2006 ರಲ್ಲಿ ವಿಧಾನಸಭೆ ಪ್ರವೇಶಿಸಿದ ಅವರು ಕೊಂಟೈ ವಿಧಾನಸಭಾ ಕ್ಷೇತ್ರದಲ್ಲಿ ಜಯ ಸಾಧಿಸಿದ್ದರು, 2009 ರಲ್ಲಿ ತಮ್ಲುಕ್ ನಿಂದ ಸಿಪಿಐ(ಎಂ) ನ ಪ್ರಬಲ ನಾಯಕ ಲಕ್ಷ್ಮಣ ಸೇರ್ ಅವರ ವಿರುದ್ಧ ಜಯಸಾಧಿಸಿದರು. 2014 ರಲ್ಲೂ ಆ ಸ್ಥಾನವನ್ನು ಉಳಿಸಿಕೊಂಡರು.

2007ರ ನಂದಿಗ್ರಾಮ ಆಂದೋಲನದ ಸಮಯದಲ್ಲಿ ಸುವೇಂದು ಮಮತಾ ಅವರ ಅತ್ಯಂತ ವಿಶ್ವಾಸಾರ್ಹ ವ್ಯಕ್ತಿಯಾಗಿ ಗುರುತಿಸಿಕೊಂಡಿದ್ದರು.

ಮಮತಾ ಜೊತೆ ಬಿರುಕು..!
ಮಮತಾ ತಮ್ಮ ಸೋದರಳಿಯ ಅಭಿಷೇಕ್ ಬ್ಯಾನರ್ಜಿ ಅವರನ್ನು ‘ಅಖಿಲ ಭಾರತ ತೃಣಮೂಲ ಯುವ’ ಘಟಕದ ಅಧ್ಯಕ್ಷರನ್ನಾಗಿ ಘೋಷಿಸಿದ್ದರು. ಇದರಿಂದ ಕೆರಳಿದ ಸುವೇಂದು, ಪಕ್ಷದಲ್ಲಿನ ಆಂತರಿಕ ಬೆಳವಣಿಗೆಗಳಿಂದ ಅಂತರ ಕಾಯ್ದುಕೊಂಡರು. ನಂತರ 2020ರಲ್ಲಿ ಬಿಜೆಪಿಗೆ ಸೇರಿದರು.

2021ರಲ್ಲಿ ಬಿಜೆಪಿಯಿಂದ ನಂದಿಗ್ರಾಮದಲ್ಲಿ ಸ್ಪರ್ಧಿಸಿದ್ದ ಸುವೇಂದು, ಮಮತಾ ಅವರನ್ನು ಸೋಲಿಸಿದ್ದರು. ಈಗ 2026ರಲ್ಲಿ ಭವಾನಿಪುರದಲ್ಲೂ ಮಮತಾ ಅವರನ್ನು 15 ಸಾವಿರ ಮತಗಳ ಅಂತರದಿಂದ ಸೋಲಿಸಿದ್ದಾರೆ.

25 ಕ್ರಿಮಿನಲ್ ಪ್ರಕರಣ
2026 ರ ಚುನಾವಣಾ ಅಫಿಡವಿಟ್ ಪ್ರಕಾರ, ಸುವೇಂದು ವಿರುದ್ಧ 25 ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿದ್ದು, ಹೆಚ್ಚಿನವು 2020 ರ ಪಕ್ಷಾಂತರದ ನಂತರ ದಾಖಲಾಗಿವೆ. ಅವುಗಳಲ್ಲಿ ಮುಖ್ಯವಾದ ಶಾರದಾ ಚಿಟ್ ಫಂಡ್ ಹಗರಣಕ್ಕೆ ಸಂಬಂಧಿಸಿದ ಆರೋಪಗಳನ್ನು ಅವರು ನಿರಾಕರಿಸಿದ್ದು, ಅವು ರಾಜಕೀಯ ಪ್ರೇರಿತ ಎಂದಿದ್ದಾರೆ.

ಸುಮೆಂದು ರಾಜಕೀಯ ಹಾದಿ:
ಮಮತಾ ಬ್ಯಾನರ್ಜಿ ಅವರು ಕಾಂಗ್ರೆಸ್ ತೊರೆದು ಟಿಎಮ್‌ಸಿ (TMC) ಸ್ಥಾಪಿಸಿದಾಗ, ಸುವೇಂದು ಮತ್ತು ಅವರ ತಂದೆ ಇಬ್ಬರೂ ಮಮತಾ ಅವರ ಜೊತೆ ನಿಂತರು.

​2006: ಕಂಠಿ ದಕ್ಷಿಣ ಕ್ಷೇತ್ರದಿಂದ ಮೊದಲ ಬಾರಿಗೆ ಶಾಸಕರಾಗಿ (MLA) ಆಯ್ಕೆಯಾದರು.

​ನಂದಿಗ್ರಾಮ ಚಳವಳಿ (2007): ಇವರ ರಾಜಕೀಯ ಜೀವನಕ್ಕೆ ದೊಡ್ಡ ತಿರುವು ಕೊಟ್ಟಿದ್ದು ನಂದಿಗ್ರಾಮದ ಭೂಸ್ವಾಧೀನ ವಿರೋಧಿ ಚಳವಳಿ. ರೈತರ ಪರವಾಗಿ ಹೋರಾಟ ಸಂಘಟಿಸಿದ ಸುವೇಂದು, ಅಲ್ಲಿ ಮಮತಾ ಬ್ಯಾನರ್ಜಿ ಅವರ ಬಲಗೈ ಬಂಟನಾಗಿ ಗುರುತಿಸಿಕೊಂಡರು. ಇದು ಪಶ್ಚಿಮ ಬಂಗಾಳದಲ್ಲಿ 34 ವರ್ಷಗಳ ಎಡಪಕ್ಷಗಳ ಆಡಳಿತ ಪತನಕ್ಕೆ ಅಡಿಪಾಯ ಹಾಕಿತು.

​ಸಂಸತ್ತಿನ ಪ್ರವೇಶ ಮತ್ತು ಮಂತ್ರಿ ಸ್ಥಾನ :
​2009 & 2014: ತಮ್ಲುಕ್ (Tamluk) ಲೋಕಸಭಾ ಕ್ಷೇತ್ರದಿಂದ ಸತತ ಎರಡು ಬಾರಿ ಸಂಸದರಾಗಿ (MP) ಆಯ್ಕೆಯಾದರು.

​2016: ಮರಳಿ ರಾಜ್ಯ ರಾಜಕೀಯಕ್ಕೆ ಬಂದು ನಂದಿಗ್ರಾಮದಿಂದ ಗೆದ್ದರು ಮತ್ತು ಮಮತಾ ಬ್ಯಾನರ್ಜಿ ಅವರ ಸಂಪುಟದಲ್ಲಿ ಸಾರಿಗೆ ಸಚಿವರಾಗಿ ಕೆಲಸ ಮಾಡಿದ್ದರು.