ಸರಕಾರ ಪ್ಲಾಟಿಂಗ್ ನಿಯಮಗಳನ್ನು ಸರಳೀಕರಿಸಿ ಆದೇಶಿಸಿದ್ದರೂ, ಭೂ ಮಾಪನ ಇಲಾಖೆಯ ಡಿಡಿಎಲ್‌ಆರ್ ಮತ್ತು ಎಡಿಎಲ್ಆರ್ ಅಧಿಕಾರಿಗಳು ಅದನ್ನು ಗಾಳಿಗೆ ತೂರಿ, ಹಣಕ್ಕಾಗಿ ಜನರನ್ನು ಅನಗತ್ಯವಾಗಿ ಪೀಡಿಸುತ್ತಿದ್ದಾರೆ ಎಂದು ನಗರಸಭಾ ಮಾಜಿ ವಿಪಕ್ಷ ನಾಯಕ, ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷ ಮಹಮ್ಮದ್ ಆಲಿ ಗಂಭೀರ ಆರೋಪ ಮಾಡಿದ್ದಾರೆ. ಈ ಕುರಿತು ಲೋಕಾಯುಕ್ತಕ್ಕೆ ಲಿಖಿತ ದೂರು ಸಲ್ಲಿಸಲಾಗಿದ್ದು, ಪ್ರಕರಣ ದಾಖಲಾಗಿದೆ ಎಂದು ಅವರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಪುತ್ತೂರು: ಸರಕಾರ ಪ್ಲಾಟಿಂಗ್ ನಿಯಮಗಳನ್ನು ಸರಳೀಕರಿಸಿ ಆದೇಶಿಸಿದ್ದರೂ, ಭೂ ಮಾಪನ ಇಲಾಖೆಯ ಡಿಡಿಎಲ್‌ಆರ್ ಮತ್ತು ಎಡಿಎಲ್ಆರ್ ಅಧಿಕಾರಿಗಳು ಅದನ್ನು ಗಾಳಿಗೆ ತೂರಿ, ಹಣಕ್ಕಾಗಿ ಜನರನ್ನು ಅನಗತ್ಯವಾಗಿ ಪೀಡಿಸುತ್ತಿದ್ದಾರೆ ಎಂದು ನಗರಸಭಾ ಮಾಜಿ ವಿಪಕ್ಷ ನಾಯಕ, ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷ ಮಹಮ್ಮದ್ ಆಲಿ ಗಂಭೀರ ಆರೋಪ ಮಾಡಿದ್ದಾರೆ. ಈ ಕುರಿತು ಲೋಕಾಯುಕ್ತಕ್ಕೆ ಲಿಖಿತ ದೂರು ಸಲ್ಲಿಸಲಾಗಿದ್ದು, ಪ್ರಕರಣ ದಾಖಲಾಗಿದೆ ಎಂದು ಅವರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

