ಬಳ್ಳಾರಿ ಸಂಸದ ಹಾಗೂ ಬಿಜೆಪಿ ಮುಖಂಡ ದೇವೇಂದ್ರಪ್ಪನ ಪುತ್ರನ ವಿರುದ್ದ ಯುವತಿ ಜತೆ ಲವ್‌ ಸೆಕ್ಸ್‌ ದೋಖಾ ಆರೋಪ ಕೇಳಿ ಬಂದಿದೆ. ಬೆಂಗಳೂರಿನ ಯುವತಿಯೊಬ್ಬಳಿಗೆ ಮದುವೆಯಾಗುವುದಾಗಿ ನಂಬಿಸಿ ದೈಹಿಕ ಸಂಪರ್ಕ ಬೆಳೆಸಿ ವಂಚಿಸಿ ಜೀವ ಬೆದರಿಕೆ ಹಾಕಿದ ಗಂಭೀರ ಪ್ರಕರಣ ದಾಖಲಾಗಿದೆ. ಬಿಜೆಪಿ ಸಂಸದ ದೇವೇಂದ್ರಪ್ಪನ ಮಗ ಮೈಸೂರು ಮಹಾರಾಜ ಕಾಲೇಜಿನ ಉಪನ್ಯಾಸಕ ವೈ.ಡಿ.ರಂಗನಾಥ್ (42) ಪ್ರಕರಣದ ಆರೋಪಿ.

ತನ್ನ ವಿರುದ್ದ ಪ್ರಕರಣ ದಾಖಲಾಗುತ್ತಲೇ, ವೈ.ಡಿ.ರಂಗನಾಥ್ ಕೂಡ ಸಂತ್ರಸ್ತೆಯ ವಿರುದ್ದ ಬ್ಲ್ಯಾಕ್‌ ಮೇಲ್‌ ಆರೋಪ ಹೊರಿಸಿ ದೂರು ದಾಖಲಿಸಿದ್ದಾರೆ. ಎರಡು ದೂರನ್ನು ಸ್ವೀಕರಿಸುವ ಪೊಲೀಸರು ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್‌ ಜಾರಿ ಮಾಡಿದ್ದಾರೆ. ಏತನ್ಮದ್ಯೆ ಸಂತ್ರಸ್ತೆ ಆರೋಪಿಯ ತಂದೆ ಸಂಸದ ದೇವೇಂದ್ರಪ್ಪನ ಜತೆ ಮಾತನಾಡಿದ್ದಾರೆ ಎನ್ನಲಾದ ಆಡಿಯೋವೊಂದು ವೈರಲ್‌ ಆಗಿದೆ. ಅಲ್ಲದೇ, ಪ್ರಕರಣ ಈಗ ರಾಜಕೀಯ ತಿರುವು ಕೂಡ ಪಡೆದಿದ್ದು, ತನ್ನ ಮಗ ಅಮಾಯಕ, ನನ್ನ ರಾಜಕೀಯ ತೇಜೊವಧೆಗಾಗಿ ಎದುರಾಳಿಗಳು ಮಾಡಿದ ಷಡ್ಯಂತ್ರ ಈ ಘಟನೆ ಎಂದು ದೇವೇಂದ್ರಪ್ಪ ಪ್ರತಿಕ್ರಿಯಿಸಿದ್ದಾರೆ

ಬಸವನಗುಡಿ ಮಹಿಳಾ ಪೊಲೀಸ್ ಠಾಣೆಯಲ್ಲಿ 24ರ ಹರೆಯದ ಸಂತ್ರಸ್ತ ಯುವತಿ ದೂರು ನೀಡಿದ್ದಾಳೆ. ಐಪಿಸಿ ಸೆಕ್ಷನ್ 417 (ಮೋಸ), ಐಪಿಸಿ ಸೆಕ್ಷನ್ 1211 (ವಂಚನೆ) ಹಾಗೂ ಐಪಿಸಿ * 3 (ಜೀವ ಬೆದರಿಕೆ) ಅಡಿ ಎಫ್‌ಐಆರ್ ದಾಖಲಿಸಲಾಗಿದೆ. .

2022ರಲ್ಲಿ ಸ್ನೇಹಿತರ ಮೂಲಕ ರಂಗನಾಥ್ ಪರಿಚಯವಾಗಿದ್ದರು. ಬಳಿಕ ಆಗಾಗ ಫೋನ್ ಮಾಡಿ ಮಾತನಾಡುತ್ತಿದ್ದರು. ನಾನು ನಿನ್ನನ್ನು ಪ್ರೀತಿಸುತ್ತಿದ್ದೇನೆ. ನಾನು ಮೈಸೂರಿನಲ್ಲಿ ಪಿಯು ಕಾಲೇಜಿನಲ್ಲಿ ಉಪನ್ಯಾಸಕನಾಗಿ ಕೆಲಸ ಮಾಡುತ್ತಿದ್ದು, ಕೈತುಂಬಾ ಸಂಬಳ ಬರುತ್ತಿದೆ. ನೀನು ನನ್ನನ್ನು ಮದುವೆಯಾದರೆ ಚೆನ್ನಾಗಿ ನೋಡಿಕೊಳ್ಳುವ ಎಂದು ನಂಬಿಸಿದ್ದರು.

