ಕಳೆದ ಲೋಕಸಭಾ ಚುನಾವಣೆಯಲ್ಲಿ “ಅತ್ತೂ ಕರೆದು ಔತಣ ಕೊಡಿಸಿಕೊಂಡರು” ಎಂಬಂತೆ ಪುತ್ತಿಲ ಅಂಡ್‌ ಟೀಮ್‌ ಬಿಜೆಪಿ ಸೇರ್ಪಡೆಗೊಂಡಿತ್ತು. ಆ ಸಂದರ್ಭ ಬಿಜೆಪಿಯೇನೂ ಅವರಿಗೆ “ರತ್ನಗಂಬಳಿಯ ಸ್ವಾಗತ” ನೀಡಿರಲಿಲ್ಲ. Infact ಪುತ್ತಿಲ ಪರಿವಾರದ ಮುಖಂಡರೇ ನಿರಂತರವಾಗಿ ರಾಜ್ಯಾಧ್ಯಕ್ಷರ ಮನೆಯ ಕದ ತಟ್ಟಿ ತಮ್ಮನ್ನೂ ಪಕ್ಷಕ್ಕೆ ಸೇರಿಸಿಕೊಳ್ಳಿ ಎಂದು ಗೋಗರೆದ ಪರಿಣಾಮ ಮನಸ್ಸಿಲ್ಲದ ಮನಸ್ಸಿನಿಂದ ಅವರನ್ನು  ಅಂದು ಪಕ್ಷಕ್ಕೆ ಸೇರಿಸಿಕೊಳ್ಳಲಾಗಿತ್ತು.  ಇದಕ್ಕೆ ಪುರಾವೆ ಪತ್ರಿಕಾಗೋಷ್ಠಿಯಲ್ಲಿ ಘೋಷಣೆ, ಅಥಾವ ಪಕ್ಷದ ಬಾವುಟ ನೀಡುವಂತಹ ಯಾವುದೇ “ರಾಜ ಮರ್ಯಾದೆ”ಯನ್ನು ರಾಜ್ಯಾಧ್ಯಕ್ಷ ವಿಜಯೇಂದ್ರ ಪುತ್ತಿಲ ಪರಿವಾರಕ್ಕೆ ಕೊಟ್ಟಿರಲಿಲ್ಲ ಎನ್ನುವುದು. ಇನ್ನೂ ಪುತ್ತೂರಿನಲ್ಲಿ ಪಕ್ಷ ಸೇರ್ಪಡೆಗೆ ಕಛೇರಿಗೆ ಬರುವ ದಿನ ಹೈಡ್ರಾಮವೇ ನಡೆದು ಕೊನೆಗೆ ಆ ಕಾರ್ಯಕ್ರಮ ಮಂಗಳೂರಿಗೆ ಶಿಫ್ಟ್‌ ಆಗಿತ್ತು.

ಇದಾಗಿ ವರ್ಷ ಕಳೆಯುತ್ತಿದ್ದಂತೆಯೇ ಯಾವುದೇ ಸ್ಪಷ್ಟ ಕಾರಣವನ್ನು ಸಾರ್ವಜನಿಕವಾಗಿ  ತಿಳಿಸದೇ ಪುತ್ತಿಲ ಪರಿವಾರ ತನ್ನದು ಬೇರೆಯೇ ಬೆಕ್ಕಿನ ಬಿಡಾರ ಎಂದು  ಪಕ್ಷದಿಂದ ದೂರ ಹೋಗಿತ್ತು. ಕಳೆದ ಡಿಸೆಂಬರ್‌ನಲ್ಲಿ ನಡೆದ ‘ಅಟಲ್ ವಿರಾಸತ್’ ಕಾರ್ಯಕ್ರಮಕ್ಕೆ ಈ ನಾಯಕರು ಗೈರಾದಾಗಲೇ ಬಿರುಕು ಸ್ಪಷ್ಟವಾಗಿತ್ತು.