alt="Ad Widget"/>

ಸರಕಾರದ ಆದೇಶಕ್ಕೂ ಸೊಪ್ಪು ಹಾಕದ ಅಧಿಕಾರಿಗಳು:
ಭೂಮಿಗಳ ಪ್ಲಾಟಿಂಗ್ (ಪೋಡಿ ದುರಸ್ತಿ) ಸಮಸ್ಯೆ ದಶಕಗಳಿಂದ ಜನರನ್ನು ಕಾಡುತ್ತಿದ್ದು, ಅರ್ಜಿ ಸಲ್ಲಿಸಿದರೂ ವರ್ಷಗಟ್ಟಲೆ ಕೆಲಸ ಆಗುತ್ತಿರಲಿಲ್ಲ. ಈ ಹಿನ್ನೆಲೆಯಲ್ಲಿ ರಾಜ್ಯ ಸರಕಾರ ಪ್ಲಾಟಿಂಗ್ ನಿಯಮಗಳನ್ನು ಸರಳೀಕರಿಸಿ ಆದೇಶ ಹೊರಡಿಸಿತ್ತು. ದ.ಕ. ಜಿಲ್ಲೆಯಲ್ಲಿ ಪ್ಲಾಟಿಂಗ್‌ಗೆ ಸಂಬಂಧಿಸಿದಂತೆ ಅಭಿಯಾನ ನಡೆಸಿ, ಮುಖ್ಯಮಂತ್ರಿಗಳ ಭೇಟಿಗೂ ಮುನ್ನ ಡಿಡಿಎಲ್‌ಆರ್ ಪ್ರಸಾದಿನಿ ಅವರು 8727 ಕಡತಗಳಲ್ಲಿ 5855 ಕಡತಗಳನ್ನು ಮಂಜೂರು ಮಾಡಿ ಪಹಣಿ ಇಂಡೀಕರಣ ಮಾಡಿಸಿದ್ದರು. ಆದರೆ, ಮುಖ್ಯಮಂತ್ರಿಗಳು ನಿರ್ಗಮಿಸಿದ ನಂತರ ಪ್ರಸಾದಿನಿಯವರು ತಮ್ಮ ಕಚೇರಿಗೆ ಸಲ್ಲಿಸಲಾದ ಕಡತಗಳಿಗೆ ಮಂಜೂರಾತಿ ನೀಡದೆ ಲಕ್ಷಾಂತರ ರೂಪಾಯಿ ಲಂಚಕ್ಕೆ ಬೇಡಿಕೆ ಇಡುತ್ತಿದ್ದಾರೆ ಎಂದು ಮಹಮ್ಮದ್ ಆಲಿ ಸ್ಫೋಟಕ ಮಾಹಿತಿ ನೀಡಿದ್ದಾರೆ. ಲಂಚ ನೀಡಿದವರ ಕಡತಗಳಿಗೆ ಮಾತ್ರ ಮಂಜೂರಾತಿ ನೀಡಲಾಗುತ್ತಿದೆ ಎಂಬ ಮಾಹಿತಿ ಲಭ್ಯವಾಗಿದೆ ಎಂದು ಅವರು ಆರೋಪಿಸಿದ್ದಾರೆ.

<>

ಪುತ್ತೂರಿನಲ್ಲಿ ಎಡಿಎಲ್‌ಆರ್, ಸೂಪರ್‌ವೈಸರ್‌ನಿಂದ ಕಿರುಕುಳ:
ಪ್ಲಾಟಿಂಗ್ ಸರಳೀಕರಣ ಆದೇಶದ ಪ್ರಕಾರ, ಭೂ ಮಂಜೂರಾತಿ ಪ್ರಕರಣಗಳಿಗೆ ಭೂ ಮಂಜೂರಾತಿ ನಡಾವಳಿ, ಸಾಗುವಳಿ ಚೀಟಿ, ಚಾಲ್ತಿ ಪಹಣಿ ಮತ್ತು ಭೂ ಸುಧಾರಣಾ ಪ್ರಕರಣಗಳಿಗೆ ಭೂ ನ್ಯಾಯ ಮಂಡಳಿಯ ಆದೇಶ, ನಮೂನೆ-10, ಚಾಲ್ತಿ ಪಹಣಿ ಮಾತ್ರ ಸಲ್ಲಿಸಬೇಕು. ಆದರೆ ಪುತ್ತೂರಿನ ಎಡಿಎಲ್‌ಆರ್ ಕಚೇರಿಯಲ್ಲಿ ಈ ಮೂರು ದಾಖಲೆಗಳ ಹೊರತಾಗಿ “ಐ ಸ್ಕೆಚ್” ದಾಖಲೆಯನ್ನು ಕೇಳಲಾಗುತ್ತಿದೆ. ಭೂಮಾಪಕರು ಮಾಡಿಕೊಟ್ಟ ಪ್ಲಾಟಿಂಗ್ ನಕ್ಷೆಗೂ, ಭೂ ಮಂಜೂರಾತಿ ಕಡತದಲ್ಲಿರುವ ಐ ಸ್ಕೆಚ್‌ಗೂ ತಾಳೆ ಬರುವುದಿಲ್ಲ ಎಂಬ ನೆಪವೊಡ್ಡಿ ಕಡತಗಳನ್ನು ತಹಶೀಲ್ದಾರ್ ಕಚೇರಿಗೆ ಹಿಂದಿರುಗಿಸುವ ಪ್ರಕರಣಗಳು ನಡೆಯುತ್ತಿವೆ. ಸೂಪರ್ ವೈಸರ್ ಪ್ರಕಾಶ ಮತ್ತು ಎಡಿಎಲ್ ಆರ್ ಶ್ರೀನಿವಾಸಮೂರ್ತಿ ಈ ರೀತಿಯಾಗಿ ಕಡತಗಳನ್ನು ಹಿಂತಿರುಗಿಸಿ ಜನರಿಗೆ ತೊಂದರೆ ನೀಡುತ್ತಿದ್ದಾರೆ. ಮಧ್ಯವರ್ತಿಗಳ ಮೂಲಕ ಹೋದ ಕಡತಗಳಿಗೆ ಮಾತ್ರ ಯಾವುದೇ ಹೆಚ್ಚುವರಿ ದಾಖಲೆ ಕೇಳದೆ ವಿಲೇವಾರಿ ಮಾಡಿ ಭ್ರಷ್ಟಾಚಾರ ನಡೆಸಲಾಗುತ್ತಿದೆ ಎಂದು ಸಾರ್ವಜನಿಕರು ತಮ್ಮಲ್ಲಿ ದೂರಿರುವುದಾಗಿ ಮಹಮ್ಮದ್ ಆಲಿ ತಿಳಿಸಿದ್ದಾರೆ.

