ಹೊಸದಿಲ್ಲಿ: ಹೊಸ ವರ್ಷದ ಕೊನೆಯ ತಿಂಗಳು ಕೂಡ ತೈಲ ಕಂಪೆನಿಗಳು ಮತ್ತೊಂದು ಬೆಲೆ ಏರಿಕೆಯ ಬರೆ ಎಳೆದಿವೆ. ವಾಣಿಜ್ಯ ಬಳಕೆಯ ಎಲ್‌ಪಿಜಿ ಸಿಲಿಂಡರ್ ದರ 103.50 ರೂಪಾಯಿ ಹೆಚ್ಚಳವಾಗಿದೆ. ಈ ಪರಿಷ್ಕೃತ ದರವು ಬುಧವಾರದಿಂದಲೇ ಅನ್ವಯವಾಗುತ್ತಿದೆ.
ದಿಲ್ಲಿಯಲ್ಲಿ 19 ಕೆಜಿ ತೂಕದ ವಾಣಿಜ್ಯ ಸಿಲಿಂಡರ್ ದರ ದಿಲ್ಲಿಯಲ್ಲಿ 2,104 ರೂಪಾಯಿಗೆ ತಲುಪಿದೆ. ಈವರೆಗೂ ಇದು 2,000.50 ರೂ ಇತ್ತು. ಕೋಲ್ಕತಾದಲ್ಲಿ ವಾಣಿಜ್ಯ ಬಳಕೆಯ ಅನಿಲದ ಬೆಲೆ 101 ರೂಪಾಯಿ ತುಟ್ಟಿಯಾಗಿದೆ. 2073.5 ರೂ ಇದ್ದ ದರ, ಬುಧವಾರದಿಂದ 2,174.5 ರೂಪಾಯಿಗೆ ಹೆಚ್ಚಳ ಕಂಡಿದೆ. ಹಾಗೆಯೇ ಮುಂಬಯಿಯಲ್ಲಿ 1950 ರೂ ದರವಿದ್ದ ಎಲ್‌ಪಿಜಿ, 2,051 ರೂಪಾಯಿಗೆ ತಲುಪಿದೆ. ವಾಣಿಜ್ಯ ನಗರಿಯಲ್ಲಿ ಕೂಡ ಎಲ್‌ಪಿಜಿ ದರ 101 ರೂ ಏರಿಕೆಯಾಗಿದೆ. ಚೆನ್ನೈನಲ್ಲಿ 2,133 ರೂ ದರವಿದ್ದ 19 ಕೆಜಿ ಎಲ್‌ಪಿಜಿ ಸಿಲಿಂಡರ್, ಬುಧವಾರದಿಂದ 2,234.50 ರೂ ಆಗಿದೆ.
ಪೆಟ್ರೋಲಿಯಂ ಕಂಪೆನಿಗಳು ಗೃಹ ಬಳಕೆಯ 14.2 ಕೆಜಿ ತೂಕದ ಅಡುಗೆ ಅನಿಲ ಸಿಲಿಂಡರ್ ದರ ಹೆಚ್ಚಳ ಮಾಡದೆ ಇರುವುದು ಜನಸಾಮಾನ್ಯರಿಗೆ ಕೊಂಚ ಸಮಾಧಾನದ ಸಂಗತಿಯಷ್ಟೇ. ದಿಲ್ಲಿಯಲ್ಲಿ ಗೃಹಬಳಕೆ ಸಿಲಿಂಡರ್ ದರ 899.50 ರೂ ಇದ್ದರೆ, 5 ಕೆಜಿ ಸಿಲಿಂಡರ್ ದರ 502 ರೂ ಇದೆ. ಬೆಂಗಳೂರಿನಲ್ಲಿ ಗೃಹ ಬಳಕೆ ಎಲ್‌ಪಿಜಿ ದರ 902.50 ರೂ ಇದೆ.
ಸಾಮಾನ್ಯವಾಗಿ ತೈಲ ಕಂಪೆನಿಗಳು ಪ್ರತಿ ತಿಂಗಳ ಮೊದಲ ದಿನ ಎಲ್‌ಪಿಜಿ ಸಿಲಿಂಡರ್ ದರ ಪರಿಷ್ಕರಣೆ ಮಾಡುತ್ತವೆ. ಪ್ರತಿ ತಿಂಗಳೂ ದರ ಏರಿಕೆ ಆಗುತ್ತಲೇ ಇದೆ. ತಿಂಗಳ ಮಧ್ಯ ಭಾಗದಲ್ಲಿಯೂ ಎಲ್‌ಪಿಜಿ ಬೆಲೆ ಹೆಚ್ಚಳ ಮಾಡುವ ನಿದರ್ಶನಗಳಿವೆ. ಹೀಗಾಗಿ ಗೃಹ ಬಳಕೆಯ ಅನಿಲದ ದರ ಏರಿಕೆಯ ಭಯ ಮತ್ತೆ ಜನರನ್ನು ಕಾಡುತ್ತಿದೆ.
