ಸ್ಥಳಕ್ಕೆ ಭೇಟಿ ನೀಡಿದ ಇಒ
ಭಕ್ತರು ಜಮಾಯಿಸಿರುವ ಮಾಹಿತಿ ತಿಳಿದು ಕೆಲ ಹೊತ್ತಿನ ಬಳಿಕ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಕೆ.ವಿ. ಶ್ರೀನಿವಾಸ್ ಸ್ಥಳಕ್ಕೆ ಆಗಮಿಸಿದರು. ದೇವಳದ ಸಿಸಿ ಕ್ಯಾಮರಾ ದೃಶ್ಯಾವಳಿಗಳನ್ನು ಪರಿಶೀಲಿಸಿ, ಅನುಮತಿ ಇಲ್ಲದೆ ಪಿಕಪ್‌ ವಾಹನ ವಠಾರಕ್ಕೆ ಪ್ರವೇಶಿಸಿರುವುದು ದೃಢಪಟ್ಟರೆ ವಾಹನ ಮಾಲಕರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದರು. ಬಳಿಕ ಭಕ್ತರು ಸ್ಥಳದಿಂದ ತೆರಳಿದರು.

ಈ ಸಂದರ್ಭದಲ್ಲಿ ಜಯಂತ್ ಕುಂಜೂರುಪಂಜ, ಹರಿಪ್ರಸಾದ್ ದೋಲ್ಪಾಡಿ, ಚೇತನ್, ಜಗದೀಶ್, ನಾಗೇಶ್ ಟಿ.ಎಸ್., ಶಶಿಧರ್ ನಾಯಕ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.

ಸಿಸಿ ಕ್ಯಾಮಾರ ಪರಿಶೀಲಿಸಿ ಕ್ರಮ : ಇಒ
ದೇವಳದ ಸಿಸಿ ಕ್ಯಾಮರಾ ಪರಿಶೀಲನೆಯಿಂದ ಪಿಕಪ್‌ ವಾಹನದ ಸಂಖ್ಯೆಯನ್ನು ದಾಖಲಿಸಿಕೊಳ್ಳಲಾಗಿದೆ. ಅನುಮತಿ ಇಲ್ಲದೆ ವಠಾರಕ್ಕೆ ವಾಹನ ತಂದಿರುವ ಕುರಿತು ಮಾಲಕರಿಗೆ ನೋಟಿಸ್ ನೀಡಿ ಎಚ್ಚರಿಕೆ ನೀಡಲಾಗುವುದು. ಭದ್ರತಾ ಸಿಬ್ಬಂದಿಯನ್ನೂ ವಿಚಾರಿಸಲಾಗುವುದು. ಮುಂದಿನ ದಿನಗಳಲ್ಲಿ ದೇವಳದ ಹಿಂಬದಿಯ ಕೆರೆ ಹಾಗೂ ಎದುರಿನ ಭಾಗದಲ್ಲಿ ಸೂಕ್ತ ಬಂದೋಬಸ್ತ್ ವ್ಯವಸ್ಥೆ ಮಾಡಲಾಗುವುದು ಎಂದು ಇಒ ಕೆ.ವಿ. ಶ್ರೀನಿವಾಸ್ ತಿಳಿಸಿದ್ದಾರೆ.