‘ ಮುನಿಸುಗೊಂಡ  ಪತ್ನಿ ತವರು ಮನೆಗೆ ಹೋದಂತೆ…’
ಪುತ್ತಿಲ ಮತ್ತು ಬಿಜೆಪಿ ನಡುವಿನ ಸಂಬಂಧ ಹೇಗಿದೆಯೆಂದರೆ, ಮುನಿಸಿಕೊಂಡ ಪತ್ನಿ ತವರು ಮನೆಗೆ ಹೋದರೂ ವಿಚ್ಛೇದನ ನೀಡದ ಸ್ಥಿತಿಯಂತಿದೆ. ಅತ್ತ ಅಧಿಕೃತವಾಗಿ ರಾಜೀನಾಮೆ ನೀಡದೆ, ಇತ್ತ ಪಕ್ಷದ ಚಟುವಟಿಕೆಗಳಲ್ಲಿ ಭಾಗವಹಿಸದೆ ಪುತ್ತಿಲ ಪರಿವಾರವು ಬಿಜೆಪಿಯನ್ನು ಇಕ್ಕಟ್ಟಿಗೆ ಸಿಲುಕಿಸಲು ಯತ್ನಿಸಿತ್ತು. ಆದರೇ ಇದೀಗ “ಕಾಯುವಷ್ಟು ಕಾದಾಯ್ತು, ಇನ್ನು ಸಾಕು” ಎಂಬ ಮನಸ್ಥಿತಿಗೆ ಬಿಜೆಪಿ ಹೈಕಮಾಂಡ್ ಬಂದಂತಿದೆ.

ಚುನಾವಣೆಗೆ ಫುಲ್ ಫೇಸ್‌ನಲ್ಲಿ ತಯಾರಿ ಆಗಬೇಕಿದ್ರೆ ಈ ಸಮಸ್ಯೆಯನ್ನೊಂದು ಕಡ್ಡಿ ತುಂಡು ಮಾಡಿದಂತೆ ಮುಗಿಸಿಕೊಳ್ಳಬೇಕು ಎಂದು ಬಿಜೆಪಿ ನಿರ್ಧರಿಸಿದಂತಿದೆ. ಈ ಮೂಲಕ ಪುತ್ತೂರಿನಲ್ಲಿ ಗತ ವೈಭವಕ್ಕೆ ಹಿಂತುರುಗಲು ಬೇಕಾದ ಸಿದ್ಧತೆಗೆ ಬಿಜೆಪಿ ಮುಂದಾಗಿದೆ ಎಂದು ಪಕ್ಷದ ಮೂಲಗಳಿಂದ ತಿಳಿದು ಬಂದಿದೆ. ಇದರ ಭಾಗವಾಗಿ ಪುತ್ತೂರು ಬಿಜೆಪಿಯು ತನ್ನ ಅಧಿಕೃತ ವಾಟ್ಸ್ಯಾಪ್ ಗ್ರೂಪಿನಿಂದ ಪುತ್ತಿಲ ಪರಿವಾರದ ನಾಯಕರನ್ನು ತೆಗೆದು ಹಾಕಿದೆ

ಅಟಲ್ ವಿರಾಸತ್ ಬಳಿಕ ಉಲ್ಭಣಿಸಿದ ʼವಿರಸ ʼ

ಪ್ರಶಾಂತ್ ನೆಕ್ಕಿಲಾಡಿ, ಉಮೇಶ್ ಕೋಡಿಬೈಲ್, ಅನಿಲ್ ತೆಂಕಿಲ  ರವರು 6 ತಿಂಗಳ ಹಿಂದಿನವರೆಗೆ ಕ್ರಮವಾಗಿ ಪುತ್ತೂರು ಗ್ರಾಮಾಂತರ ಹಾಗೂ ನಗರ ಮಂಡಲದ ಪ್ರಧಾನ ಕಾರ್ಯದರ್ಶಿಗಳಾಗಿ ಕಾರ್ಯನಿರ್ವಹಿಸುತ್ತಿದ್ದರು. ಕಳೆದ ಡಿಸೆಂಬರ್‌ನಲ್ಲಿ ಪುತ್ತೂರಿನಲ್ಲಿ ನಡೆದ ‘ಅಟಲ್ ವಿರಾಸತ್’ ಕಾರ್ಯಕ್ರಮಕ್ಕೆ ಈ ಮೂವರು ಪ್ರಧಾನ ಕಾರ್ಯದರ್ಶಿಗಳು ಗೈರಾಗಿದ್ದರು. ಅಲ್ಲದೇ ತಾವು ಈ ಕಾರ್ಯಕ್ರಮದಿಂದ ದೂರ ಉಳಿಯುವುದಾಗಿ ಮಾಧ್ಯಮ ಪ್ರಕಟಣೆಯನ್ನು ನೀಡಿದ್ದರು. ಹೀಗಾಗಿ ಆ ಕಾರ್ಯಕ್ರಮ ಮುಗಿಯುತ್ತಿದ್ದಂತೆಯೇ ಆ ಮೂರು ಪ್ರಧಾನ ಕಾರ್ಯದರ್ಶಿ ಸ್ಥಾನಕ್ಕೆ ನಾಗೇಶ್ ಟಿ ಎಸ್, ಸುನೀಲ್ ದಡ್ಡು ಹಾಗೂ ವಿರೂಪಾಕ್ಷ ಮಚ್ಚಿಮಲೆಯವರನ್ನು ಬಿಜೆಪಿ ನೂತನವಾಗಿ  ನೇಮಿಸಿತ್ತು. ಆದರೇ ಈ ಹಿಂದೆ ನೇಮಕಗೊಂಡಿದ್ದ ಪ್ರಧಾನ ಕಾರ್ಯದರ್ಶಿಗಳನ್ನು ತೆಗೆದು ಹಾಕಿರುವುದಾಗಿಯೂ ಅಥಾವ ಬದಲಿಸಿರುವುದಾಗಿಯೂ ಎಲ್ಲಿಯೂ ಹೇಳಿಕೊಳ್ಳದೆ ಜಾಣತನ ಪ್ರದರ್ಶಿಸಿತ್ತು.