ಬಳಿಕ ನನ್ನನ್ನು ಹೋಟೆಲ್‌ಗೆ ಕರೆದೊಯ್ದು ದೈಹಿಕ ಸಂಪರ್ಕ ಬೆಳೆಸಿದ್ದರು. ಈಗ ಮದುವೆ ಮಾಡಿಕೊಳ್ಳದೆ ಮೋಸ ಮಾಡಿದ್ದಾರೆ. ನನ್ನನ್ನು ಮದುವೆ ಆಗು ಎಂದು ಕೇಳಿದರೆ, ಕೊಲೆ ಬೆದರಿಕೆ ಹಾಕಿದ್ದಾರೆ ಎಂದು ಯುವತಿ ದೂರು ನೀಡಿದ್ದಾರೆ.

ಮೇಲಿನ ಪ್ರಕರಣಕ್ಕೆ ಪ್ರತಿಯಾಗಿ ಸಂಸದ ದೇವೇಂದ್ರಪ್ಪ ಅವರ ಪುತ್ರ ಪ್ರೊ.ರಂಗನಾಥ್‌ ಮೈಸೂರಿನ ವಿಜಯನಗರ ಠಾಣೆಯಲ್ಲಿ ಯುವತಿ ಸೇರಿ ಇಬ್ಬರ ವಿರುದ್ಧ ಜಾತಿ ನಿಂದನೆ, ಹಣಕ್ಕಾಗಿ ಬೇಡಿಕೆ, ಪ್ರಾಣ ಬೆದರಿಕೆ ದೂರು ದಾಖಲಿಸಿದ್ದಾರೆ, ತಾನು ನಾಯಕ ಸಮುದಾಯಕ್ಕೆ ಸೇರಿದ್ದು, ಸ್ನೇಹಿತ ಕಲ್ಲೇಶ್ ರಿಂದ ಯುವತಿ ಮತ್ತು ಶ್ರೀನಿವಾಸ ಪರಿಚಯವಾಗಿದ್ದರು. ಆಕೆ ನನ್ನನ್ನು ಪ್ರೀತಿಸುತ್ತಿರುವುದಾಗಿ ತಿಳಿಸಿದ್ದು, ಇದನ್ನು ನಾನು ವಿರೋಧಿಸಿದ್ದೆ, ನಂತರ ಯುವತಿ ಹಣಕ್ಕಾಗಿ ಬ್ಲ್ಯಾಕ್ ಮೇಲ್ ಮಾಡಿದಾಗ 32,500 ರು. ನೀಡಿದ್ದೆ. ಮತ್ತೆ ಹಣ ಕೊಡಲ್ಲ ಎಂದಾಗ ಶ್ರೀನಿವಾಸನನ್ನು ಕಳುಹಿಸಿದ್ದು, ಆತ 15 ಲಕ್ಷಕ್ಕೆ ಬೇಡಿಕೆ ಇಟ್ಟಿದ್ದ, ನಿರಾಕರಿಸಿದಾಗ ಕೊಲೆ ಬೆದರಿಕೆ ಹಾಕಿದ್ದ ಎಂದು ದೂರಿನಲ್ಲಿ ತಿಳಿಸಿದ್ದಾರೆ. ಮಹಿಳೆ ಹಾಗೂ ಶ್ರೀನಿವಾಸ್ ಎಂಬವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಇವರಿಬ್ಬರು ಬೆಂಗಳೂರು ಮೂಲದವರು ಎಂದು ತಿಳಿದುಬಂದಿದೆ