ತಪ್ಪೊಪ್ಪಿಗೆ, ಕ್ಷಮೆಯಾಚನೆ

ಮುಂದುವರಿದ ಭಾಗವಾಗಿ ಆ 14ರಂದು ದೇವಸ್ಥಾನದ ಅಡಳಿತ ಕಛೇರಿಗೆ ಆಗಮಿಸಿದ ಪಿಕಪ್‌ ಚಾಲಕ ದಿನೇಶ್ ನಾಯ್ಕ ಕೆ. ಅವರು ದೇವಸ್ಥಾನದ ವ್ಯವಸ್ಥಾಪನ ಮಂಡಳಿ ಅಧ್ಯಕ್ಷರು ಹಾಗೂ ಕಾರ್ಯನಿರ್ವಹಣಾಧಿಕಾರಿಗೆ ಪತ್ರ ಸಲ್ಲಿಸಿ ಘಟನೆ ಕುರಿತು ಕ್ಷಮೆಯಾಚಿಸಿದ್ದಾರೆ. ಈ ವೇಳೆ ಅಲ್ಲಿಗೆ ಮಣ್ಣು ಹಾಕಲು ಸೂಚಿಸಿದ ಪಿಡಬ್ಲ್ಯೂಡಿ ಗುತ್ತಿಗೆದಾರ ವೆಂಕಟರಮಣ ಗೌಡ ಕೊಡಿಪ್ಪಾಡಿಯವರು ಜತೆಗಿದ್ದರು.
ಆ.13ರಂದು ದೇವಾಲಯದ ಹಿಂಭಾಗದಿಂದ ಕೆಎ 21 ಬಿ 7663 ಸಂಖ್ಯೆಯ ಪಿಕಪ್‌ನಲ್ಲಿ ಮಣ್ಣನ್ನು ಸಾಗಿಸಿ ಖಾಸಗಿ ಅಂಗಡಿಗೆ ಹಾಕಿರುವುದಾಗಿ ಅವರು ಪತ್ರದಲ್ಲಿ ತಿಳಿಸಿದ್ದಾರೆ. ದೇವಸ್ಥಾನದ ಅಧ್ಯಕ್ಷರು ಹಾಗೂ ಕಾರ್ಯನಿರ್ವಹಣಾಧಿಕಾರಿಯವರ ಗಮನಕ್ಕೆ ತಾರದೆ ಮಣ್ಣು ಸಾಗಿಸಿರುವುದು ತಮ್ಮ ತಪ್ಪು ಎಂದು ಒಪ್ಪಿಕೊಂಡಿರುವ ಅವರು, ಇನ್ನು ಮುಂದೆ ಇಂತಹ ಘಟನೆ ಮರುಕಳಿಸದಂತೆ ನೋಡಿಕೊಳ್ಳುವುದಾಗಿ ತಿಳಿಸಿ ಕ್ಷಮೆಯಾಚಿಸಿದ್ದಾರೆ. ಬಾಕಿ ಉಳಿದಿರುವ ಮಣ್ಣನ್ನು ತಾವೇ ನಿಂತು ತೆರವುಗೊಳಿಸುವುದಾಗಿಯೂ ಹೇಳಿದ್ದಾರೆ.

ಬಳಿಕ ಮಾಧ್ಯಮ ಹೇಳಿಕೆ ನೀಡಿದ ದಿನೇಶ್ ನಾಯ್ಕ, ಪಿಡಬ್ಲ್ಯೂಡಿ ಗುತ್ತಿಗೆದಾರ ವೆಂಕಟರಮಣ ಗೌಡ ಕೊಡಿಪ್ಪಾಡಿ ಅವರ ಸೂಚನೆಯಂತೆ ಮೂರು ಟ್ರಿಪ್ ಮಣ್ಣು ತಂದು ಹಾಕಿದ್ದಾಗಿ ತಿಳಿಸಿದ್ದಾರೆ. ದೇವಸ್ಥಾನದ ಅನುಮತಿ ಪಡೆಯದೆ ಮಣ್ಣು ಹಾಕಿರುವುದು ತಮ್ಮ ತಪ್ಪು ಎಂದು ಪುನರುಚ್ಚರಿಸಿದ್ದಾರೆ. ತಮ್ಮಿಂದಾದ ಪ್ರಮಾದಕ್ಕಾಗಿ ದೇವಸ್ಥಾನದಲ್ಲಿ ತುಪ್ಪದ ದೀಪ ಹಚ್ಚಿ ಪ್ರಾರ್ಥಿಸುವುದಾಗಿಯೂ ಹೇಳಿದ್ದಾರೆ.

ಮಣ್ಣು ಹಾಕಲು ಸೂಚಿಸಿದ್ದಾಗಿ ಹೇಳಲಾದ ಪಿಡಬ್ಲ್ಯೂಡಿ ಗುತ್ತಿಗೆದಾರ ವೆಂಕಟರಮಣ ಗೌಡ ಕೊಡಿಪ್ಪಾಡಿ ಅವರು ಕೂಡ ಇದೆ ವೇಳೆ ನಿಖರ ನ್ಯೂಸಿಗೆ ಸ್ಪಷ್ಟನೆ ನೀಡಿದ್ದಾರೆ.
ಸಾಮೆತ್ತಡ್ಕದಲ್ಲಿ ಮನೆ ನಿರ್ಮಾಣಕ್ಕಾಗಿ ಮಣ್ಣು ತೆಗೆಯುವ ಕೆಲಸ ತನಗೆ ದೊರೆತಿದ್ದು, ತಮ್ಮ ವಾಹನ ಲಭ್ಯವಿಲ್ಲದ ಹಿನ್ನೆಲೆಯಲ್ಲಿ ದಿನೇಶ್ ನಾಯ್ಕ ಅವರಿಗೆ ಸೇರಿದ ‘ಶ್ರೀ ಲಕ್ಷ್ಮೀ ಪ್ರಸಾದ್’ ಹೆಸರಿನ ವಾಹನದಲ್ಲಿ ಮಣ್ಣು ಸಾಗಿಸಲಾಗಿತ್ತು ಎಂದು ತಿಳಿಸಿದ್ದಾರೆ. ದೇವಸ್ಥಾನದ ಪಕ್ಕದ ಅಂಗಡಿಗೆ ಮಣ್ಣಿನ ಅಗತ್ಯವಿದ್ದ ಕಾರಣ ಅಲ್ಲಿಗೆ ಮಣ್ಣು ಹಾಕಲಾಗಿತ್ತು ಎಂದಿದ್ದಾರೆ.

