ಜೈಲಿನಿಂದ ನಿರ್ದೇಶನ ನೀಡಿದ ಕೇಜ್ರಿವಾಲ್
ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರು ಜಾರಿ ನಿರ್ದೇಶನಾಲಯ (ಇ.ಡಿ) ವಶದಲ್ಲಿದ್ದರೂ, ಬೇಸಿಗೆ ದಿನಗಳಲ್ಲಿ ದೆಹಲಿಯಲ್ಲಿ ಕಂಡುಬರುವ ಸಂಭಾವ್ಯ ಕುಡಿಯುವ ನೀರಿನ ಸಮಸ್ಯೆ ಕುರಿತು ಕ್ರಮ ತೆಗೆದುಕೊಳ್ಳುವಂತೆ ಸಂಪುಟ ಸಹೋದ್ಯೋಗಿ ಅತಿಶಿ ಮರ್ಲೆನಾ ಅವರಿಗೆ ಸೂಚಿಸಿದ್ದಾರೆ.

‘ನಾನು ಜೈಲಿನಲ್ಲಿ ಇರಬಹುದು. ಇದರಿಂದ ದೆಹಲಿಯ ಜನರಿಗೆ ಅನಾನುಕೂಲ ಆಗಬಾರದು. ಸಾರ್ವಜನಿಕರ ಸಮಸ್ಯೆಗಳನ್ನು ತಕ್ಷಣವೇ ಪರಿಹರಿಸಬೇಕು. ಅಗತ್ಯವಿದ್ದರೆ, ಇದಕ್ಕೆ ಲೆಫ್ಟಿನೆಂಟ್ ಗವರ್ನರ್ ಸಹಕಾರವನ್ನೂ ಪಡೆದುಕೊಳ್ಳಿ. ಅವರು ಖಂಡಿತವಾಗಿಯೂ ಸಹಕರಿಸುತ್ತಾರೆ ಎಂದು ಕೇಜ್ರಿವಾಲ್‌ ಅವರು ಲಿಖಿತವಾಗಿ ನಿರ್ದೇಶನ ನೀಡಿದ್ದಾರೆ’ ಎಂದು ಅತಿಶಿ ಅವರು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ. ‘ಮುಖ್ಯಮಂತ್ರಿ ಅವರ ನಿರ್ದೇಶನ ಗಳನ್ನು ಶನಿವಾರ ತಡರಾತ್ರಿ ಸ್ವೀಕರಿಸಿದ್ದೇನೆ’ ಎಂದರು.

ಜನರು ಸಂಭ್ರಮಿಸಿದ್ದಾರೆ: ಬಿಜೆಪಿ
‘ಕೇಜ್ರಿವಾಲ್‌ ಅವರ ಬಂಧನಕ್ಕೆ ದೆಹಲಿ ಜನರು ದುಃಖ ವ್ಯಕ್ತಪಡಿಸಿಲ್ಲ. ಬದಲಿಗೆ ಸಿಹಿ ಹಂಚಿ, ಪಟಾಕಿ ಸಿಡಿಸಿ ಸಂಭ್ರಮಿಸಿದ್ದಾರೆ. ತನ್ನ ಬೆಂಬಲಕ್ಕೆ ಜನ ಇಲ್ಲ ಎಂಬುದನ್ನು ತಿಳಿದ ಬಳಿಕ ಕೇಜ್ರಿವಾಲ್, ಇದೀಗ ದೆಹಲಿ ಜನರ ನೀರಿನ ಸಮಸ್ಯೆ ಕುರಿತು ಅಳಲು ತೋಡಿಕೊಂಡಿದ್ದಾರೆ” ಎಂದು ದೆಹಲಿಯ ಬಿಜೆಪಿ ಸಂಸದ ಮನೋಜ್ ತಿವಾರಿ ವ್ಯಂಗ್ಯವಾಡಿದ್ದಾರೆ.

ವಾಸ್ತವವಾಗಿ ದೆಹಲಿಯ ಬೀದಿಗಳಲ್ಲಿ ಚರಂಡಿ ನೀರು ಉಕ್ಕಿ ಹರಿದು ಮನೆಗಳನ್ನು ಸೇರುತ್ತಿದೆ. ಜನರಿಗೆ ಕುಡಿಯಲು ಕೊಳಕು ನೀರು ಪೂರೈಸಲಾಗುತ್ತಿದ್ದು, ಜನರ ಆರೋಗ್ಯ ಹದಗೆಡುತ್ತಿದೆ. ದೆಹಲಿ ಸರ್ಕಾರವು ಇಲ್ಲಿನ ಜನರ ಸಮಸ್ಯೆಗಳನ್ನು ಕಡೆಗಣಿಸಿತ್ತು. ಹೀಗಾಗಿಯೇ ಜನರು ಮುಖ್ಯಮಂತ್ರಿ ಮೇಲೆ ವಿಶ್ವಾಸ ಕಳೆದುಕೊಂಡಿದ್ದಾರೆ ಎಂದು ಅವರು ಆರೋಪಿಸಿದರು.

• ಇದು ಎಎಪಿ ಅಥವಾ ಕಾಂಗ್ರೆಸ್ ಇಲ್ಲವೇ ‘ಇಂಡಿಯಾ’ ಮೈತ್ರಿಕೂಟದ ಪ್ರಶ್ನೆಯಲ್ಲ. ಇದು ಪ್ರಜಾ ಪ್ರಭುತ್ವದ ಅಳಿವು-ಉಳಿವಿನ ಪ್ರಶ್ನೆ- ಅರವಿಂದ ಸಿಂಗ್ ಲವಿ, ಕಾಂಗ್ರೆಸ್ ದೆಹಲಿ ಘಟಕದ ಅಧ್ಯಕ್ಷ
• ಕಸ್ಟಡಿಗೆ ಹೋದ ಬಳಿಕ ನಿಮಗೆ (ಕೇಜ್ರಿವಾಲ್) ದೆಹಲಿಯ ಜನರ ಸಮಸ್ಯೆಗಳು ಗೊತ್ತಾಯಿತೇ? ಆದರೆ ಈಗ ಇದು ತಡವಾಗಿದೆ.- ಮನೋಜ್ ತಿವಾರಿ, ದೆಹಲಿಯ ಬಿಜೆಪಿ ಸಂಸದ
• ಚುನಾವಣಾ ಬಾಂಡ್‌ಳ ಮಾಹಿತಿ ಬಹಿರಂಗವಾದ ಬಳಿಕ ಕೇಬ್ರಿವಾಲ್ ಬಂಧನವಾಗಿದೆ. ಇದು ಪ್ರಜಾತಂತ್ರದ ಮೇಲಿನ ದಾಳಿ. -ರಾಜೀವ್ ಕನ್ನರ್, ಸಿಪಿಎಂನ ದೆಹಲಿ ಕಾರ್ಯಕಾರಿ ಮಂಡಳಿ ಸದಸ್ಯ