ಶಾಸಕರ ಎಚ್ಚರಿಕೆಗೂ ಕ್ಯಾರೆ ಎನ್ನದ ಅಧಿಕಾರಿಗಳು:
ಶಾಸಕ ಅಶೋಕ್ ಕುಮಾರ್ ರೈ ಅವರು ಎಡಿಎಲ್‌ಆರ್ ಮತ್ತು ಸೂಪರ್‌ವೈಸರ್‌ಗೆ ಹಲವು ಬಾರಿ ಎಚ್ಚರಿಕೆ ನೀಡಿದ್ದರೂ, ಅವರ ವರ್ತನೆಯಲ್ಲಿ ಬದಲಾವಣೆಯಾಗಿಲ್ಲ. ಪ್ಲಾಟಿಂಗ್ ಸಮಸ್ಯೆ ಬಗೆಹರಿಸಲು ಶಾಸಕರು ಸರಕಾರದ ಮೇಲೆ ಒತ್ತಡ ಹೇರಿ, ಸರಳೀಕರಣ ಆದೇಶ ಹೊರಡಿಸಿದ್ದರೂ, ಅಧಿಕಾರಿಗಳು ಅದನ್ನು ಸರಿಯಾಗಿ ಪಾಲಿಸದೆ, ಭ್ರಷ್ಟಾಚಾರದ ದುರುದ್ದೇಶದಿಂದ ಕಠಿಣಗೊಳಿಸುತ್ತಿದ್ದಾರೆ ಎಂದು ಆಲಿ ಆರೋಪಿಸಿದ್ದಾರೆ.