ಸೈಲೆಂಟ್‌ ಮೋಡ್‌ ನಿಂದ Action ಮೋಡ್‌ ಗೆ

ಆ ಬಳಿಕ ಸೈಲೆಂಟ್‌ ಮೋಡ್‌ ಗೆ ತೆರಳಿದ ಬಿಜೆಪಿ  ಒಂದಷ್ಟು ಕಾದು ನೋಡುವ ತಂತ್ರಕ್ಕೆ ಇಳಿಯಿತು.  ಈ ಅವಧಿಯಲ್ಲಿ  ಪುತ್ತಿಲ ಪರಿವಾರದೊಂದಿಗೆ ಗುರುತಿಸಿಕೊಂಡಿದ್ದವರನ್ನು ಕಾರ್ಯಕ್ರಮದಿಂದ ದೂರ ಇಡುವ ಅಥವಾ ಪಕ್ಷದ ಅಧಿಕೃತ ಮಾಹಿತಿ ನೀಡುವ Whatsapp ಗ್ರೂಪಿನಿಂದ ತೆಗೆಯುವ ಕಾರ್ಯ ಮಾಡದೇ ಜಾಗರೂಕ ಹೆಜ್ಜೆ ಇಟ್ಟಿತ್ತು. ಹಾಗಿದ್ದೂ ಕಳೆದ 6 ತಿಂಗಳಿನಿಂದ ಪುತ್ತಿಲ ಪರಿವಾರದ ಯಾವೊಬ್ಬ ನಾಯಕರೂ ಬಿಜೆಪಿಯ ಯಾವುದೇ ಕಾರ್ಯಕ್ರಮದಲ್ಲಿ ಭಾಗವಹಿಸಿರಲಿಲ್ಲ. ಈಗ ಬಿಜೆಪಿ ತನ್ನ ಚುನಾವಣಾ ಯಂತ್ರಕ್ಕೆ ಆಯಿಲಿಂಗ್ ಮಾಡಲು ಹೊರಟಿದ್ದು, ತನಗೆ ‘ಮಗ್ಗುಲ ಮುಳ್ಳಾಗಿ ಕಾಡುತ್ತಿರುವ ಪುತ್ತಿಲ ಪರಿವಾರವನ್ನು’ ತೆಗೆದುಹಾಕದೆ ಚುನಾವಣಾ ತಂತ್ರಗಾರಿಕೆ ಸಾಧ್ಯವಿಲ್ಲ ಎಂಬ ತೀರ್ಮಾನಕ್ಕೆ ಬಂದಂತಿದೆ. ಅದರ ಮೊದಲ ಹಂತವಾಗಿ ಬಿಜೆಪಿ ತಾಲೂಕು ಪದಾಧಿಕಾರಿಗಳ ಹಾಗೂ ಮುಂಚೂಣಿ ನಾಯಕರ ಅಧಿಕೃತ whatsapp ಗ್ರೂಪಿನಿಂದ ಪುತ್ತಿಲ ಪರಿವಾರದ ಮುಂಚೂಣಿ ಮುಖಂಡರನ್ನು ರಿಮೂವ್ ಮಾಡಿದೆ.

