆ.  ಅವೆಲ್ಲವನ್ನೂ ಪೂರೈಸಿದ ಬಳಿಕವಷ್ಟೇ ನಾವು ಅವರನ್ನು ಒಳಕ್ಕೆ ಸ್ವೀಕರಿಸಬಹುದಾಗಿದೆ ಎಂದು ತಿಳಿಸಿದ್ದು ಅದಕ್ಕೆ ನಾನು ಅದು ನಿಮಗೆ ಮತ್ತು ಆ ಕುಟುಂಬಕ್ಕೆ ಸೇರಿದ್ದು , ನಾನು ನಿಮ್ಮ ಮೊಬೈಲ್‌ ಸಂಖ್ಯೆಯನ್ನು ಆ ಕುಟುಂಬದವರಿಗೆ ನೀಡುತ್ತೇನೆ ಎಂದು ಹೇಳಿ ಅರ್ಚಕರ  ಮೊಬೈಲ್‌ ಸಂಖ್ಯೆಯನ್ನು ಸಂದೀಪ್‌ ಮುಖಾಂತರ ಆ ಕುಟುಂಬಕ್ಕೆ ರವಾನಿಸಿರುತ್ತೇನೆ . ಇಡೀ ಘಟನೆಯಲ್ಲಿ ನನ್ನ ಪಾತ್ರ ಇಷ್ಟೇ ಎಂದು ಅವರು ಹೇಳಿದರು.

ಕುಟುಂಬದವರ ಸ್ಪಷ್ಟನೆ :

ಮೂಲಗಳ ಪ್ರಕಾರ , ದೇವಸ್ಥಾನದಲ್ಲಿ ಹಿಂದೂ ಸಂಪ್ರದಾಯದ ಅನುಸಾರ ವಿವಾಹವಾದ ಜೋಡಿ ಅಕ್ಕಪಕ್ಕದ ಮನೆಯವರಾಗಿದ್ದು, ಹಲವು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದರು. ವಧು ಬ್ಯಾಂಕಿನಲ್ಲಿ ಉದ್ಯೋಗಿಯಾಗಿದ್ದು, ವರನಿಗೆ ವಧುವಿನ ತಂದೆಯೇ ಹಲವು ವರ್ಷಗಳ ಹಿಂದೆ ವಾಹನವೊಂದನ್ನು ತೆಗೆಸಿಕೊಟ್ಟು ವ್ಯವಹಾರಕ್ಕೆ ಅವಕಾಶ ಕಲ್ಪಸಿದ್ದರು. ಇದೀಗ ಎರಡು ಕುಟುಂಬಗಳ ಒಪ್ಪಿಗೆಯೊಂದಿಗೆ ಅವರು ಕುಟುಂಬಿಕರ ಸಮ್ಮುಖದಲ್ಲಿ ವಿವಾಹವಾಗಿದ್ದಾರೆ ಎನ್ನಲಾಗಿದೆ.

ಕಾನೂನು ಪ್ರಕಾರ ಎಲ್ಲ ದಾಖಲೆ ಸಿದ್ದಪಡಿಸಿ ಶನಿವಾರದಂದು ಬೆಳ್ತಂಗಡಿ ಸಬ್‌ ರಿಜಿಸ್ಟ್ರಾರ್‌ ಕಛೇರಿಯಲ್ಲಿ ಮದುವೆ ನೋಂದಾಣಿ ಮಾಡಿಕೊಳ್ಳುತ್ತೇವೆ. ನಮಗೆ ಹಿಂದೂ ಹಾಗೂ ಮುಸ್ಲಿಂ ಸಮುದಾಯದಿಂದ ತೊಂದರೆ ಇಲ್ಲದೇ ಜೀವನ ನಡೆಸುತ್ತಿದ್ದೇವೆ. ನಮಗೆ ಯಾವುದೇ ರೀತಿಯಲ್ಲಿ ತೊಂದರೆ ಮಾಡಬೇಡಿ ಎಂದು ವಧು – ವರರ ಕುಟುಂಬದವರು ಸ್ಪಷ್ಟನೆ ನೀಡಿರುವುದಾಗಿ ಮಾಧ್ಯಮವೊಂದು ಪ್ರಕಟಿಸಿದೆ. 

ಇಂದು ವಿವಾಹ ನೋಂದಾವಣೆ ಆದ ಬಳಿಕ ಎರಡು ಕುಟುಂಬಸ್ಥರು ಬೆಳ್ತಂಗಡಿಯಲ್ಲಿ ಮಾಧ್ಯಮಗಳಿಗೆ ಈ ಘಟನೆಯ ಬಗ್ಗೆ ಸ್ಪಷ್ಟನೆ ನೀಡಲಿದ್ದಾರೆ ಎಂದು ತಿಳಿದು ಬಂದಿದೆ