“ಹಣ ಪಡೆದರೆ ಜನರ ಶಾಪ ತಟ್ಟಲಿದೆ, ರೋಗಗಳಿಗೆ ಬಲಿಯಾಗುತ್ತಾರೆ!”:
“ಅಧಿಕಾರಿಗಳು ಮರ್ಯಾದೆಯಲ್ಲಿ ಕೆಲಸಮಾಡಬೇಕು. ಬಡವರಿಂದ ಹಣ ಪಡೆದು ಸುಲಿಗೆ ಮಾಡಿದರೆ ಒಳ್ಳೆಯದಲ್ಲ. ಜನರ ಶಾಪ ನಿಮಗೆ ತಟ್ಟಲಿದೆ. ಅವರು ರೋಗಗಳಿಗೆ ಬಲಿಯಾಗಿ ಸಾಯಲಿದ್ದಾರೆ. ರಾಜಾರೋಷವಾಗಿ ಹಣ ಪಡೆಯುವುದಾದರೆ ಅವರಿಗೆ ಭಯವೇ ಇಲ್ಲದಾಗಿದೆ. ಇನ್ನು ಜನರೇ ಹೋಗಿ ಹೊಡೆಯಬೇಕಷ್ಟೆ. ಮಾಡಿದ ಕರ್ಮ ಅನುಭವಿಸಲಿದ್ದಾರೆ. ಪುತ್ತೂರಿನಲ್ಲಿ ಮಾಡಿದ ಕರ್ಮ ಅವರ ಉಸಿರು ಇರುವ ತನಕ ನೆನಪಿನಲ್ಲಿಡುವಂತೆ ನಾವು ಮಾಡುತ್ತೇವೆ” ಎಂದು ಮಹಮ್ಮದ್ ಆಲಿ ಆಕ್ರೋಶಭರಿತವಾಗಿ ಹೇಳಿದ್ದಾರೆ.

ಭ್ರಷ್ಟಾಚಾರದ ಬಗ್ಗೆ ಜನರು ಧ್ವನಿ ಎತ್ತಬೇಕು:
ಭ್ರಷ್ಟಾಚಾರದ ಬಗ್ಗೆ ಜನರು ಧ್ವನಿ ಎತ್ತಿದರೆ ಅಧಿಕಾರಿಗಳು ಹಣ ಕೇಳಲು ಸಾಧ್ಯವಿಲ್ಲ. ಜನರು ಸ್ವಾರ್ಥ ಬಿಡಬೇಕು. ಬುದ್ಧಿವಂತರು, ವಿದ್ಯಾವಂತರ ಜಿಲ್ಲೆಯಲ್ಲಿಯೇ ಅಧಿಕ ಭ್ರಷ್ಟಾಚಾರ ಆಗುತ್ತಿದೆ. ಅಧಿಕಾರಿಗಳು ಜನರಿಂದ ಹಣ ಪಡೆಯುವುದನ್ನು ನಿಲ್ಲಿಸಬೇಕು. ಇಲ್ಲದಿದ್ದರೆ ನಿಲ್ಲಿಸುವ ಕೆಲಸ ನಾವು ಮಾಡುತ್ತೇವೆ. ಜನರಲ್ಲಿ ಜಾಗೃತಿ ಮೂಡಿಸುವ ಕೆಲಸ ಮಾಡುತ್ತೇವೆ. ಜನರು ಯಾವುದೇ ಕಚೇರಿಯಲ್ಲಿ ಲಂಚ ಕೊಡಬಾರದು. ಲಂಚ ಕೇಳುವವರ ವಾಯ್ಸ್ ರೆಕಾರ್ಡ್ ಮಾಡಿ ಲೋಕಾಯುಕ್ತಕ್ಕೆ ದೂರು ನೀಡಬೇಕು. ಲೋಕಾಯುಕ್ತಕ್ಕೆ ದೂರು ಕೊಡಲು ಇಚ್ಛಿಸುವವರಿಗೆ ಎಲ್ಲಾ ಸಹಕಾರ ನೀಡಲಾಗುವುದು ಎಂದು ಆಲಿ ಕರೆ ನೀಡಿದರು.

