ಪ್ರಕರಣದ ಹಿನ್ನಲೆ: ಚಿಕಿತ್ಸೆಗೆಂದು ಆಸ್ಪತ್ರೆಗೆ ದಾಖಲಿಸಲಾದ ಧರ್ಮಸ್ಥಳದ ಕೂಲಿ ಕಾರ್ಮಿಕರೊಬ್ಬರು ಮೃತ ಪಟ್ಟಿದ್ದು ಅವರಿಗೆ ಸ್ಥಳೀಯ ರಾಜಕೀಯ ನಾಯಕರೊಬ್ಬರು ಮಾರಣಾಂತಿಕವಾಗಿ ಹಲ್ಲೆ ನಡೆಸಿದ ಕಾರಣ ಮೃತಪಟ್ಟಿದ್ದಾರೆಂದು ಧರ್ಮಸ್ಥಳ ಠಾಣೆಗೆ ಮೃತರ ತಾಯಿ ದೂರು ನೀಡಿದ್ದು ಅದರಂತೆ ಕೊಲೆ ಪ್ರಕರಣ ದಾಖಲಿಸಲಾಗಿದೆ.

ಬೆಳ್ತಂಗಡಿಯ ತಾಲೂಕಿನ ಕನ್ಯಾಡಿ ನಿವಾಸಿ ಕೂಲಿಕಾರ್ಮಿಕ ದಿನೇಶ್ ನಾಯ್ಕ್ ಹತ್ಯೆಯಾದವರು. ವಿಹಿಂಪ, ಬಜರಂಗದಳ ಪುತ್ತೂರು ಜಿಲ್ಲಾ ಕಾರ್ಯಾಧ್ಯಕ್ಷ ಭಾಸ್ಕರ ಧರ್ಮಸ್ಥಳ ಅವರ ಸಹೋದರ ಕೃಷ್ಣ ಈ ಕೊಲೆ ಮಾಡಿದ್ದಾರೆ ಎಂದು ಮೃತ ದಿನೇಶ್ ನಾಯ್ಕ್ ತಾಯಿ ಪಧ್ಮಾವತಿ ಅವರು ದೂರಿದ್ದಾರೆ . ಅದರಂತೆ ಕೃಷ್ಣ ನಾಯ್ಕ (ಶಂಕಿತ) ವಿರುದ್ದ ಐಪಿಸಿ ಸೆಕ್ಷನ್ 302ರಂತೆ ಕೊಲೆ ಪ್ರಕರಣ ದಾಖಲಾಗಿದೆ.

ಕೃಷ್ಣರವರ ಜಾಗದ ರೆಕಾರ್ಡ್ ನ್ನು ಮಾಜಿ ಶಾಸಕ ವಸಂತ ಬಂಗೇರರ ಮೂಲಕ ನಾನು ಮಾಡಿಸಿಕೊಟ್ಟಿದ್ದು ಎಂದು ದಿನೇಶ್ ರವರು ಸಾರ್ವಜನಿಕವಾಗಿ ಹೇಳಿದ್ದಾರೆ ಎನ್ನಲಾಗಿದೆ. ಇದರಿಂದ ಕೋಪಗೊಂಡ ಕೃಷ್ಣ ರವರು ನನ್ನ ಪತಿಯ ಮೇಲೆ ಫೆ 23 ರಂದು ಬೆಳಿಗ್ಗೆ ಹಲ್ಲೆ ನಡೆಸಿದ್ದಾರೆಂದು ದಿನೇಶ್ ಪತ್ನಿ ಕವಿತಾ ಆರೋಪಿಸಿದ್ದಾರೆ
ರಾಮ ಮಂದಿರದ ಮುಂಭಾಗದಲ್ಲಿ ಅಂಗಡಿ ಹೊಂದಿದಿರುವ ಕೃಷ್ಣ ಎಂಬವರು ಜಾಗದ ದಾಖಲಾತಿ ಮಾಡಿಕೊಟ್ಟ ವಿಚಾರವನ್ನು ಸಾರ್ವಜನಿಕವಾಗಿ ಹೇಳಿದ್ದೇನೆಂದು ಕೋಪಗೊಂಡು ನನ್ನ ಮೇಲೆ ಮಾರಣಾಂತಿಕವಾಗಿ ಹಲ್ಲೆ ಮಾಡಿದ್ದಾನೆಂದು ಫೆ 23 ಬೆಳಿಗ್ಗೆ 11 ಗಂಟೆಗೆ ದಿನೇಶ್ ತನ್ನ ತಾಯಿ ಪದ್ಮಾವತಿ (ದೂರುದಾರೆ) ಹಾಗೂ ತನ್ನ ಪತ್ನಿ ಕವಿತಾರವರ ಬಳಿ ಬಂದು ಹೇಳಿರುವುದಾಗಿ ಆರೋಪಿಸಲಾಗಿದೆ.