ನನ್ನ ಘನತೆಗೆ ಧಕ್ಕೆ ತರುವ ಯತ್ನ: ದೇವೇಂದ್ರಪ್ಪ

ಪುತ್ರನ ವಿರುದ್ಧ ಕೇಳಿಬಂದಿರುವ ಆರೋಪದ ಸತ್ಯಾಸತ್ಯತೆ ಪರಿಶೀಲಿಸಿ ಕ್ರಮ ಕೈಗೊಳ್ಳಬೇಕು. ಕಾನೂನು ಮುಂದೆ ಎಲ್ಲರೂ ಒಂದು. ಯುವತಿ ನನ್ನ ಪುತ್ರನನ್ನು ಬ್ಲ್ಯಾಕ್ ಮೇಲ್ ಮಾಡುತ್ತಿದಾಳೆ, ಚುನಾವಣೆ ಕಾರಣ ಕೆಲವರು ನನ್ನ ಘನತೆಗೆ ಕುಂದುತರಲು ಈ ರೀತಿಯ ಆರೋಪ ಮಾಡುತ್ತಿದ್ದಾರೆಂದು ಬಳ್ಳಾರಿ ಸಂಸದ ವೈ.ದೇವೇಂದ್ರಪ್ಪ ಆರೋಪಿಸಿದರು. ದಿಲ್ಲಿಗೆ ತೆರಳಿದ್ದ ನಾನು ರೈಲಲ್ಲಿದ್ದಾಗ ಯುವತಿ ನನಗೆ ಕರೆ ಮಾಡಿದ್ದರು. ಅನ್ಯಾಯ ಆಗಿದ್ದರೆ ದೂರು ನೀಡಿ ಎಂದಿದ್ದೇನೆ, ಆರೋಪ ಕುರಿತು ಮಗನನ್ನು ಕೂಡ ಕೇಳಿದೆ, ಆತ ಆ ಯುವತಿ ಬ್ಲ್ಯಾಕ್ ಮೇಲ್ ಮಾಡುತ್ತಿದ್ದಾಳೆ ಅಂತ ಹೇಳಿದ್ದಾನೆ ಎಂದರು.

ಕರೆ ಮಾಡಿ ವಿವರಣೆ ಕೇಳಿದ ಪಕ್ಷಾಧ್ಯಕ್ಷ ನಡ್ಡಾ

ದಾವಣಗೆರೆ: ಯುವತಿ ಆರೋಪದ ಬಗ್ಗೆ ಸಂಸದ ದೇವೇಂದ್ರಪ್ಪಗೆ ಕರೆ ಮಾಡಿರುವ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ ಅವರು ಪ್ರಕರಣದ ಕುರಿತು ವಿವರಣೆ ನೀಡುವಂತೆ ಹೇಳಿದ್ದಾರೆ. ಇದೊಂದು ರಾಜಕೀಯ ಷಡ್ಯಂತ್ರ ಇದರ ಹಿಂದೆ ಭರಮಸಾಗರ ತಾಲೂಕಿನ ವ್ಯಕ್ತಿ ಹಾಗೂ ಬೆಂಗಳೂರಿನ ಗ್ಯಾಂಗ್ ಇದೆಯೆಂಬ ಅಂಶವನ್ನು ಸಂಕ್ಷಿಪ್ತವಾಗಿ ಹೇಳಿರುವ ದೇವೇಂದ್ರಪ್ಪ, ಡಿ.4ರಂದು ದೆಹಲಿಗೆ ತೆರಳಿದಾಗ ವಿಶ್ವತವಾಗಿ ವಿವರಣೆ ನೀಡುವುದಾಗಿ ತಿಳಿಸಿದ್ದಾರೆ ಎನ್ನಲಾಗಿದೆ.

ಏನಿದು ಪ್ರಕರಣ ?

42 ವರ್ಷದ ರಂಗನಾಥ್‌ಗೆ 24 ವರ್ಷದ ಮಹಿಳೆ ಜೊತೆ ಪ್ರೇಮ ಉಂಟಾಗಿದೆ. ಪಾರ್ಟಿ ಒಂದರಲ್ಲಿ ಮಹಿಳೆಯ ಪರಿಚಯ ಮಾಡಿಕೊಂಡ ರಂಗನಾಥ್ ಮೈಸೂರಿನ ಖಾಸಗಿ ಹೋಟೆಲ್‌ನಲ್ಲಿ ಲೈಂಗಿಕ ಸಂಪರ್ಕ ಬೆಳೆಸಿದ್ದಾರೆ. ಬಳಿಕ ಮಹಿಳೆ ಮದುವೆಯಾಗುವಂತೆ ರಂಗನಾಥ್ ಅವರನ್ನು ಕೇಳಿದ್ದಾರೆ. ಈ ವೇಳೆ ರಂಗನಾಥ್ ಮಹಿಳೆಯನ್ನು ಕಡೆಗಣಿಸಲು ಪ್ರಾರಂಭಿಸಿದ್ದು, ಮದುವೆ ಆಗಲ್ಲ ಏನು ಮಾಡಿಕೊಳ್ಳುತ್ತೀಯೋ ಮಾಡಿಕೋ ಎಂದಿದ್ದಾರೆ. ನಂತರ ಮಹಿಳೆ ಈ ವಿಚಾರವನ್ನು ಎಂಪಿ ದೇವೇಂದ್ರಪ್ಪ ಅವರ ಗಮನಕ್ಕೆ ತಂದಿದ್ದಾರೆ. ಆದರೆ ದೇವೇಂದ್ರಪ್ಪ ಮಹಿಳೆಯ ವಿರುದ್ಧ ಗರಂ ಆಗಿದ್ದಾರೆ.