ಬೆದ್ರಾಳದಲ್ಲಿ ಮಲತ್ಯಾಜ್ಯ ಘಟಕ ಆಗಿಯೇ ಆಗುತ್ತದೆ:
ಬೆದ್ರಾಳದ ಬಡಾವಣೆಯ ಬಗ್ಗೆ ಪತ್ರಕರ್ತರ ಪ್ರಶ್ನೆಗೆ ಉತ್ತರಿಸಿದ ಮಹಮ್ಮದ್ ಆಲಿ, ಬೆದ್ರಾಳದಲ್ಲಿ ಮಲತ್ಯಾಜ್ಯ ಘಟಕ ಆಗಿಯೇ ಆಗುತ್ತದೆ. ಯಾರು ಏನು ಬೇಕಾದರೂ ಮಾಡಲಿ. ಆದರೆ ಸರಕಾರದ ವಿರುದ್ಧ ಹೋಗಲು ಯಾರಿಗೂ ಸಾಧ್ಯವಿಲ್ಲ. ಮಲತ್ಯಾಜ್ಯ ಘಟಕಕ್ಕೆ ರಸ್ತೆ ನಿರ್ಮಾಣಕ್ಕೆ ಭೂ ಸ್ವಾಧೀನಕ್ಕೆ ನಗರಸಭೆಗೆ ಆದೇಶವಾಗಿದ್ದು, ಅದರ ಪ್ರಕ್ರಿಯೆ ಆರಂಭವಾಗಿದೆ. ಕಾನೂನು ಬಾಹಿರ ಬಡಾವಣೆ ನಿರ್ಮಾಣಕ್ಕೆ ಮಾತ್ರ ನನ್ನ ವಿರೋಧವಿದೆ ಎಂದರು.
.
ಪುತ್ತೂರಿನಲ್ಲಿ ಭ್ರಷ್ಟಾಚಾರ ಆಳವಾಗಿ ಬೇರೂರಿದೆ: ಭ್ರಷ್ಟ ಅಧಿಕಾರಿಗಳಿಗೆ ಬುದ್ಧಿ ಬಂದಿಲ್ಲ!
ಪುತ್ತೂರಿನಲ್ಲಿ ಭ್ರಷ್ಟಾಚಾರ ಆಳವಾಗಿ ಬೇರೂರಿದ್ದು, ಕೆಲ ತಿಂಗಳ ಹಿಂದೆ ತಾಲೂಕು ಕಚೇರಿಗೆ ಲೋಕಾಯುಕ್ತರು ದಾಳಿ ಮಾಡಿ ವಿಷಯ ನಿರ್ವಾಹಕ ಸುನೀಲ್‌ನನ್ನು ಲಂಚ ಪಡೆಯುವಾಗ ರೆಡ್ ಹ್ಯಾಂಡ್ ಆಗಿ ಹಿಡಿದು ಜೈಲಿಗೆ ಅಟ್ಟಿದ್ದರು. ಸುನೀಲ್ ತಹಶೀಲ್ದಾರ್ ಹೆಸರು ಹೇಳಿದ ಕಾರಣಕ್ಕಾಗಿ ತಹಶೀಲ್ದಾರ್ ಲೋಕಾಯುಕ್ತದಿಂದ ತಪ್ಪಿಸಲು ಪರಾರಿಯಾದ ಪ್ರಕರಣ ನಡೆದಿದ್ದರೂ, ಸಿಬ್ಬಂದಿಗಳಿಗೆ ಇನ್ನೂ ಬುದ್ಧಿ ಬಂದಿಲ್ಲ. ಇವರಿಗೆ ಭಯವೇ ಇಲ್ಲದಂತಾಗಿದೆ. ತಾಲೂಕು ಕಚೇರಿಯ ಸಿಬ್ಬಂದಿಗಳು ಇನ್ನೂ ಕೂಡಾ ಲಂಚಾವತಾರದಲ್ಲಿ ತೊಡಗಿಸಿಕೊಂಡಿದ್ದಾರೆ.