ದೇವಸ್ಥಾನದ ಅಧ್ಯಕ್ಷರ ಅನುಮತಿ ಪಡೆಯದೆ ಮಣ್ಣು ಹಾಕಿರುವುದು ತಮ್ಮ ತಪ್ಪಾಗಿದ್ದು, ಅದಕ್ಕಾಗಿ ಕ್ಷಮೆಯಾಚಿಸುವುದಾಗಿ ಅವರು ಹೇಳಿದ್ದಾರೆ. ಆದರೆ ಪ್ರಕರಣವನ್ನು ಮುಂದಿಟ್ಟುಕೊಂಡು ಅನ್ಯಕೋಮಿನವರ ವಾಹನದಲ್ಲಿ ಅಕ್ರಮವಾಗಿ ದೇವಳದ ವಠಾರಕ್ಕೆ ಪ್ರವೇಶಿಸಿ ಮಣ್ಣು ಹಾಕಲಾಗಿದೆ ಎಂದು ಬಿಂಬಿಸಿರುವುದು ಬೇಸರ ತಂದಿದೆ. ಮಣ್ಣು ಸಾಗಿಸಿದವರು ತಮ್ಮ ಪರಿಚಯದವರು ಎಂದು ಸ್ಪಷ್ಟಪಡಿಸಿದ್ದಾರೆ. ನಾನು ಹಿಂದೂ ಕಾರ್ಯಕರ್ತನಾಗಿದ್ದು, ವಾಹನದಲ್ಲಿ “ಶ್ರೀ ಲಕ್ಷ್ಮೀ ಪ್ರಸಾದ್‌ “ಎಂದು ಬರೆಯಲಾಗಿದೆ. ಹಾಗಿದ್ದೂ ಅನ್ಯಕೋಮಿನವರು ಬಂದು ದುರುದ್ಧೇಶ ಮಾಡಿರುವುದಾಗಿ ಹೇಳಿರುವುದು ದೊಡ್ಡ ತಪ್ಪು ಇದು ನನಗೆ ಭಾರೀ ಬೇಸರ ಮೂಡಿಸಿದೆ ಎಂದರು.

ದೇವಸ್ಥಾನದ ಅಧ್ಯಕ್ಷರನ್ನು ಗೌರವದಿಂದ ಕಾಣುತ್ತೇವೆ. ಆದರೆ ಘಟನೆಯ ಸಂದರ್ಭದಲ್ಲಿ ಅಧ್ಯಕ್ಷರೊಂದಿಗೆ ನಡೆದ ತಳ್ಳಾಟದ ರೀತಿಯ ಬೆಳವಣಿಗೆಗಳು ನೋವುಂಟು ಮಾಡಿವೆ. ಸತ್ಯಾಂಶ ತಿಳಿಯದೆ ಪ್ರಕರಣಕ್ಕೆ ಕೋಮು ಬಣ್ಣ ನೀಡಬಾರದು ಎಂದು ಅವರು ಮನವಿ ಮಾಡಿದ್ದಾರೆ.

( ಪಿಕಪ್‌ ಚಾಲಕ ದಿನೇಶ್ ನಾಯ್ಕ ಕೆ ಹಾಗೂ ಅವರಿಗೆ ಮಣ್ಣು ಹಾಕಲು ಸೂಚಿಸಿದ ವೆಂಕಟರಮಣ ಗೌಡ ಅವರ ಹೇಳಿಕೆ ನಿಖರ ನ್ಯೂಸಿನ ಯೂಟ್ಯೂಬ್‌ ಚಾನೆಲ್‌ ನಲ್ಲಿದೆ )