ಆ ಬಳಿಕ ತೀವ್ರ ಅಸ್ವಸ್ಥಗೊಂಡಿದ್ದ ದಿನೇಶ್ ಮನೆಯಲ್ಲಿಯೇ ನೋವಿನಿಂದ ನರಳಾಡುತ್ತಿದ್ದರು . ದಿನೇಶ್ ಮನೆಯವರು ತೀರ ಬಡ ಕುಟುಂಬದವರಾಗಿದ್ದು ಹೀಗಾಗಿ ತಮಗೆ ಆತನನ್ನು ಆಸ್ಪತ್ರೆಗೆ ಸಾಗಿಸಲು ಸಾಧ್ಯವಾಗಿಲ್ಲ ಎಂದು ತಿಳಿಸಿದ್ದಾರೆ. ಮರು ದಿನ ಬೆಳಿಗ್ಗೆ ದಿನೇಶ್ ಪತ್ನಿ ಕವಿತಾರವರು ಕೃಷ್ಣರವರ ಬಳಿ ನಿನ್ನೆ ನೀವು ಹಲ್ಲೆ ನಡೆಸಿದರಿಂದ ನನ್ನ ಪತಿ ತೀವ್ರ ಅಸ್ವಸ್ಥಗೊಂಡಿರುವುದಾಗಿಯೂ , ಕೂಡಲೇ ಅವರನ್ನು ಆಸ್ಪತ್ರೆಗೆ ಸೇರಿಸುವಂತೆಯೂ ಒತ್ತಾಯಿಸಿದ್ದಾರೆ.

ಅದರಂತೆ ಗಂಭೀರ ಗಾಯಗೊಂಡ ದಿನೇಶ್ ರನ್ನು ಮನೆಯವರು ಹಾಗೂ ಕೃಷ್ಣ ಅವರೇ ಮಂಗಳೂರಿನ ವೆನ್ಲಾಕ್ ಆಸ್ಪತ್ರೆಗೆ ಸೇರಿಸಿದ್ದಾರೆ. ತನ್ನ ತಪ್ಪನ್ನು ಮರೆಮಾಚುವ ಉದ್ದೇಶದಿಂದ ಹಾಗೂ ಕಾನೂನಿನ ಕುಣಿಕೆಯಿಂದ ತಪ್ಪಿಸಿಕೊಳ್ಳುವ ಉದ್ದೇಶದಿಂದ ದಿನೇಶ್ ರವರು ಮೆಟ್ಟಿಲಿನಿಂದ ಬಿದ್ದು ಗಾಯಗೊಂಡಿರುವುದಾಗಿ ಅಸ್ಪತ್ರೆಯಲ್ಲಿ ಕೃಷ್ಣರವರು ಕೃಷ್ಣ ತಿಳಿಸಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ. ಫೆ.24ರ ರಾತ್ರಿ 2 ಗಂಟೆ ಸುಮಾರಿಗೆ ಚಿಕಿತ್ಸೆ ಫಲಕಾರಿಯಾಗದೇ ದಿನೇಶ್ ಮೃತಪಟ್ಟಿದ್ದಾರೆ.
ಬಳಿಕ ಕೃಷ್ಣ ಅವರ ವಿರುದ್ಧ ಪ್ರಕರಣ ದಾಖಲಿಸದಂತೆ ರಾಜಕೀಯವಾಗಿ ಒತ್ತಡ ಹೇರಳಾಗಿತ್ತು ಎನ್ನಲಾಗಿದ್ದು ಈ ಹಿನ್ನಲೆಯಲ್ಲಿ ದಿನೇಶ್ ಕುಟುಂಬದ ಆತ್ಮೀಯರು ಹಾಗೂ ಇತರ ಸಾರ್ವಜನಿಕರು ಪೊಲೀಸ್ ಠಾಣೆಗೆ ತೆರಳಿ ಕೇಸ್ ದಾಖಲಿಸುವಂತೆ ಒತ್ತಾಯಿಸಿದ್ದಾರೆ ಎಂದು ತಿಳಿದು ಬಂದಿದೆ.

ಕೇಸ್ ದಾಖಲಿಸಲು ತೆರಳಿದ್ದ ದಿನೇಶ್ ತಾಯಿ ಪಧ್ಮವತಿಗೂ ಕ ಒತ್ತಡ ಹಾಕಲಾಗಿದೆ ಎಂದು ಕೊಲೆಯಾದ ದಿನೇಶ್ ರ ಪತ್ನಿ ಕವಿತಾ ನಿಖರ ನ್ಯೂಸ್ ಗೆ ತಿಳಿಸಿದ್ದಾರೆ.
ಕೊಲೆ ಆರೋಪಿ ಕೃಷ್ಣ ಸ್ಥಳೀಯ ಬಿಜೆಪಿ ಮುಖಂಡನಾಗಿದ್ದು, ಕಳೆದ ಚುನಾವಣೆಯಲ್ಲಿ ಗ್ರಾಮ ಪಂಚಾಯತ್ ಚುನಾವಣೆಯಲ್ಲಿ ಸ್ಪರ್ಧಿಸಿ ಸೋಲುಂಡಿದ್ದ ಎನ್ನಲಾಗಿದೆ. ಇದೀಗ ದಿನೇಶ್ ರವರಿಗೆ ಹಲ್ಲೆ ನಡೆಸುವ ಸಿಸಿಟಿವಿ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ಕೊಲೆ ಪ್ರಕರಣ ದಾಖಲಾಗಿದೆ.