ಸೋಶಿಯಲ್ ಮೀಡಿಯಾ ಸಮರ

ಈ ಬೆಳವಣಿಗೆಯನ್ನು ಪುತ್ತಿಲ ಪರಿವಾರವು ತನಗೆ ಪೂರಕವಾಗಿ ಬಳಸಿಕೊಳ್ಳಲು ಮುಂದಾಗಿದೆ. ಅರುಣ್ ಪುತ್ತಿಲರನ್ನು ‘ದುರಂತ ನಾಯಕ’ನಂತೆ ಬಿಂಬಿಸುವ ಪ್ರಯತ್ನಗಳು ಸೋಷಿಯಲ್ ಮೀಡಿಯಾದಲ್ಲಿ ಶುರುವಾಗಿದ್ದು, “ಗ್ರೂಪ್‌ನಿಂದ ಹೊರಹಾಕಬಹುದು, ಆದರೆ ಕಾರ್ಯಕರ್ತರ ಮನಸ್ಸಿನಿಂದಲ್ಲ” ಎಂಬ ಭಾವುಕ ಪೋಸ್ಟ್‌ಗಳು ಹರಿ ಬಿಟ್ಟಿದೆ.

ಟಿಕೆಟ್‌ ಬಿಜೆಪಿಯದು – ಪ್ರೀತಿ ಕಾಂಗ್ರೆಸ್‌ ನೆಡೆಗೆ

ಈ ಪೋಸ್ಟ್‌ಗೆ ಬಿಜೆಪಿಯ ಯುವ ನಾಯಕರೊಬ್ಬರು ಪ್ರತಿಕ್ರಿಯಿಸಿದ್ದು, “ಪುತ್ತಿಲ ಪರಿವಾರದ ಕೆಲವು ಮಂದಿ ಸಾಮಾಜಿಕ ಜಾಲತಾಣದಲ್ಲಿ ನಿರಂತರವಾಗಿ ಬಿಜೆಪಿ ಹಾಗೂ ಬಿಜೆಪಿ ನಾಯಕರ ಬಗ್ಗೆ ಇಲ್ಲ ಸಲ್ಲದನ್ನು ಬರೆಯುತ್ತಾರೆ. ಇದೇ ವೇಳೆ ಕಾಂಗ್ರೆಸ್ ಹಾಗೂ ಕಾಂಗ್ರೆಸ್ ಶಾಸಕರ ಬಗ್ಗೆ ಯಾವುದೇ ಟೀಕೆ ಟಿಪ್ಪಣಿಗಳನ್ನು ಮಾಡುವುದಿಲ್ಲ. ಕಾಂಗ್ರೆಸ್‌ನ ಕಡೆಗಿನ ಅವರ ವರ್ತನೆ ಶಂಕಾಸ್ಪದವಾಗಿದೆ. ಅವರು ಕೇಳುವುದು ಬಿಜೆಪಿ ಟಿಕೆಟ್, ಪ್ರೀತಿ ಕಾಂಗ್ರೆಸ್‌ ಕಡೆಗೆ ತೋರಿಸುವುದು ಇದು ಹೇಗೆ ಸರಿ? ಹೀಗಾಗಿ ಪಕ್ಷದ ಅಧಿಕೃತ ಮಾಹಿತಿಗಳನ್ನು ಹಂಚುವ ಗ್ರೂಪಿನಿಂದ ಅವರನ್ನು ತೆಗೆದಿರುವುದು ಒಳ್ಳೆಯ ಬೆಳವಣಿಗೆ” ಎಂದಿದ್ದಾರೆ.

ಇನ್ನೂ ಹಿರಿಯ ಬಿಜೆಪಿ ನಾಯಕರೊಬ್ಬರು ಈ ಬಗ್ಗೆ ಪ್ರತಿಕ್ರಿಯಿಸಿ, “Whatsapp ಗ್ರೂಪಿನಿಂದ ತೆಗೆದರು ಎಂದ ಮಾತ್ರಕ್ಕೆ ಪಕ್ಷದಿಂದ ತೆಗೆದರು ಎನ್ನುವುದು ತಪ್ಪು. whatsapp group ಸದಸ್ಯತ್ವ ಹಾಗೂ ಪಕ್ಷದ ಪ್ರಾಥಮಿಕ ಸದಸ್ಯತ್ವ ಬೇರೆ ಬೇರೆಯೇ” ಎಂದು ಸ್ಪಷ್ಟಪಡಿಸಿದ್ದಾರೆ