ತಾಲೂಕು ಕಚೇರಿಯ ಕನ್ವರ್ಷನ್ ಕೇಸ್ ವರ್ಕರ್ ಆಗಿರುವ ದಯಾನಂದ ಪ್ರತಿ ಕಡತವನ್ನು ವಿಲೇವಾರಿ ಮಾಡಲು ದೊಡ್ಡ ಮೊತ್ತದ ಲಂಚ ಕೇಳುತ್ತಿದ್ದಾರೆ. ದಯಾನಂದ ಅವರು ಈ ಹಿಂದೆ ಪಂಜ ಹೋಬಳಿಯ ಆರ್.ಐ. ಆಗಿದ್ದ ಸಂದರ್ಭದಲ್ಲಿ ವ್ಯಕ್ತಿಯೊಬ್ಬರಿಂದ ಲಂಚ ಪಡೆಯುವಾಗ ಭ್ರಷ್ಟಾಚಾರ ನಿಗ್ರಹದಳದವರಿಂದ ಬಂಧನಕ್ಕೆ ಒಳಗಾಗಿದ್ದರು. ಈತ ಜೈಲಿಗೆ ಹೋಗಿ ಬಂದಿದ್ದರೂ ಭ್ರಷ್ಟಾಚಾರದ ಚಾಳಿ ನಿಲ್ಲಿಸಿಲ್ಲ. ನೇರವಾಗಿ ಸಾರ್ವಜನಿಕರಲ್ಲಿ ಹಣ ಕೇಳುತ್ತಿದ್ದಾರೆ. ಸಾರ್ವಜನಿಕರಿಂದ ಹಣ ಪಡೆಯುವುದಕ್ಕಾಗಿಯೇ ದಯಾನಂದರಿಗೆ ಈ ಹುದ್ದೆ ನೀಡಿದ್ದಿರಬೇಕು. ಸಿಬ್ಬಂದಿಗಳನ್ನು ನಿಯಂತ್ರಿಸದೇ ಇದ್ದರೆ ಅಧಿಕಾರಿಗಳು ಆಗಾಗ ‘ಎಸ್ಕೆಪ್’ ಆಗಬೇಕಾಗಬಹುದು ಎಂದು ಮಹಮ್ಮದ್ ಆಲಿ ಎಚ್ಚರಿಸಿದರು.
ಪತ್ರಿಕಾಗೋಷ್ಠಿಯಲ್ಲಿ ಬ್ಲಾಕ್ ಕಾಂಗ್ರೆಸ್ ಮಾಜಿ ಉಪಾಧ್ಯಕ್ಷ ಮೌರೀಸ್ ಮಸ್ಕರೇನಸ್, ನಗರ ಕಾಂಗ್ರೆಸ್ ಉಪಾಧ್ಯಕ್ಷ ಸುರೇಶ್ ಪೂಜಾರಿ, ಮಾಜಿ ಕಾರ್ಯದರ್ಶಿಗಳಾದ ರೋಷನ್ ಡಯಾಸ್, ಕಮರುದ್ದೀನ್ ಕೂರ್ನಡ್ಕ ಉಪಸ್ಥಿತರಿದ್ದರು

ಈ ಸುದ್ದಿಯನ್ನು ಷೇರ್‌ ಮಾಡಿ

• WhatsApp
• Telegram
• Tweet
• Print

Related Topics:ಭೂ ಮಾಪನ ಇಲಾಖೆಮಹಮ್ಮದ್ ಆಲಿಪುತ್ತೂರುಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷDDLR and ADLR officialsMohammad AliPutturSurvey Department

Up Next

Kerala CM-ಕೇರಳ ಸಿಎಂ ಆಗಿ ವಿ.ಡಿ. ಸತೀಶನ್ ಪದಗ್ರಹಣ: ದೈತ್ಯ ನಾಯಕರ ನಡುವೆ ಶಶಿ ತರೂರ್ ಗೈರು ಏಕೆ?

Don't Miss

Modi visits UAE-ಇಂಧನ ಬಿಕ್ಕಟ್ಟಿನ ನಡುವೆ ಪ್ರಧಾನಿ ಮೋದಿ ಯುಎಇ, ಇಟಲಿ ಪ್ರವಾಸ